1 Mo nao king Mosaea i mekem se evri pipol oli kam tugeta.

2 Nao i no gat plante long ol pikinini blong Nifae, o plante long olgeta we oli kamaot long laen blong Nifae, olsem we i bin gat plante long ol ^apipol blong Sarahemla, we oli kamaot long laen blong ^bMyulek mo olgeta we oli bin kam wetem hem long waelples.

3 Mo i no bin gat plante long ol pipol blong Nifae mo long ol pipol blong Sarahemla olsem we i bin gat plante long Ol Man blong Leman; yes, namba blong olgeta i no bin kasem haf blong olgeta.

4 Mo nao evri pipol blong Nifae oli kam tugeta, mo tu, evri pipol blong Sarahemla, mo oli kam tugeta long tu grup.

5 Mo i bin hapen se Mosaea i ridim, mo hem i mekem se oli ridim, ol histri blong Senif long ol pipol blong hem; yes, hem i ridim ol histri blong ol pipol blong Senif, stat long taem we oli bin aot long graon blong Sarahemla i go kasem taem we oli kambak bakegen.

6 Mo tu, hem i ridim histri blong Alma mo ol brata blong hem, mo evri hadtaem blong olgeta stat long taem we oli livim graon blong Sarahemla, i go kasem taem we oli kambak bakegen.

7 Mo nao, taem we Mosaea i finis blong ridim ol histri ia, ol pipol blong hem we oli bin stastap long graon oli bin fulap wetem sapraes mo oli sapraes tumas.

8 From oli no bin save wanem blong tingting long hem; from taem we oli luk olgeta ia we oli mekem olgeta oli ^akamaot long fasin blong stap slef, oli fulap wetem bigfala glad we i bigwan tumas.

9 Mo bakegen, taem we oli tingbaot ol brata blong olgeta we Ol Man blong Leman oli kilim olgeta oli ded, oli fulap long harem nogud, mo tu, wota blong ae i ron plante from oli harem nogud.

10 Mo bakegen, taem we oli tingbaot fasin ia blong God, we i gud tumas mo i kam kwiktaem, mo paoa blong God blong mekem Alma mo ol brata blong hem oli aot long ol han blong Ol Man blong Leman mo kam fri long fasin blong stap slef, nao oli leftemap voes blong olgeta mo talem tangkyu long God.

11 Mo bakegen, taem we oli tingbaot Ol Man blong Leman, we oli ol brata blong olgeta, long saed blong ol fasin blong sin mo doti fasin blong olgeta, oli harem i ^asoa tumas long bodi mo tingting blong olgeta i trabol tumas se bae ^bsol blong olgeta i stap gud o no.

12 Mo i bin hapen se olgeta we oli ol pikinini blong Amulon mo ol brata blong hem, we oli bin tekem ol gel blong Ol Man blong Leman olsem waef blong olgeta, oli no hapi long fasin blong ol papa blong olgeta, mo oli nomo wantem se bae oli singaotem olgeta wetem ol nem blong ol papa blong olgeta; from hemia, oli tekem long olgeta nem blong Nifae, blong mekem se oli save singaotem olgeta ol pikinini blong Nifae, mo bae oli kaontem olgeta ia long medel blong olgeta we oli bin singaotem olgeta, Ol Man blong Nifae.

13 Mo nao, evri pipol blong Sarahemla oli bin ^akaontem olgeta wetem Ol Man blong Nifae, hemia i from se oli no bin givim kingdom long wan man moa, be long olgeta nomo we oli bin kamaot long laen blong Nifae.

14 Mo nao, i bin hapen se taem we Mosaea i finis blong toktok mo rid long ol pipol, hem i wantem se Alma tu bae i toktok long ol pipol.

15 Mo Alma i bin toktok long olgeta, taem we oli stap tugeta long ol bigfala grup, mo hem i go long wan grup i go long narafala grup, i prijim long ol pipol fasin blong sakem sin mo gat fet long Lod.

16 Mo hem i askem strong long ol pipol blong Limhae mo ol brata blong hem, evriwan we oli mekem olgeta oli kamaot long fasin blong stap slef, blong oli mas tingbaot se Lod nao i mekem olgeta oli kam fri.

17 Mo i bin hapen se afta we Alma i tijim plante samting long ol pipol, mo i finis blong toktok long olgeta, nao king Limhae i wantem blong kasem baptaes; mo evri pipol blong hem i wantem blong kasem baptaes tu.

18 From hemia, Alma i go long wota mo i ^abaptaesem olgeta; yes, hem i bin baptaesem olgeta folem fasin we hem i bin baptaesem ol brata blong hem long ol ^bwota blong Momon; yes, mo evriwan we hem i baptaesem olgeta, oli joenem jos ia blong God; mo hemia, i from bilif blong olgeta long ol toktok blong Alma.

19 Mo i bin hapen se king Mosaea i letem Alma blong hem i save stanemap ol jos raon long evri graon blong Sarahemla; mo i givim ^apaoa long hem blong odenem ol pris mo ol tija ova long evri jos.

20 Nao, oli bin mekem samting ia from i gat plante man tumas, mekem se oli no save lukaotem olgeta tru long wan tija nomo; mo tu, olgeta evriwan i no save harem toktok blong God taem we oli kam tugeta long wan grup;

21 From hemia, oli bin kam tugeta long ol defren grup, we oli singaotem olgeta ol jos; mo evri jos i gat ol pris blong olgeta mo ol tija blong olgeta, mo evri pris i prijim trutok folem wanem we hem i bin kasem tru long maot blong Alma.

22 Mo olsem ia nao, i nomata we i bin gat plante jos, olgeta evriwan i wan ^ajos nomo, yes, we hem i jos ia blong God; from i no gat wan samting moa we oli bin prijim long evri jos, be nomo, fasin blong sakem sin mo gat fet long God.

23 Mo nao, i bin gat seven jos long graon blong Sarahemla. Mo i bin hapen se eniwan we i wantem blong tekem long hem ^anem blong Kraes, o blong God, i bin joenem ol jos ia blong God;

24 Mo oli singaotem olgeta ol ^apipol blong God. Mo Lod i bin kapsaetem Spirit blong hem long olgeta, mo hem i bin blesem olgeta, mo oli bin kam antap gud long graon.