1 Áádóó baa hoolzhiizh Shí, Bóhólníihii Diyin God, chʼíbiníłkaad bikééʼdóó, Adam nahasdzáán néįgodgo yaa nídiidzá, áádóó tʼáá ałtso dáʼákʼehgi ndaaldlooshii yikʼi hooʼááł, áádóó nitaaʼ tó bąąh náálį́įgo bááh yiyą́ą doo, Shí Diyin Bóhólníihii kótʼáo bee bá nihoníʼą́. Áádóó Eve, beʼasdzą́ą́, ałdóʼ, yił naalnish.

2 Áádóó Adam beʼasdzą́ą́ yił, baʼałchíní hodeezlį́į́ʼ, áádóó kʼeeʼąą dínééstą́ dóó nahasdzáán bikááʼ náhoohdleeł silį́į́ʼ.

3 Áádóó hodeeshzhiizh, nahasdzáán bikáaʼgo Adam biyeʼké dóó bitsiʼké naaki nínilgo dah dadiikai, áádóó kʼidiʼdoolyéełgo hashtʼeʼdahoolaa, áádóó dibé dóó tłʼízí yaa ádahalyą́, áádóó bí áłdóʼ biyeʼké dóó bitsiʼké dahazlį́į́ʼ.

4 Áádóó Adam dóó Eve, beʼesdzą́ą́, Diyin Bóhólníihii bízhiʼ yinahjįʼ náʼookąąhgo yichʼį́ʼ sodoolzin, áádóó Eden biDáʼákʼehdę́ę́ʼ Diyin Bóhólníihii biinééʼ yidiiztsʼą́ą́ʼ, tʼáá áłah bichʼįʼ yáłtiʼgo, tʼáadoo yiyiiłtsą́ą da; háálá bí bił hazʼą́ą́dóó bidáʼdeelkaal.

5 Áádóó bee hazʼáanii yeinílá, éí Bóhólníihii biDiyin God deidósin doo, áádóó bilį́į́ʼ áłtsé ndahaazhchínígíí yee náádaʼíídoołnih, éí Diyin Bóhólníihii yichʼįʼ náádaʼíídoołnih. Áádóó Adam éí Diyin Bóhólníihii bibee hazʼáanii yikʼeh áhoolaa.

6 Áádóó ląʼí yiską́ Diyin Bóhólníihii yá naalʼaʼí Adam yaa níyáago ání, kóníigo: Haʼátʼíí lá biniyé Diyin Bóhólníihii yá naalʼaʼí bichʼįʼ nááʼiyíłniih? Áádóó Adam ádííniid: Doo shił bééhózin da, tʼóó Diyin Bóhólníihii ákóshidííniid.

7 Áádóó Diyin yá naalʼaʼí ádííniid, kóníigo: Díí éí nihiTaaʼ Nilíinii Tʼááłáʼí Bá Yizhchínígíí nááheezniiʼę́ę beełtʼé, éí diyingo ajoobaʼ dóó tʼáá aaníinii biiʼ hadeezbin.

8 Ákohgo, tʼáá ałtso áníłʼínígíí aYeʼ nilíinii bízhiʼ binahjįʼ áníłʼį́, áádóó ádaa náʼiiníkąąh dóó Diyin God bichʼįʼ sodílzin biYeʼ bízhiʼ binahjįʼ.

9 Áádóó éí bijį́įdi Iiʼ Sizį́ Diyinii Adam yikʼi hooleʼ, éí nihiTaaʼ dóó biYeʼ yaa halneʼ, kóníigo: Shí éí hodeeyáádą́ą́ʼ Tʼáá Éí Tʼéiyá Bá Yizhchíinii nishłį́, kʼad dóó ahoolʼáágóó, áko bąąhági átʼéii íinidzaaígíí éí tʼáá ákótʼáo éí náándiʼyoolnihgo átʼé, dóó tʼáá ałtso nihokááʼ dineʼé ałdóʼ, áádóó tʼáá ałtso ádeinízinígíí ałdóʼ.

10 Áádóó éí bijį́įdi Adam Diyin God yaa hasdliʼ dóó Iiʼ Sizį́ Diyinii bił hooleʼ, áádóó tʼáá ałtso nahasdzáán bikááʼ hooghan ndahazʼánígíí yaa hoolneʼ, kóníigo: Diyin God bízhiʼ baa hashniih, háálá asésihígíí biniinaa shinááʼ ąą ádzaa, díí iiná biyiʼ aláahgo ił hózhǫ́ shee hólǫ́ǫ doo, dóó atsʼíís biyiʼ Diyin God náánéideestsééł.

11 Áádóó Eve, beʼasdzą́ą́, díí tʼáá ałtso yidiiztsʼą́ą́ʼ dóó yaa bił hóózhǫǫd, kóníigo: Doo asiilziihgóó doo nihaʼáłchíní nihee hodooleeł da ńtʼę́ę́ʼ, dóó yáʼátʼééh dóó nichxǫ́ʼí tsʼídá doo nihił bééhodoozįįł da ńtʼę́ę́ʼ, náánihiʼdiizniiʼígíí bitsʼą́ą́dóó ił hózhǫ́, dóó hoolʼáágóó iiná Diyin God yikʼeh dahółʼínígíí tʼáá átʼé yeilééh.

12 Áádóó Adam dóó Eve Diyin God bízhiʼ yaa haznih, áádóó biyeʼké dóó bitsiʼké tʼáá ałtsoní yił íísjáán áyiilaa.

13 Áádóó Chʼį́įdii bitah níyá, kóníigo: Shí ałdóʼ Diyin God biyeʼ nishłį́; áádóó kódadoohnííł yidííniid, kóníigo: Tʼáadoo deinohdlání; áádóó doo deiyoosdląąd da, áádóó Diyin God bilááh Chʼį́įdii ayóóʼádeiyóʼní. Áádóó nihokááʼ dineʼé atsʼíseekʼeh, dóó bitsʼíís deinízinígíí, dóó bedaʼiiníziingo dah dadiikaigo bee bił hahoolzhiizh.

14 Áádóó Bóhólníihii Diyin God éí Iiʼ Sizį́ Diyinii binahjįʼ nihokááʼ dineʼé tʼáá ałtsogóó ádaa ńdaʼoohkąąh yidííniid;

15 Áádóó ląʼída diné biYeʼ deiyoosdląąd, dóó bibąąhági ádaatʼéii yaa ádaa ńdaʼooskanígíí, éí yisdádootʼish; áádóó ląʼí diné doo daʼoosdląąd da dóó tʼáadoo ádaa ńdaʼooskanígíí, éí tiʼhooʼnííhgóó bá nihodootʼááł; Diyin God bizaad yee haadzíʼígíí beʼdoolníiłgo yee nihoníʼą́; ákohgo tsʼídá bohodoolnííł.

16 Áádóó Adam dóó beʼesdzą́ą́, Eve, Diyin God yichʼįʼ sodilzinígíí tʼáadoo nahjįʼ kóyiilaa da. Áádóó Adam beʼasdzą́ą́ Eve yił ałtʼajííʼáazhgo, áádóó iʼniiltsąąd dóó Cain yishchį́, áádóó ání: Diyin Bóhólníihii bitsʼą́ą́dóó hastiin nídiiłtį́į́ łaʼ; ákohgo bizaadígíí doo nahjįʼ kwíidoolííł da. Ákondi shooh, Cain táadoo akʼehóółʼįįd da, kóníigo: Háísh éí Diyin Bóhólníihii átiʼį́įgo bééhodeesįįł?

17 Áádóó nááʼniiltsąąd dóó bitsilí Abel yishchį́. Áádóó Abel éí Diyin Bóhólníihii biinééʼ yidiiztsʼą́ą́ʼ dóó yikʼeh hóółʼįįd. Áádóó Abel éí dibé yaa áhályáanii nilį́į ńtʼę́ę́ʼ, ákondi Cain éiyá dáʼákʼeh yinaalnishii silį́į́ʼ.

18 Áádóó Cain éí Chʼį́įdii Diyin God yiláahgo ayóóʼáyóʼní. Áádóó Chʼį́įdii kóbidííniid, kóníigo: Diyin Bóhólníihii bichʼįʼ nááʼiiyíłniih.

19 Áádóó bichʼįʼ hoolzhish dóó baa hoolzhiizh Cain łeeyiʼdóó tsin bineestʼąʼ haníísánígíí Diyin Bóhólníihii yee yichʼįʼ nááʼiisniiʼ.

20 Áádóó Abel, éí ałdóʼ bilį́į́ʼ áłtsé nadahaazhchínígíí daneeskʼahígíí, nayiizjaaʼ. Áádóó Diyin Bóhólníihii Abel bił nilį́, dóó nááʼiisniiʼígíí bichʼįʼ ałdóʼ;

21 Ákondi Cain, dóó yee nááʼiisniiʼígíí, éí doo bił nilį́į da. Áko Chʼį́įdii díí bee bił bééhózin, dóó bił yáʼátʼééh. Áádóó Cain éí tʼáá awołíbee báhóóchįįd, dóó biniiʼyę́ę niʼ kódzaa.

22 Áádóó Diyin Bóhólníihii Cain áyidííniid: Háʼátʼíísh biniyé tʼáá awołíbee náháchįʼ? Háʼátʼíísh éí biniyé niniiʼ nijįʼ kódzaa?

23 Yáʼátʼéehgo íʼiinlaago, bee ná lą́ adooleeł. Áádóó doo yáʼátʼéehgo íʼiinlaagóó éí, bąąhági átʼéii dáádílkałgi siláa doo, áádóó Chʼį́įdii nikʼihooʼááł doo nízin; áádóó shibee hazʼáanii bikʼeh honíłʼį́įgo tʼéiyá, yisdánideeshtééł, áádóó bí ná yinízinígíí bikʼehgo éí áhoonííł doo. Áádóó ni éí bí bikʼi hwííʼááł doo;

24 Háálá kʼad kodóó dóó náasjįʼ tʼáá ałtso biyoochʼíídii bizhéʼé nilį́į doo; Chʼį́įdii Biʼiiníziinii yínílyéego bee néíhoʼdílzin doo; háálá tʼahdoo nahasdzáán álnééhyę́ędą́ą́ʼ honílǫ́ǫ́ʼ ńtʼę́ę́ʼ.

25 Áádóó kóhaʼníigo baa hodoolzhish—Áko díí tsʼídá aláahdi woolchʼį́į́dę́ę éí kʼad Cain dahyoojih; háálá bí éí Diyin God tsʼídá aláahdi yee naʼneeztʼą́ʼę́ę doo yinízin da; áádóó díí éí hóyéeʼgo nąąh nideeshłééł, tʼáá hazhóʼí ádaa náʼiisíníkango tʼéiyá doo nąąh nideeshłééł da.

26 Áádóó Cain tʼáá awołíbee báháchįʼ, dóó Diyin Bóhólníihii bizhí doo yiyíístsʼą́ą da silį́į́ʼ, Abel, bitsilí ałdóʼ doo yiyíístsʼą́ą da, éí Diyin Bóhólníihii yá hodísingo yidááhdóó yigááł ńtʼę́ę́ʼ.

27 Áádóó Adam dóó beʼasdzą́ą́ Diyin Bóhólníihii yidááhdóó chaał nilį́į ńtʼę́ę́ʼ, éí Cain dóó bitsilíké biniinaa.

28 Áádóó baa hoolzhiizh Cain łaʼ bitsilí bitsiʼ beʼasdzą́ą́ʼ áyiilaa, áádóó éí tʼáá áłah Chʼį́įdii Diyin God yiláahgo ayóóʼáyóʼníí ńtʼę́ę́ʼ.

29 Áádóó Chʼį́įdii Cain áyidííniid: Nidáyiʼdóó bee tʼáá aaníigo ádeehandziih, áádóó baa hwíínílneʼgo éí tʼáá aaníí dadíítsaał; áádóó nitsiliké bitsiitsʼiin binahjįʼ ádeehadíídzih, dóó Diyin God hináanii binahjįʼ, éí díí doo yaa dahodoolnih da; háálá yaa dahoolneʼgo éí, tʼáá ááníí dadinóonééł; áko díí nizhéʼé doo yaa bił bééhodoozįįł da; áádóó áajį́ʼ ayííłką́ągo nitsilí Abel níhílákʼe deeshtééł.

30 Áádóó Chʼį́įdii éí Cain tʼáá ni nínízinígíí bikʼehgo ádeeshłííł yidííniid. Áádóó díí tʼáá átʼé tʼáá nahonitʼingo ádaalyaa.

31 Áádóó Cain ádííniid: Tʼáá aaníí Shí Mahan nishłį́, díí ayóó átʼáo nahonitʼin binanitʼaʼí, áko iideeshxééł dóó binahjįʼ ashtʼį́į doo. Ákohgo Cain éí Nanitʼaʼí Mahan bee wóójiʼ, áádóó bí éí doo yáʼáshónígíí yaa naagháhígíí bił ayóó átʼé.

32 Áádóó Cain dáʼákʼehgóó níyá, dóó Cain áadi bitsilí, Abel yichʼįʼ haadzííʼ. Áádóó baa hoolzhiizh dáʼákehdi naaʼaashgo, Cain Abel, bitsilí yikʼijįʼ ndíídzá, dóó yiyiisxį́.

33 Áádóó Cain áátʼįįdígíí yaa haniih, kóníigo: Kʼad tʼáá nííkʼehgóó áshtʼį́; tʼáá aaníí shitsilí bilį́į́ʼ shilákʼee níídeeʼ.

34 Áádóó Diyin Bóhólníihii Cain kóyidííniid: Nitsilí Abelshąʼ, háájí? Áádóó bí ání: Doo shił bééhózin da. Daʼ shíísh shitsilí baa áháshyą́?

35 Áádóó Diyin Bóhólníihii ábidííniid: Háʼátʼíísh baa nisíníyá? Nitsilí łeeyiʼdę́ę́ʼ bidił hojoobaʼgo yichago shichʼįʼ ání.

36 Áádóó kʼad díí nahasdzáán bikááʼ hóyéeʼgo bikʼeʼíyéʼígíí nikʼijįʼ kódoolnííł háálá bizééʼ ąą átʼéego nitsilí nílaʼ bee siyíníłhínígíí bidił biihdoonah.

37 Dáʼákʼeh hashtʼeniléehgo bidziil ndi doo iitsóóh da doo. Nahasdzáán bikááʼ éí nanichée doo dóó tʼáá áłahjįʼ naanááʼnééł doo.

38 Áádóó Cain Diyin Bóhólníihii kóyidííniid: Chʼį́įdii éí shizahooloʼ shitsilí bilį́į́ʼ biniyé. Áádóó Shí ałdóʼ tʼáá awołíbee sháháchįʼígíí biniinaa; háálá bí yee nichʼįʼ nááʼiisniiʼígíí nił tʼáá áko shíhígíí éí ndagaʼ; bee atíshiʼdilnééhígíí éí tsʼídá shiláahdi átʼé éí shí doo bííníshghah da.

39 Áko shooh díí jį́ Diyin Bóhólníihii bidááhdóó chʼíshiníníłchą́ą́ʼ, áádóó nidááhdóó éí nashidiʼnilʼin doo; áádóó nahasdzáán bikááʼ éí nanishchée doo dóó tʼáá áłahjįʼ naanááshnééł doo; áádóó baa hodoolzhish, tʼáá háí shį́į́ shikʼíníyáhígíí shidiyoołhééł, bąąhági ááshtʼįįłígíí biniinaa, háálá díí éí Diyin Bóhólníihii doo bitsʼąą nanilʼin da.

40 Áádóó Shí Diyin Bóhólníihii kóbidííniid: Tʼáá háí shį́į́ niisxínígíí, tsostsʼidi tínbiʼdidoolnííł. Áádóó Shí Diyin Bóhólníihii Cain bitsįʼ yishtłizgo íishłaa, áko łaʼda hakʼíníyáago doo hodiyoołhéeł da.

41 Áádóó Cain Diyin Bóhólníihii bitsʼą́ą́ʼdóó dáʼdeelkaal, áádóó beʼasdzą́ą́ dóó ląʼí bikʼiské yił kéyah Nodgi kéédahatʼį́, Eden kéyahdóó haʼaʼaahjigo.

42 Áádóó Cain beʼasdzą́ą́, nááʼniiltsąąd dóó Enoch yishchį́, áádóó ayeʼké dóó atsiʼké ląʼí bá yizhchį́. Áádóó kintah haidiilaa, áádóó éí kintah biyeʼ, Enoch bízhiʼ yee yiyíízhiʼ.

43 Áádóó Enoch Irad bá yizhchį́, áádóó nááná łaʼ biyeʼké dóó bitsiʼké ałdóʼnááhásdlį́į́ʼ. Áádóó Irad éí Mahujael bá yizhchį́, áádóó nááná łaʼ biyeʼké dóó bitsiʼké ałdóʼnááhásdlį́į́ʼ. Áádóó Mahujael éí Methusael bá yizhchį́, áádóó nááná łaʼ biyeʼké dóó bitsiʼké ałdóʼnááhásdlį́į́ʼ. Áádóó Methusael éí Lamech bá yizhchį́.

44 Áádóó Lamech éí beʼasdzą́ą́ʼ naakigo áyiilaa; łaʼ éí Adah wolyé, áádóó łaʼígíí éiyá, Zillah wolyé.

45 Áádóó Adah éí Jabal yishchį́; éí níbaal yiyiʼ kéédahatʼį́, áádóó ałʼąą ádaatʼéego naaldlooshii yaa ádahalyáanii yizhéʼé nilį́; áádóó bitsilí éí Jubal wolyé, éí tsin tłʼóół bąąh daneelzheeʼgo bee nidaʼaʼnéii índa tsin bee íʼdílzoołí yee nidaanéhígíí bizhéʼé dzizlį́į́ʼ.

46 Áádóó Zillah, éí ałdóʼ Tubal Cain yishchį́, éí béésh łitsoii dóó béésh ditʼóódígíí tʼáá ałʼąą ádaatʼéego yee naʼachʼąąh dóó yinaʼníłtingo yiyiichįįh. Áádóó Tubal Cain bideezhí éí Naamah wolyé.

47 Áádóó Lamech bedaʼasdzą́ą́ kwííłní, Adah dóó Zillah: Shiinééʼ deisínóółtsʼą́ą́ʼ, Lamech beʼasdzą́ą́ nóhłíinii, baa haasdziihígíí bikʼeh honołʼį́; háálá diné atíshiilaaígíí biniinaa hoséłhį́, dóó tsíłkéí atíshiilaaígíí ájítʼį́.

48 Cain éí tsostsʼidi atínídoodlíiłgo, éí tʼáá aaníí Lamech tsostsʼidiin dóó baʼaan tsostsʼidi atínídoodlíiłgo;

49 Háálá Lamech éí Chʼį́įdii yił ahaʼádeestʼą́, Cain ádzaaígíí bikʼehgo, éí binahjįʼ Nantʼaʼí Mahan silį́į́ʼ, éí Chʼį́įdii ayóó átʼáo ndanilʼinée yinanitʼaʼí nilíinii Cain yeinílá; dóó Irad, Enoch biyeʼ ałdóʼ, éí nideiniłʼinée bił bééhózin, áádóó éí Adam biyeʼké yił ííshją́ą́ ádeiłʼį́įgo yaa nídiikai;

50 Ákohgo Lamech, báháchʼįʼgo, yiyiisxį́, Cain bitsilí Abel, yiyiisxínígíí biniinaa éí ndagaʼ, háálá éí binaadeełii yíkáʼátʼį́į ńtʼę́ę́ʼ, ákondi bí éí yee yił ahaʼdeestʼánígíí biniinaa yiyiisxį́.

51 Háálá, Cain biiníłką́ą́dę́ę́ʼ, nahonitʼingo ałhaʼdiitʼaah hólǫ́ǫ ńtʼę́ę́ʼ, áádóó chahałheeł biyiʼ danichxǫ́ʼígíí yaa naakai, áádóó hastóí tʼáá ałtso bikʼis danilínígíí bił béédahózinígíí bídóʼ bił béédahózin.

52 Ákohgo Diyin Bóhólníihii Lamech hóyéeʼ yee yá nahoníʼą́, aadóó yił dabighanígíí ałdóʼ, áádóó tʼáá ałtso Chʼį́įdii yił ahadaʼdeestʼánígíí ałdóʼ; háálá éí Diyin God bibee hazʼáanii doo yikʼeh dahółʼį́į da, dóó éí Diyin God doo bił yáʼátʼéeh da, áko tʼáadoo yíkáʼeelwod da, áádóó bindaanishígíí éí aláahgo woolchʼį́dígíí ádeiłʼį́, dóó tʼáá ałtso nihokááʼ dineʼé beʼashiiké bitahgo kódeiyiilaa. Áádóó nihokááʼ dineʼé beʼashiiké bitahgóó hazlį́į́ʼ.

53 Áádóó nihokááʼ dineʼé beʼatsiʼké bitahgóó díí doo baa yáʼátiʼ da ńtʼę́ę́ʼ, áko Lamech éí bedaʼasdzą́ą́ yee yił hoolneʼ, dóó bikʼijįʼ daazlį́į́ʼ, áádóó adahwiisʼáágóó díí yaa dahoolneʼ, doo aa dajoobaʼ da;

54 Ákohgo Lamech biʼjoodláa doo, chíbidiʼnoolchą́ą́ʼ, áádóó tʼáadoo nihokááʼ dineʼé beʼashiiké yitah naagháa da silį́į́ʼ ńtʼę́ę́ʼ, háálá ákódzaago dabidiyoolhéłígíí biniinaa.

55 Áádóó ákótʼáo nihokááʼ dineʼé beʼashiiké bitahgóó chahałheeł biyiʼ danichxǫ́ʼí baa naʼaldeehígíí atxisgo hazlį́į́ʼ.

56 Áádóó Diyin God nahasdzáán tʼáá íiyisíí hóyééʼii yee yikʼijįʼ haadzííʼ, áádóó doo yáʼádaashóonii yaa naakaiígíí yichʼįʼ báhóóchįįd, éí tʼáá ałtso nihokááʼ dineʼé beʼashiiké haidiilaayę́ę;

57 Háálá biinééʼ doo yikʼeh dahółʼį́į da, éí doodago biYeʼ Tʼáá Éí Tʼéiyá Bá Yizhchíinii doo deiyoodlą́ą da, éí áłníiʼgi hoolzhishgo doogááł níigo yaa haadzííʼ, éí nahasdzáán tʼahdoo álnéhę́ędą́ą́ʼ hashtʼebiʼdiilyaa.

58 Áádóó ákótʼáo Diyin Binaʼnitin Bee Yisdáʼiildéehii bee naʼnitingo ályaa, éí hodeeyáádą́ą́ʼ, éí Diyin yá nidaalʼaʼí dadiyinii yaa dahalneʼ éí Diyin God bił hazʼą́ą́dóó adabiʼdiisʼaʼ, aadóó tʼáá biinééʼ bee, dóó Iiʼ Sizį́ Diyinii aa yílyé bee.

59 Áádóó ákótʼáo tʼáá ałtsoní Adam bee bikʼihodiiniiʼ, hódílzingo óʼoolʼįįł bee, dóó Diyin Binaʼnitin Bee Yisdáʼiildéehii bee naʼnitin doo, dóó haneʼ ílíinii bee chʼíhootʼááł, éí nahasdzáán biyiʼ siláa doo, dóó ńléí nihoníyą́ąjįʼ; dóó díí bodahoolyaa. Amen.