1 Áádóó baa hoolzhiizh Enoch saad t’áá yee yáłti’, kóní: Áko shooh, nihizhé’é Adam díí yee na’neezt’ą́ą́’, dóó lą’í diné da’oosdląąd dóó Diyin God ba’áłchíní daazlį́į́’, áádóó lą’í diné t’áadoo da’oosdląąd da, dóó bibąąhági ádaat’eii t’áá yił dahnídahidiikai, dóó náasdi ádahodooníłígíí yéédaaldzid, tiʼdahooníihgo, háálá Diyin God bibee áteʼelʼíinii báháchʼįʼ dookʼą́ą́ł nahalinígíí bik’ijį’ kódadoolnííł.

2 Áádóó Enoch diyingo ádahodoonííłígíí diné yee neinitingo bił hahoolzhiizh, áko, diné kót’áo yich’į’ haadzíí’: Ch’aa naasháago, áádóó Mahujah holyéegi sézį́įgo, Diyin Bóhólníihii bich’į’ yéego sodiszingo náásiyékan, yá’ąąshdę́ę́’ ha’oodzíí’, kóníigo—Hósdę́ę́’ náhínááh, dóó dził Simeon bikáá’ haninááh.

3 Áádóó baa hoolzhiizh náháyá dóó dził bikáá’ haséyá; áádóó dził bikáá’di sézį́įgo, yáʼąąsh ąą ádzaago néshʼį́, dóó ayóó át’éii bee hadinísht’éego shik’i hoole’;

4 Áádóó Diyin Bóhólníihii yiiłtsą́; áádóó shidááhdóó sizį́įgo, shich’į’ yááłti’, hastóí ałch’į’ yáłti’ nahalingo, t’áá shinii’jį’ shich’į’ yáłti’; áádóó áshíłní: Níníłʼį́, nihimá nahasdzáán díkwíidishį́į́ są náʼoogą́ąʼgo nił ííshją́ą́ áshłééh.

5 Áádóó baa hoolzhiizh Shum chʼíhootsodi, lą’í diné níbaal yiiʼ dabighango yiiłtsą́, dóó nééł’į́į́’, éí Shum bidine’é ádaat’į́.

6 Áádóó Diyin Bóhólníihii ánááshidoo’niid: Níníł’į́; dóó nahookósjigo déé’į́į́’, dóó Canaan bidine’é yiiłtsá, éí níbaal yiiʼ dabighan.

7 Áádóó Diyin Bóhólníihii áshíłní: Diyingo ádahodoonííłii bee na’nítin; áko éí bee na’nétą́ą́’, kódíshníigo: Áko shooh Canaan bidine’é, éí lą’í, éí Shum bidine’é yik’ijį’ dadeezbaa’ aná’í éé’ yee hadadít’éego, éí nídeidoołtsxiłgo ádeidoołdįįł; áádóó Canaan bidine’é áł’ąą dahdeiyíkááhgo áda’diilyaa, áádóó kéyah bikááʼ doo naniseʼ da doo dóó aneest’ą’ bąąh ádaadin doo, áádóó doo nááná ła’ ákwe’é ndoonééł da t’áá hazhó’í Canaan bidine’é t’éiyá;

8 Háálá áko shooh, Diyin Bóhólníihii kéyah hóyéego yá hadoodzih, áádóó hool’áágóó kéyah bikááʼ doo naniseʼí da doo; áádóó Canaan t’áá ałtso ba’áłchíní bikáá’ dadiłhił daazlį́į́’, áko t’áá ałtso bílaʼashdlaʼii bitahgóó dabijoołá.

9 Áádóó baa hoolzhiizh Diyin Bóhólníihii kóshidííniid: Níníł’į́; áádóó nééł’į́į́’, dóó Sharon bikéyah yiiłtsą́, dóó Enoch bikéyah, dóó Omner bikéyah, dóó Heni bikéyah, dóó Shem bikéyah, dóó Haner bikéyah, dóó Hanannihah bikéyah, áádóó t’áá ałtso ákwe’é kéédahat’ínígíí ałdó’;

10 Áádóó Diyin Bóhólníihii kóshidííniid: Díí diné bich’į’ dínááh, dóó kóbididííniił—Ádaa nda’oohkąąh, éí doodago éí deeshááł dóó nahasdzáán t’áá si’ą́ą ńt’ę́ę́’ doo yáʼáshóonii bee bikʼijįʼ hóyéego bá hadeesdzih, áádóó dadínóonééł.

11 Áádóó nihiTaa’, dóó biYe’ bízhi’ binahjį’ tó bee íísį́į́h doogo bee haz’áanii sheinílá, háálá éí ajoobaʼ dóó tʼáá aaníinii biyiʼ hadeezbin, áádóó Ii’ Sizį́ Diyinii, éí nihiTaa’ dóó biYe’ t’áá aaníigo yaa halne’.

12 Áádóó baa hoolzhiizh Enoch t’áá ałtso diné ádaa ńda’oohkąąh yiłníigo, neinitin, ákondi Canaan bidine’é éí ndaga’;

13 Áádóó Enoch ts’ídá yéego oodlánígíí biniinaa Diyin God bidine’é yoo’ish, áádóó bedaʼanaʼí bik’ijį’ dadeezbaa’; áádóó Diyin Bóhólníihii bizaad yee haadzíí’, dóó nahasdzáán nahasnáá’, dóó dził dadeesnáá’, éí ííłnínígíí bik’ehgo; áádóó tooh danílínígíí nát’ą́ąjigo danilį́ daazlį́į́’; áádóó diné doo kééhótʼinídééʼ náshdóítsoh bitsiijįʼ ditłʼooígíí ádaaní; áádóó t’áá ałtso nihokááʼ dineʼé dah deíkááhgo yéego nídaaldzid, háálá Enoch bizaad ayóó na’iiłná, dóó Diyin God éí díí saad ayóó na’iiłnánígíí beinílá.

14 Áádóó tónteel bitł’áádę́ę́’ kéyah de kódzaa, áádóó Diyin God bidine’é beda’ana’í ts’ídá béédaaldzid, áko tónteel bitł’áádę́ę́’ kéyah de kódzaayę́ę’ yikáá’góó ahineezhchą́ą́’ dóó áadi nízaadi ndaniché.

15 Áádóó kéyah bikáá’ yé’iitsoh, ałdó’, t’áá nízaaddi ndaakai; áádóó diné t’áá ałtso Diyin God yik’ijį’ ndaabaahígíí éí hóyéego bá hada’iisdzíí’;

16 Áádóó áádę́ę́ʼ dóó kojįʼ anaʼí dóó naʼatsxeed bitah hazlį́į́’; ákondi Diyin Bóhólníihii níyá dóó bidine’é yił kééhat’į́į ńt’ę́ę́’, áádóó Diyink’ehgo deiyíkai.

17 Diyin Bóhólníihii bikʼeʼíyéʼii éí ał’ąą dine’é dah deíkáhígíí bitah hólǫ́, Diyin Bóhólníihii bi’ayóó át’éii éí ts’ídá ntsaa, éí bidine’é bił dahólǫ́. Áádóó Diyin Bóhólníihii kéyah yik’ijisdli’, áádóó dziłghą́ądi kéédahat’ínígíí ałdó’ yik’ijisdli’, dóó dahnahaz’ą́ą́góó, áádóó ał’ąą dadínéesą́.

18 Áádóó Diyin Bóhólníihii bidine’ Zion yee yiyíízhi’, háálá bijéí dóó bíni’ yee t’ááłá’í ádaat’éhígíí biniinaa, áádóó Diyink’ehgo deiyíkai; dóó diné baa dahojoobáʼígíí bitah ádin.

19 Áádóó Enoch éí Diyin God bidine’é t’áá Diyink’ehgo oodááł yee neinitin. Áádóó baa hoolzhiizh beiníłką́ądi, kin haal’á haidiilaa éí Kin Haal’á Hodílzingi bee wóóji’, azhą́ Zion ndi.

20 Áádóó baa hoolzhiizh Enoch Diyin Bóhólníihii yááłti’; áádóó Diyin Bóhólníihii kóyidííniid: Zion éí t’áá aaníigo hool’áágóó baa áháyą́ągo bił haz’ą́ą doo. Ákondi Diyin Bóhólníihii Enoch kwííłní: Shí éí Zion bik’ihojísdli’, ákondi diné ch’éékaiígíí éí hóyée’go bá haasdzíí’.

21 Áádóó baa hoolzhiizh Diyin Bóhólníihii éí Enoch tʼáá ałtso nihokáá dineʼé nahasdzáán bikááʼgóó dahólónígíí yich’į’ ííshją́ą́ áyiilaa; áádóó yiyiiłtsą́, dóó yinééł’į́į́’, Zion, t’áá bich’į’ hoolzhiish, éí yá’ąąsh góde’ kólyaa. Áádóó Diyin Bóhólníihii Enoch kwííłní: Áko shooh ákwe’é hool’áágóó kééhonisht’į́į doo.

22 Áádóó Enoch éí Adam biye’ké ch’éékai’ígíí yiyiiłtsą́; áádóó Adam bílástsii’ t’áá áł’ąą ádaat’éego át’é ákondi Cain bílástsii’ éí ádin, háálá Cain bílástsii’ éí dadiłhił, dóó bitah doo bá hoo’a’ da.

23 Áádóó éí bikéé’dóó Zion yá’ąąsh góde’ eeldoh, éí Enoch yiyiiłtsą́, dóó yinééł’į́į́’, tʼáá ałtso nihokáá dineʼé nahasdzáán yikááʼ dahdeíkááhígíí bidááh naazį́įgo, yiyiiłtsą́;

24 Áádóó ałkééʼ da’íchííh dóó da’íchííhjį’ t’áá áłkéé’ hoolzhishgo; áádóó Enoch éí wódahdi dóó ayóó át’éii nilį́įgo, éí aTaa’ ádíyóltą’, áádóó Diné Silį́į’ii ałdó’; áádóó áko shooh, Ch’į́įdii be’adziil éí t’áá ałtso nahasdzáán bikáá’góó hólǫ́.

25 Áádóó Diyin yá ndaalʼaʼí yáʼąąshdę́ę́ʼ adah deíkáahgo yiyiiłtsą́; áádóó iinéé’ ayóó ííts’a’go yidiizts’ą́ą́’ kóníigo: Yíí, yíí tʼáá ałtso nahasdzáán bikááʼgóó nahasdzáán yikáá’ kéédahat’íinii bich’į’ kódoolnííł.

26 Áádóó Ch’į́įdii yiyiiłtsą́; dóó béésh daʼahólzhaʼí ntsaa léí’ dahyoolééł, dóó cháhałheeł t’áá ałtso nahasdzáán bikáá’góó bik’ésti’; áádóó dego déé’į́į́’ dóó eedlo’, áádóó bá ndaal’a’í t’áá íiyisíí bił dahóózhǫǫd.

27 Áádóó Enoch éí Diyin yá ndaalʼaʼí yáʼąąshdę́ę́ʼ adah deíkáahgo yiyiiłtsą́, éí nihiZhé’é dóó biYe’ t’áá aaníigo yaa dahalne’; dóó Ii’ Sizį́ Diyinii lą’í yik’ihoole’, áádóó yáʼąąsh bibe’adziilii binahjį’ Zion dah ooldah góde daazlį́į́’.

28 Áádóó baa hoolzhiizh yá’ąąsh bidiyin God diné ch’éédzíí’ígíí yinééł’į́į́’, dóó yaa yíchah; áádóó Enoch éí yaa ná’íízoh, kóníigo: Ha’át’íísh éí biniinaa yá’ąąsh daachah, dóó dził bikáá’ nahałtin nahalingo binék’eshto’ ndaazlį́?

29 Áádóó Enoch Diyin Bóhólníihii kóyidííniid: Ni shą’ ha’át’íí biniinaa doo nicha da, jó hadíníłt’é, éí ahoolʼáádééʼ dóó ahoolʼáágóó doo łahgo ánááʼnííł da?

30 Áádóó nahasdzáán bikáá’góó t’áá ałtsoní ádaałts’íísíígíísh diné yíídóołtah, aoo’, díí nahasdzáán ádaat’éhígi át’áo mííltsoh ánéelą́ą’go, éí bilááh ánéelą́ą’go t’áá ałtsoní hadadiilyaa; dóó nidáádiníbaal t’áhdii t’áá ałtsogóó bik’édaasti’; dóó ni éí ałdó’ áadi honílǫ́, dóó t’áá ánít’é áadi honílǫ́; áádóó ałdó’ t’áá ákogi ánít’é; dóó ne’ajooba’ dóó hool’áágóó naa áhwiinítį́;

31 Áádoo Zion éí t’áá ni ádídííyíníltą’, éí t’áá ałtsoní hadinlaaígíí bits’ą́ą́dóó, éí ahoolʼáádééʼ dóó ahoolʼáágóó doo łahgo ánááʼnííł da; áádóó ahodeezyéél, t’áá ákogi át’éii, dóó t’áá aaníí ádaat’éii t’éiyá bikááʼ dahasdahí bikááʼdóó nahatʼáhígíí bee hadilyaa; áádóó ajooba’ éí nidááhgi doo niit’ééhgóó hólǫ́ǫ doo; áko ha’át’íísh biniinaa doo nicha da?

32 Áádóó Diyin Bóhólníihii Enoch kwííłní: Áko shooh díí diné ch’éékaiígíí; éí t’áá shí shíla’ bee hadadiishłaa, dóó ééhózinii baa dahélá, éí hadadiishłéyę́ędą́ą́’; áádóó Eden biDá’ák’ehgi, diné t’áá bí ádánitsídaakeesgo áda’ał’ínígíí baa dahélá;

33 Áádóó díí diné ch’éékaiígíí kóbidííniid, áádóó ałdó’ bee haz’áánii baa dahélá, éí ayóó áda’ahóóníi doo, aadóó shí shik’eh dahół’į́į doo, biZhé’é nishłíinii; ákondi shooh, doo ayóó’ádahó’níi da, áádóó bik’éí danilíinii ndi deijoołá;

34 Áádóó kǫ’ nahalingo bee honishkéhígíí bik’ijį’ kódeeshłííł; dóó ts’ídá doo shił yá’át’ééhígíí biniinaa tónteel bił didoolkǫǫłgo bich’į’ kódeeshłííł, háálá t’áá awołí bee bich’į’ sháháchį’.

35 Áko shooh, Shí éí Diyin God nishłį́; Diyin Bá Hodílzinii éí yinishyé; Hastiin Na’nitinii éí shízhi’; dóó Bi’iina’ Doo Nidoot’ihii dóó Hool’áágóó Hináanii éí, ałdó’ yinishyé.

36 Ákohgo, t’áá ałtsoní hadadiishłaaígíí éí shíla bee dahyishjih; áádóó ałdó’ shináá’ bee biníkádínísh’į́į́’, áádóó t’áá ałtso shíla’ bee hadadiishłaaígíí doo hádą́ąʼdida éí doo kótʼáo shik’éí danilíinii tsʼídá yéego bąąhági ádaatʼį́į da ńt’ę́ę́’.

37 Ákondi shooh, díí asdzihígíí bizhe’é bik’ijį’ doodzoh; Ch’į́įdii éí bizhé’é nilį́į doo, dóó ti’hoo’nííh bee bá ndahodoot’ááł; dóó t’áá ałtso yá’ąąshii di dahyikahígíí bíká binák’eeshto’ ndáálį́į doo, t’áá ałtso shíla’ bee hadadiishłaaígíí ałdó’; ákohgo yá’ąąshdi dahyikáhígííísh daacha doo, jó díí bich’į’ ndahwiidoo’nááłígíí deiyiiłtsą́?

38 Ákondi shooh, díí nináá’ bee yiniłtsánígíí éí tónteel bił didoolkǫǫłgo adadoo’oł; áádóó áko shooh, awáalyah bá hast’eishłaa góneʼ; yah adabidi’doo’nił.

39 Áádóó bik’idiishnii’ígíí shidááhdóó náshookąąh. Ákohgo, bibąąhági ádaat’éii ák’ididoot’ááł; éí Bik’idiishnii’ii bijį́ shaa nádzáago ádaa ńda’dookąął, áádóó áajį’ ayííłkąągo ti’dahoonííh doo;

40 Ákohgo, díí biniinaa yá’ąąshdę́ę́’ dahyikahígíí bá binák’eeshto’ ndáálį́į doo, aoo’, dóó t’áá ałtso shíla’ bee ádaashłaaígíí ałdó’ bá.

41 Áádóó baa hoolzhiizh Diyin Bóhólníihii Enoch yich’į’ haadzíí’, áádóó Enoch t’áá ałtso nihokáá’ dine’é ba’áłchíní yaa naakaiígíí yee yił hoolne’; ákohgo éí binahjį’ Enoch bił bééhózin, dóó bąąhági ádaat’įįłígíí yiyiiłtsą́, dóó ti’dahooníihgo, dóó bilá yee yich’į’ dahdoolnihgo yícha, áádóó hool’áágóó áhoníłtéél nahalingo bijéí ntsaa silį́į́’; dóó yaa aa ááh níízį́į́’; dóó nahasdzáán t’áá ałtso nahasnáá’.

42 Áádóó Enoch éí Noah, dóó ba’áłchíní ałdó’ yiyiiłtsą́; áko Noah biye’ké náás da’ahoolchííłígíí éí t’áá ałtso ats’íísk’ehgo baa ádahodoolyąął;

43 Ákohgo Enoch éí Noah tsinaaʼeeł haidiilaagó yiyiiłtsą́; áádóó Diyin Bóhólníihii yaa bił hóózhǫǫd, dóó bíla’ yee yináznii’; ákondi diné doo yá’áshóonii ch’éédzí’ígíí éí tó yíląąd dóó abiiłna’.

44 Áádóó díí Enoch yiyiiłtsą́ągo, éí bikʼeʼashchʼííʼgo bikʼeʼíyééʼgo ábiilaa, dóó bik’iské ádaanííłígíí yik’ee yícha, dóó yá’ąąsh yich’į’ kódííniid: Shí éí doo ha’ííníshníi da doo; ákondi Diyin Bóhólníihii Enoch kóyidííniid: Nijéí ha’ólníigo ánílééh, dóó nił hózhǫ́; dóó níníł’į́.

45 Áádóó baa hoolzhiizh Enoch déé’į́į́’; dóó Noah bits’ą́ą́dę́ę́’ éí, t’áá ałtso nahasdzáán bikáá’ hooghan bił ndahaz’ą́ągo yiyiiłtsą́; dóó Diyin Bóhólníihii náyoozkan, kóníigo: Hahgooísh éí Diyin Bóhólníihii nádááh? Hahgooísh éí T’áá Ákogi Át’éego naagháii bidił didoonah, áko t’áá ałtso yínííł danilínígíí haałt’éego adadoolnííł dóó hool’áágóó iiná baa dahidoolyééł?

46 Áádóó Diyin Bóhólníihii kóní: Éí ałníí’góó hoolzhishgo doogááł, bąąhági áhooníiłgo dóó atíʼálʼį́ baa na’aldeehgo.

47 Áádóó áko shooh, Enoch éí Diné Silį́į’ii doogááł góne’ yiyiiltsą́, bits’íís hólǫ́ǫgo; áádóó bi’ ii’sizíinii bił hózhǫ́ǫgo, kódííniid: T’áá Ákogi Át’éego naagháii tsin ałnáoz’á bikáa’jį’ bił o’oolkaal, áádóó hodeeyáádą́ą́’ Dibé Yázhí Wólyéii bidi’doolyééłgo bá nahoot’ą́; áádóó she’oodlą’ binahjį’ éí aTaa’ ádíshóltą’, áádóó áko shooh, Zion éí shił hólǫ́.

48 Áádóó baa hoolzhiizh Enoch nahasdzáán yik’i naazghal; áádóó biyi’dóó iinéé’ yidiizts’ą́ą́’, kódííniid: Yáa, yáa shaa nahóókaad, nihokáá’ dine’é bimá nishłíinii; Shił hodiniih, Bąąh chééhdéyá, háálá sha’áłchíní doo bąąhági ádaat’ínígíí biniinaa. Hahgoshą’ háádeeshyįh, dóó shikáá’góó chin dóó doo yá’ádaat’éehii shąąh silį́’ígíí shąąh t’áádadoogis? Hahgoshą’ Tʼáá Ałtsoní Áyiilaií hanisht’éego áshidoolííł, áko háádeeshyįh, áádóó nihokáá’ dine’é shikáá’góó Diyin bibee haz’áanii yik’eh dahół’į́įgo nahalzhiish doo?

49 Áádóó Enoch nahasdzáán di’níigo yidiizts’ą́ą’go, yícha, dóó Diyin Bóhólníihii náyoozkan, kóníigo: O Diyin Bóhólníihii, nahasdzáán ne’ajooba’ bich’į’ kónílééh? Noah ba’áłchíní bik’ihojidíídliił?

50 Áádóó baa hoolzhiizh Enoch Diyin Bóhólníihii t’ah néíyookąąh, kóníigo: Nánooshkąąh, O Diyin Bóhólníihii, Tʼáá Éí Tʼéiyá Ná Yizhchíinii, Jesus Christ bízhi’ binahjį’, éí Noah dóó bílástsii’ baa jidííbaał, áko nahasdzáán tónteel doo bił náádidoolkǫǫł da.

51 Áádóó Diyin Bóhólníihii doo t’ą́ą́’ kót’éégóó bidiizts’ą́ą́’; dóó Enoch yił aha’deet’ą́, dóó yił aha’deet’ánígíí yee ádéé haadzíí’, áko doo nahasdzáán tónteel bik’ididoolkǫǫł da; áko Noah ba’áłchíní yich’į’ haadzíí’;

52 Áádóó yee haadzíí’yę́ę doo łahgo ádoonííłgóó yich’į’ áyiilaa, áko bílástsii’ ch’éédzí’ígíí éí t’áá ałtso diné dah deiyíkááhgóó hólǫ́ǫ dooleeł, éí nahasdzáán t’ah hólǫ́ǫ́dą́ą́’;

53 Áádóó Diyin Bóhólníihii kódííniid: Messiah éí yits’ą́ą́dóó níyáhígíí bik’idahozhdoodliił; háálá ání—Messiah nishłį́, Zion bi’Aláahdi Naat’áanii, Yá’ąąshii biTsé nahalin, éí ahool’áágóó bidziilgo aa áhályą́; t’áá háíshį́į́ dáńdítį́hígi yah adoogááł dóó shíighahgi hólónígíí éí bíká’anáshwo’ doo; ákohgo, diné baa yéíłti’ígíí éí bik’idahojidoodliił, háálá éí hool’áágóó ił hózhǫ́ biyiin yee dahataałgo nahidookah.

54 Áádóó baa hoolzhiizh Enoch éí Diyin Bóhólníihii néíyoozkan, kóníigo: Diné Silį́į’ii bits’íís hazlį́į’go nihaa níyáago, ákohgo índaaísh nahasdzáán háádoolyįh? Díí shił ííshją́ą́ ádíílíiłgo, bíká sodiszin.

55 Áádóó Diyin Bóhólníihii Enoch kwííłní: Níníłʼį́, áádóó déé’į́į́’ ńt’ę́ę́’ Diné Silį́į’ii tsin ałnáozʼá bikʼijįʼ bił oʼoolkaalgo yiyiiłtsą́, éí nihokáá’ dine’é bik’ehgo áda’iilaa;

56 Áádóó iinééʼ ayóo íitsʼaʼgo yidiizts’ą́ą́’; dóó yá’ąąshii bik’ésti’; dóó Diyin God t’áá ałtsoní hadeidiilaa yínííł daazlį́į́’; dóó nahasdzáán ádiiʼádííniid; dóó tséhę́ę ndahaastǫʼ; dóó Diyin yá naazíinii deizį’go náádahii’na’, dóó Diné Silį́į’ii binishnáájígo dah sidá, éí ayóó át’éii bąąh nahidoolyééł;

57 Áádóó daneeznánígíí bits’íís awáalyahdę́ę́’ ndahaaskai, dóó Diyin God bílaʼ binishnáájígo deiizį́; áádóó ch’éékaiígíí éí chahałheeł biyi’ béésh daʼahólzhaʼí dabótą’ éí ayóóʼátʼéii beiníłką́ągo índa bá ndahodoot’ááł.

58 Áádóó nááná Enoch yichahgo Diyin Bóhólníihii náyoozkan, kóníigo: Hahgoshą’ índá nahasdzáán háádoolyįh?

59 Áádóó Enoch éí Diné Silį́į’ii yáʼąąsh góde’ nihiTaa’ yich’į́’ ánáádzáago yiyiiłtsą́; áádóó Diyin Bóhólníihii náyoozkan, kóníigo: Nahasdzáán bikáa’giísh doo nináádíídááł da? Ázha ákótʼée ndi Diyin God nílį́, dóó nééhonisin, dóó shich’į’ ádééháinídzíí’, dóó Tʼáá Éí Tʼéiyá Ná Yizhchíinii bízhi’ binahjį’ nashidídííłkił díníniid; ni áshiinlaa, dóó yáʼąąsh aghánáhóóʼáadi dah sínídáhígíí shadiní’ą́ągo yisdáshííníłtį́, dóó doo éí shí ásht’ínígíí binahjį’ da, ndi ni ne’ajooba’ binahjį’; ákohgo, nináánídíshkid da’ nahasdzáán bikáa’giísh doo nináádíídááł da.

60 Áádóó Diyin Bóhólníihii Enoch kwííłní: Shí hinishnáago, nihodoogáałjįʼ ayííłką́ągo nídeeshdááł, bąąhági áhooníiłgo dóó atíʼálʼį́ baa na’aldeehgo, áko Noah ba’áłchíní bídadéét’i’ígíí bee nił ahaʼdinishtʼánée bohodoolnííł biniyé;

61 Áádóó nahasdzáán háádoolyįhjįʼ iidoołkááł, ákondi t’áhdoo baa hoozhííshdą́ą́’ yá’ąąshii éí bił chahodoołhił, dóó chahałheeł t’áá ałtso nahasdzáán bikáá’góó bik’ésti’ doo; dóó yá’ąąsh nahidoo’naał, áádóó nahasdzáán ałdó’; áádóó nihokáá’ dine’é ba’áłchíní yéego bich’į’ ndahwii’náa doo, ákondi shidine’é éí baa áhodeeshyąął;

62 Áádóó Diyink’ehgo ádaat’éhígíí éí yá’ąąshdę́ę́’ bich’į’ kódeeshłííł; áádóó nahasdzáán bikáá’dóó éí t’áá da’aníinii bich’į’ kódeeshłííł, éí Tʼáá Éí Tʼéiyá Shá Yizhchíinii t’áá aaníí át’é daaníigo yaa dahalne’ doo; éí nihá niná’nídlá áko anoonééłdę́ę́’ náádahidii’naał; aoo’, áádóó éí t’áá ałtso nihokáá’ diné’é yá niná’nídlá; áádóó tó yíląąd nahalingo Diyink’ehgo ádaat’éhígíí dóó t’áá da’aaníínii nahadzaan bikáa’jį’ kódeeshłííł, diné nídahisélá’ígíí nahasdzáán bikááʼ tʼáá dį́į́ʼgóó adahwiisʼáádę́ę́ʼ ahídahideesh’ish, éí haz’ą́ągi hasht’e’ deeshłííł, éí Hodílzingo Kin Dashijaa’, áko shidine’é éí bi’éé’ binoozhníí’ gónaa’í yeda’dootł’óół, dóó nídééshdáałdi yich’į́’ dadéez’į́į́’ dooleeł; háálá ákwe’é éí shił haz’ą́ą doo, áádóó Zion hoolyée, éí New Jerusalem át’ée doo.

63 Áádóó Diyin Bóhólníihii Enoch kwííłní: Ákó áadi ni dóó kin dashijaa’dę́ę́’ ndaakaiígíí áadi bił ahíídohkah, áádóó éí Diyin Bóhólníihii adídeiyóltą’ doo, dóó Diyin Bóhólníihii deidoołtsééł; áádóó Diyin Bóhólníihii yizénázhchidgo yizts’ǫs, áádóó bí ałdó’ Diyin Bóhólníihii yizédaazhchidgo deizts’ǫs, áádóó da’ahidiits’ǫs;

64 Áádóó ákwe’é éí shighan, áádóó éí Zion át’ée doo, éí t’áá ałtsoní hadadiishłaaígíí bits’ą́ą́dóó t’áá sahdii át’ée doo; áádóó éí dimííl yázhí ńdoohah nahasdzáán hanályį́įhgo.

65 Áádóó baa hoolzhiizh that Enoch éí Diné Silį́į’ii doogááł góne’ yiyiiltsą́, éí akéeʼdi deiyoołkáałdi, Diyink’ehgo yigáalgo dimííl yázhí ńdoohah;

66 Ákondí éí t’áhdoo baa hoolzhííshdą́ą́’ éí doo yá’ádaashóonii yéego ti’dahooníihgo yiyiiłtsą́; áádóó tónteel ałdó’ yiyiiłtsą́, yilk’oołgo doo hasht’edít’éhígo, dóó bilá’ ashdla’ii bijéí yee doo hada’ólníi da dooleeł, éí Diyin God Ayóó’ábóodziilii bá nda’hwiidoo’ááłgo yéédaaldzid, éí diné’ doo yá’ádaashóonii yik’ijį’ kwíídoolííł.

67 Áádóó Diyin Bóhólníihii éí Enoch t’áá ałtsoní yił ííshją́ą́ áyiilaa, nahasdzáán niitʼéhígíí ndi; áádóó Diyink’ehgo dahínánígíí, éí bá nináda’asyáhíjį’ o’oolkid, dóó ił hózhǫ́ tʼáá ałtso binahjįʼ biiʼ dahólǫ́;

68 Áádóó Zion t’áá biiníłką́ą́dę́ę́’, dóó t’áá át’é Enoch biiníłkánígíí, éí táadi neeznádiin dóó bi’aan hast’ą́diin dóó bi’aan ashdla’ nááhai.

69 Áádóó Enoch dóó t’áá át’é bidine’é éí Diyin God yikék’ehgo deiíkááh, áádóó Zion yitah kééhat’į́; áádóó baa hoolzhiizh Zion nahasdzáán yikáá’dóó ásdįįd, háálá Diyin God éí Zion t’áá bí ádíyóltą’; áádóó nahasdzáán bikáa’gi kóhó’níigo hada’eesdzíí’, Zion éí dahnídiidzá.