Moses biNaaltsoos
biyiʼdóó łaʼ haneʼ haaʼnilígíí átʼé

1 Diyin God bizaad, éí Moses yee yichʼįʼ haadzííʼ íídą́ą́ʼ Moses dził agháhazʼą́ądi bił áhoodzaa,

2 Áádóó áadi Diyin God biniiʼ yiyiiłtsą́, dóó yichʼįʼ haadzííʼ, áádóó Diyin God biʼayóó átʼéii Moses bił hooleʼ; éí bąą Moses Diyin yinéłʼį́įgo yíighahgo ábiʼdiilyaa.

3 Áádóó Diyin God Moses yichʼįʼ haadzííʼ, kóníigo: Áko shooh, Shí éí Bóhólníihii Diyin God Ayóóʼábóodziilii nishłį́, áádóó Biʼiinaʼ Doo Nidootʼihii éí shízhiʼ; háálá doo éí niyiiłkaah éí doodago nináhááh bąąh ádinii nishłį́į da; áádóó daʼ díísh éí iiná doo óodįįh átʼée da?

4 Áádóó, áko shooh, ni éí shiyeʼ nílį́; ákohgo shiníníłʼį́, áádóó shílaʼ bee naanish íishłaaígíí nił ííshją́ą́ ádeeshłííł; ákondi doo éí tʼáá átʼé da, háálá shinaanish éí doo bee nihonítʼiʼ da, áádóó áłdóʼ shizaad, háálá éí tsʼídá doo nidootʼih da.

5 Ákohgo, doo éí łaʼ nihokááʼ dineʼé tʼáá ałtso shinaanish yaa ákodínóozįįł da, tʼáá hazhóʼó tʼáá ałtso shiʼayóó átʼéii yiyiiłtsą́ągo tʼéiyá; áádóó doo łaʼ nihokááʼ dineʼé tʼáá ałtso shiʼayóó átʼéii yidoołtséeł da, áádóó ákódzaago éí doo nahasdzáán bikáaʼgi tʼah bitsʼíís hólǫ́ǫ da dooleeł.

6 Áádóó Moses, shiyeʼ, naanish ádíílíłígíí łaʼ shee hólǫ́; áádóó Tʼáá Éí Tʼéiyá Shá Yizhchíinii bił aheníłtʼé; dóó Tʼáá Éí Tʼéiyá Shá Yizhchíinii éí kʼad dóó náásgóó Yisdáʼiiníiłii nilį́į doo, háálá ajoobaʼ dóó tʼáá aaníinii biiʼ haʼdeezbin; áko doo éí shííghahgi łaʼ Diyin God náánídlį́į da, áádóó tʼáá ałtsoní kweʼé hoolzhishgi shił hólǫ́, háálá tʼáá ałtso shił bééhózin.

7 Áádóó áko, shooh, díí tʼéiyá tʼááłáʼígo nił ííshją́ą́ ádeeshłííł, Moses, shiyeʼ, háálá ni éí nahasdzáán biyiʼ honílǫ́, dóó kʼad nił ííshją́ą́ áshłééh.

8 Áádóó baa hoolzhiizh Moses deezghal, áádóó nahasdzáán bikáaʼgi ábiʼdiilyaaígíí yaa ákoniizį́į́ʼ; áádóó Moses nahasdzáán yaa ákoniizį́į́ʼ dóó bił nihodoolzhishgo yiyiiłtsą́, áádóó tʼáá ałtso nihokááʼ dineʼé baʼáłchíní ałdóʼ yaa ákoniizį́į́ʼ, áádóó éí ałdóʼ ádabiʼdilyaa; díí kótʼáo ayóó átʼéego yikʼee deesyiz dóó yéego yaa bił hóózhǫǫd.

9 Áádóó Diyin God bił hólónée Moses bitsʼą́ą́dóó nahjįʼ kódzaa, áko Moses éí Diyin biʼayóó átʼéii doo bił hólǫ́ǫ da; áádóó Moses tʼáá sáhí naagháago ábiʼdiilyaa. Áádóó tʼáá sáhí silį́įʼgo, nahasdzáán yikʼáaʼjįʼ naaʼíítłizh.

10 Áádóó baa hoolzhiizh ląʼída ahéédaʼiiskid áadi índa Moses bidziilyę́ę baa nályá nihokááʼ dineʼé bidziilígi átʼáo; áádóó tʼáá bí ádił haadzííʼ: Áko kʼad, díí shił bééhozin nihokááʼ dineʼé éí ádin doo jílíní da, éí tsʼídá doo ákótʼáo baa ntséskees da ńtʼę́ę́ʼ.

11 Ákondi kʼad éí tʼáá shí shinááʼ bee Diyin God yiiłtsą́; ákondi nahasdzáán bikáaʼgi shináʼígíí éí bee ndagaʼ, ákondi iiʼ sizíiniikʼehgo shináʼígíí bee yiiłtsą́, háálá nahasdzáán bikáaʼgi shinááʼ shee yílyáhígíí éí doo bee Diyin God yiiłtsą́ą da; háálá ákótʼéego éí shí tʼáá áajįʼ ségan dóó bidááhdóó nááshiʼdiilyáa doo ńtʼę́ę́ʼ; ákótʼée ndi biʼayóó átʼéii éí shił hólǫ́ǫ ńtʼę́ę́ʼ; áádóó biniiʼ yiiłtsą́, háálá bidááhdóó łahgi áníshtʼéego áshiʼdiilyaa.

12 Áádóó baa hoolzhiizh Moses díí saad yee haadzííʼ, áko shooh, Chʼį́įdii éí azá bidínóoʼahgo baa níyá, kóníigo: Moses, Diné Silį́įʼii, shígo shichʼįʼ nahółá.

13 Áádóó baa hoolzhiizh Moses éí Chʼį́įdii yinééłʼį́į́ʼ dóó ání: Háísh ánítʼį́? Háálá áko shooh, Shí éí Diyin God biyeʼ nishłį́, Tʼáá Éí Tʼéiyá Bá Yizhchíinii binishtʼéego; áádóó niʼayóó átʼéii shąʼ éí háájí, ákohgo nichʼįʼ nahashłáa doo?

14 Háálá áko shooh, doo éí Diyin God dínéeshʼįįł da, tʼáá hazhóʼí biʼayóó átʼéii shikʼi hooleʼgo tʼéiyá, áádóó shí éí łah áníshtʼéego bidááhdóó áshiʼdiilyaago tʼéiyá. Ákótʼée ndi shí éí tʼáá shinááʼ nahasdzáán bikáaʼgi shee yílyáhígíí bee ninéshʼį́. Daʼ díísh éí tʼáá aaníí ákótʼé, yaʼ?

15 ShiDiyin God bízhiʼ bee shikʼihojídlíigo baa ahééh nisin, háálá biʼ Iiʼ Sizíinii dóó tʼáá átʼé shitsʼą́ąjįʼ kódzaa da, éí doodago niísh éí háájí niʼayóó átʼéii, háálá tʼóó chahałheełgi átʼé shił nahalnin? Áádóó Diyin God dóó ni háajigooígíí ánítʼínígíí shił bééhózin; háálá Diyin God áshíłní: Diyin God bichʼįʼ nahółá, háálá tʼáá bí tʼéiyá bá nanilʼaʼ doo.

16 Nílááh yíwohjįʼ, Chʼį́įdii; tʼáa doo shinaʼílóʼí; háálá Diyin God áshíłní: Tʼáá Ní Tʼéiyá Shá Yizhchíinii beníłtʼé.

17 Áádóó bibee nahazʼáanii ałdóʼ shee nílá chʼil dookʼą́łígíí biyiʼdę́ę́ʼ shichʼįʼ ádííniidyę́ędą́ą́ʼ, kóníigo: Diyin God bichʼįʼ sodílzin Tʼáá Éí Tʼéiyá Shá Yizhchíinii bízhiʼ binahjįʼ, dóó shichʼįʼ nahółá.

18 Áádóó Moses ánáádooʼniid: Diyin God éí bichʼįʼ sodiszingo doo niʼ kódeeshłííł da, nááná łaʼ shínaʼádíkidígíí bee bichʼįʼ hadeesdzih nisin: háálá biʼayóó átʼéii éí shikʼi hooleʼ, ákohgo ni dóó bí háí ohtʼínígíí shił bééhózin. Yíwohjįʼ, Chʼį́įdii.

19 Áádóó kʼad, Moses díí saad yee haadzíiʼgo, Chʼį́įdii biinééʼ yee ayóó átʼéego hááchah, dóó ayóó íítsʼaʼgo doo niʼ kónééhgóó nahasdzáán bikáaʼgi ákódzaa, áádóó yee nihoníʼą́, kóníigo: Shí éí Tʼáá Éí Tʼéiyá Bá Yizhchíinii áshtʼį́, shichʼįʼ nidahołá.

20 Áádóó baa hoolzhiizh Moses tʼáá íiyisíí násdzííd; áádóó násdzíídgo, chʼį́įdiitah tʼóó baaʼihígíí yiyiiłtsą́. Ákótʼée ndi, Diyin God yichʼįʼ sodilzin, áádóó adziilii beiyílyá, áádóó yee nihoníʼą́, kóníigo: Chʼį́įdii, shitsʼą́ą́dóó yíwohjįʼ yínááł, háálá díí Diyin God tʼáá éí tʼéiyá bichʼįʼ nahashłáa doo, háálá éí Diyin God ayóó átʼéii nilį́.

21 Áádóó kʼad Chʼį́įdii bitah hodiʼniitsxiz, dóó nahasdzáán nahasnááʼ; dóó Moses bidziil násdlį́į́ʼ, áádóó Diyin God yichʼįʼ sodoolzin, kóníigo: Tʼáá Éí Tʼéiyá Bá Yizhchíinii bízhiʼ binahjįʼ, yíwohjįʼ yínááł, Chʼį́įdii.

22 Áádóó baa hoolzhiizh Chʼį́įdii ayóó íítsʼaʼgo biinééʼ diistsʼą́ą́ʼ, dóó yícha, dóó dilwoshgo yicha, dóó biwooʼ ahíídiłkʼash; áádóó índa dah diiyá, Moses sizínídóó yíwohjįʼ ndi, áko tʼáadoo nááyiyiiłtsą́ą da.

23 Áádóó kʼád díí éí Moses yaa náʼíízoh; ákondi háálá doo yáʼátʼééhgo ooldahígíí biniinaa doo nihokááʼ baʼáłchíní bitahgóó kólyaa da.

24 Áádóó baa hoolzhiizh Chʼį́įdii Moses yidááhdóó dah diiyáago, áko Moses yáʼąąsh góde déíʼį́į́ʼ, Iiʼ Sizį́ Diyinii biiʼ hóólǫǫdgo, NihiTaaʼ dóó biYeʼ tʼáá aaníigo yaa hoolneʼ;

25 Áádóó Diyin God yichʼįʼ sodoolzin, dóó biʼayóó átʼéii nááyiyiiłtsą́, háálá bikʼi hooleʼ; áádóó iinééʼ yidiiztsʼą́ą́ʼ, kóníigo: Moses, nikʼihojidlí, háálá Shí, Ayóóʼáshóodziilii, nándiiłtį́, áádóó tó tʼóó ahayóí nilínígíí bilááhgo nidziil doo; háálá Diyin God nahalingo nizaadígíí yikʼedahółʼį́į doo.

26 Áádóó níníłʼį́, nił honishłǫ́, nihoníyáajįʼ ndi; háálá shidineʼé ąąh shijééʼdóó yisdádííʼish, éí Israel dineʼé bikʼidiishniiʼígi.

27 Áádóó baa hoolzhiizh, biinééʼ tʼahdii yáłtiʼ, Moses deezghal dóó nahasdzáán yiyiiłtsą́, aooʼ, tsʼídá tʼáá átʼé yiyiiłtsą́; tsʼídá tʼáá ałtsoní áłtsʼíísíjįʼ tʼáá átʼé yiyiiłtsą́, Diyin God biʼIiʼ Sizį́ Diyinii bił hólǫ́ǫgo éíidiígíí yiyiiłtsą́.

28 Áádóó ałdóʼ nihokááʼ dineʼé yikááʼ kéédahatʼíinii ałdóʼ yiyiiłtsą́, tsʼídá tʼáá átʼé tʼááłáʼí nízínígo yiyiiłtsą́; Diyin God biʼIiʼ Sizį́ Diyinii yinahjįʼ tʼáá átʼé ádáátʼįįłígíí yiyiiłtsą́; áádóó tʼóó ahayóigo ánéelą́ą́ʼ tsʼídá doo wóltaʼgi átʼéego, tónteel bąąhgi séí doo wóltaʼ ánéiláʼígi átʼéego.

29 Áádóó kéyah tʼóó ahayóigo áłdóʼ yiyiiłtsą́; éí tʼáá átʼé kéyahígíí nihokááʼ wolyé, yikáaʼgi éí nihokááʼ dineʼé kéédahatʼį́.

30 Áádóó baa hoolzhiizh Moses Diyin God yichʼįʼ sodoolzin, kóníigo: Shił hólneʼ, tʼáá shǫǫdí nichʼįʼ sodiszin, haʼátʼíísh biniyé díí kódaatʼé, áádóó haʼátʼíísh biniyé tʼáá íiyisíí doo nił yáʼátʼéeh da?

31 Áádóó áko shooh, Diyin Bóhólníihii biʼayóó átʼéii Moses bił hooleʼ, áko Moses éí Diyin God yidááhdóó sizį́, áádóó ahinéłʼį́įgo yił yááłtiʼ. Áádóó Bóhólníihii Diyin God Moses yichʼįʼ haadzííʼ: Háálá shibiniyéí hólonígíí biniinaa díí tʼáá ałtso íishłaa. Áko díí éí hódzáanii átʼé áádóó tʼahdii shił hólǫ́.

32 Áádóó shizaad binahjįʼ adziilígíí, bee ádeeshłaa, éí shiYeʼ Tʼáá Éí Tʼéiyá Shá Yizhchíinii, háálá éí ajoobaʼ dóó tʼáá aaníinii tʼáá átʼé bee hólǫ́.

33 Áádóó nahasdzáán doo wóltaʼ ánéelą́ą́ʼgóó hadiishłaa; dóó tʼáá shí íínísinígíí biniyé hadiishłaa; áádóó shiYeʼ binahjįʼ hadadiishłaa, éí Tʼáá Éí Tʼéiyá Shá Yizhchíinii binahjįʼ.

34 Áádóó tsʼídá áłtsé hastiin tʼáá ałtso hastóíʼígíí bitsʼą́ą́dę́ę́ʼ éí Adam bee yízhiʼ, éí ląʼígo óolyé.

35 Ákondi díí nahasdzáán nélʼį́įgo, dóó yikááʼ kéédahatʼíinii, éí naadinishʼaah. Háálá áko shooh, ląʼída nahasdzáán bił yóóʼádahóóyá shizaad binahjįʼ sheʼadziilii bee. Áádóó ląʼída éí kʼad tʼah naaznil, áádóó diné bichʼįʼgo éí doo jółtaʼ átʼée da; ákondi shí éí shichʼijígo ánéelą́ʼígíí shił bééhózin, háálá daashí dóó béédahonisin.

36 Áádóó baa hoolzhiizh Moses Diyin Bóhólníihii yichʼįʼ haadzííʼ, kóníigo: Ná naalʼaʼí baa jiiníbaʼ, O Diyin God, díí nahasdzánígíí baa shił hólneʼ, dóó yikááʼ kéédahatʼínígíí ałdóʼ, dóó yáʼąąshdi ádaatʼéhígíí ałdóʼ, áádóó áadi índa ná naalʼaʼí bił hodooshǫǫł.

37 Áádóó Bóhólníihii Diyin God Moses yichʼįʼ haadzííʼ, kóníigo: Yáʼąąsh ádaatʼéii, éí ląʼída dahólǫ́, diné yinéłʼį́įgo éí doo nineelʼą́ą́góó yinéłʼį́; ákondi shí éiyá áneeląʼígíí shił bééhózin, háálá shíhígíí biniinaa ákótʼé.

38 Áádóó łaʼ nahasdzáán bił yóóʼahoogháahgo, áádóó yádiłhił yáʼąąsh ádaatʼéii ákótʼée ndi nááná łaʼ nááhodoodleeł; áádóó shinaanish, dóó shizaad ałdóʼ doo ninítʼiʼ da.

39 Háálá áko shooh, díí shinaanish dóó shiʼayóó átʼéii átʼé—nihokááʼ dineʼé doo náádinóonééł da dóó hoolʼáágóó iiná bá hólǫ́ǫ doogo ádeeshłííł.

40 Áádóó áko kʼad, Moses, shiyeʼ nílíinii, díí nahasdzáán bikááʼ sínízínígíí kʼad bee nił hashneʼ; áádóó bee nichʼįʼ hadeesdzihígíí náhidíízoh.

41 Áádóó nihokááʼ dineʼé baʼáłchínígíí shizaadígíí ádin doo bił danilį́įjįʼ ayííłką́ągo áádóó ląʼída díí naaltsoos biyiʼdóó nahjįʼ kódadoolnííł díí éí náhidíízohígíí, áko shooh, nááná łaʼ nigi átʼéhígíí náádínéesééł; áádóó éí diné bitahgóó nááhódlǫ́ǫ dooleeł—tʼáá haashį́į́ néélą́ą́ daboodlą́ą́ shį́į́ ánéeltʼeʼgo.

42 (Díí saad Moses bee bichʼįʼ haʼoodzííʼ dził bighą́ąʼdi, éí bízhiʼ nihokááʼ dineʼé baʼáłchíní bitahgóó doo bééhózin da dooleeł. Áádóó kʼad éí ni bee nichʼįʼ haʼoodzííʼ. Doo éí łaʼ bił ííshją́ą́ ádíílííł da tʼáá hazhóʼí daʼoodlą́ągo tʼéiyá. Tʼáá ákótʼée doo. Amen.)