1 Mi, Senif, oli bin tijim mi long evri lanwis blong Ol Man blong Nifae, mo mi bin gat wan save long saed blong ^agraon blong Nifae, o fasfala graon blong ol papa blong mifala we oli bin karem long ol papa blong olgeta, mo oli bin sendem mi olsem wan spae long medel blong Ol Man blong Leman blong mi save spae long ol ami blong olgeta, blong mekem se ami blong mifala i save kam mo prapa spolem gud olgeta—be taem we mi bin luk ol samting we oli gud long medel blong olgeta, mi no bin wantem se oli prapa spolem gud olgeta.

2 From hemia, mi bin rao wetem ol brata blong mi long waelples, from mi bin wantem se man we i rulum mifala bae i mekem wan promes wetem olgeta; be from hem i wan man we i stronghed mo i tosta from blad, hem i bin givim wan oda se bae oli mas kilimded mi; be oli bin sevem mi tru long plante blad we i bin ron; from papa i bin faet agensem papa, mo brata agensem brata, kasem taem we bigfala namba blong ami blong mifala i nomo gat long waelples; mo mifala i bin gobak, olgeta long mifala we i no ded, long graon blong Sarahemla, blong talemaot stori ia long ol waef mo ol pikinini blong olgeta.

3 Mo yet, from mi bin wantem tumas blong tekem graon blong ol papa blong mifala, mi bin karem i kam tugeta olgeta we oli bin wantem blong go antap blong tekem graon ia, mo mifala i bin statem bakegen wokbaot blong mifala i go long waelples, blong go antap long graon ia; be mifala i bin kasem hadtaem blong kasem kaekae mo hadtaem we i strong tumas; from mifala i bin slo blong tingbaot Lod, God blong mifala.

4 Be, afta plante dei we mifala i stap goraon long waelples, mifala i bin stanemap ol tenet blong mifala long ples ia we ol brata blong mifala oli bin kilim olgeta i ded long hem, we i bin stap kolosap long graon blong ol papa blong mifala.

5 Mo i bin hapen se mi bin go bakegen wetem fo man blong mi insaed long bigtaon, long king, blong mi save kasem tingting blong king, mo blong mi save sapos mi save go insaed wetem ol pipol blong mi mo tekem graon long wan fasin blong pis.

6 Mo mi bin go long king mo hem i bin mekem wan kavenan wetem mi se bae mi save stap long graon blong Lihae-Nifae, mo graon blong Saelom.

7 Mo tu, hem i bin givim oda long ol pipol blong hem se oli mas aot long graon, mo mi mo ol pipol blong mi i bin go long graon we mifala i save stap long hem.

8 Mo mifala i stat blong bildim ol haos, mo blong fiksim ol wol blong bigtaon ia, yes, ol wol blong bigtaon blong Lihae-Nifae tu, mo bigtaon blong Saelom.

9 Mo mifala i stat blong planem kaekae long graon, yes, wetem evri kaen sid tu, wetem ol sid blong kon, mo blong wit, mo blong bali, mo wetem nas, mo wetem sam, mo wetem ol sid blong evri kaen frut; mo mifala i bin stat blong kam plante mo kam antap gud long graon.

10 Nao hemia ol trik mo giaman plan blong king Leman, blong ^amekem ol pipol blong mi oli kam slef, mekem se hem i bin letem graon blong mekem se mifala i save stap long hem.

11 From hemia, i bin hapen se afta we mifala i bin stap long graon blong spes blong twelef yia, nao king Leman i bin stat blong wari, hem i fraet se long eni wei bae ol pipol blong mi oli kam strong long graon, mo oli no save winim olgeta, mo mekem olgeta oli kam slef.

12 Nao oli bin wan pipol we oli les mo oli ^awosip long ol aedol; from hemia, oli bin wantem blong mekem mifala i kam slef, blong oli save flasem olgeta tru long ol wok blong ol han blong mifala. Yes, blong oli save fidim olgeta bakegen long ol grup blong animol blong ol plantesen blong mifala.

13 From hemia, i bin hapen se king Leman i bin stat blong pusum ol pipol blong hem blong bae oli rao wetem ol pipol blong mi; from hemia, i bin stat blong gat ol faet mo ol rao long graon.

14 Nao, long nambatetin yia we mi stap rul long graon blong Nifae, longwe long Saot blong graon blong Saelom, taem we ol pipol blong mi oli stap givim wota mo fidim ol grup blong animol blong olgeta, mo stap wok long ol graon blong olgeta, wan bigfala ami blong Ol Man blong Leman i bin foldaon long olgeta mo i bin stat blong kilimded olgeta, mo blong tekem ol grup blong animol blong olgeta, mo ol kon long ol garen blong olgeta.

15 Yes, mo i bin hapen se oli bin ronwe, evriwan we oli no bin kasem, oli go insaed long bigtaon blong Nifae, mo oli bin singaotem mi blong lukaot gud long olgeta.

16 Mo i bin hapen se mi bin mekem olgeta oli rere wetem ol bonara, mo wetem ol ara, wetem ol naef blong faet, mo wetem ol huknaef, mo wetem ol nalnal, mo wetem ol sling, mo wetem evri kaen tul blong faet we mifala i save mekem, mo mi mo ol pipol blong mi, mifala i bin go agensem Ol Man blong Leman blong faet.

17 Yes, wetem paoa blong Lod mifala i bin go faet agensem Ol Man blong Leman; from mi mo ol pipol blong mi i bin prea strong long Lod blong hem i sevem mifala aot long ol han blong ol enemi blong mifala, from mifala i bin wekap blong tingbaot we ol papa blong mifala oli bin kam fri.

18 Mo God i bin ^aharem ol krae blong mifala mo i bin ansarem ol prea blong mifala; mifala i gohed long paoa blong hem; yes, mifala i go faet agensem Ol Man blong Leman, mo long wan dei mo wan naet mifala i kilimded tri taosen mo fotitri; mifala i kilim olgeta i ded kasem taem we mifala i ronemaot olgeta long graon blong mifala.

19 Mo mi, miwan, wetem ol han blong mi, mi bin help blong berem ol dedman blong olgeta. Mo luk, long bigbigfala harem nogud mo kraekrae blong mifala, tu handred mo seventinaen brata blong mifala oli bin ded.