Joseph Smith—Matthew

1 Háálá Shí nihichʼįʼ haasdziih, kʼad yoołkáałdi doo dashiidoołtsééł da áádóó diyin yá yádaałtiʼí yaa ndaʼíízohyę́ę éí shí ashtʼį́įgo nihił béédahodoozįįł, kódadoohniiłjįʼ índa: Diyin Bóhólníihii bízhiʼ yinahjįʼ níyáhígíí éí bikʼihojidoodliił, yáʼąąshdi kʼosígíí biyiʼdę́ę́ʼ, dóó tʼáá ałtso diyin yá ndaalʼaʼí dadiyinígíí yił yikahgo. Áádóó bikééʼ naazíinii yikʼidaʼdiitʼą́ągo éí nahasdzáán yikááʼ nínáádoodááł, éí bikééʼdóó ayóó átʼáo ábiʼdiilyaa dóó Diyin God bigaan nishnáájí naatʼá chʼah bikʼidíʼą́ągo ádeiyiilaa.

2 Áádóó Jesus tłʼóógóó chʼíníyá, dóó Diyin bighan ntsaaígíí yitsʼą́ą́dóó dah diiyá; áádóó bikééʼ naazíinii bee yíkai, dabididootsʼį́į́ł biniyé, kódaaní: Master, Diyin bighan ntsaa ádoolníłígíí nihił ííshją́ą́ ánílééh, ádíníniidyę́ę bikʼehgo—Niʼjįʼ ndadoołdas, áádóó doo łaʼ yiiʼ naagháhí da doo.

3 Áádóó Jesus bichʼįʼ haadzííʼ: Daʼ dííísh tʼáá ałtso daohʼį́, dóó dooísh bikʼidaʼdoohtįįh da? Tʼáá aaníigo Shí nihichʼįʼ haasdziih, doo łaʼ kweʼé siláhí da doo, díí Diyin bighan ntsaaígi, tʼááłáʼí tsé ndi doo niʼjįʼ ałkʼidasinilgo ndoołdas da.

4 Áádóó Jesus yitsʼą́ą́dóó dah diiyá, dóó Dził Olive góde níyá. Áádóó Dził Olivedi dah sidáago, bikééʼ naazíinii nidanitʼingo baa níkai, kódaaníigo: Nihił hólneʼ Diyin bighan ntsaaígíí, dóó Jew dineʼé shąʼ éí hahgo dadoolchxǫǫł shą́ą́ʼ éí bee háíndzííʼ neʼ; áádóó haitʼáo shąʼ nihił bééhodoozįįł nínáándááhdi, bee nidahodoogáłígíí, éí doodago diné doo yáʼádaashóonii ádooldįįłígíí, éí áajįʼ índa nihodoogááł?

5 Áádóó Jesus ábidííniid, dóó kóyidííniid: Baa ádahoołchįįh áko diné doo łaʼ nihidiʼdooloh da;

6 Háálá ląʼída diné shízhiʼ binahjįʼ nihidookah, kódaaníigo—Shí éí Christ áshtʼį́—dóó ląʼída yóóʼadeidínóoʼah;

7 Dóó atídanihidiʼdoolnííł biniyé danihidiʼdooltsoł, dóó danihidiyoołhééł, dóó tʼáá ałtso diné dah deíkááhgóó danihijoołáa doo, háálá éí shízhiʼígíí biniinaa;

8 Áádóó ląʼída bádahodoochxįįł, dóó ahidadiʼdooloh, dóó daʼahijoołáa doo;

9 Áádóó Diyin yá yádaałtiʼí tʼóó ádaʼdilʼínígíí ląʼí dahodooleeł, dóó ląʼída yidaʼdidooloh;

10 Áádóó bąąhági ádaatʼéii baa ooldahígíí biniinaa, ląʼída biʼayóó ádaʼónínée ádadoodįįł;

11 Ákondi tʼáá íiyisíí beʼoodląʼ deiyótąʼígíí éí doo bikʼeh hodidoodleeł da, éí yisdáʼdahidookah.

12 Áádóó éí bąą, nihí, bąąhági átʼéii dabidoołchxǫǫłígíí deidoołtsééł, éí Daniel Diyin yá yáłtiʼí yee haadzííʼ, éí Jerusalem doolchxǫǫłgo baa haneʼígíí, áádóó nihí éí hodílzin bił hazʼą́ądi nisoozį́į dooleeł; tʼáá háí shį́į́ díí yiyííłtaʼígíí éí akʼidiʼdootį́į́ł.

13 Judeadi naakaiígíí éí dził gódeʼ adahidínóochééł;

14 Kin bikáaʼgi nisoozínígíí dadínóhchééh, dóó doo nátʼą́ą́ʼ hooghan biyiʼ nídoodáałgo haʼátʼíí da chʼíídoojih da;

15 Áádóó ałdóʼ łaʼ dáʼákʼehgi naagháago doo nátʼą́ą́ʼ nídoodáałgo biʼééʼ néídidoojih da;

16 Áádóó yíi adaʼniiłchínígíí, dóó éí bijį́įdi awééʼ dahałtʼoʼígíí;

17 Éí bąą, Diyin Bóhólníihii bichʼįʼ sodadołzin áko doo haigo, éí doodago Damóogo doo dahdadínóohchééł da;

18 Háálá ákohgo, éí bijį́įdi, Jew dineʼé tsʼídá yéego bichʼįʼ ndahwiidooʼnaał, áádóó Jerusalemdi kéédahatʼínígíí ałdóʼ, éí Israel tsʼídá doo kótʼáo, Diyin God bichʼįʼ kwíílééh da ńtʼę́ę́ʼ, diné dah yikah ábiʼdiilyaa dóó hóshdę́ę́ʼ kojįʼ; dooda, éí Israel dineʼé díí doo kojįʼ bikʼijįʼ kónáádoolníił da.

19 Tʼáá ałtsoní yiiʼ naaskaiígíí éí tʼóó yínííł bee hahaalzhíshígíí átʼé háálá éí náásgóó bikʼijįʼ kódoolnííł.

20 Áádóó éí bijínígíí áłtsʼíísí ádaalyaago tʼéiyá, łaʼ bidineʼé tʼáá dahináa doo; áko bikʼidahodiiniiʼígíí éí, bee ahadaʼdeestʼánígíí bikʼehgo, dabijínígíí áłtsʼísígo ádadoolnííł.

21 Áko shooh, díí Jew dineʼé bídadéétʼiʼígíí bee nihichʼįʼ haasdzííʼ; áádóó nááná, Jerusalem tsʼídá yéego bichʼįʼ ndahwiidooʼnaałgo bijį́ yiih yikaigo, tʼáá háiida łaʼ, Shooh, kǫ́ǫ́, éí doodago ńléíjí Christ nidííniidgo, tʼáadoo yínídlání doo;

22 Háálá éí bijį́įdi tʼóó Christ ádaʼdilʼínígíí dahodooleeł, dóó diyin yá yádaałtiʼí tʼóó ádaʼdilʼínigíí ałdóʼ, áádóó ląʼí bee éédahózinii dóó ayóó ádaatʼéii ádeiłʼį́į dooleeł, áko, éí biniinaa, tʼáá yídeíghahgo, diné nídahaasdláʼę́ę yidadiʼdooloh, éí ahaditʼaah binahjįʼ nídahaasdlááʼ.

23 Áko shooh, diné nídahaasdláʼígíí binahjįʼ díí Shí bee nihichʼįʼ haasdziih; áádóó anaaʼ dahólǫ́ǫgo baa dahaneʼ doo, ałkʼináájiijééʼ jiní haʼníigo; díí tʼáadoo bąąh danihíneʼí doo, háálá tʼáá ałtso bee nihił dahweeshneʼę́ę éí bidahodoolnííł; ákondi díí éí doo nihooghááh da.

24 Áko shooh, tʼáá íídą́ą́ bee nihił dahweeshneʼ;

25 Ákohgo, éí kódanihidííniidgo: Áko shooh, dzígaidi naahghá daaníigo; ákǫ́ǫ́ doohkááh láʼgo: Áko shooh, háálá nahonitʼin nidahazʼą́ądi naaghá daaníigo; tʼáadoo deinohdlání;

26 Háálá abínígo haʼaʼaahdę́ę́ʼ hadiʼdlaʼgo, dóó eʼeʼaahjigo yidiʼníłdííngo, dóó tʼáá ałtso nahasdzáán yikʼidiʼníłdláadgo, Diné Silį́įʼii ałdóʼ tʼáá ákótʼáo doogááł.

27 Áádóó kʼad éí haneʼ bitsʼą́ą́dóó óhooʼaahii łaʼ bee nihił chʼídeeshʼááł. Áko shooh, tʼáá haʼátʼííshį́į́ daaztsánígíí, ákweʼé atsá áłah nilį́į doo; tʼáá ákótʼeego diné nídahiséláʼígíí nahasdzáán bikááʼ tʼáá dį́į́ʼgóó adahwiisʼáádę́ę́ʼ ahídahideeshʼish.

28 Áádóó anaaʼ dahólǫ́ǫgo baa dahaneʼgo deididootsʼį́į́ł, ałkʼináájiijééʼ jiní haʼníigo ałdóʼ.

29 Áko shooh Shí éí diné nídahiséláʼígíí bá haasdziih; háálá diné dah deíkááhgóó ałkʼijįʼ nídadiibah doo, áádóó nidahazʼą́ągo ałkʼinéíjah doo; ląʼí dichin aghą́, dóó naałniih yiiʼ naakai doo, áádóó ałʼąą ádahootʼéégóó, kéyah ndahaʼnáa doo.

30 Áádóó nááná, bąąhági átʼéii bił hwiiʼaʼígíí biniinaa, nihokááʼ dineʼé bee ayóóʼóʼónínée ádoodįįł; ákondi tʼáadoo bikʼehdahodeesdlį́ʼígíí, éí yisdáʼdahidookah.

31 Áádóó nááná, Diyin Bił Hazʼą́ą́dę́ę́ʼ Binahatʼá bee Yisdáʼiildéehii adahwiisʼáágóó bee naʼnitin doo, háálá éí tʼáá ałtso nihokááʼ dineʼé dah deíkááhgóó bichʼįʼ yitʼį́į dooleeł, áádóó éí bikééʼdóó nihodootʼih, éí doodago bąąhági ádaatʼíinii ábidiʼdooldįįł;

32 Áádóó nááná Daniel Diyin yá yáłtiʼí, bąąhági átʼéii dabidoołchxǫǫłígíí yee haadzííʼ yę́ę, éí bidahodoolnííł.

33 Áádóó tsʼídá yéego bichʼįʼ ndahwiidooʼnaałgo bijį́ yiih yikaigo éí bikééʼdóó, jóhonaaʼéí bił chahodoołhił, áádóó ooljééʼ doo adiníłdíín da dooleeł, áádóó sǫʼ éí yádiłhiłdę́ę́ʼ adah dínóodah, áádóó yáʼąąshdi bee dahółdzilii dadoogał.

34 Tʼáá aaníigo, Shí nihichʼįʼ haasdziih, díí kʼad oochíłígíí biyiʼ, díí ádaatʼéhígíí nihił ííshją́ą́ ádadoolnííł, díí doo bił yooʼahidoogááł da tʼáá ałtso bee nihił hweeshneʼę́ę bidahoolyaago índa.

35 Azhą́ ákótʼée ndi, bee doołkááł, yáʼąąsh dóó nahasdzáán bił ahodoolzhish; ákondi shizaadígíí éí doo bił yóóʼahodoolzhish da, tʼáá átʼé bohodoolnííł.

36 Áádóó, ánihidííniidgo ánáánihidishní, tsʼídá yéego bichʼįʼ ndahwiidooʼnaał bijį́ yiih yikaigo, áádóó yáʼąąshdi bee dahółdzilii dadoogał, éí bikééʼdóó Diné Silį́įʼii bee yitʼínígíí yáʼąąshdi deidoołtsééł, áádóó éí bikééʼdóó tʼáá áłtso nahasdzáán yikáaʼgi nihokááʼ dineʼé dah deíkáhígíí yínííł danilį́į doo; áádóó Diné Silį́įʼii yáʼąąshdi kʼosígíí biyiʼdę́ę́ʼ, adziilii dóó ayóó átʼéii yee yigáałgo deidoołtsééł;

37 Áádóó tʼáá háí shį́į́ shizaad bił nilíniígíí, háálá éí doo bidiʼnóotah da, háálá Diné Silį́įʼii doogááł, áádóó éí bá ndaalʼaʼí dilní ayóó íitsʼaʼgo yee ndaanéego bilą́ąjįʼ yikahgo íidoolííł, áádóó tʼáá dį́į́ʼdę́ę́ʼ hanáyołdę́ę́ʼ diné néíhiyiizláago chʼéékaiígíí ahíidookah, yádiłhił biyaa kéyah nidaneesʼą́ą́dę́ę́ʼ.

38 Áko kʼad fig tsin sikaad baa haneʼ bídahodoołʼááł—Éí tsin bitsʼádaazʼá tʼahdii ditʼódígo, áádóó bitąʼ bąąh dah daʼiitsoigo, shį́ kʼadę́ę baa hoolzhííshígíí nihił béédahózin doo;

39 Tʼáá ákótʼeego, diné nídahiséláʼígíí, díí tʼáá ałtso deiyiiłtsą́ągo, doogáłígíí áyídídę́ę́ʼ bichʼįʼ hoolzhishgo bił béédahózin dooleeł, azhą́ dááʼdílkałígi ndi;

40 Ákondi yoołkáłígíí, dóó oolkiłígíí, doo łaʼ bił bééhóziní da; ádin, yáʼąąshdi Diyin God yá ndaalʼaʼí ndi, ákondi shiTaaʼ nilíinii tʼéiyá bił bééhózin.

41 Noah hináyę́ędą́ą́ʼ nahalingo, Diné Silį́įʼii yígháahdi ałdóʼ tʼáá ákótʼée doo;

42 Háálá ákótʼáo bił hooʼaʼ, éí tónteel nahasdzáán tʼah doo bił diilkǫǫhyę́ędą́ą́ʼh nahalin; háálá daʼayą́ dóó daʼadlą́, daʼiiyeh dóó baʼáłchiní iigeh yee yá lą́ daʼiiłeeh háálá éí Noah tsinaaʼeeł yiih yííyáajįʼ ákódaatʼį́į ńtʼę́ę́ʼ;

43 Áádóó tónteel hazʼlį́įgo índa bił béédahodoozįįł, dóó tʼáá ałtso tó adabisnaʼ; áádóó ákótʼáo ałdóʼ Diné Silį́įʼii doogááł.

44 Áádóó ndaasdzohyę́ę bohodoolnííł, áko akéedi yoołkáałdi, naaki dáʼákʼehdi naaʼaash doo, łaʼ abidiʼdooltééł, dóó łaʼ éí tʼáá ákǫ́ǫ doo;

45 Naaki daʼjikʼáadi akʼáa doo, łaʼ abidiʼdooltééł, dóó łaʼ éí tʼáá ákǫ́ǫ doo;

46 Áádóó tʼááłʼáʼí ábidishnínígíí éí, tʼáá ałtso nihokááʼ dineʼé ábidishníi dooleeł; éí bąą, haʼísííd, háálá nihiBóhólníihii oolkił góneʼ doogáłígíí doo nihił béédahózin da.

47 Ákondi díí nihił béédahózin doo, diné yáʼátʼéehii bighandi aniʼįįhii oolkił góneʼ doogááłígíí bił bééhózingo, éí haʼasííd doo, áádóó bighanígíí doo łaʼ yiih doogááł da, ákondi yibá sidáa doo ńtʼę́ę́ʼ.

48 Éí bąą nihídóʼ bichʼįʼ hashtʼeʼ ádadoołnééh, háálá oolkił doo baa ádahoołchį́į́h góneʼ, Diné Silį́įʼii doogááł.

49 Áko, háíshąʼ, éí naalʼaʼí akʼeh hółʼį́įgo hóyáanii nilį́, éí bibóhólníihii bighan hazʼánígíí yikʼi bóhólnííh doo, éí ałʼąą ánáhooʼnííł góneʼ chʼiiyánígíí eii dooleeł?

50 Éí ánaalʼaʼí bóhólníihii nilį́įgo bikʼihozhdoodliił, éí nídoodáałdi, tʼahdii akééʼ sizį́į doo; áádóó tʼáá aaníigo Shí nihichʼįʼ haasdziih, áádóó tʼáá ałtso binaadeełii yáʼádaatʼéhígíí yikʼi bóhólníihgo íidoolííł.

51 Ákondi naalʼaʼí doo yáʼáshóonígíí bijéí biyiʼdi kódííniidgo: ShiBóhólníihii doohah yíghááh da,

52 Áádóó bá ndaalʼaʼí yił ndaalʼaʼígíí atííłʼį́įgo bił hahodoolzhish, dóó daʼadláanii yil daʼadlą́ dóó daʼayą́ą doo,

53 Éí naalʼaʼí bidiyin bóhólníihii doo haideezʼį́į́ʼ gónéʼ, dóó oolkił doo nayólíí gónéʼ baa doogááł,

54 Áádóó ndahidoolkał, éí tʼóó ádaʼdilʼínígíí bił bá ndahidiyootʼááł; dóó yéego dajidilwoshgo dajicha doo dóó hawooʼ ahídazhdiłkʼash doo.

55 Áádóó áko diné doo yáʼádaashóonii ádabidiʼdooldįįł, éí Moses diyingo náasdi áhoodoonííł níigo yee haadzííʼ yę́ę bikʼehgo, éí kódííniid: Éí diné bitahdóó kʼídabidiʼdookał; ákondi nahasdzáán éí tʼahdoo bił nihooghááh da, ákondi tʼáá baa hodoolzhish.