1 Mo nao taem we king i bin harem ol toktok ia, hem i talem long ol pris blong hem: “Tekem man ia i go longwe, mo kilim hem i ded; from bae yumi mekem wanem wetem hem, from hem i krangke.”

2 Mo oli stanap mo oli traem blong putum han blong olgeta long hem, be hem i stanap strong agensem olgeta, mo i talem long olgeta:

3 “Yufala i no tajem mi, from bae God i panisim yufala sapos yufala i putum han blong yufala long mi, from mi no talemaot yet mesej ia we Lod i sendem mi blong talemaot; mo mi no talemaot long yufala yet, ol samting we yufala i bin askem mi blong talem; from hemia, God bae i no letem se yufala i prapa spolem gud mi long taem ia naoia.

4 Be mi mas mekem ol komanmen oli hapen, we God i bin givim long mi; mo from mi talem trutok ia long yufala, nao yufala i kros long mi. Mo bakegen, from mi talemaot toktok blong God yufala i jajem mi se mi mi krangke.”

5 Nao i bin hapen se afta we Abinadae i talemaot ol toktok ia, ol pipol blong king Noa oli fraet blong putum han blong olgeta long hem, from Spirit blong Lod i stap wetem hem; mo fes blong hem i saen we i saen bigwan, olsem we fes blong Moses i saen taem we hem i bin stap long hil blong Sinae taem we hem i stap toktok wetem Lod.

6 Mo hem i toktok wetem paoa mo atoriti we i kam long God; mo hem i bin gohed wetem ol toktok blong hem, se:

7 “Yufala i luk se yufala i no gat paoa blong kilimded mi, from hemia mi endem mesej blong mi. Yes, mo mi luk se i katem hat blong yufala from mi talem trutok long yufala long saed blong ol rabis fasin blong yufala.

8 Yes, mo ol toktok blong mi oli fulumap yufala, i mekem yufala i sek mo sapraes bigwan, mo yufala i kros.

9 Be mi endem mesej blong mi, mo afta, i nomata se mi go long wanem ples, sapos i hapen se Lod i sevem mi.

10 Be mi save talem hemia long yufala, wanem we yufala i mekem long mi, afta long samting ia, bae hem i wan eksampol mo wan sado blong ol samting we bae oli kam.

11 Mo nao mi ridim long yufala smol haf blong ol komanmen blong God, from mi luk se yufala i no raetemdaon olgeta long hat blong yufala; mi luk se yufala i bin lanem mo yufala i bin tijim rabis fasin long bigfala pat blong laef blong yufala.

12 Mo nao, yufala i tingbaot we mi bin talem long yufala: ‘Yu yu no mas mekem, blong yu bakegen, eni kaen pikja, o eni narafala samting we i olsem ol samting antap long heven, o we i stap daon long wol ia, o we i stap long solwota andanit long graon.’

13 Mo bakegen: ‘Yu yu no mas bodaon long olgeta, mo wok blong olgeta; from mi Lod, God blong yu, mi mi wan jalus God, mi stap panisim ol rabis fasin blong ol papa long ol pikinini, i go kasem long nambatri mo nambafo jeneresen blong olgeta we oli no laekem mi nating;

14 Mo mi stap soem sore long ol taosen blong olgeta we oli lavem mi mo obei ol komanmen blong mi.

15 Yu yu no mas tekem nem blong Lod, God blong yu blong nating; from bae Lod i no luk se man ia i no gat rong, we i stap tekem nem blong hem blong nating.

16 Tingbaot sabat dei, blong holem i tabu.

17 Sikis dei bae yu wok, mo mekem evri wok blong yu;

18 Be long nambaseven dei, sabat blong Lod, God blong yu, yu yu no mas mekem eni wok, yu, o boe blong yu, o gel blong yu, man blong wok blong yu, o woman blong wok blong yu, o ol buluk blong yu, o ol strenja we oli stap long ples blong yu;

19 From long sikis dei Lod i bin mekem heven mo wol, mo solwota, mo evri samting we i stap long hem; taswe Lod i blesem sabat dei, mo i mekem i tabu.

20 Ona long papa mo mama blong yu, blong mekem se ol dei blong yu oli save longfala long graon we Lod, God blong yu i givim long yu.

21 Yu yu no mas kilim man i ded.

22 Yu yu no mas mekem adaltri. Yu yu no mas stil.

23 Yu yu no mas mekem giaman toktok agensem neba blong yu.

24 Yu yu no mas gat tingting blong wantem haos blong neba blong yu, yu no mas gat tingting blong wantem waef blong neba blong yu, o man blong wok blong hem, o woman blong wok blong hem, o buluk blong hem, o dongki blong hem, o eni samting we i blong neba blong yu.’”

25 Mo i bin hapen se afta we Abinadae i bin stop long ol toktok blong hem, nao hem i talem long olgeta: ‘?Yufala i bin tijim ol pipol ia se oli mas mekem evri samting ia blong holem ol komanmen ia?’

26 Mi talem long yufala, No; from sapos yufala i bin mekem, bae Lod i no mekem mi blong kam fored mo blong talemaot profesi we i nogud long saed blong ol pipol ia.

27 Mo nao yufala i bin talem se “fasin blong sevem man i kam tru long loa blong Moses.” Mi talem long yufala se i gat nid blong yufala i gohed blong holemtaet loa blong Moses yet, be mi talem long yufala, se taem ia bae i kam we bae i nomo gat nid blong holem loa blong Moses.

28 Mo antap long samting ia, mi talem long yufala, se fasin blong sevem man i no kam tru long loa ia nomo; mo sapos i no from atonmen, we God hemwan bae i mekem from ol sin mo ol rabis fasin blong ol pipol blong hem, bae oli mas ded nomo, i nomata long loa blong Moses.

29 Mo nao mi talem long yufala se i bin gat nid blong oli givim wan loa long ol pikinini blong Isrel, yes, wan strongfala loa tu; from oli bin wan stronghed pipol, oli kwik blong mekem rabis fasin, mo oli slo blong tingbaot Lod God blong olgeta.

30 From hemia, God i bin givim wan loa long olgeta, yes, wan loa blong mekem ol wok mo ol odinens, wan loa we oli nid blong folem gud long wan dei i go long narafala dei, blong oli kipim olgeta blong tingbaot God mo ol wok blong olgeta i go long hem.

31 Be luk, mi talem long yufala, se evri samting ia oli ol eksampol blong ol samting we bae oli kam.

32 Mo nao, ?oli bin andastanem loa? Mi talem long yufala, No, evriwan i no bin andastanem loa ia; mo hemia, from hat blong olgeta i strong tumas; from oli no andastanem se i no save gat wan man we Lod i save sevem hem, be nomo sapos i tru long fasin we God i pemaot man.

33 From luk, ?i no tru se Moses i bin talemaot profesi long olgeta long saed blong taem we Mesaea bae i kam, mo we God bae i pemaot ol pipol blong hem? Yes, mo tu, evri profet we oli bin talemaot ol profesi stat long taem we wol i bin stat—?i no tru se oli bin toktok kolosap lelebet o moa long saed blong ol samting ia?

34 ?Oli no bin talemaot se God hemwan bae i kamdaon long medel blong ol pikinini blong ol man, mo tekem long hem pikja blong man mo wokbaot i go wetem bigfala paoa long fes blong wol?

35 Yes, mo ?oli no bin talemaot tu se bae hem i mekem laef bakegen long ded blong ol dedman i hapen, mo we hem, hemwan, bae oli mekem nogud fasin mo givim hadtaem long hem?