1 Mo i bin hapen se, afta we spes blong tu yia i pas, Abinadae i kam long medel blong olgeta long ol defren kaen klos, blong mekem se oli no luksave hem, mo hem i stat blong profesae long medel blong olgeta, i talem se: “Olsem ia nao Lod i bin givim oda long mi, se—‘Abinadae, go mo talemaot profesi long olgeta ia, ol pipol blong mi, from oli bin mekem hat blong olgeta i kam strong agensem ol toktok blong mi; oli no bin sakem sin from ol rabis fasin we oli stap mekem; from hemia, bae mi ^apanisim olgeta long bigfala kros blong mi, yes, long strongfala kros blong mi bae mi panisim olgeta from ol rabis fasin mo ol rabis sin blong olgeta.

2 Yes, !sore tumas long jeneresen ia!’ Mo Lod i talem long mi se: ‘Stretem han blong yu mo profesae, mo talem se: Olsem ia nao Lod i talem se, bae i hapen se jeneresen ia, from ol rabis fasin blong olgeta, bae oli ^akam slef, mo bae ol man oli slapem olgeta long ^bsaed blong fes; yes, mo bae ol man oli ronemaot olgeta, mo bae oli kilim olgeta i ded, mo ol pijin blong ea, mo ol dog, yes, mo ol wael animol, bae oli kakae ol mit blong bodi blong olgeta.

3 Mo bae i kam blong hapen se praes blong ^alaef blong king Noa bae i olsem wan klos insaed long wan hot ^boven; from bae hem i save se mi mi Lod.

4 Mo bae i kam blong hapen se bae mi mi nokem olgeta ia, ol pipol blong mi, wetem ol strong hadtaem, yes, wetem hadtaem blong kasem kaekae, mo wetem ^arabis sik; mo bae mi mekem se bae oli ^bkrae bigwan from harem nogud blong olgeta blong fuldei.

5 Yes, mo bae mi mekem se oli holem ol ^ahevi samting long ol bak blong olgeta; mo bae oli pulum olgeta olsem wan dongki we i no save toktok.

6 Mo bae i kam blong hapen se bae mi sendem ol smol aes ston i kam long olgeta, mo bae i nokem olgeta; mo bae mi panisim olgeta tu wetem ^awin blong Is; mo tu, ol ^bbebet bae oli mekem trabol long graon blong olgeta, mo kakae ol sid blong olgeta.

7 Mo bae mi panisim olgeta wetem wan rabis sik—mo evri samting ia, bae mi mekem from ol ^arabis fasin mo ol sin blong olgeta.

8 Mo bae i kam blong hapen se, sapos nomo oli no sakem sin, bae mi ^aprapa spolem gud olgeta evriwan we oli lus evriwan long fes blong wol; be stil, bae oli livim wan ^bhistri i stap biaen long olgeta, mo bae mi lukaotgud olgeta histri ia blong ol narafala pipol we bae oli stap long graon ia; yes, bae mi mekem samting ia tu blong mekem se mi save soem ol rabis sin blong ol pipol ia long ol narafala pipol.’” Mo plante samting Abinadae i bin talemaot profesi agensem ol pipol ia.

9 Mo i bin hapen se oli kros long hem; mo oli tekem hem mo oli karem hem i go long fored blong king afta we oli fasem hem, mo oli talem long king se: “Luk, mifala i bin karem wan man i kam long fored blong yu we i bin profesae long saed blong nogud samting we bae i hapen long ol pipol blong yu, mo i talem se bae God i prapa spolem gud olgeta.

10 Mo tu, hem i profesae se samting nogud bae i hapen long saed blong laef blong yu, mo i talem se laef blong yu bae i olsem wan klos we i stap insaed long wan oven blong faea.

11 Mo bakegen, hem i talem se bae yu olsem wan rop, olsem wan rop blong garen we i drae, we ol wael animol oli ron antap long hem mo oli purumbut andanit long leg blong olgeta.

12 Mo bakegen, hem i talem se bae yu olsem ol flaoa blong nilgras, we taem we oli raep fulwan, sapos win i blo, i ronemaot olgeta i go olbaot long fes blong graon. Mo hem i stap mekem olsem se Lod nao i bin talemaot samting ia. Mo hem i talem se evri samting ia bae i kam long yu, be nomo sapos yu sakem sin, mo hemia from ol rabis fasin blong yu.

13 Mo nao, O king, ?wanem nao bigfala nogud samting we yu bin mekem, o wanem ol bigfala sin we ol pipol blong yu oli bin mekem, blong mekem se God bae i panisim yumi, o blong man ia i jajem mifala?

14 Mo nao, O king, luk, mifala i no gat rong, mo yu, O king, i no bin sin; from hemia, man ia i giaman long saed blong yu, mo hem i profesae blong nating.

15 Mo luk, yumi strong, bae yumi no kam slef, o ol enemi blong yumi bae oli no save tekem yumi olsem prisena; yes, mo yu bin kam antap gud long graon, mo tu, bae yu gohed blong kam antap gud.

16 Luk, hemia man ia; mifala i putum hem long han blong yu; yu save mekem wetem hem olsem we yu ting se i gud blong mekem.”

17 Mo i bin hapen se king Noa i mekem se bae oli sakem Abinadae i go long kalabus; mo hem i givim oda long ol ^apris blong oli kam tugeta long wan ples, blong hem i save holem wan kaonsel miting wetem olgeta blong askem wanem blong mekem wetem Abinadae.

18 Mo i bin hapen se oli bin talem long king se: “Karem hem i kam long ples ia blong mifala i save askem sam kwestin long hem;” mo king i givim oda se bae oli karem hem i kam long fored blong olgeta.

19 Mo oli stat blong kwestinim hem, blong mekem se oli save trikim hem, we tru long wei ia, oli save gat wan samting we oli save yusum agensem hem; be hem i ansa long olgeta long fasin we i no fraet, mo hem i ^astanap strong agensem olgeta long evri kwestin blong olgeta, mo i blokem olgeta long evri toktok blong olgeta.

20 Mo i bin hapen se wan long olgeta i talem long hem se: “?Wanem nao mining blong ol toktok we oli bin raetem, mo we ol papa blong yumi oli bin tijim, we oli talem se:

21 ‘^aAntap long ol bigfala hil, ol leg oli naes tumas, ol leg ia blong hem we i stap karem ol gud nius oli kam; we i talemaot pis; we i karem ol gud nius blong ol gud samting i kam; we i talemaot fasin blong sevem man; we i talem long Saeon: “God blong yu i rul;”

22 Ol gadman blong yu bae oli singaot strong i go antap, tugeta wetem wan voes bae oli singsing; from bae oli luk wetem ae blong olgeta taem ia we Lod bae i karembak Saeon.

23 Singaot wetem glad; singsing tugeta, yufala ol emti ples blong Jerusalem; from Lod i bin leftemap tingting blong ol pipol blong hem, hem we i bin pemaot Jerusalem;

24 Lod i bin soemaot tabu ^ahan blong hem long ol ae blong evri kantri, mo evri en blong wol bae oli luk fasin blong God blong yumi blong sevem man?’”

25 Mo nao Abinadae i talem long olgeta se: “?Yufala i ol ^apris, mo yufala i traem blong talem se yufala i stap tijim ol pipol ia, mo se yufala i andastanem spirit blong profesi, be yet, yufala i wantem blong save long mi, se wanem nao mining blong ol samting ia?

26 Mi talem long yufala, !sore tumas long yufala from yufala i stap jenisim ol gudfala fasin blong Lod! From sapos yufala i andastanem ol samting ia, yet yufala i no bin tijim olgeta; from hemia, yufala i bin spolem gud ol gudfala fasin blong Lod.

27 Yufala i no putum fulwan hat blong yufala blong ^aandastanem samting; from hemia, yufala i no bin waes. From hemia, ?yufala i stap tijim wanem long ol pipol ia?”

28 Mo oli talem: “Mifala i tijim loa blong Moses.”

29 Mo bakegen hem i talem long olgeta: “Sapos yufala i tijim ^aloa blong Moses, ?from wanem yufala i no obei loa ia? ?From wanem yufala i putum hat blong yufala long ol rij samting? ?From wanem yufala i stap mekem fasin ia blong ^bslip olbaot mo westem paoa blong yufala wetem ol woman blong rod, yes, mo mekem pipol ia oli mekem sin, mekem se Lod i gat stamba tingting blong sendem mi blong talemaot profesi agensem ol pipol ia, yes, wan bigfala nogud samting agensem pipol ia tu?

30 ?Yufala i no save se mi stap talem trutok? Yes, yufala i save se mi stap talem trutok; mo yufala i sapos blong seksek wetem fraet long fored blong God.

31 Mo bae i kam blong hapen se bae Lod i panisim yufala from ol rabis fasin blong yufala, from yufala i bin talem se yufala i tijim loa blong Moses. Mo ?wanem nao yufala i save long saed blong loa blong Moses? ?^aWeswe? ?Fasin blong sevem man i kam tru long loa blong Moses? ?Yufala i talem wanem?”

32 Mo oli ansa mo talem se fasin blong sevem man i bin kam finis tru long loa blong Moses.

33 Be nao, Abinadae i talem long olgeta: “Mi save se sapos yufala i obei ol komanmen blong God, bae Lod i sevem yufala; yes, sapos yufala i obei ol komanmen we Lod i bin givim long Moses long hil blong ^aSinae, we i talem se:

34 ‘^aMi mi Lod, God blong yu, we i bin ^bkaremaot yu long graon blong Ijip, aot long haos blong slef.

35 Yu yu no mas gat wan ^anarafala God be mi nomo.

36 Yu yu no mas mekem, blong yu bakegen, eni kaen pikja, o eni samting we i olsem eni samting antap long heven, o ol samting we oli stap daon long wol ia.’”

37 Nao Abinadae i bin talem long olgeta: “?Yufala i bin mekem evri samting ia? Mi talem long yufala se, No, yufala i no bin mekem. Mo ?yufala i bin ^atijim ol pipol ia se oli mas mekem evri samting ia? Mi talem long yufala se, No, yufala i no bin mekem.”