1 Áádóó Shí, Bóhólníihii Diyin God, Moses bichʼįʼ haasdzííʼ, kódíshníigo: Éi Chʼį́įdii, Tʼáá Éí Tʼéiyá Shá Yizhchíinii bízhiʼ binahjįʼ bichʼįʼ yíníłʼaadʼę́ę, éí hodeeyáádą́ą́ʼ áadi naaghá, áádóó shidááhdóó niníya, kóníigo—Áko shooh, kǫ́ǫ́ honishłǫ́, shí ashíłʼaah, Niyeʼ nishłį́į dooleeł, áádóó nihokááʼ dineʼé tʼáá ałtso yisdádeeshʼish, tʼááłáʼí diné nilínígíí ndi doo yóóʼadoogáał da, dóó tʼáá aaníigo shí ádeeshłííł; ákohgo bee nóhólníhígíí shaa díílééł.

2 Ákondi, áko shooh, shiYeʼ Ayóó ííníshʼníinii, éí Ayóóʼííníshʼní dóó hodeeyáádą́ą́ʼ Bikʼidiishniiʼ, éí áshíłní—ShiZhéʼé, nínízinígíí bohodoolnííł, dóó ayóó ádaatʼéii hoolʼáágóó tʼáá ni doo.

3 Ákohgo, Chʼį́įdii shitsʼą́ą́jí sínílį́ʼígíí biniinaa, dóó diné tʼáá bí ádeinízingo ádaʼałʼį́ bitsʼą́ą́ʼ deeshchxǫǫł nínízingo, éí Shí, Bóhólníihii Diyin God, baa nílá, áádóó ałdóʼ, tʼáá shí sheʼadziilii baa nishłéego; éí Tʼáá Éí Tʼéiyá Shá Yizhchíinii bibeʼadziilii binahjįʼ, niʼ góyaa chʼíbidiʼdoolghą́ą́ł;

4 Áádóó Chʼį́įdii silį́į́ʼ, aooʼ, biʼiiníziinii ndi, yoochʼííd tʼáá ałtso yizhéʼé nilį́, áko nihokááʼ dineʼé yidiʼdoolohgo doo deiyooʼíi da dooleeł, áádóó ąąhshijééʼgo yooʼish dooleeł yinízin, tʼáá ałtso shizaad doo yikʼeh hółʼínígíí ndi.

5 Áádóó áko tłʼiish éí yéego naʼagiz nááná łaʼ honeijííhdi naaldlooshii biláahdi éí Shí, Bóhólníihii Diyin God, íishłaa.

6 Áádóó Chʼį́įdii éí tłʼiishígíí bijéí biyiʼ niiníla, (háálá ląʼída bikééʼ dah yidiiʼeezh,) áádóó Eve ałdóʼ yinaʼaloʼgo yaa nídiidzá, háálá Diyin God bíniʼígíí doo bił bééhózin da, ákohgo nahasdzáán yidoołchxǫǫłgo yaa nídiidzá.

7 Áádóó asdzáán kwíídííniid: Aooʼ, God éí ání—Dáʼákʼehdi doo tʼáá átʼé tsin bąąh adííyį́įł da? (Áádóó tłʼiish bizééʼ yiyiʼdóó haadzííʼ.)

8 Áádóó asdzání tłʼiish ííłní: Tʼáá ałtso dáʼákʼehdi tsin bąąhdóó bineestʼą́ diidį́į́ł;

9 Ákótʼée ndi dáʼákʼeh biniʼgi tsin bineestʼą́ yíníʼíngíí, Diyin God ání—Éí doo dííyį́įł da, éí doodago doo bididíílchił da, ákwíindzaago éí dadíítsaał.

10 Áádóó tłʼiish éí asdzání ííłní: Doo tʼáá aaníí dadíítsxaał da;

11 Háálá Diyin God éí bijį́įdi yíníyą́ągo, nił bééhodoozįįł ninááʼ ąą ádoonííł, áádóó diyin god danilínígi ánítʼée dooleeł, yáʼátʼéehii dóó nichxǫ́ʼígíí nił bééhózin dooleeł.

12 Áádóó asdzání tsin yiyiiłtsą́ągo chʼiyáán yáʼátʼéehii doodíłígíí átʼéego yiyiiłtsą́, dóó binááʼ bił yáʼátʼéeh silį́į́ʼ, áádóó éí tsinígíí hóyą́ągo ábidoolíiłgo yinízin, áádóó bineestʼąʼígíí néídiiʼą́, aadóó yiyííyą́ą́ʼ, áádóó beʼhastiin ałdóʼ yee níʼą́, áádóó yiyííyą́ą́ʼ.

13 Áádóó tʼáá áłah binááʼ ąą ályaa, dóó tʼáá łíchíʼígíí bił bééhoozin. Áádóó fig bitʼąąʼ ahíídiiłkad dóó boozhnííʼ gónaaí dahsiłtsoozígíí áyiilaa.

14 Áádóó Bóhólníihii Diyin God biinééʼ yidiiztsʼą́ą́ʼ, tʼáá áłah dáʼákʼehgi yiʼashgo, éí bijį́ honeezkʼází; áádóó Adam dóó beʼasdzą́ą́ʼ Bóhólníihii Diyin God yitsʼąą nídeestʼį́į́ʼ dáʼákʼeh tsin adaazʼáhígíí bitah.

15 Áádóó Shí, Bóhólníihii Diyin God, Adam bíká ádííniid, áádóó ábidishní: Háadísh naniná?

16 Áádóó ádííniid: Dáʼákʼeh biyiʼgi niinééʼ sidítsʼą́ą́ʼ, áádóó nísésdzííd, háálá tʼáá łinishchííʼígíí biniinaa, áádóó nídéshtʼį́į́ʼ.

17 Áádóó Shí, Bóhólníihii Diyin God, Adam ábidííniid: Háísh tʼáá łíníchííʼ nidííniid? Daʼ tsin doo bąąhdóó ádííyį́įł da nidííniidyę́ęísh yíníyą́ą́, ákwíindzaago éí tʼáá aaníí dadíítsaał?

18 Áádóó hastiin ádííniid: Asdzání shéíníłtínée, dóó bił naniʼaash doo shidíníniidę́ę, éí tsin bineestʼąʼ tsin bąąhdóó sheiníʼą́ áádóó yíyą́ą́ʼ.

19 Áádóó Shí, Bóhólníihii Diyin God, asdzání ábidíshní: Díísh haʼátʼíí shąʼ baa nisíníyá? Áádóó asdzáá ání: Tłʼiish shiʼdeezloʼ, dóó ííyą́ą́ʼ.

20 Áádóó Shí, Bóhólníihii Diyin God, tłʼiish bichʼįʼ haasdzííʼ: Díí baa nisíníyáhígíí biniinaa béégashii tʼáá ałtso bilááh átʼéego hóyéeʼgo ná haʼdoodzih; nihoojííhdi naaldlooshii daʼałchiní tʼáá átʼé biláahdi; nibid bee naninaʼdooleeł, dóó łéézh nildeełgo tʼáá hinínáago ałtso niidoołkááł.

21 Ni dóó asdzání ahoołchʼį́į́dgo ádeeshłííł, nihitsʼą́ą́dóó yizhchíinii bitah daʼahoolchʼį́į́dgo ádeeshłííł; áádóó bí eí nitsiitsʼiin yidoołtłish, áádóó ni eí bíkétal dííłtlish.

22 Ásdzánígíí bichʼįʼ, Shí, Bóhólníihii Diyin God, ábidííniid: Ayóó átʼáo tiʼhoyínííhgo ádeeshłííł éí awééʼ nahwiileehdi áko nił nahonigaahgo niʼayííłchííh dooleeł. Áádóó nahastiin éí baʼíínílíi dooleeł, áádóó nikʼi bóhoníłnííh doo.

23 Áádóó Adam bichʼįʼ, Shí, Bóhólníihii Diyin God, haasdzííʼ: Háálá neʼasdzáá biinééʼ sidínítsʼą́ągo bikʼeh hwííníłʼįįdígíí, bąąhdóó doo ádííyį́įł da nidishnínée bąąhdóó tsin bineestʼą́ yíníyą́ą́ʼ éí, kódííniid—Doo éí dííyį́įł da, niʼígíí éí doo yáʼátʼééhgóó bá haʼdoodzih ni ná; áádóó yínííł nee hólǫ́ǫgo tʼáá ákwíí jį́ íyą́ągo tʼáá átʼé neʼiinaʼ yidiyoołkááł.

24 Chʼil deeníní ałdóʼ, áádóó ałdóʼ hosh éí nahwiileeh doo, áádóó dáʼákʼeh chʼil azeeʼígíí niyą́ą dooleeł.

25 Tó niniiʼ bąąh náálį́įgo bááh niyą́ą dooleeł, ńléí łeezh niʼjįʼ aneinídzaajįʼ—háálá tʼáá aaníí éí dadíítsxaał—háálá éí bitsʼą́ą́dóó éí ániʼdiilyaa: háálá łeezh nilį́į́ ńtʼę́ę́ʼ, dóó łeezh nídíídleeł.

26 Áádóó Adam beʼasdzáá Eve yee yiyíízhiʼ, háálá tʼáá ałtsoní hináanii bimá nilį́; jó Shí, Bóhólníihii Diyin God, tʼáá ałtso sáanii daʼáłtséhígíí kótʼáo déízhiʼ, éí ląʼí ákódaatʼé.

27 Adam, áádóó beʼasdzáá ałdóʼ bá, Shí, Bóhólníihii Diyin God, akágí ééʼ bá íishłaa, dóó biihyíłtį́h.

28 Áádóó Shí, Bóhólníihii Diyin God, Tʼáá Éí Tʼéiyá Shá Yizhchíinii ábidishní: Áko shooh, nihokááʼ dineʼé éí nihígi átʼé silį́į́ʼ yáʼátʼéehii dóó doo yáʼátʼéehii bił bééhózin; áádóó bílaʼ náasdi kóyiilaago áádóó iiná bitsin sikaad néídiiláago, áádóó yiyííyą́ąʼgo éí hoolʼáágóó hináa dooleeł,

29 Éí bąą Shí, Bóhólníihii Diyin God, Eden biDáʼákʼehdóó chʼíhodeesłóós, dáʼákʼeh áhodooʼlííłgo, éí niʼgi náhojigod dóóʼ éí áádóó hojizlį́į́ʼ;

30 Háálá Shí, Bóhólníihii Diyin God, hinishnánígi átʼáo, shí shizaad doo nátʼą́ą́ʼ kónídeeshdlįįł da, háálá shizééʼdóó bee haasdzííʼ éí bohodoolnííł.

31 Áko diné Shí chʼíníłchą́ą́ʼ, Eden biDáʼákʼehdi haʼaʼaahjígo ninílá, diyin yá naalʼaʼí cherubim dóó béésh hał dookʼą́ąłgo nááyisgo éí tsin iináanii yaa áhályą́ą doogo ninílá.

32 (Áádoo díigi átʼáo shá naalʼaʼí Moses saad bee bichʼįʼ yéíłtiʼ, áádóó tʼáá aaníigo ádaatʼé shí íínísinígi átʼáo; áádóó ni bee nichʼįʼ haasdzííʼ. Áádóó nááná łaʼ diné doo bee bił hodíílnih da, shí tʼáá áko nidííniidgo índa, áádóó daʼoodlánígíí tʼeíya ałdóʼ. Amen.)