1 Áádóó Adam Diyin God bízhí yik’ehóół’įįd, áádóó biye’ké ádaa ńda’oohkąąh yidííniid.

2 Áádóó nááná Adam be’asdzą́ą́, biyáázh yishchį́, dóó Seth yee yiyíízhi’. Áádóó Adam Diyin God bízhi’ ayóó át’áo yidóósin ńt’ę́ę́’; háálá kódííniid: Diyin God álástsii’ ła’ shee nááhodoodleełgo yee shik’idiilnii’, Abel éí ndaga’, éí Cain biisyį́.

3 Áádóó Diyin God éí Seth yich’į’ ííshją́ą́ á’diilyaa, áádóó doo ak’ijį’ silį́į́’ da, ákondi náá’iiłniihgo bee bá lą́ ázlį́į́’, bínaaí Abel ádzaaígi át’áo. Áádóó bí ałdó’ biye’ hazlį́į́’, áádóó Enos yee yiyíízhi’.

4 Áádóó díí hastóí Diyin Bóhólníihii bízhi’ yinahjį’ sodadilzin daazlį́į́’, áádóó Diyin Bóhólníihii bik’ihojisdli’;

5 Áádóó naaltsoos bee ééhaniihii deiníʼą́, éí Adam bizaadk’ehjí biyi’ ńda’asdzoh, háálá t’áá háida Diyin God yich’į’ sodoolzingo ii’ sizíinii yik’ehgo nda’azoh doo;

6 Áádóó ba’áłchíní da’ółta’ dóó nda’azohgo yee ndeineeztą́ą́’, éí bizaad hadaałt’é dóó doo yíchxǫ’ da.

7 Áádóó t’áá éí Diyin Bibe’adziilii, éí hodeeyáádą́ą́’ hólǫ́, áádóó ńléí nihoníyáajį’ ałdó’ hólǫ́ǫ doo.

8 Áádóó díí diyingo áhodooníłígíí Adam yaa haadzíí’, éí Ii’ Sizį́ Diyinii binahjį’ nabiiłnáago haadzíí’, áádóó Diyin God ba’áłchíní ałkéé’ da’íchííh yaa halne’go naaltsoos ndei’á. Áádóó díí naaltsoos éí Adam ba’áłchíní ałkéé’ daazhchínígíí biyi’ dabikáá’, kóníigo: Diyin God diné áyiilaa, dóó éí Diyin God bínoolningo áyiilaa;

9 Éí bits’íísígíí t’áá bináłt’éego, hastiin dóó asdzą́ą́, áyiilaa, dóó yik’ihojisdli’, áádóó Adam yee yiyíízhi’, áádóó éí bijį́ ádabi’diilyaago dahiná daazlį́į́’ éí Diyin God bik’i dah adées’eezí nahasdzáán bikáa’gi.

10 Áádóó Adam éí t’ááłá’ídi neeznádiin dóó bi’aan tádiin binááhái, biye’ t’áá bínoolningo yizhchį́, dóó t’áá bí bináłt’éego, dóó Seth yee yiyíízhi’.

11 Áádóó Adam biyoołkaał, Seth bá yizhchį́į́dóó, tseebíidi neeznádiin nááhai, biye’ké dóó bitsi’ké lą’í bá daazhchį́;

12 Áádóó Adam t’áá át’é biiníłkánígíí éí náhást’édiin dóó bi’aan tádiin nááhai, áádóó dahnídiidzá.

13 Seth éí t’ááłá’ídi neeznádiin dóó bi’aan ashdla’ nááhaijį’ hináá ńt’ę́ę́’, áádóó Enos bá yizhchį́, áádóó diyingo ádahodooníłígíí yaa hoolne’go biiníłką́, dóó biye’ Enos Diyin God bina’nitinígíí yee neineeztą́ą́’; ákohgo Enos ałdó’ diyingo ádahodooníłígíí yaa hoolne’.

14 Áádóó Seth, Enos bá yizhchį́, dóó hináago tseebíídi neeznádiin dóó bi’aan tsosts’id binááhai, áadi biye’ké dóó bitsi’ké lą’ída náádahaasdlį́į́’.

15 Áádóó díí kéyah tʼáá ałtso bikááʼgóó nihokáá’ dine’é ba’áłchíní lą’í silį́į́’. Íídą́ą́’ Ch’į́įdii t’áá áwołí bee nihokáá’ dine’é yik’i bóhólnííh ńt’ę́ę́’, dóó bijéí biyi’ bádahachį’go áyiilaa; dóó éí bits’ą́ą́dóó anaaʼí dóó na’altseed hazlį́į́’; áádóó t’áá dabik’is ndi ndeiłtseed, ákohgo yik’ijį’ danilį́įgo nda’ałtseed, háálá nanil’ingo na’anishígíí biniinaa, éí adziilii yiyi’ hadeinitá.

16 T’áá át’é Seth biiníłkánígíí éí náhásts’éídi neeznádiin dóó bi’aan naakits’áadah binááhai, áádóó dahnídiidzá.

17 Áádóó Enos náhást’édiin binááhaigo, Cainan bá yizhchį́. Áádóó Enos dóó Diyin God bidine’é ch’éédzí’ígíí kéyahdóó ch’íníná, éí Shulon hoolyé, dóó kéyah bee ádééha’oodzíi’gi kééhat’į́į ńt’ę́ę́’, éí t’áá bí biye’ bízhi’ yee yiyíízhi’, Cainan yee yiyíízhi’.

18 Áádóó Enos, Cainan bá yizhchį́, dóó hináago tseebíidi neeznádiin dóó bi’aan ashdladiin binááhai, áádóó biye’ké dóó bitsi’ké lą’ída náádahaasdlį́į́’. T’áá át’é Enos biiníłkánígíí náhást’éídi neeznádiin dóó bi’aan ashdla’ nááhai, áádóó dahnídiidzá.

19 Áádóó Cainan hináago tsosts’idiin nááhai, áadi Mahalaleel bá yizhchį́; áádóó Cainan Mahalaleel bá yizhchį́į́dóó tseebíidi neeznádiin dóó bi’aan dízdiin nááhai t’ah hináago, áádóó biye’ké dóó bitsi’ké dahazlį́į́’. Áádóó t’áá át’é Cainan biiníłkánígíí éí náhást’éídi neeznádiin dóó bi’aan neeznáá nááhai, áádóó dahnídiidzá.

20 Áádóó Mahalaleel hastą́diin dóó bi’aan ashdla’ binááhaigo, Jared bá yizhchį́; áádóó Mahalaleel, Jared bá yizhchį́į́dóó, tsebíídi neeznádiin dóó bi’aan tádiin nááhai, áádóó biye’ké dóó bitsi’ké lą’ída dahazlį́į́’. Áádóó t’áá át’é Mahalaleel biiníłkánígíí éí tseebíídi neeznádiin dóó bi’aan náhást’édiin dóó bi’aan ashdla’ nááhai, áádóó dahnídiidzá.

21 Áádóó Jared hináago t’ááłáhídi neeznádiin dóó bi’aan hastą́diin dóó bi’aan naaki binááhai, Enoch bá yizhchį́; áádóó Jared hináago, Enoch bá yizhchį́ éí bikéé’dóó, tseebídi neeznádiin binááhai, áádóó biye’ké dóó bitsi’ké lą’ída dahazlį́į́’. Áadóó Jared éí Enoch neineeztą́ą́’ t’áá ałtso Diyin God bik’ehgooígíí.

22 Áko díí eíyá Adam biye’ké ałkéé’ da’ízhchínígíí át’é, éí Diyin God biye’ nilį́į, éí Diyin God, t’áá bí, yił yááłti’.

23 Áádóó yá’át’éehii yik’ehgo nda’nitiní danilį́į ńt’ę́ę́’, dóó diyingo ádahoonííł yaa hadahaasdzíí’ dóó yaa yádááłti’, dóó t’áá ałtso nihokáá’ dine’é, t’áá ałtsogóó, ádaa ńda’oohkąąh; áádóó da’iinohdlą́ deiłníigo nihokáá’ dine’é ba’áłchíní ndeineeztą́ą́’.

24 Áádóó baa hoolzhiizh t’áá át’é Jared biiníłką́ągo éí náhást’éídi neeznádiin dóó bi’aan hastą́diin dóó bi’aan naaki nááhai, áádóó dáhnídiidzá.

25 Áádóó Enoch hináago hastą́diin dóó bi’aan ashdla’ binááhai, áadi Methuselah bá yizhchį́.

26 Áádóó baahoolzhiizh Enoch keyahgóó dahdiiná, dine’é bitahgóó; áádóó ákǫ́ǫ́ yinéełgo, Diyin God biʼIiʼ Sizį́ Diyinii yá’ąąshdę́ę́’go bik’ihoole’, dóó bił hólǫ́ǫ́ ńt’ę́ę́’.

27 Áádóó yá’ąąshdę́ę́’ iinéé’ yidiizts’ą́ą́’, kóníigo: Shiye’, Enoch, diyingo ádahodooníłígíí díí diné bee bił dahólne’, dóó kóbididííniił—Ádaa ńda’oohkąąh, háálá Diyin Bóhólníihii kóní: Díí diné bich’į’ sháháchį’, dóó t’áá awołí bee bich’į’ sháháchį’ séł’ą́; háálá bijéí yéego deistł’is, áádóó bijaa’ doo yee da’diits’a’ da daazlį́į́’, dóó bináá’ yee doo nízaadgóó da’oo’į́į da;

28 Áádóó díí lą’í da ałkéé’ ńda’azhchį́, t’áá hadadiishłaa dóó hóshdę́ę́’, t’áá át’é t’áá bí ádeinízinjígo dah dahidiikai, dóó yóó’aheeskai dóó doo dashinízin da, dóó t’áá bí chahałheeł biyi’ nda’ahinitin; áádóó bąąhági ádaat’ínígíí biyi’ nda’ahiltseedgo ádeiyiilaa, áádóó bee haz’áanii doo yik’eh dahół’į́į da, éí bizhé’é baa níláhę́ę, Adam.

29 Ákohgo, t’áá ałtso yee ak’ijį’ hadahaasdzíí’, dóó, yee ádéíhadaasdzíí’, dóó anoonééł ak’ideideest’ą́; dóó doo ádaa ńda’ooskangóó, éí ch’į́įdiitah bá hasht’eishłaa;

30 Áádóó díí éí bee nihoní’ą́, éí hodeeyáádą́ą́’ bee nihoní’ą́, t’áá shí shizéé’dóó, bee hahoolzhiizhdóó, áádóó shá ndaal’a’í bizéé’dóó bee, danihizhé’é, éí áádóó bee nihoní’ą́, azhą́ áádóó adahwiisáágóó, bich’į’ kódoolníiłgo.

31 Áádóó Enoch díí saad yidiizts’ą́ą́’go, nahasdzáán yich’į’ yaa kódzaa, Diyin Bóhólníihii bidááhdóó, áádóó Diyin Bóhólníihii yich’į’ haadzíí’, kóní: Haash yit’áo shaa hosínídli’, áłchíní nishłį́, dóó t’áá ałtso diné dashijoołá; háálá doo tsxį́į́ł yáshti’ da; ákohgo ná naash’a’í nishłį́į doo?

32 Áádóó Diyin Bóhólníihii Enoch kwííłní: Ńlááh yínááł dóó shibee haz’áanii bik’eh í’ił’į́į doo, dóó diné doo ła’ átíndoolííł da. Nizéé’ ąą ádíílííł, dóó saad bee hadíídzihígíí bii’ hólǫ́ǫ dooleeł, dóó bee hadíídzihígíí naadeeshłééł, háálá t’áá ałtso ats’íís danilíinii éí dah yishjih, dóó t’áá shí yá’át’ééhígíí ádeeshłííł.

33 Díí diné kóbididííniił: Dííjį́ nídadoołé, Bóhólníihii Diyin God ánihiilaaígíí bá ndaał’a’.

34 Áko shooh shi’ii’ Sizį́ Diyinii éí nihił dahólǫ́, ákohgo t’áá át’é nizaadígíí bee lą́ adeeshłeeł; áádóó dził daní’áhígíí nits’áhidoojah, dóó tooh danílínígíí nááná łahjigo danílį́į doo; áádóó shił honílǫ́ǫ dooleeł, áádóó Shí éí nił honishłǫ́ǫ dooleeł; éí bąą shił yí’ash.

35 Áádóó Diyin Bóhólníihii Enoch yich’į’ haadzíí’, áádóó ííłní: Nináá’ hastł’ish bąąh ánílééh, áádóó bąąh táánígis, áádóó ííní’į́į doo. Áádóó yihoolaa.

36 Áádóó Diyin God ii’ naazíinii hadeidiilaayę́ę yiyiiłtsą́; áádóó ats’íísk’ehgo anaa’ doo bee daat’ínígíí deiyiiłtsą́; áádóó nahasdzáán bikáa’gi t’áá ałtsogóó kóhá’ní: Diyin Bóhólníihii éí bidine’é yá oo’íinii yineesą́.

37 Áádóó baa hoolzhiizh Enoch kéyah yikáá’góó dahdiiyá, diné yitahgóó, dahdaask’id dóó hódahgo ndahaz’ą́ yikáá’ sizį́įgo, áádóó ayóó ííts’a’go biinéé’ yee hadoolghaazh, bindaanishígíí yik’ijį’ haadzíí’; áádóó t’áá ałtso nihokáá’ dine’é dabijoosłáá’ bí biniinaa.

38 Áádóó dabididoots’į́į́ł biniyé nidahaaskai, hódahgo ndahaz’ą́ągóó níbaal yaa ádahalyánígíí kódeiłníigo: Kwe’é dahonóhłǫ́ áádóó níbaal kwe’é baa ádahołyą́, nihí éí ńléíjigo oo’íinii deidiiltsééł, háálá diyingo áhodooníłígíí yaa halne’, áádóó ałdó’ kéyah bikáá’góó doo bééhó’dílzinii naaghá; dine’é doots’íidii nihaa níyá.

39 Áádóó baa hoolzhiizh deidiizts’ą́ą’go, ádin diné t’áadoo ła’ bidoolchid da; háálá t’áá ałtso dabidiizts’ą́’ígíí béédaasdzííd; háálá Diyin God yił naa’aash.

40 Áádóó hastiin ła’ baa níyá, éí Mahijah wolyéego, dóó iidííniid: Hazhó’í shił hólne’ háílá ánít’į́, dóó háádéé’ísh yínááł?

41 Áádóó kwíídííniid: Kéyah Cainandę́ę́’ yishááł, shizhé’é bikéyahdę́ę́’, dííshjį́į́góó t’ah diyingo da’iináádę́ę́’. Áádóó shizhé’é Diyin God bina’nitinígíí t’áá át’é yee nashineeztą́ą́’.

42 Áádóó baa hoolzhiizh, kéyah Cainandę́ę́’ yishááłgo, ha’a’aahjigo tónteel bąąhgi, áadi diyingo shił áhoodzaa; áádóó shooh, yá’ąąsh yiiłtsą́, áádóó Diyin Bóhólníihii shich’į’ haadzíí’, áádóó bee haz’áanii ła’ sheinílá; ákohgo, díí biniinaa, bee haz’áanii bik’eh honish’į́, díí saad bee nihich’į’ haasdzíí’.

43 Áádóó Enoch hanáánáádzíí’, kóníigo: Diyin Bóhólníihii shich’į’ haadzíí’ígíí, éí yá’ąąsh biDiyin God át’į́, áádóó bí éí shiDiyin God nilį́, áádóó nihído’ nihiDiyin God, áádóó nihí éí shik’iské danohłį́, áádóó ha’át’íísh biniyé bee ałch’į’ hadahohdziih, dóó yá’ąąshdę́ę́’ Diyin God nahjį’ kódaohłaa?

44 Yá’ąąsh ádaat’éii áyiilaa; dóó nahasdzáán éí yikáá’ dahdéis’eezii át’é; áádóó biyaa siléí éí bí. Áko shooh, bí éí haidiilaa, lą’í da nihokáá’ dine’é yikáá’ neinínil.

45 Áádóó anoonééł éí danihizhé’é yaa haaskai; áko nihí éí béédahoniilzin, dóó doo nahjį’ kódeilnééh da, dóó ts’ídá áłtsé haz’lį́’ígíí ałdó’ t’áá áníiltso béédahoniilzin, éí Adam.

46 Háálá naaltsoos bee ééhaniihii éí nihitahgóó bii’ nída’siidzoh, éí Diyin God bilázhoozh bik’ehgo; áádóó éí t’áá nihí nihizaad bik’ehgo niheiyílyá.

47 Áádóó Enoch Diyin God bizaad yee hahaasdzíí’, diné daditsxiz, dóó hónáásdóó doo yidááhdóó naazį́įgo doo yídeiíghah da.

48 Áádóó kwíídííniid: Adam asihígíí biniinaa, dóó díí nahasdzáán bikáa’jį’ kóbi’diilyaaígíí binahjį’ anoonééł haz’lį́į́’; nihídó’ ákónihi’diilyaa; áádóó nihí éiyá doo yá’át’éehii dóó yíiyá tiʼhooʼnííh bii’ yiikah doogo nihá ályaa.

49 Áko shooh Ch’į́įdii nihokáá’ dine’é ba’áłchíní yitah níyá, áádóó shí shich’į’ ndahołá yił níigo yizáhooní’aahgo yaa ńdiidzá; áádóó nihokááʼ dineʼé tʼáá ałtso atsʼíískʼeh deiyíkááhii dóó atsʼíís deinizinii, dóó bidaʼiinízįįd, dóó Diyin God bił hazʼą́ bich’į’ bidáʼdeelkaal.

50 Ákot’ee ndi Diyin God nihizhé’é díí yił ííshją́ą́ áyiilaa t’áá ałtso nihokáá’ dine’é ádaa ńda’ookąąh doo.

51 Áádóó t’áá bí biinéé’ yee nihizhé’é Adam yich’į’ haadzíí’, kóníigo: Shí éí Diyin God nishłį́; nahasdzáán ííshłaa, áádóó nihokáá’ dine’é t’ahdoo ats’íís baa dahalyéyę́ędą́ą́’ ííshłaa.

52 Áádóó bí ałdó’ iidííniid: Shich’į’ nidahohkááhgo, dóó shiinéé’ bik’eh dahonoł’į́įgo, dóó deinohdlą́ągo, dóó nihibąąhági ádaat’éii t’áá ałtso baa ádaa ńda’oohkąąhgo, dóó tó bee danihi’diilzį́į́’go, tó biyi’ ndi, éí T’áá Éí Tʼéiyá Shá Yizhchíinii bízhi’ binahjį’, éí ajooba’ dóó t’áá aaníinii bee hólǫ́, éí Jesus Christ, ts’ídá t’áá éí t’éiyá yá’ąąsh biyaadóó niilyá, éí binahjį’ nihokáá’ dine’é ba’áłchíní yisdáhidookah, Ii’ Sizį́ Diyinii nihaa dahidoolyééł, éí bízhi’ binahjį’ t’áá ałtsoní baa nída’ídołkid dooleeł, áádóó t’áá ha’át’íí shį́į́ bínda’ídółkidígíí, éí nihaa dahidoolyééł.

53 Áádóó nihizhé’é Adam Diyin Bóhólníihii yich’į’ haadzíí’, dóó kóní: ha’átíísh biniinaa éí nihokáá’ dine’é ádaa ná’ookąąh dooleeł dóó tó bee bidi’doolzį́į́ł? Áádóó Diyin Bóhólníihii Adam koyidííniid: Áko shooh Eden biDá’ák’ehdi nibąąhági át’éii bee naanídi’ní’ą́.

54 Áádóó t’áá ałtso diné bitahgóó kóhá’ní, Diyin God biYe’ éí ts’ídá áłtsé asdzihę́ę yá ti’hooznii’ dóó yik’é ninánídlá, ákohgo áłchíní bimá dóó bizhé’é na’iisí’ígíí éí doo ba’áłchíní bik’i si’ą́ą da dooleeł, háálá éí hodeeyáádą́ą́’ hadaałt’é.

55 Áádóó Diyin Bóhólníihii Adam yich’į’ haadzíí’, kóníigo: Niha’áłchíní bąąhági át’eii yitah dabi’diizhchį́įgo, áádóó dah dadíníisą́ągo, bijéí biyi’di bąąhági át’eii nahwiizlį́į́’, áadi dích’į́į’go deesnih, éí binahjį’ yá’át’éehii bił da’ílį́į dooleeł.

56 Áádóó yá’át’éehii dóó nichxǫ́’ígíí bił béédahózingo baa dahaasyáa doo; ákohgo t’áá bí ádeinízingo ntsídaakees, áádóó nááná ła’ bee haz’áanii dóó bee haasdzíí’ii nihaa nílá.

57 Ákohgo niha’áłchíní bee ndanohtin, áko t’áá ałtso nihokáá’ dine’é, t’áá ałtsogóó, ádaa ńda’ookąąh dooleeł, éí doo ákódzaagóó éiyá Diyin God bił haz’ą́ądi doo baa dahidoolyéeł da, háálá chin bąąh hólónígíí éí áadi kééhát’į́į doogo, doo bá ahóót’i’ da doo dago doo yił holǫ́ǫ da dooleeł; háálá, Adam bizaad binahji’, Diné Bá Hodílzinii éí bízhi’, áádóó Tʼáá Éí Tʼéiyá Bá Yizhchíinii bízhi’ éí Diné Silį́į’ii, éí Jesus Christ, yá’át’ééhgo Nahwii’aahii, dóó ałníí’góó hoolzhishgo doogááł.

58 Éí bąą bee haz’áanii ła’ nihaanishłé, áádóó t’áá ahą́ą́h niha’áłchíní bee ndadínóohtįįł, kódíníigo:

59 Áko asdzihígíí binahjį’ bąąhági át’eii hazlį́į́’, éí asdzihígíí binahjį’ anoonééł hólǫ́ silį́į́’, áádóó tó binahjį’ nahasdzáán bikáa’jį’ nidanihi’diizhchį́, dóó t’áá dił, dóó ii’ sizíinii, éí bee ánót’éego ánihiishłaa, áádóó łeezh bits’ą́ą́dóó ii’ sizíinii bee dahinii’náago ánhi’dilyaa, t’áá ákót’éego yá’ąąshdi haz’ą́ąjį’ náánihidi’doochííł, éí tó bee, dóó Ii’ Sizį́ Diyinii bee hodi’doolzį́į́ł, áádóó t’áá diłígíí binahjį’ hadanołt’ée doo, Tʼáá Éí Tʼéiyá Shá Yizhchíinii bidił deezna’ígíí binahjį’; ákót’áo t’áá ałtso bąąhági át’éii nihąąh ádingo diyingo ánihidi’doolnííł, dóó hool’áágóó iiná saadígíí bee nihił dahózhǫ́ǫ dooleeł díí nahasdzáán bikáa’gi, dóó hool’áágóó Diyin God bił haz’ą́ądi dahonohłǫ́ǫ doo, éí anoonééł ádingo baa ha’niihdi;

60 Háálá tó bee nihi’doolzį́’ígíí binahjį’ bee haz’áanii bik’eh dahonół’į́; áádóó Ii’ Sizį́ Diyinii binahjį’ asoosihígíí bee nihaa nídidoot’ááł, áádóó diłígíí binahjį’ diyingo ánihi’diilyaa;

61 Éí bąą nihiyi’ hólǫ́ǫ doogo nihaa yílyá; yá’ąąshdi nída’íísdzooígíí; éí Aaʼáhályáanii; éí ayóó át’áo anoonééł ádinígíí bee áho’diilzéé’; t’áá ałtsoní t’áá aaníinii; t’áá ałtso tsxįįł áyoolíiłii, t’áá ałtsoní hiná áyoolíiłii; t’áá ałtsoní bił bééhózinii, dóó t’áá ałtsoní bee adziilii binahjį’ hódzą́, ajooba’, t’áá aaníinii, t’áá ákohgi ó’ool’įįł, dóó ndahwiit’aah.

62 Áádóó áko, shooh, Shí nihich’į’ haasdziih: Díí t’áá ałtso nihokáá’ dine’é bá Diyin binahat’á bee yisdá’iildéehii át’é, Tʼáá Éí Tʼéiyá Shá Yizhchíinii bidił biníkáá’ góne’, éí ałníí’góó hoolzhishgo doogááł.

63 Áádóó áko shooh, t’áá ałtsoní t’áá bínoolnin dooleeł, áádóó t’áá ałtsoní ályaii éí shí shaa halne’go yaa dahalne’, t’áá áłah ats’íseek’eh, dóó ii’ sizíiniik’eh; dóó yá’ąąsh ádaat’éii biyi’, dóó nahasdzáán bikáa’gi, dóó nahasdzáán biyi’di, dóó nahasdzáán bitł’ááhdi, t’áá áłah biláahdi dóó biyaagi: éí t’áá ałtsoní t’áá aaníigo shaa dahalne’.

64 Áádóó baa hoolzhiizh, Diyin Bóhólníihii nihizhé’é Adam, yich’į’ haadzíi’go, Adam Diyin Bóhólníihii yéego yich’į’ sodoolzingo náyoozkan, áádóó Diyin Bóhólníihii biIi’ Siz’į́ Diyinii bił hoole’, áádóó tó biih bidooltį́, áádóó tó bił diilkǫ’, áádóó tó biyi’dóó hanááltį́.

65 Áádóó ákót’áo tó bee bi’diilzį́į́’, áádóó Diyin God biʼIiʼ Sizį́ Diyinii bik’i hoole’, áádóó bí éiyá Ii’ Sizį́ Diyinii bee náábiʼdizhchį́, áádóó hayi’di tsxį́įłgo diné jílíinii yidiisnáá’.

66 Áádóó yá’ąąshdę́ę́’ iinéé’ yidiidiizts’ą́ą́’, kóníigo: Ni éiyá kǫ’ bee ni’diilzį́į́’, dóó Ii’ Sizį́ Diyinii ałdó’. Díí éiyá nihiZhé’é, dóó biYe’ yaa ná’iizoh, kodóó dóó hool’áágóó;

67 Áádóó ni éí niyiiłkaah éí doodago nináhááh bąąh ádinii bik’ehgo sínízį́, éí éiyá ahoolʼáádééʼ dóó ahoolʼáágóó hólǫ́.

68 Áko shooh, shił t’ááłá’í sínílį́į́’, Diyin God biye’; áádóó t’áá ałtso shiye’ké dadohłeeł. Amen.