Joseph Smith—Nákééʼ Náháneʼ

1 Diné doo yáʼádaashóonii dóó ndaʼagizígíí ląʼígo nídaʼíízooígíí adahwiisʼáágóó baa dahaneʼgo ádeiyiilaa éí díí, Jesus Christ Bisodizin Bá Hooghan Akéeʼdi Hoolzhishdi Yá Naazínígíí noosééł dóó ntsaa yileełígíí yaa nídaʼíízoh, yaa ńdaʼiizooígíí éí díí Sodizin Bá Hooghan yá naazínígíí dóó adahwiisʼáágóó náás yigáłígíí yaa ńdaʼíízoh—Éí biniinaa éí díí nákééʼ náháne nidíízoh shiʼdooʼniidígíí íishłaa, áko bílaʼ ashdlaʼii hazhóʼó bił béédahodoozįįł biniyé, áádóó tʼáá átʼé bindaʼádíkidígíí éí tʼáá aaníí átʼéego bił dahodoonih, éí ádahóótʼįįdígíí bikʼehgo, tʼáá shí dóó díí Sodizin Bá Hooghanígíí bídéétʼiʼgo, áko tʼáá shí éí díí tʼáá aaníí ádaatʼéhígíí shił bééhózin.

2 Áko díí nákééʼ náháneʼígíí biyiʼ Sodizin Bá Hooghan dóó bił hoogáłígíí éí chʼídeeshʼááł, tʼáá aaníí átʼéego dóó tʼáá ákogi átʼéego, ádahoodzaaígíí bikʼehgo, éí doodago tʼáá kʼadjįʼ ahoolzhiizhjįʼ átʼéhígi átʼáo, [tʼááłáhádi mííl yázhí dóó biʼaan tseebíídi neeznádiin dóó biʼaan tádiin dóó biʼaan tseebíí yiihah góneʼ] díí Sodizin Bá Hooghan bił hahóóyá hashtʼeilyaa dóó wóshdę́ę́ʼ tseebíí nááhai.

3 Tʼááłáhádi mííl yázhí dóó biʼaan tseebíídi neeznádiin dóó biʼaan ashdlaʼ yihah góneʼ shiʼdizhchį́, Níłchʼitsoh naadiin-tááʼ yihah góneʼ, éí kindashijaaʼ Sharon, Windsor hahoodzoh, Vermont Bináhásdzodi. … Shizhéʼé, Joseph Smith, Sen., Vermont Bináhásdzodóó dahdiiná, dóó Palmyra, Ontario (kʼad Wayne hoolyéedi) hahoodzohdi niníná, éí New York Bináhásdzo biyiʼdi, náhástʼéí nááhai biyiʼ shíyoołkáałgo, éí doodago tʼáá ákwéʼé nahalzhiishgo. Áko Palmyragi shizhéʼé ninínáago dį́į́ʼ nááhaigo, bí dóó bighan hazʼą́ Manchesterjįʼ niníná éí Ontario hahoodzohígíí tʼáá éí biyiʼ—

4 Łaʼtsʼáadah yiltʼéego yił háájééʼ, dabízhiʼígíí éiyá, shizhéʼé, Joseph Smith; shimá, Lucy Smith (éí bízhiʼ, tʼahdoo iiyehę́ędą́ą́ʼ bízhiʼígíí, éí Mack wolyée ńtʼę́ę́ʼ, Solomon Mack bitsiʼ); shínaaí, Alvin (éí Níłchʼitsʼósí náhástʼéítsʼáadahgóó yoołkáałgo, tʼááłáhádi mííl yázhí dóó biʼaan tseebídiin dóó biʼaan naadiin tááʼ yihahyę́ędą́ą́ʼ dah nídiidzá, naadiin hastą́ą́ binááhaigo), Hyrum áádóó shí dóó Samuel Harrison dóó William dóó Don Carlos; dóó shádí, Sophronia dóó shideezhí Catherine dóó Lucy.

5 Haaʼígíí shį́į́ hoolzhishgo Manchestergi naaki nááhai niiʼnáago, ákweʼé hazʼą́ągi oodląʼ bee dah ooldah yéego bíhonéésdlįįd. Methodist danilínígíí baa hahoolzhiizh, áádóó tʼáá hodíínaʼí tʼáá átʼé daʼoodlą́ągo dah daʼíldééh éí hahoodzo biyiʼ. Áko, áádóó tʼáá ntsaago nahósʼaʼgi éí ałdóʼ dabidiisnááʼ, dóó ayóó ánéilą́ą́ áłah daazlį́į́ʼ ałʼąą sodizin bee dahólǫ́ǫgo, éí doo tʼóó áłtsʼísígo bíhónéésdlįįd da dóó doo áłtsʼísígo dah daʼíldéeh da, łąʼ dadilwosh, “Shooh, kojí!” áádóó nááná łaʼ éí, “Shooh, kojí yeeʼ!” Łaʼ daʼoodlání éíidí dah deíkááhgo éiyá Methodist oodląʼjí dah ooldahígíí yíká ádaatʼį́, áádóó nááná łaʼ éiyá Presbyterian oodląʼjí dah ooldahígíí yíká ádaatʼį́, áádóó nááná łaʼ éiyá Baptist oodląʼjí dah ooldahígíí yíká ádaatʼį́.

6 Háálá, azhą́ ayóó átʼáo ayóóʼóʼóní yee ahidahidiikaiígíí ałʼąą átʼáo daʼíldééh daʼoodlánígíí éí ákweʼé hoolzhishgo idahidiikai, sodizin yilą́ąjįʼ naazínígíí tʼáá áwołí bee ádaatʼį́įgo, éí nídeidzįįh dóó tsʼídá oodląʼ bił danilį́įgo yídaʼoołkąąh, bíjígo ididookah biniyé, áko bił yáʼádaatʼééh, bíneʼ tʼáá háí shį́į́ dah yikahígíí yididookah; ákótʼée ndi ákódzaago ałʼąą átʼáo dah daʼdiisdeeʼgo, łaʼ kojigo nááná łaʼ éí nighééjigo, tʼóó nizhónígo ahaa ntsáhákees nahalin alą́ąjįʼ naazíinii dóó idahidiikaiígíí; éí ákótʼée ndi tʼóó yedaʼałʼį́ doo tʼáá aaníí átʼée da nahalin ákohgo ayóó átʼáo hahonííchaad dóó doo yáʼátʼéehgo ahaa ntsáhákees hazʼlį́į́ʼ—nááná łaʼ sodizin bá hooghan yá naazínígíí dóó nááná łaʼ sodizin bá hooghan yá naazínígíí yił ałkʼijįʼ saad adeiyiinííł, áádóó idahidiikaiígíí nááná łaʼ idahidiikaiígíí yikʼijįʼ daazlį́į́ʼ; hashį́į́tʼáo tʼáá átʼé yáʼátʼéehgo ahaa ntsáhákeesyę́ę, éí daatsʼí tʼáá aaníí dahólǫ́ǫ ńtʼę́ę́ʼ, jó éí yę́ę ałtso ásdįįd háálá saad ałʼąą átʼáo ałchʼiʼ adajiiznilígíí dóó ałʼąąʼ átʼáo ntsáhákeesígíí biniinaa.

7 Ákweʼé hoolzhishgo éí shí dį́į́ʼtsʼáadah shinááhai. Shizhéʼé bighan hazʼą́ągi éí Presbyterianjí daʼoosdląąd, dį́į́ʼgo áájí sodizin bá hooghan yihidiikai, dabízhiʼígíí éiyá, shimá, Lucy; shínaaí Hyrum dóó shitsilí Samuel Harrison; áádóó shádi Sophronia.

8 Díí yéego bíhoneedlį́įgo baa naʼaldeehgo ayóó átʼáo shíniʼígíí biyiʼ siʼą́ silį́į́ʼ áko yéego baa ntséskees tʼóóyó doo shił yáʼátʼééhgóó; ákótʼée ndi tʼáá íiyisíí shiyiʼdi kótʼáo siʼą́ dóó tʼáá íiyisíí nashiiłná, ákó ndi doo éí łaʼ dah ooldahígíí bidiiyáa da, áádóó shá bíighah nádleehgo díkwíígóóshį́į́ áłah ńdaʼadleehígíí tʼaa altsogo bitaa séyá. Áádóó náás hoolzhish shí baa ntsídíkéezgo Methodist dah ooldahígíí, tʼóóyó áájígo shił nilį́ silį́į́ʼ dóó bidideeshááł niizį́į́ʼ; ákótʼée ndi tʼóó báhádzidgo hahonííchaad dóó ałkʼijįʼ danilį́įgo dah ooldah, áko shí doo bíighah da tʼah ániid naasháago, háálá nihokááʼ dineʼé doo tʼáá íiyisíí baa ákonisin da, éí binahjįʼ łaʼ atah jidoogálígíí łaʼ daatsʼí tʼáá aaníí dóó háídíígíísh doo ákótʼée da.

9 Áko íídą́ą́ʼ shíniʼ biyiʼdi ayóó átʼéego shił ánátʼįįh ndi, ákótʼée ndi ałchʼįʼ dahodiwosh dóó saad ałchʼįʼ adajiinííł tsʼídá ayóó átʼé dóó tʼóóyó doo yáʼátʼéehgo ádaʼjiłʼį́. Presbyterian danilínígíí éí Baptist danilínígíí dóó Methodist danilínígíí yikʼijįʼ daazlį́į́ʼ, áádóó tʼáá ałtso beʼadziilii ałchʼihjí baa ntsáhákees dóó saadígíí ndajigizgo łahjígo doo yáʼátʼéeh da dajiníigo, éí doodago, da, dinéhígíí bichʼįʼ bídaʼjoołkąąh kojigo doo yáʼátʼéeh da dabijiníigo. Ákótʼée ndi nááná łahjigo, Baptist danilínígíí dóó Methodist danilínígíí tsʼídá tʼáá ákótʼáo ałdóʼ yídaneedlį́įgo tʼáá bí deiyoodlánígíí diné yichʼįʼ yídaʼoołkąąh áádóó nááná łaʼígíí éí doo ákótʼée da daaní.

10 Áko díí saad bee daʼahijighánígíí bitaʼgi tʼóó ałʼąą átʼáo saad nidajigizígíí, tʼáá ahą́ą́h baa hanásdzih: Haʼátʼíísh éí ádoolnííł? Háídíígíí dah ooldahígíísh tʼáá aaníí átʼé; éí doodago, tʼáá átʼé daatsʼí doo ákódaatʼée da? Łaʼ tʼáá aaníí átʼéego, háidiígíísh tʼáá ákótʼé, dóó haash yitʼáó éí shił bééhodoozįįł?

11 Díí ałʼąą átʼáo daʼoodlą́ągo dah daʼíldéhígíí tʼáá áwołí bee achʼįʼ nahwiiʼná hólǫ́ǫgo biyiʼ yishááł, ákohgo łaʼajį́ James biNaaltsoos siʼánígíí biyiʼ yíínishtaʼ, áłtsé wóltaʼii dóó ashdlaʼ saad dashijaaʼgi, díí kóní: Nihí łaʼ bee hódzáanii bídin nohłį́įgo, Diyin God bíídóohkił, éí bił hadleeʼgo índa doo akʼíháʼááhgóó, tʼáá ałtso nihokááʼ dineʼé yeidiyiiʼaah; áko honohsą́ągo ánihidoolííł.

12 Tsʼídá tʼah doo diné bijéí biyiʼdi kótʼáo saad dashijaaʼígíí adziilii bił hólǫ́ǫgo ánéeh da ńtʼę́ę́ʼ shí kʼad íísdzaaígi átʼáo. Áko shijéí biyiʼdi tʼóó báhádzidgo bidziilgo hólǫ́ silį́į́ʼ. Tsʼídá tʼáá baa ntséskees dóó baa ntsínáskos, jó Shí, éí díí hódzáanii Diyin God bitsʼą́ą́dę́ę́ʼ nídideeshłééłgo tʼáá íiyisíí nisin; áádóó haitʼéego áníshtʼée dooleełígíí doo shił bééhózin da, ákohgo hózhǫ́ ląʼígo hódzą́ shee hodooleeł nísin kʼad áníshtʼéhígíí átʼáo, doo ákótʼéego éí tsʼídá doo shił bééhodoozįįł da; háálá díí Diyin God bizaad saad dashijaaʼ ałʼąą atʼáo dah deíkáahgo ndaʼnitin tʼáá átʼé ałʼąą átʼáo yaa ntsédaakees hónáásiiʼ íiyisíí Diyin God bizaad biyiʼdi naʼádíkidígíí ndi ádin doo yadaʼólíi da.

13 Áádóó náás hodeeshzhiizhgo baa ákoniizį́į́ʼ tʼáá daatsʼí shił chahałheeł dóó shił halą́ą dooleeł, éí doodago James ánínígi átʼáo, áko éí, Diyin God nabídídééshkił. Áádóó náás hodeeshzhiizhgo “Diyin God nabidídéeshkiłgo,” baa tsídíkééz jó éí háiida bee hódzáanii yídin nilínígíí hódzáanii yaa yiléego hóyą́ągo íidoolííł, éí bił hadleeʼgo, índa doo akʼíháʼááhgóó, áko Shí naʼadídééshkił niizį́į́ʼ.

14 Áko, díí bikʼehgo, Diyin God nabidídeeshkiłígíí biká áátʼįįd, díí bídínéeshtah biniyé tsintahgóó níyá. Dąągo, abinínóo nizhónígo ooʼááłgo, tʼááłáhádi mííl dóó biʼaan tseebíídi neeznádiin dóó biʼaan naadiingóó yihahą́ądą́ą́ʼ. Tʼáá íítsʼaʼígo tʼéiyá sonídiszįįh ńtʼę́ę́ʼ, háálá ádił náhodishchiʼ tʼóó ahayóí shiyiʼ hólónígíí biniinaa doo hodiitsʼaʼgo sodiszin da ńtʼę́ę́ʼ.

15 Áłtséédą́ą́ʼ deeshááł niizííʼę́ęgi níyá, shinaagóó haʼíísid, dóó tʼáá sáhí naasháago baa ákoniizį́į́ʼ, ntsidinígoʼ dóó shijéí biyiʼdi nisinée Diyin God bee bichʼįʼ sodiʼniiszin. Tsʼídá sodiʼniiszingo, haʼátʼíí shį́į́ adziilii shį́į́ shiiłtsood dóó tʼáá ałtsojįʼ shikʼihooleʼ, áádóó ayóó átʼáo shitsooʼ yiyiiłtsoodígi ádzaago chʼééh haasdziih. Shinaagóó yéego chahóółhéél, áádóó hónízahjįʼ tʼáá hooshchʼįʼ daatsʼí shidoołchxǫǫł niizį́į́ʼ.

16 Ákondi, sheʼadziil tʼáá átʼéé ńtʼéé ʼ bee Diyin God díí anaʼí bibeʼadziil shótąʼígíí bitsʼą́ąjįʼ kóshílééh bidííniid, áádóó tsʼídá doo bííníshghah da dóó bíniʼ shį́į́ shikʼeh didoodleeł niizį́į́ʼ—doo tʼóó shił átʼį́į da, ákondi haʼátʼíí shį́į́ bibeʼadziilii doo hootʼį́ hazʼą́ą́dę́ę́ʼ, éí tsʼídá doo ayóó átʼéego adziilii doo háiida bee hólǫ́ǫgo shił bééhózin da—áko díí yéego baa ákoniizį́į́ʼgo, shikáaʼgi, jóhonaaʼéí bilááhgo, adinídíín yiiłtsą́, tʼáá hazhóóʼígo yildohgo shikʼiʼdiiłdláád.

17 Anaʼí shótą́ʼyę́ę́ bitsʼą́ą́dę́ę́ʼ shiʼdoochidgo baa ákoniizį́į́ʼ. Ayóó adinídíín shikʼi hooleʼgo Diyin God dóó BiYeʼ yiiłtsą́, éí bitsʼádinídínígíí dóó ayóó átʼéhígíí tsʼídá tʼáá átʼé doo saad bá hólǫ́ǫ da, éí tʼáá áłah hódahgi níłchʼi biyiʼ dahjizį́. Łaʼ shichʼįʼ haadzííʼ, shízhiʼ yee shíízhiʼ dóó kóshidííniid, łaʼígíí yichʼįʼ dahdilnihgo—Díí ShiYeʼ Ayóó ííníshʼníinii Átʼį́. Yíísíníłtsʼą́ą́ʼ!

18 Diyin Bóhólníihii baa deesháałgo biniyé nabídidééshkił éí tʼáá ałtso sodizin bá dahooghanígíí háídígíí shąʼ éí tsʼídá tʼáá aaníí átʼé, áko éí shił bééhoozingo éí bidideeshááł. Tʼáá áko, éí bąą, tʼáá hazhóʼí nitsísískéezgo, dóó yáshtiʼ ńsésdlį́įgo, ákogo índa Diyin God dóó BiYeʼ shíighahgi adinídíín yiyiʼ tʼáá áłah jizinígíí nahódééłkid, éí tʼáá ałtso sodizin bá dahooghanígíí háídígíí shąʼ éí tsʼídá tʼáá aaníí átʼé áádóó háídíígíí shąʼ bidideeshááł bidííniid—(háálá íídą́ą́ʼ éí shijéí biyiʼdi tʼáá átʼé sodizin bá dahooghan tsʼídá doo tʼóó ádaatʼée da nisin ńtʼę́ę́ʼ).

19 Áádóó áshiʼdooʼniid doo łaʼ bididíínááł da, háálá tʼáá átʼé doo tʼáá aaníí ádaatʼée da; áádóó Diyin shichʼįʼ haadzíʼígíí ání tʼáá ałtso dah ooldah deiyoodlánígíí éí shídę́ę́ʼgo tsʼídá aláahdi woolchʼį́dígíí ádaatʼé; áko éí tʼáá ałtso oodlání danilínígíí doo ákódaatʼée da lá; “dabizábąąhdóó yee tʼáá átʼé tʼáá íiyisíí shinaago dahólǫ́ nahalin, áko ndi bijéíígíí tsʼídá doo deeghánídi nidaakai nahalin, áko diné bibee hazʼáanii áájígo binaʼnitinígíí tʼáá aaníí átʼé daaníigo yee ndaʼnitin, kʼasdą́ą́ʼ diyingo ádaʼałʼį́, ákondi bibeʼadziilii éí nahjįʼ kódeiyiilaa.”

20 Áádóó ánááshidooniid doo łaʼ bididíínáał da; dóó tʼóó ahayóí tʼáadoo leʼé yee shił nááhoolneʼ, éí kʼad doo baa niʼdéesoh da. Áádóó shinaagóó átʼéhígíí baa ákónáneesdzįįhgo, tʼah ńtʼę́ę́ʼ síde sétį́, yáʼąąsh gódeʼ díníshʼį́įgo. Áádóó adinídínée éí nahjįʼ kódzaa, ádin Shí éí doo shidziil da; áádóó tʼįįdigo shidziil nísésdlį́įgo, hooghangóó nánísdzá. Áádóó dééʼdíljahgi bíneeshtį́įgo, shímá haash nítʼé shiłníigo nashídééłkid. Áádóó Shí ádíshní, “Tʼáá áko, tʼáá yáʼáníshtʼééh—tʼáá yéego yáʼáníshtʼééh.” Áádóó shimá ábidishní, “Tʼáá shí shił bééhoozįįd Presbyterianism éí doo tʼáá aaníí da.” Áko chʼį́įdii biʼiinízįįdii éí tsʼídá tʼáá ánístsʼíísídą́ą́ʼ, díí tʼáá íídą́ą́ bił bééhózin lá, éí bił hazʼą́ągi tʼóó hahoniłchaadii dóó aanátʼíinii nishłį́į dooleełgo bił bééhózin lá; díí doo kótʼéégóó haʼátʼíísh éí biniyé tʼóó báhádzidgo chahałheeł bidziilii shikʼijįʼ nídaadleeh? Háʼátʼíísh éí biniinaa tʼáá ánístsʼíísídą́ą́ʼ, shikʼijįʼ ídlį́ dóó atíʼshiʼdilʼį́?

21 Díí Diyin shaa níʼáázhígíí bikééʼdóó dikwííshį́į́ yiską́ągo, Methodist binaʼnitiní łaʼ bił honishłǫ́, éí atah áłtséédą́ą́ʼ ałʼąą daʼoodlání yéego ałkʼijįʼ yádaałtiʼí nilį́į ńtʼę́ę́ʼ; áádóó, oodląʼ bee bichʼįʼ yáshtiʼgo, łah diyingo shił áhoodzayę́ę bee bił hweeshneʼ. Ńtʼę́ę́ʼ shichʼįʼ áátʼįįdígíí tʼáá íiyisíí bikʼeedésyiz; bee bichʼįʼ haadziʼígíí tʼįįdígo yaa ntsézkéezgo yaa haadzííʼ, ákondi tʼáá íiyisíí doo ílį́į́góó yaa haadzííʼ, tʼáá átʼé chʼį́įdii bitsʼą́ą́dę́ę́ʼ átʼé, díí jį́į́góó diyingo doo hwił ííshją́ą́ ádaʼalʼį́į da éí doodago Diyin doo hwił ííshją́ą́ áʼáłʼį́į da dííniid; éí hastóí naakitsʼáadah bikʼi dahodiiniiʼígíí bił niʼkódzaaʼ, dóó tsʼídá doo łaʼ náádahodoodleeł da dííniid.

22 Áko, tʼáadoo hodíínaʼí baa ákoniizį́į́ʼ, sha haneʼ baa hweeshneʼgo ląʼída oodląʼ yá ndaʼniłtiní shikʼijįʼ daazlį́į́ʼ, dóó ayóó átʼáo atíʼálʼį́ shikʼijįʼ hazlį́į́ʼ, éí áádóó tʼóó yíwoh da átʼé silį́į́ʼ; azhą́ ashkii doo bééhoʼdílzinii nishłį́į ndi, índa dį́į́ʼtsʼáadah dóó ashdlaʼáadah bitaʼgi shinááhai, áádóó sheʼiinaʼ kʼad ánishtʼéhígíí ashkiiʼ adahwiisʼáágóó doołaʼ íídóólííł da, ákondi hastóí béédahoʼdílzinii shaa ákodadínóozįįł dóó nihokááʼ dineʼé shikʼijįʼ danilį́įgo ádeidoolííł, dóó tʼóó baaʼihgo atíʼálʼį́ shikʼijįʼ kódeiyiilaa; áádóó díí éí tʼáá ałtso oodląʼ dah deíkáhígíí bitahgóó kótʼé silį́į́ʼ—tʼáá átʼé atʼídashidoolííłgo ádayiilaa.

23 Íídą́ą́ʼ yéego baa nitsísískééz, áádóó hóshdę́ę́ʼ tʼáá ahą́ą́h, haitʼáo ashkii doo bééhoʼdílzinii, dį́į́tsʼáadah tʼįįhdígo bilááhgóó binááhaigo, dóó łaʼ, ałdóʼ, tʼįįhdígo tʼáadoo léʼé bee hólónígíí yíká naalnishgo bił hazʼą́, éí hózhǫ́ bééhoʼdílziníigo ayóó ádaatʼéii dóó hózhǫ́ daʼoodląʼ íídą́ą́ʼ dah ooldah dabinízin doo yę́ę, ákondi tsʼídá yéego atʼílʼį́ dóó joodlá. Áko azhą́ tʼóó haashį́į́ yitʼée ndi éí doodago doo haashį́į́ yitʼée da ndi, díí kótʼáo, dóó áłahjįʼ ayóó átʼáo yinííł ánáshiilʼįįh.

24 Ákótʼée ndi, tʼáá aaníigo diyingo shił áhoodzaa. Áádóó hóshdę́ę́ʼ, áko Paul nitsékeesígi áníshtʼé, Aláahdi Naatʼáanii Agrippa yidááhdóó ádaa halneʼgo, dóó diyingo bił áhoodzaago adinídíín yaa hoolneʼ, dóó iinééʼ yidiiztsʼą́ą́ʼ; ákondi tʼáá díkwíhí daboosdląąd; łaʼ biyoochʼííd dabidííniid, áádóó nááná łaʼ diigis nilį́ dadííniid; dóó doo yáʼátʼééhgo bichʼįʼ hadaasdzííʼ dóó dabijoosłááʼ. Ákondi díí tʼáá átʼé tʼáá aaníigo diyingo bił áhoodzaaígíí tʼáadoo deiyííłchǫʼ da. Diyingo bił áhoodzaago iiłtsą́, tʼáá aaníigo bił bééhozin, yáʼąąsh biyaadóóʼígíí doo łahgi átʼáo bá ahodoonííł da; dóó azhą́ atídeiyiilaago da biisxį́į ndi, ákótʼée ndi bił bééhózin, dóó tʼáá bił bééhózin dóó azhą́ biyol ásdįįdjįʼ ndi, adinídíín doo iinééʼ yidiiztsʼą́ą́, dóó doo łaʼ nahasdzáán bikááʼ łahgi átʼáo tsíbidoołkos da éí doodago łahgi átʼáo yoodlą́ągo ábidoolííł da.

25 Áko shí tʼáá ákótʼáo shił hazʼą́. Tʼáá aaníí adinídíín yiiłtsą́, dóó adinídíín biyiʼ Diyin God dóó BiYeʼ yiiłtsą́, dóó tʼáá aaníí tʼáá áłah shichʼįʼ yááłtiʼ; dóó azhą́ shį́į́ʼ shiʼjoodlá dóó diyingo shił áhoodzaa dishníigo biniinaa atíshiʼdilʼį́į ndi, áko tʼáá aaníí áhóótʼįįd; áádóó atíshiʼdilʼį́įgo, shijoodláago, dóó tʼáá átʼé doo yáʼátʼéehii shikʼijįʼ doo tʼáá aaníígóó hadaʼiisdzííʼ, díí baa haasdzíiʼgo shijéí biyiʼdi adííniid: Haʼátʼíí biniyé atíshiʼdilʼį́ tʼáá aaníí ahóótʼįįdígíí baa haasdzíiʼgo? Tʼáá aaníigo Diyin God dóó BiYeʼ yiiłtsą́ dóó háísh éí áshtʼį́į doo Diyin God bikʼijįʼ nishłį́įgo, éí doodago haʼátʼíísh biniinaa nihokááʼ dineʼé tʼáá aaníigo Diyin God dóó BiYeʼ yiiłtsánígíí tʼáadoo yiiniłtsʼą́ą da daaní? Háála tʼáá aaníí Diyin God dóó BiYeʼ yiiłtsą́; éí Shí shił bééhózin, áádóó Diyin God ałdóʼ bił bééhózingo baa ákonisin, áádóó doo nahjįʼ kódeeshłíił da, dóó doo bídínéeshtah da nisin; dóó binétʼą́ągo éí Diyin God bá hodeeshchįįł, dóó shá nahodooʼááł.

26 Kʼad díí shíniʼ lą́ niizį́į́ʼ díí ałʼąą daʼoodlání dah ooldah bídéétʼiʼígíí—áko doo shídéétʼiʼ da łaʼ bidideesháałgo, ákondi tʼáá náás yishááł doo shił nááhóoneʼgo índa łahgo ádeeshłííł. James bitʼáá aaníinii yaa hoolneʼę́ę tʼáá aaníí átʼée lá—diné hódzáanii yídin nilínígíí éí Diyin God neídídóołkił, dóó baa doolyééł, dóó doo bichahodiʼdooshkeeł da.

27 Áádóó tʼáá shí sheʼiinaʼ bíkáʼááshtʼįįłgo Biniʼanitʼą́ą́tsoh naadiin-łaʼ yoołkááłjįʼ ałtso, éí tʼááłáhádi dimííl yázhí dóó biʼaan tséébíídi neeznádiin dóó biʼaan naadiin-tááʼ, áádóó aláahjįʼ atíshiʼdilʼį́ tʼáá ałtso nihokááʼ dineʼé bitsʼą́ą́dę́ę́ʼ, sodizin dóó doo sodizin yidahidiikai, háálá tʼah tʼáá aaníí diyingo shił áhoodzaii yiiłtsánígíí biniinaa.

28 Diyingo shił áhoodzaa dóó tʼááłáhádi dimííl yázhí dóó biʼaan tséébíídi neeznádiin dóó biʼaan naadiin-tááʼ nahashzhiizhjįʼ—íídą́ą́ʼ oodląʼ dah deíkáhígíí doo łaʼ bididíínááł da shiʼdooʼniid, dóó doo ląʼí shinááhai da, dóó dashikʼis hazhóʼó ádashoołʼįįł doo yę́ę tʼóó atídashiłʼį́, áádóó yóó abiʼdoodlóóz dashóʼníigo hazhóʼó ayóóʼóʼóní yee yisdánídashidoolóós—dóó daʼíłtsʼą́ą́dę́ę́ʼ tʼáá ałtso ndashintaah; dóó, ląʼída dah íldééh bił naashdeeh, ląʼída niʼiilzííh biih náshtłish, ániid naaghái doo áhonishyą́ągo naashá, dóó nihokááʼ dineʼé doo dabichiinii; éí, yínííł nishłį́įgo, niʼiilzííh, Diyin God doo bił yáʼátʼééh da. Díí baa ádaahashneʼgo, doo łaʼ ayóó átʼéego éí doodago tsʼídá joodláago niʼiilzííh bee shikʼi hodiitʼą́ą da. Akondi yéego adeesihígíí éí doo nísin da. Ákondi łahda doo tʼáá bíhólníhgíí bá nahashtʼiʼ da, dóó łahda diné aa daadlohígíí bitah náshdááh łeh, ákótʼáo nidaakaiígíí, éí Diyin God doo yikʼi didoolnih da shí shikʼidiilniiʼígi átʼáo. Ákondi ánístsʼíísídą́ą́ʼ shéédahósinígíí doo tʼáá yiyisíí bił haadaatʼée da, éí ayóó bá hózhǫ́ danízin.

29 Díí naʼayésíʼígíí biniinaa, tʼáá áłahjįʼ biʼoh nishłínígíí dóó doo tʼáá átʼé bíneeshʼánígíí baa yínííł nisin; áádóó ałdóʼ, éí iʼííʼą́ągo wódahdi-baa haasdzíʼígíí naadiin-łaʼgóó yoołkáałgo Biniʼantʼą́ą́tsoh yiziłígíí biyiʼ, yéego joobaʼ dóó tʼáá aaníí íínisingo Diyin God Ayóóʼábóodziilii bichʼįʼ sodiszin tʼáá átʼé shibąąhági ádaatʼéii dóó naʼayésíʼígíí bá, áko haitʼáo bidááhdóó sézį́ dóó áníshtʼéhígíí; éí shił ííshją́ą́ íidoolííł nisin; háálá tʼáá aaníí diyingo shił ííshją́ą́ íidoolíiłgo bee baʼ ííníshłí, háálá łahdi tʼáá ákótʼáo shił ííshją́ą́ éʼélyaa.

30 Diyin God bichʼįʼ sodiszingo, adinídíín shił hazʼą́ą́ góneʼ hooleełgo wónáásdóó ałnéʼéʼaah bilááh átʼéego adinídíín silį́į́ʼ, tʼáá hooshchʼįʼ Diyin yá naalʼaʼí léiʼ shitsáskʼeh bíighahgi hojizlį́į́ʼ, doo niʼgi nikʼídéesʼeez da, níłchʼi yiyiʼ dasizį́.

31 Éénééz tsʼídá nizhónígo łigai léiʼ yiiʼ sitį́. Nahasdzáán bikáaʼgi díigi átʼéego łigaiígíí tʼah doo łaʼ yiistséeh da; dóó nahasdzáán bikáaʼgi kótʼéego tʼáá íiyísíí nizhónígo łigai dóó bitsʼádiʼńlíidgo tsʼídá doo łaʼ hodooleeł da nisin. Bílaʼ, doo bigaan ałdóʼ tʼįįhdígo bílátsíín biláahgo doo bikʼeʼéstiʼí da; bikeeʼ, dóó bijáád ałdóʼ tʼįįhdígo bikétsíín biláahgo doo bikʼeʼéstiʼ da. Bitsiitsʼiin dóó bikʼos ałdóʼ doo bikʼeʼéstiʼ da. Éénéézígíí tʼéiyá yiiʼ sitį́, ąą átʼéego, biyid yiiłtsą́.

32 Doo éí biʼéénééz tʼéiyá tʼáá íiyisíí łigai da, bitsʼíís tʼáá átʼé ałdóʼ doo baa hojoolneʼ átʼéego ayóó átʼé, dóó biniiʼ éí iiʼniʼ nʼdiilchʼilgo inʼdíldlaʼígíí bił aheełtʼé. Hooghan góneʼ tʼáá íiyisíí adinídíín, ákondi sizínígi binaagóó aláahgo bitsʼádiʼnílííd. Tʼóó áłtsé hoołtsánéedą́ą́ʼ, násdzid ńtʼę́ę́ʼ; ákondi násdzidę́ę tʼáá áko nahjįʼ kódzaa.

33 Shízhiʼ yee shíizhiʼ, áádóó Diyin God bitsʼą́ą́dę́ę́ʼ haneʼ neiʼáhí nishłį́įgo nichʼįʼ ashiʼdoolʼaʼ shidííniid, dóó Moroni wolyéego; Diyin God naanish bá ádeeshłíiłgo; dóó nihokááʼ dineʼé dah deíkááhgo, ahidaʼdiilchíín, dóó bizaad ałʼąą ádaatʼéii, dóó nihokááʼ dineʼé bitahgóó, shízhiʼ yáʼátʼéehgo baa haʼniih dóó doo bił yáʼádaashǫ́ǫ da dooleeł; éí doodago bílaʼashdlaʼii bitahgóó yáʼátʼééh dóó doo yáʼáshǫ́ǫ́góó baa yáʼátiʼ dooleeł.

34 Naaltsoos léiʼ łeeyiʼ siʼą́ shidííniid, béésh óola tʼą́hí ályaago bikʼi naʼasdzo, díí kéyah yikááʼ kéédahatʼínée, dóó háádę́ę́ʼ yíkaiígíí bikááʼ yaa halneʼ. Tʼáá ałtso hoolʼáágóó Nahatʼá Bee Yisdáʼiildéehii ałdóʼ biyiʼ dííniid, Yisdáʼiiníiłii ałkʼidą́ą́ʼ kéédahatʼínée yichʼįʼ kóyiilaa.

35 Áádóó tsé naaki béésh łigaii binázʼáago—dóó éí tsé, ayidgi dah siʼánígíí beʼestłʼǫ́ǫgo, Urim dóó Thummim wolyéego bee hadítʼé—béésh tʼą́hí bił łeeyiʼ sinil; dóó tʼáá háiida díí tsé bee hólǫ́ǫ́góó dóó choyoołʼį́įgo ałkʼidą́ą́ʼ diné “diyingo daʼooʼíinii” deiłníí ńtʼę́ę́ʼ; dóó Diyin God díí tséhígíí bee béésh óola tʼą́hí nááná łaʼ saadkʼehjí ádoolnííł biniyé hashtʼeyiilaa.

36 Áádóó díí ałtso yee shił hoolneʼgo, Naaltsoos Ahaʼdeetʼą́ Áłtséhígíí biyiʼdóó diyingo ádahoodzaaígíí yaa ahoʼniilneʼ. Áłtsé éí Malachi wóltaʼii tááʼ góneʼ yiyííłtaʼ; áádóó dį́į́ʼ góneʼ éí doodago akéedi wóltaʼígíí tʼáá éí diyingo áhoodzaa baa haneʼígíí yiyííłtaʼ, éí Diyin God Bizaad biyiʼdóó tʼóóyó łahgo átʼáo wóltaʼ. Nihinaaltsoos biyiʼdóó áłtsé saad dashijaaʼ wóltaʼ tʼáadoo yiyííłtaʼ da, ákondi díí yiyííłtaʼ:

37 Háálá áko shooh, éí bijį́ béésh biiʼkǫʼí nahalingo hodookʼąął doo, áádóó tʼáá ałtso ádaa dadzódlíyę́ę, aooʼ, dóó tʼáá ałtso doo yáʼáshǫ́ǫgo ádaʼałʼínée ałtso tséhégod ndahalingo adadidookʼą́ą́ł; háálá nidahaaskaiígíí adabididoołkʼą́ą́ł, ní Diyin Tʼáá Ałtsoní bee Bóhólníihii, bikétłʼóól dóó tsin bitsʼádaazʼáyę́ę ádooldįįł.

38 Áádóó áko, saad dashijaaʼ ashdlaʼ góneʼ kótʼáo yiyííłtaʼ: Áko shooh, Diyin Bibeʼadziilii nihił ííshją́ą́ ádeeshłííł, Elijah diyin yá yáłtiʼí bílaʼ bee, tʼah doo Diyin Bóhólníihii tʼáá íiyisíí báhádzidgo tʼáá bichʼįʼ hoolzhishídi haiłkaahdą́ą́ʼ.

39 Áádóó ákóneʼ saad dahnáánáshjaaʼígíí ałdóʼ łahgo átʼáo nááyiyííłtaʼ: Áádóó bizhéʼé danilíinii ádee hadaʼiisdzííʼ bichʼįʼ kódaalyaayę́ę áłchíní bijéí yiyiʼ neidiyoolééł, áádóó áłchíní bijéí dabizhéʼéyę́ę yichʼįʼ kódeidoolííł. Doo ákódzaagóó, éí níyáadi nahasdzáán tʼáá átʼé tʼáadoo biniyéhígo ályaa doo ńtʼę́ę́ʼ.

40 Áádóó éí bił ałdóʼ, Isaiah biyiʼ łaʼtsʼáadah wóltaʼii góneʼ yiyííłtaʼ, kʼadę́ę bohoolnííh níigo. Áádóó naaltsoos Acts tááʼ góneʼ wóltaʼígíí ałdóʼ yiyííłtaʼ, naadiin-naaki dóó naadiin-tááʼ saad dashijaaʼígíí Acts tááʼ wóltaʼígi, naadiin-naaki dóó naadiin-tááʼ saad dashijaaʼígíí, éí Ahaʼdeetʼą́ Ániidíii tsʼídá tʼáá beełtʼéego. Áádóó ádííniid éí diyin yá yáłtiʼígíí éí Christ átʼį́; ákondi éí bijį́ tʼah doo baa hoolzhíísh da “éí bízhiʼ doo dajíistsʼą́ʼígíí tʼáá ádzíłtso bitsʼáhizhdookahgo ádahodiʼdooldįįł,” ákondi tʼáadoo hodíínaʼí áhodoonííł.

41 Áádóó naaltsoos Joel biyiʼ wóltaʼii naaki góneʼ ałdóʼ yiyííłtaʼ, éí naadiin-tseebíí saad dashijaaʼ dóó ałtsojįʼ yiyííłtaʼ. Áádóó ałdóʼ ání díí éí tʼah doo boholnééh da, ákondi hodíínaʼgo bohodoolnííł. Áádóó ałdóʼ ádííniid Gentile dineʼé tʼáá ałtso tʼáá aaníinii bił ííshją́ą́ ádoolnííł. Áádóó ląʼída Diyin Bizaad yiyííłtaʼ, áádóó ląʼígo yaa nahaasneʼ éí kweʼé doo náhidoodzoh da.

42 Ánááshíłní, béésh óola tʼą́hí yaa yááłtiʼę́ę sheiníʼą́ągo—shaa dootʼáałjįʼ tʼah doo baa hoolzhíish da—doo éí háiida bichʼįʼ ííshjání ádeeshłíił da; áádóó ayidgi dasiʼánígíí Urim dóó Thummim biłgo ałdóʼ; bił ííshją́ą́ ádíílííł shidiʼdooʼniiłígíí tʼéiyá bichʼįʼ; ákwíisdzaago éí shidiʼyoolyééł. Béésh óola tʼą́hí yee shichʼįʼ yáłtiʼgo, shíniʼ bił áhoodzaago béésh óola tʼą́hí łeeyiʼ sinilígíí yiiłtsą́, dóó éí tʼáá íiyisíí yitʼį́ dóó tʼáá bahatʼaadígíí biniinaa áadi níyáago hazʼánígi bééhosésįįd.

43 Díí ałtso sidétsʼą́ąʼgo, hooghan góneʼ adinídínígíí éí bichʼįʼ yáshtiʼígíí binaagóó tʼéiyá tʼáadoo hodíínaʼí silį́į́ʼ, áádóó tʼáá ałchʼįʼ kwáánííłgo, wónáásdóó hooghan góneʼ chahałheeł náhásdlį́į́ʼ, tʼáá hazhóʼó hanaagóó tʼéiyá, áádóó tʼáá hooshchʼįʼ yáʼąąsh ąą ádzaa, dóó ákóde ííyáago áajįʼ ájísdįįd, áádóó hooghan góneʼ tʼah doo yáʼąąshdę́ę́ʼ adinídíín haleehę́ęgi átʼáo násdlį́į́ʼ.

44 Shił áhoodzaaígíí hazhóʼó baa ntséskeesgo sétį́, dóó haneʼ neiʼáhí doo łaʼ kótʼéego shił halneʼ da ńtʼę́ę́ʼgo tʼáá íiyisíí baa ntséskees; tʼáá íiyisíí baa ntséskeesgo, hooghan góneʼ yah anááʼdíídláád tʼáá hooshchʼįʼ baa ákonáániisdzįįh, dóó tʼáadoo hodíínaʼí shił nahalingo, tʼáá éí yáʼąąshdę́ę́ʼ haneʼ neiʼáhí tʼah ńtʼééʼ shitsáskʼeh bíighahgi náánásdzį́.

45 Ayánááʼniiłtiʼ, dóó áłtséédą́ą́ʼ níyáago yee haadzíʼę́ę yee hanáánáádzííʼ; tsʼídá doo łahgo átʼéego; ałtso yááłtiʼgo, nahasdzáán bikáaʼgi yéego ándahwiitʼaah yee shił nááhoolneʼ, dichin, daʼahijigą́, dóó naałniihii bee ndaʼastseed; dóó díí tʼáá naʼníleʼdii nahasdzáán bikáaʼgi ándahwiitʼaah éí kʼad oochíłígíí biyiʼ áhodoonííł. Tʼáadoo leʼé ałtso shił ííshją́ą́ ánaayiidlaago, áłtséédą́ą́ʼ ádzaayę́ęgi átʼéego dah nínáádiidzá.

46 Ákweʼé hoolzhishgo, shíniʼ tʼáá íiyisíí biʼdíisnáaʼgo biniinaa, doo bił nisingóó áshiilaa, áádóó yiiłtsą́ dóó sidétsʼą́ʼígíí tʼáá íiyisíí shiyaa hodeesyizgo sétį́. Shitsáskʼeh bíighahgi tʼáá éí haneʼ neiʼáhí náánásdzį́įgo bikʼee náádésyiz, dóó tʼáadoo leʼé áłtséédą́ą́ʼ yaa hoolneʼę́ę náásidétsʼą́ą́ʼ éí doodago yaa nááhoolneʼ áádóó baa áháshyą́ą dooleełígíí shił chʼíiníʼą́, Chʼį́įdii nanínítaahgo ninaalnish dooleeł shidííniid (Shizhéʼé bighan hazʼą́ągi doo daʼatʼínígíí biniinaa), béésh óola tʼą́hí ńdiitʼą́ągo bee ádeeshtʼįįłgo ałdóʼ shóʼní. Díí éí doo ádíílíił da shidííniid, Diyin God bee baa haʼniih dooleełgo tʼéiyá biniyé béésh óola tʼą́hí naadootʼááł shidííniid, áádóó Bisodizin bił nahazʼą́ą dooleełgo tʼéiyá bíká áshtʼį́į dooleeł nááná łaʼ éí dooda; doo kótʼéégóó éí doo shaa dootʼáał da.

47 Tááʼdi shaa níyá dóó bikʼijįʼ, áłtséédą́ą́ʼyę́ęgi átʼéego yáʼąąsh góde dahnááhodiidleʼ, dóó haashį́į́ yitʼéego shił áhoodzaaígíí yéego baa ntsínáánáskeesgo ánááshiidlaa; yáʼąąshdę́ę́ʼ haneʼ neiʼáhí tááʼdi shaa nádzá dóó tʼáá áko, naʼahóóhai ádííniid, dóó hoosʼįįd lá, áko ałchʼįʼ yéiltiʼgo tłʼééʼ bíighah azlį́į́ʼ lá.

48 Áádóó bikʼijįʼ shitsáskʼehdóó ńdiishʼnaʼ, dóó, naanish áshʼínéegóó dah diiyá; ákondi, shinaanish ánáshʼįįhyę́ę ábiʼniishłaago, sheʼedziilii tʼáá íiyisíí doo bitsxeʼgóó ndeeshnishyę́ę doo bííníshghagóó baa ákoniizį́į́ʼ. Shizhéʼé, shíighahgi yilnishgo, naanishyę́ę biʼoohneeshʼą́ągo yaa ákoniizį́į́ʼ, dóó hoghangóó nídídááh shidííniid. Kin siʼą́ą́góó ńdeeshdááł nisingo dah diiyá; ákondi dáʼákʼeh dóó tłʼóóʼjígo anítʼiʼ báhátixs yishááh ńtʼę́ę́ʼ; tʼáá ałtsojįʼ doo shidziil da sélį́į́ʼ, dóó niʼjįʼ doo shidziilgóó naaʼíítłizh, dóó haashį́į́ nízahjįʼ shił chʼaa hazlį́į́ʼ lá.

49 Tsʼídá áłtsé tʼáadoo leʼé bénáshniihígíí éí łaʼ shijózhíigo, shichʼįʼ yájíłtiʼ. Dego déghal ńtʼę́ę́ʼ tʼáá éí haneʼ neiʼáhí shitsijįʼ wódahgo náánásdzį́, áłtséédą́ą́ʼ bitsʼádinilíídę́ęgi átʼéego, áádóó áłtséétłʼę́ę́dą́ą́ʼ yee shił hoolneʼę́ę yee shił nááhoolneʼ, dóó nizhéʼé bichʼįʼ díínááł dóó nił ííshją́ą́ ályaayę́ę dóó bee hazʼáanii naaheesyáhę́ę bee bił hodíílnih shidííniid.

50 Bikʼeh hóółʼįįd; dáʼákʼehgi shizhéʼé baa nánísdzá, dóó tʼáá ałtso shił áhoodzaayę́ę bee bił hweeshneʼ. Diyin God bitsʼą́ą́dę́ę́ʼ nił áhoodzaa lá shidííniid, dóó haneʼ neiʼáhí yee nił hoolneʼígíí bikʼehgo aʼdíílííł shidííniid. Dáʼákʼehdóó dah diiyá, dóó haneʼ neiʼáhí béésh óola tʼą́hí łeeyiʼ sinil dííniidyę́ęgóó níyá; dóó tʼáá íiyisíí yitʼį́įgo shił áhoodzaaígíí biniinaa, áadi níyáago doo nanitłʼahgóó bikʼíníyá.

51 Manchestergi kin sinil bitsį́įgi, éí Ontario hahoodzoh biyiʼ, dóó New York ntsaago hahoodzohgi, ákweʼé tʼáá ntsaago dah yiskʼid. Dah yiskʼid eʼeʼaahjígo kʼasdą́ą́ʼ bílátahdi, tsé ntsaa léiʼ biyaagi, béésh tʼą́hí siʼą́, tsé nástłʼin biyiʼ góneʼ béésh tʼą́hí siʼą́. Díí tséhígíí bikááʼdę́ę́ʼ ałníiʼgi ditą́ dóó nímaz, dóó bibąąhjígo áłtʼą́ʼí, áko ałníiʼgi tʼéiyá yitʼį́, ákondi bibąąh gónaa éí łeezh bikʼi shijaaʼ.

52 Łeezh nahjįʼ íishłaago, tsin łaʼ ńdiitą́, éí tsé biyaa íítsih, dóó deʼíishłaa. Biyaa góneʼ dééʼį́į́ʼ, dóó béésh óola tʼą́hí, Urim dóó Thummim, dóó béésh ééʼ, haneʼ neiʼáhí yaa hoolneʼę́ę yiiłtsą́. Tsitsʼaaʼ biiʼaznilígíí tsé nádleehí biyiʼ tsé ałhąąh naheesnil nahalingo bee ályaa. Tsitsʼaaʼ bitłʼáahdi tsé naaki sinil, dóó bikáaʼgi béésh óola tʼą́hí dóó tʼáadoo leʼé łaʼígíí bił sinil.

53 Haashnííł ńtʼę́ę́ʼ, haneʼ neiʼáhí dooda shidííniid, dóó hadootʼáłígíí éí tʼahdoo baa hoolzhíish da nááshiʼdooʼniid, dį́į́ʼ nááhaigo índa shiʼdooʼniid, ákondi tsʼídá tʼááłáʼí nááhai azlį́įʼgo éí kweʼé hazʼą́ąjįʼ naadíídááł shidííniid, dóó áadi baa deeshááł, dóó tʼáá ákóshtʼį́įgo béésh óola tʼą́hí shaa dootʼáałjįʼ ahodoolzhish shidííniid.

54 Bee shił hóóneʼę́ę, bikʼehgo, tʼáá nináháhááh bikʼeh áadi náshdááh, dóó tʼáá éí haneʼ neiʼáhí néistsééh, dóó naʼnitin dóó bee ééhózinii shaa yiléehgo baa náshdááh, Diyin Bóhólníihii haʼátʼíí íidoolíłígíí shił nilį́įgo, dóó bił hazʼánígíí haitʼáo dóó haitʼéego akéeʼdi deiyoołkáałgo ádoolníłígíí.

55 Shizhéʼé bił áhootʼéhígíí éí doo ląʼí tʼáadoo leʼé bee hólǫ́ǫ da, nihílaʼ tʼéiyá íiyisíí bee ndeilnish, nááná łaʼ diné bá ndeilnish ákótʼáo béeso ádeilʼį́į́ ńtʼę́ę́ʼ áádóó nááná łah átʼáo ałdóʼ, naanish bee nihá náhooʼaahgo. Łahdi éí tʼáá hooghan bíighahgi nínádeilnish, áádóó łahda éí tʼáá nizaadi, áádóó tʼáá ákótʼáo ninádeilnishgo nihibéeso tʼáá náhádleeh ńtʼééʼ.

56 1823 yihahyę́ędą́ą́ʼ shínaaí alą́ąjįʼígíí, Alvin dah nídiidzáago shizhéʼé baʼáłchíní yił tʼáá íiyisíí bichʼįʼ nidahwiisʼnááʼ. Ghąąjįʼ, 1825 yihahgo, hastiin sání léiʼ Josiah Stoal wolyéego bá díshnish, éí Chenango hahoodzo, Ntsaago Hahoodzooígíí New York biyiʼdi. Éí Harmony, Susquehanna hahoodzogi, Ntsaago Hahoodzo Pennsylvaniadi ákweʼé Naakaii dineʼé béésh łigaii yíká hadaʼagééd ńtʼę́ęʼgo yaa hodiiztsʼą́ą́ʼ; dóó ákweʼé, tʼahdoo bá dishnííshyę́ędą́ą́ʼ, nidaʼageed ńtʼę́ę́ʼ, jó ákótʼáo, bił béédahodoozįįł biniyé, éí béésh łigaii haagééd hadeinitáá ńtʼę́ę́ʼ. Bił yah íínáádóó bikééʼdóó, bá díshnish, łaʼ bá ndaalnishígíí bił, éí béésh łigaii haagééd bíká ndaʼiigeed ńtʼę́ę́ʼ, éí tʼáá bá naanishgo kʼasdą́ą́ʼ ałtso nídeizid, áko chʼééh bíká nidaʼsiigeed, áádóó hastiin sání bił naʼashgeedígíí kʼad shį́į́ bíighah bidííniid. Éí shį́į́ biniinaa áádóó béeso yíká naʼageedii nilį́ shiʼdiʼníigo shaa haneʼ silį́į́ʼ.

57 Íídą́ą́ bá naashnishgo, Hastiin Isaac Hale bił yah ííná, ákweʼé hazʼą́ągi; sheʼasdzą́ą́ dooleełígíí áłtséʼ yiiłtsą́ (éí bitsiʼ nilį́įgo), éí Emma Hale wolyé. Yas Niłtʼees tseebíítsʼáadahgóó yoołkáałgo, 1827 yihah yę́ędą́ą́, ałhaa niitʼáázh, éí Hastiin Stoal tʼahdii bá naanishgo.

58 Tʼah Diyingo shił áhoodzaaígíí baa náháshnihgo, shikʼijįʼ ídlínígíí tʼahdii shił hólǫ́ǫ́ ńtʼę́ę́ʼ, áko éí biniinaa sheʼasdzą́ą́ bizhéʼé yił háájéʼígíí éí ahidiitʼázhígíí tʼáá íiyisíí yikʼijįʼ danilį́į ńtʼę́ę́ʼ. Éí biniinaa, shí, nááná łaʼ hazʼą́ągi bił deeshʼash niizį́į́ʼ; áko Shádiʼáahjigo Bainbridge, Chenango hahoodzo, Ntsaago Hahoodzo New Yorkdi niitʼáázh dóó Squire Tarbill bighangi ahaa niitʼáázh. Tʼáá asiigeh bikééʼdóó, Hastiin Stoal bighandóó chʼíníná, áádóó shizhéʼé bighangóó niitʼáázh, áádóó áadi éí kʼidoolyáhígíí biyiʼ bíká aashwod.

59 Índa béésh óola tʼą́hí, Urim dóó Thummim, dóó ayid bichʼą́ą́h siʼání hadooʼniłjįʼ ayííłką́. Biniʼantʼą́ą́tsohgi yiziłígíí naadiin–naakigóó yoołkáałgo, tʼááłáhádi mííl dóó baʼaan tseebíidi neeznádiin dóó baʼaan naadiin–tsostsʼidgóó yihahgo, nínáánááhai bikʼeh łeeyiʼ sinilyę́ęgi nínáánísdzáago, tʼáá éí yáʼąąshdę́ę́ʼ haneʼ neiʼáhí sheiníʼą́ kóshiłníigo: Baa áhólyą́ą doo; tʼáá naʼníleʼdii naashʼáago shitsʼą́ą́ʼ ńdiitʼą́ągo, éí doodago tʼáá ádzaagi átʼéego naashʼáago, tʼóó nahjįʼ kóshidiʼdoolnííł; ákondi tʼáá ałtso bee hadíníshtʼéhígíí bee baa áháshyą́ągo, áko éí, haneʼ neiʼáhí, yíká nádzáajįʼ, éí baa áháshyą́ą doo.

60 Haʼátʼíí biniyé tʼáá íiyisíí baa áhólyą́ shiʼdooʼniidígíí shił bééhoozin, dóó haneʼ neiʼáhí haʼátʼíí biniyé tʼáadoo leʼé ádíílííł shiʼdooʼniidyę́ę íishłaago, shaa ńdoodááł dóó nínéididootʼááł. Tʼáá áko diné díí naashʼáhígíí bił béédahoozingo, ląʼída tʼáadoo leʼé bee shighaʼdootʼáłígíí chodayoosʼįįd. Tʼáá ałtso bee aghaʼdooʼniłgo baa ntsáháskézígíí yee chʼééhʼáálʼįįd. Achʼįʼ nahwiiʼnánígíí tʼóó tsíkʼeh dóó tʼóó tsé ádin silį́į́ʼ, dóó ląʼída diné shighadeidootʼáałgo áłahjįʼ hadashisííd. Ákondi Diyin God bibee ééhózinii binahjįʼ, baa áháshyą́ągo shílákʼee siʼą́ą́ ńtʼę́ę́ʼ, ádíílííł shiʼdooʼniidyę́ę ałtso íishłaago índa. Yee nahoníʼánée bikʼehgo, haneʼ neiʼáhí yíká nádzá, dóó baa níʼą́; dóó díí jį́įdi yaa áhályą́, Tʼą́ą́tsoh yiziłígíí naakigóó yoołkáałgo, tʼááłáhádi mííl dóó baʼaan tseebíidi neeznádiin dóó baʼaan tádiin dóó baʼaan tseebíígóó yihahgo.

61 Ákondi bíhoneedlínígíí, éí eíyá, tʼahdii náás kwóónííł, áádóó shizhéʼé bikʼéí dóó shí, tʼáá ádzaagóó nihaa haneʼ ląʼí silį́į́ʼ. Dimííl ánéelą́ąʼgo baa náhweeshneʼgo, éí ląʼígo naaltsoos sinilgo ałtso naʼasdzo yee haididoolííł. Ákótʼée ndi, atínihiʼdilʼínígíí biniinaa, Manchesterdóó dah diiyáago tʼéiyá bíighah niizį́į́ʼ, áádóó sheʼasdzáá bił Susquehanna hahoodzogóó niitʼáázh, Pennsylvania Bináhásdzodi niiʼná. Hahoolzhííshgo hashtʼeʼádiilnéehgo—yéego téʼéʼį́ biiʼ neitʼaashgo, dóó yéego atínihiʼdilʼínígíí biniinaa doo łahgi átʼéego—díí achʼįʼ nahwiiʼná biiʼ yiitʼashgo Martin Harris hastiin nihikʼis silį́įʼgo bikʼíniitʼáázh, éí nihaa níyá dóó ashdladiin béeso nihainínil éí binahjįʼ náásgóó yiiʼnééł doo biniyé. Hastiin Harris éí Palmyra kin dashijaaʼ, Wayne hahoodzogi kééhatʼį́, New York Bináhásdzodi, éí diné yáʼátʼéehii kʼééʼdídlééhii nilį́įgo bééhoʼdílzin.

62 Díí nihíkáʼaʼoowodígíí biniinaa Pennsylvaniagóó deeshááł nisinéejįʼ niiʼná; áádóó áadi níyáago tʼáá hodinaʼí béésh óola bikááʼ naʼasdzooígíí bééʼáshdléehgo baa ńdiisdzá. Tʼáá ląʼí bééʼiishdlaa, Urim dóó Thummim bee łaʼ bilagáana bizaadkʼehjí íishłaa, éí sheʼasdzáá bizhéʼé bighangi níyáago íishłaa, éí Níłchʼitsoh, dóó Atsá Biyáázh yiziłjįʼ íishłaa.

63 Atsá Biyáázh biyiʼ hoolzhishgo, Hastiin Martin Harris yíízhiʼę́ę nihaaníyá, dóó béésh óola bikááʼdóó bééʼiishdlaayę́ę neidiinil, dóó kin haalʼá New Yorkgóó dahyidiijaaʼ. Bí dóó naʼasdzoh bił áhoodzaaígíí, tʼáá bí yaa naʼíízooígíí yaa hodoolnih, éí nádzáago shił yiyííłtaʼ, éí kótʼéego yaa hoolne:

64 “Kin haalʼá New Yorkgóó níyá, naʼasdzo bilágáana bizaadjí ályaaígíí, éí ályaaígíí, Hódahgo Óltaʼdi Naʼniłtiní Charles Anthon, éí hastiin naadzojí bee bééhoʼdílzin. Hódago Óltaʼdi Naʼniłtiní Anthon ání bilagáana bizaadkʼehjí ályaaígíí tsʼídá tʼáá ákótʼáo ályaa, éí Egypt bizaadjí hózhǫ́ biláahgo nizhónígo bééʼályaa dííniid. Áádóó tʼah doo bilagáana bizaadjí álnéhígíí bił ííshją́ą́ íishłaa, áádóó ání áko éí Egyptjí dóó Chaldaic dóó Assyriac dóó Arabic bizaadjí ádaatʼé shidííniid; áádóó tʼáá aaníigo áájí ndaʼasdzoh shidííniid. Áádóó naaltsoos díí tʼáá aaníí átʼé níigo bikááʼgo sheiníłtsooz, éí Palmyragi dineʼé kéédahatʼínígíí díí tʼáá aaníí daasaadígíí dóó bilagáankʼehjí ályaa níigo ałdóʼ yichʼįʼ áyiilaa bízhiʼ bikááʼgo, áádóó díí bikʼedaʼashchínígíí tsʼídá tʼáá ałtso tʼáá ákótʼéego bikʼedaʼaschį́. Éí naaltsoos bízhiʼ bikáʼígíí shizaʼazis góneʼ ííłtsooz, áádóó tsʼídá bighandóó dahdiisháahgo, Hastiin Anthon hágo shidííniid, dóó nashídééłkid haash yitʼáo ashkii ániid naagháii bił bééhózin haaʼígi béésh óolaa bikʼi naʼadzoyę́ę sinilgo. Áádóó bee bił hweeshneʼ Diyin God bá naalʼaʼí bił ííshją́ą́ áyiilaa.

65 “Áádóó áshíłní, ‘Naaltsoos shízhiʼ bikááʼ íishłaaígíí néshʼį́.’ Áádóó shizaʼazisdóó hááłtsooz dóó baa níłtsooz, néidiiłtsoozdóó ałtso neiyiizǫ́ǫ́z, kóníigo kʼad yeeʼ doo Diyin yá naalʼaʼí aadahakáahii hólǫ́ǫ da, dóó béésh óola bikááʼ naʼasdzo sháiníjaaʼgo bilagáana bizaadkʼehjí ádeeshłííł shidííniid. Áádóó łahdóó béesh óola éí bidáʼdeeljééʼ bidíínid, áádóó deeshjihígíí éí doo bee shá hazʼą́ą da. Áádóó ádííniid, ‘Naaltsoos ahéshjééʼii yídéeshtahgo doo bííníshghah da.’ Áádóó bitsʼą́ą́ʼdóó dah diiyá dóó Dr. Mitchell baa níyá, éí Hódahgo Óltaʼdi Naʼniłtiní Anthon naʼadzoh bił nilínígíí dóó bilagáana bizaadkʼehjí ályaaígíí tʼáá aaníí tʼáá ákótʼé dííniid.”

· · · · · · ·

66 Tʼą́ą́chil ashdlaʼgóó yoołkáałgo, tʼááłáhádi mííl dóó biʼaan tseebíídi neeznádiin dóó biʼaan naadiin náhástʼéígóó yihahgo, Oliver Cowdery shighangi níyá, éí tʼah doo yistsééh da ńtʼę́ę́ʼ. Áádóó ání nizhéʼé kééhatʼį́įgi óltaʼ binaagi naʼnishtin ńtʼę́ę́ʼ, dóó shizhéʼé baʼáłchíní ákweʼé daʼííłtaʼ, dóó tʼóó hóníshgháníjįʼ bighangi sédáago łahgo áhoonííł azlį́į́ʼ, ákweʼé sédáago bił háájééʼ béésh óola sheiyíjaaʼgo shił áhootʼéhígíí yee yił daholneʼ, éí bikʼehgo níyáago shínaʼídéełkid.

67 Hastiin Cowdery níyáádóó naaki yiską́ągo (Tʼą́ą́chil tsostsʼidgóó yoołkááłgo) Naaltsoos Mormon Wolyéhígíí bilagáana bizaadkʼehjí áshłéehgo baa nínáádiisdzá, áádóó bí éiyá shá naʼazohgo yaa ńdiidzá.

· · · · · · ·

68 Áádóó bilagáanakʼehjí íilnéhígíí tʼahdii bineilnish, áko, nínáádeezidgo (Tʼą́ą́tsoh, tʼááłáhádi mííl dóó biʼaan tseebíídi neeznádiin dóó biʼaan naadiin náhástʼéígóó yihahgo), łaʼ ajį́ tsiyiʼgóó niitʼáázh sodidiilzįįł biniyé dóó Diyin Bóhólníihii tó bee alzį́į́h binahjįʼ bąąhági átʼéii niʼ kólʼįįh bínaʼadídíílkiłgo, áko éí béésh tʼą́hí bilagáanakʼehjí íilnééhę́ę bikááʼ. Áádóó neilnishgo, sodiilzin dóó Diyin Bóhólníihii bichʼįʼ náʼiikąąhgo, yáʼąąshdę́ę́ʼ kʼos biyiʼ adinídíín biyiʼdę́ę́ʼ haneʼ neiʼáhí nihaa níyá, áádóó nihitsʼiitʼááhgi dahdeesniiʼ, dóó kóníigo, nihíísį́į́ʼ:

69 Shił naołʼaʼí nohłíinii, Messiah bízhiʼ binahjįʼ Diyin Bibeʼadziilii Aaron Wolyéhígíí nihąąh ninishłé, éí Diyin yá nidaalʼaʼí ákáʼandaajahí bibee ąą ńdaditį́hí dahdeiyójááhgo yee nidaalnish dooleeł, dóó Diyin binaʼnitin bee yisdáʼiildéehii bibee ádaa náʼookąąh, dóó tó bee ilzį́į́h éí tó hakʼidiilkǫǫh binahjįʼ bąąhági ádaatʼéii nahjįʼ kólʼįįh; dóó díí tsʼídá doo nahasdzáán bikááʼdóó nínáádidoolyééł da, éí Levi biyeʼké diyinkʼehgo iiná Diyin Bóhólniihii yichʼįʼ nínáádaʼiisniiʼgo índa.

70 Kóní díí Diyin Bibeʼadziilii Aaronic Wolyéhígíí éí doo atsiitʼááh adziilii bee dahdiʼdoolnihgo Iiʼ Sizį́ Diyinii aadoolyééł da, ákondi díí bikééʼdóó bee nihikʼihodidoonih; áádóó yíwohjįʼ tó bee nihidiʼdoolzįįł nihidííniid, áádóó haitʼáo Oliver Cowdery tó bee yideesį́łígíí nihił ííshją́ą́ áyiilaa, áádóó éí bikééʼdóó tó yee shiidoosį́į́ł.

71 Éí bikʼehgo ákǫ́ǫ́ niitʼáázhgo tó bee nihiʼdoolzį́į́ʼ. Shí áłtsé tó bee hwíísį́į́ʼ, áádóó bikééʼdóó éí shí tó yee shíísį́į́ʼ—éí bikééʼdóó bitsiitʼááh dahdéshniiʼ dóó Diyin Bibeʼadziilii Aaronic bee yíísį́į́ʼ, áádóó éí bikééʼdóó shitsiitʼááh dah déesniiʼ dóó tʼáá éí Diyin Bibeʼadziilii yee shíísį́į́ʼ—háálá kótʼáo ádoohłííł nihiʼdooniid.*

72 Áádóó haneʼ neiʼáhí kweʼé hoolzhishgo nihaa níyá dóó Diyin Bibeʼadziilii yee nihíísį́į́ʼ, éí John yinishyé nihidííniid, éí tʼáá éí John Tó Yee Iisį́įhii éí Ániid bee Áłhaʼdeetʼáanii biyiʼ ákóolyé, áádóó Peter dóó James dóó John yiyaadóó kódíínííł dabiłníigo éʼiilaa, éí Diyin Bibeʼadziilii Melchizedek bibee aandítį́hí dah deiyóójááh, éí Diyin Bibeʼadziilii, náásgóó bee nihidiʼdoolzį́į́ł, dííniid, áádóó shí éí Sodizin Bá Hooghandóó áłtsé Elder nishłį́įgo bee shidíʼdóojiił, áádóó bí (Oliver Cowdery) naaki góneʼ bidiʼdoolzį́į́ł. Áko Tʼą́ą́tsoh ashdlaʼáadahgóó yoołkááł, tʼááłáhádi mííl dóó biʼaan tseebíídi neeznádiin dóó biʼaan naadiin náhástʼéígóó yihahgo, éí haneʼ neiʼáhí bílaʼ yee nihikʼi déesniiʼgo óʼoolʼįįł niheinílá, dóó tó yee nihíísį́į́ʼ.

73 Tó bee nihiʼdoolzį́į́ʼ bikééʼdóó tsʼídá tʼó biyiʼdóó haitʼáázhgo, NihiTááʼ Yáʼąąshdi Hólóonii ayóó átʼéego dóó ayóó átʼáo nihikʼihojisdliʼígíí nihił ádzaa. Oliver Cowdery tó bee yíísį́į́ʼ dóó tʼáá hooshchʼįʼ, Iiʼ Sizį́ Diyinii bił hazʼlį́į́ʼ, áádóó yiizįʼ dóó tʼáá tsxíłígo diyingo ádahodooníłígíí ląʼígo baa hodoolzhishígíí yaa hoolneʼ. Áádóó nááná, tsʼídá tó yee shíísį́įʼgo, shidóʼ náásgóó diyingo ádahodooníłígíí shił hólǫ́ silį́į́ʼ, áko, sézį́įgo, Sodizin Bá Hooghan ntsaago dínóóséłígíí baa hweeshneʼ, dóó lą́ʼída Sodizin Bá Hooghan bídadéétʼiʼígíí, dóó díí nihokááʼ dineʼé baʼáłchíní ałkʼééʼ daʼáchíhígíí ałdóʼ baa hweeshneʼ. Iiʼ Sizį́ Diyinii ląʼígo nihiiʼ hazʼlį́į́ʼ, dóó Diyin God Nihi yisdáʼiiníiłii baa nihił hóózhǫǫd.

74 Nihíniʼ kʼad bił ééhoozin, Diyin bizaad bikʼeʼdiyitįįhgo nihił ąą ádzaa, dóó tʼáá aaníigo dóó biniyéí hólǫ́ǫgo doo bikʼiʼdiitįįh yę́ę índa áłtséédą́ą́ʼ chʼééh bikʼeʼdiitįįh yę́ę, éí doodago áłtséédą́ą́ʼ tsʼídá doo bííniighah da yę́ę nihił ííshją́ą́ ályaa. Áádóó Diyin Bibeʼadziilii nihaiyílyá dóó tó bee nihiʼdoolzį́į́ʼ áhoodzaaígíí nanohłʼin doo nihiʼdooniid, áádóó biniyé baaʼáhółyą́ nihiʼdooʼniidígíí tʼáá íídą́ą́ʼ dahooghan tahgóó bił béédahózin silį́į́ʼ.

75 Diné daʼóółchʼį́dígíí atídanihidiilníił daaní, tʼáá ahą́ą́h hoolzhishgo, áádóó díí, oodląʼ yíndaʼniłtiní, ałdóʼ. Áádóó sheʼasdzą́ą́ binálí danilínígíí béédahoʼdílzinígíí binahjįʼ doo atídanihiléeh da (éí Diyin nihikʼi déezʼį́ʼígíí biniinaa), éí ayóó shichʼihjí danilį́ daazlį́į́ʼ, éí éí dinéʼ daʼahoołchʼídígíí doo bił yáʼádaatʼéeh da, áádóó bilagáanakʼehjí naʼasohgo shinaanishígíí éí doo nahjįʼ kódeeshłííłgóó shá deinízin; éí bąą bee hazʼáanii doo yikʼeh dahółʼínígíí bikʼijįʼ nihaa ádahwiilyą́ą doo danihidííniid, tʼáá yídaneelʼánígíí bikʼehgo.