Oodlą’ Ałkéé’ Daasdzooígíí
Jesus Christ Bisodizin Bá Hooghan Akée’di Hoolzhishdi Yá Naazínígíí bi’Oodlą’ Ałkéé’ Daasdzooígíí

1 Nihí éí Diyin God Hool’áágóó nihiTaa’ Nilíinii dóó biYe’ Jesus Christ dóó Ii’ Sizį́ Diyinii díí tált’éego deiniidlą́.

2 Nihí éí nihokáá’ dine’é bąąhági ádzaago t’áá bí yik’ee ti’hwiidoonihgo deiniidlą́, áádóó Adam asiihígíí doo bik’ee ti’dahwiidii’nih da.

3 Nihí éí Jesus Christ Ti’hooznii’go Nihá Niná’nídláhígíí binahjį’ t’áá ałtso nihokáá’ dine’é yisdánahidookahgo deiiniidlą́; dóó Diyin bibee haz’áanii dóó Nahatʼá Bee Yisdá’iildéehii bibee áda’ool’įįł yik’eh dahół’į́įgo áłdó’ yisdánáhidookah.

4 Nihí éí díí Nahatʼá Bee Yisdáʼiildéehii áłtsé bitł’ááh naazléii dóó Diyin bibee áda’ool’įįł deiiniidlą́: Áłtsé éí, Diyin Bóhólníihii Jesus Christ deiidiidląął; naaki góne’ éí, Ádaaná’iidiikąął; táá’ góne’ éí, Tó Bee Alzį́į́h tó hak’idiilkǫǫhgo bąąhági át’éii nihaa nídidoot’ááł; dį́į́’ góne’ éí, nihitsiit’ááh dah’adéesnii’go sodizin bee Ii’ Sizį́ Diyinii hweilyééh.

5 Nihí éí díí deiiniidlą́ Diyin God éí diné ła’ yik’ididoolnih, éí Nahatʼá Bee Yisdáʼiildéehii yee na’nitin dooleeł dóó Diyin bibee ó’ool’įįł ííł’į́į doo, éí diyingo áhodooníłígíí bik’ehgo, dóó Diyin bibee óhólníihii dahdeiyíléhígíí diné yitsiit’ááh dahdadéesnii’go ła’ yik’i sodilzįįh.

6 Nihí éí dííshjį́įdi T’áá Ałk’idą́ą́’ Jesus Christ Bisodizin Bá Hooghan haidiilaayę́ęgi át’áo deiiniidlą́. Jó íídą́ą́’ éiyá hastóí naakits’áadah bik’i dahodiinii’ígíí dóó Diyin yá yádaałti’í, dóó sodizin bá hooghan yá naazíinii, índa nda’nitiní, dóó hane’ yá’át’éehii yaa dahalne’ii, éí kót’áo deiyíníijí, áádóó kodaat’éhígíí ádaalyaa.

7 Nihí éí díí deiiniidlą́ ła’ saad ał’ąą ádaat’áo baa dahalyé, ła’ éí diyingo náásgóó ádahodooníłígíí bił béédahózin, ła’ éí diyingo bił ííshją́ą́ áda’alne’, ła’ éí diyink’ehgo da’oo’į́, ła’ éí nída’ałdziih, ła’ éí saad ał’ąą ádaat’éego yee ata’ dahalne’, áádóó kódaat’éhígíí ádaalyaa.

8 Nihí éí Diyin God Bizaad t’áá aaníí Diyin God bizaad át’éego deiiniidlą́ ákondi háiida doo ákót’áo néíyíízohígíí éí doo deiiniidlą́ą da. Áádóó ałdó’ nihí éí Naaltsoos Mormon Wolyéhígíí t’áá át’é Diyin God bizaad át’éego deiiniidlą́.

9 Nihí éí Diyin God t’áá ałtso bizaad nihił ííshją́ą́ áyiilaaígíi deiiniidlą́, áádóó k’ad nihił ííshją́ą́ áyoolíiłii áłdó’, áádóó nihí éí Diyin God Bił Haz’ą́ bídadéét’i’ígíí éí náasdi ayóó át’éii lą’ígo dóó ílį́įgo nihił ííshją́ą́ ííł’į́į doogo ałdó’ deiiniidlą́.

10 Nihí éí díí deiiniidlą́: Israel dine’é t’áá ałtso ahínéídookah. Dóó Neeznáá Ał’ąą Dine’é ałdó’ ahínáhidookahgo háádidoolnííł. Áádóó Zion (Jersalem Ániidíígíí) díí Ashdladiin Kéyah Ałts’ahaasdzooígíi bikáa’gi hadidoolnííł. Áádóó Christ t’áá bí díí nahasdzáán yikáá’ alą́ąjį’ naat’áanii nilį́į dooleeł. Áádóó ałdó’ díí nahasdzáán łahgo ánályaago ániidí ńdoodleeł dóó yá’ąąshgi át’áo hadíłt’ée dooleeł.

11 Nihí éí díigi át’éego bee nihá ahóót’i’ dadii’ní: T’áá nihí ádaniidzingo Diyin God Ayóó Ábóodziilii bich’į’ sodadiilzin; áádóó t’áá ałtso nihokáá’ dine’é t’áá éí ałdó’ bee bá nidahosiil’ą́, hait’áo, haa’ígi, éí doodago háí yich’į’ sodadidoolzįįłígíí éí t’áá bí bee bídahólnííh.

12 Nihí éí díí deiiniidlą́: T’áá áníiltso aláahdi naat’áanii, alą́ąjį’ naat’áanii, ak’ih bídahólníihii, dóó ándahwii’aahii éí bik’eh dahoniil’į́, bá dahódíníilzin, dóó bee haz’áanii bikéé’ ndasiidzį́.

13 Nihí éí díí t’áá aaníík’ehgo nitsáhákees dóó yá’áti’ deiiniidlą́. Áádóó ats’íís dílzinii deiiniidlą́. Áádóó t’áá ałtso ał’ąą dine’é bich’į’ yá’át’éehii ádeil’į́į doogo deiiniidlą́. Áádóó aláahgo yá’át’ééh ídlį́ deiiniidlą́. Áádóó nihokáá’ dine’é t’áá ałtso bíká’anídeijah doogo deiiniidlą́. Ádadii’ní Paul yee na’neeztą́’ą́ą bik’ehgo deínííkááh—T’áá ałtsoní deiniidlą́, t’áá ałtsoní baa laanaa daniidzin, áádóó lą’í da bik’eh dahsidiidlį́į́’, áádóó t’áá ałtsoní bik’eh dadidiidleełgo baa laanaa daniidzin. T’áá ha’át’íí shį́į́ aláahgo yá’át’ééh nilį́įgo, áádóó ts’ídá t’áá ha’át’ííshį́į́ yá’át’éehii át’áo, éí doodago t’áá ałtso yá’át’éehgo haa ch’ídahwii’doot’áałgo, éí doodago ha’át’ííshį́į́ yá’át’éehgo baa hodoo’nihígíí deiidiiltsołgo, bíká ádeit’į́.