Saad Bee Ąą Álnéehii

Diichiłí Agháahgo Ílíinii éí Jesus Christ Bisodizin Bá Hooghan Akéeʼdi Hoolzhishdi Yá Naazínígíí ląʼí alą́ąjįʼ binaʼnitin dóó deiyoodlą́ągo bídadéétʼiʼígíí átʼé. Díí éí Diyin Yá Yáłtiʼí Joseph Smith Bilagáanakʼehjí áyiilaa áádóó naaltsoos bee siʼą́ągo áyiilaa, áádóó ląʼí éí Diyin Bisodizin Bá Hooghan naaltsoos haneʼ bee hahinidéhígíí íídą́ą́ʼ biyiʼ baa náhánih ńtʼę́ę́ʼ.

1851yę́ędą́ą́ʼ Elder Franklin D. Richards díí Diichiłí Agháahgo Ílíinii wolyéhígíí binaaltsoos ahąʼáyiilaa éí biyiʼ diyingo bee hadaʼiisdzííʼ tsʼídá áłtsé naaltsoos bee niitʼą́, éí Hastʼóí Naakitsʼáadah Alą́ąjįʼ Ándahaʼáii yitah nilį́į́ ńtʼę́ę́ʼ dóó British Mission yilą́ąjįʼ naatʼáanii nilį́į ńtʼę́ę́ʼ. Joseph Smith naagháhą́ądą́ą́ʼ díí haneʼ ílį́įgo ádaalyaaígíí tsʼídá nidzin ákondi doo ląʼígo hólǫ́ǫ da ńtʼę́ę́ʼ. Europe dóó Americagi Sodizin Bá Hooghan ląʼí yihidiikááhígíí biniinaa, díí bá hólǫ́ǫ doogo ályaa. Diichiłí Agháahgo Ílíinii tsʼídá ląʼígo chooʼínígíí biniinaa Alą́ąjįʼ Sodizinjí Naatʼáanii danilínígíí Jesus Christ Bisodizinjí bee naʼnitin dooleełgo Salt Lake Citydi Ghąąjįʼ 10, 1880 yihahgo ntsaago áłah náʼádleehdi ałdóʼ yee lą́ daʼasłį́į́ʼ.

Sodizin Bá Hooghan łah áánííłígíí bikʼehgo díkwíidi shį́į́ʼ naaltsoos biyiʼ siláhígíí hashtʼe nályaa. 1878yę́ędą́ą́ʼ naaltsoos áłtsé haaltsʼidę́ę biyiʼ Moses naaltsoos biyiʼ ndaháásdzohę́ę łahdóó yiih deíyíízoh éí doo biyiʼ da ńtʼę́ę́ʼ. 1902yę́ędą́ą́ʼ Diichiłí Agháahgo Ílíinii biyiʼ łahdóó baa nídaʼíísdzooígíí éí Diyingo Naʼnitin dóó Bee Ahadaʼdeestʼáanii biyiʼ ałdóʼ tʼáá áheełtʼéego baa ndaʼíísdzooígíí nahjįʼ kodaalyaa. 1902yę́ędą́ą́ʼ hazhóʼí hashtʼe nályaa, éí daóltaʼii dóó saad dashijaaʼ, dóó saad háádę́ę́ʼ bee ndaʼíísdzoh yaa halneʼígíí ałkééʼ nideiznil. 1921yę́ędą́ą́ʼ éí tsʼídá áłtsé saad dahshijaaʼígíí naakigo naaltsoos bikááʼ nítʼiʼgo, áádóó saad ałkééʼ sinilgo naaltsoos bee niitʼą́. Áádóó Tʼą́ą́chil 1976 yihahgo índa łah ánáánályaa, éí naakigo diyingo ííshją́ą́ áyiilaaígíí biih náánásdzoh. 1979 yihahyę́ędą́ą́ʼ éí díí tʼáá áłah Diichiłí Agháahgo Ílíinii naaltsoos biyiʼdóó nahjįʼ haadzoh áádóó éí Diyingo Naʼnitin dóó Bee Ahadaʼdeestʼáanii naaltsoos biyiʼjįʼ náháásdzoh, áko éí daóltaʼii 137 dóó 138 átʼé. Kʼad naaltsoos bee siʼánígíí biyiʼ éí naaltsoos áłtséédóó ályaayę́ę beełtʼée doogo bikʼeh hashtʼe nályaa.

Kʼad éí tʼáá áłtsʼíísígo saad bee ąą álnéehii díí naaltsoos biyiʼ dabikááʼígíí yaa hodoolnih:

1. Moses biNaaltsoos biyiʼdóó łaʼ haneʼ haaʼnilígíí átʼé. Díí Genesis naaltsoos Joseph Smith Diyin Bizaad néíyíízohę́ę biyiʼdóó haadzoh, éí Yaʼiishjááshchilí 1830 yihahgo haʼíízoh.

2. Abraham biNaaltsoos. Éí Abraham Diyingo naʼíízohígíí dabiyiʼ. 1835yę́ędą́ą́ʼ Joseph Smith Egyptian papyri łaʼ néídiinil éí bikééʼdóó náánáłahdę́ę́ʼ saad yee ándeidléehgo bee hahoolzhiizh. Díí Bilagáanakʼehjí saad ánéíyiidlaayę́ę Times and Seasons biyiʼ Wóózhchʼį́į́d 1, 1842 yihahgo, Nauvoo, Illinoisdi tʼáá ałkééʼ naaltsoos biyiʼ ánálʼįįhgo ályaa.

3. Joseph Smith—Matthew. Díí éí Matthew tʼáá daʼaaníinii yaa náʼíízohę́ę biyiʼdóó haadzoh éí Joseph Smith Diyin Bizaad Bible saad náánáłahdę́ę́ʼ saad yee ánáyiidlaa (Diyingo Naʼnitin dóó Bee Ahadaʼdeestʼáanii 45:60–61gi dínííłʼįįł éí Diyin áníigo Ahaʼdeetʼą́ Ániidíii éí bá ataʼ halneʼgo bee hahodoolzhish).

4. Joseph Smith—Nákééʼ Náháneʼ. Díí éí Joseph Smith tʼáá aaníigo ílį́įgo yaa hoolneʼígíí dóó binákééʼ náháneʼ biyiʼdóó saad haaʼnil, éí bí dóó yił ndaʼíízohę́ę hashtʼe deiyiilaa 1838–1839 yihahgo áádóó éí Times and Seasons Nauvoo, Illinoisdi, Wóózhchʼį́į́d 15, 1842 yihahgo tʼáá ałkééʼ naaltsoos biyiʼ ánálʼįįhgo ályaa.

5. Jesus Christ Bisodizin Bá Hooghan Akéeʼdi Hoolzhishdi Yá Naazínígíí biʼOodląʼ Ałkééʼ Daasdzooígíí. Díí saad Joseph Smith yee haadzíiʼgo baa náʼíísdzoh Times and Seasons biyiʼ Wóózhchʼį́į́d 1, 1842 yihahgo, éí Sodizin Bá Hooghan tʼáá áłtsʼíísígo binákééʼ náháneʼ Wentworth Naaltsoos wolyéhígíí biiʼ bił náháasdzoh.