1 Nao i bin hapen se afta we ol ^aboe blong Mosaea oli mekem evri samting ia, oli tekem wan smol namba wetem olgeta mo oli gobak long papa blong olgeta, we i king, mo oli askem hem blong letem olgeta wetem olgeta we oli bin jusum, blong oli save go antap long graon blong ^bNifae blong oli save prijim evri samting we oli bin harem, mo blong oli save serem toktok blong God long ol brata blong olgeta, Ol Man blong Leman—

2 Blong maet oli save tekem olgeta blong kam blong kasem save ia long saed blong Lod God blong olgeta, mo winim tingting blong olgeta blong oli luksave ol rabis fasin blong ol papa blong olgeta; mo maet oli save tekemaot rabis tingting ia blong ^ano laekem Ol Man blong Nifae, blong mekem se, olgeta tu, oli save glad long Lod God blong olgeta, blong oli save kam moa gudfala fren wetem wanwan long olgeta, mo blong i nomo save gat ol rao long ful graon ia we Lod God blong olgeta i bin givim long olgeta.

3 Nao, oli wantem se oli mas talemaot fasin blong sevem man long evri man, from oli no save ^atekem se wan ^bsol blong man i save lus; yes, iven tingting ia nomo se eni sol bae i gotru long wan hadtaem ^dwe i no gat en, i mekem olgeta oli seksek mo seksek from fraet.

4 Mo olsem ia nao Spirit blong Lod i bin wok long olgeta, from olgeta nao oli ol moa ^anogud long ol rabis man blong mekem ol sin. Mo Lod i bin luk se i stret, long ^bsore blong hem we i no gat en, blong sevem olgeta; be, oli bin safa plante trabol long sol, from ol rabis sin blong olgeta, oli gotru long plante hadtaem mo oli fraet se bae God i sakemaot olgeta blong oltaem.

5 Mo i bin hapen se oli plis long papa blong olgeta blong plante dei blong oli save go antap long graon blong Nifae.

6 Mo king Mosaea i go mo i askem long Lod sapos hem i mas letem ol boe blong hem i go antap long medel blong Ol Man blong Leman blong prijim trutok.

7 Mo Lod i talem long Mosaea: “Letem olgeta oli go antap, from plante bae oli biliv long ol toktok blong olgeta, mo bae oli kasem laef we i no save finis; mo bae mi mekem ol boe blong yu oli ^akam fri, oli aot long ol han blong Ol Man blong Leman.”

8 Mo i bin hapen se Mosaea i letem olgeta blong go mo mekem folem we oli bin askem.

9 Mo oli ^atekem wokbaot blong olgeta i gotru long draeples blong go antap blong prijim trutok long medel blong Ol Man blong Leman; mo bae mi givim wan ^bripot blong wanem oli bin mekem, afta long hemia.

10 Nao king Mosaea i no bin gat wan man we hem i save givim raet long hem blong rulum kingdom, from i no bin gat eni long ol boe blong hem we bae i akseptem kingdom.

11 From hemia, hem i tekem ol histri we oli bin raetem long ol ^abuk we oli mekem wetem bras, mo tu, ol buk blong Nifae, mo evri samting we hem i holem mo i putum gud i stap folem ol komanmen blong God, afta we hem i bin transletem mo i mekem oli raetem ol histri we oli stap long ol ^bbuk blong gol, we ol pipol blong Limhae oli bin faenem, we Limhae i givim long hem;

12 Mo samting ia, hem i mekem from bigfala wari blong ol pipol blong hem; from oli wantem bitim mak blong save long saed blong ol pipol ia we oli bin ded evriwan.

13 Mo nao hem i transletem olgeta tru long tu ^aston ia we oli bin fasem tufala long tufala saed blong wan bonara.

14 Nao ol samting ia oli bin mekem rere stat long stat, mo oli pasem daon long wan jeneresen i go long narafala jeneresen, from stamba tingting ia blong talem mining blong ol lanwis;

15 Mo Lod i bin holem mo sevem olgeta wetem han blong hem, blong hem i save soemaot long evri man we bae i stap long graon ia, ol rabis fasin mo ol rabis sin blong ol pipol blong hem;

16 Mo eni man we i holem ol samting ia, oli singaotem hem, ^asia, folem fasin blong taem bifo.

17 Nao, afta we Mosaea i finis blong transletem ol histri ia, luk, hem i talemaot wan histri blong ol pipol we oli bin ^aded, stat long taem we oli ded evriwan, i gobak long taem we oli bin bildim ^bbigfala taoa, long taem ia we Lod i ^dmiksimap lanwis blong ol pipol, mo oli bin seraot i go olbaot long fes blong ful wol, yes, mo tu, stat long tetaem ia i gobak kasem taem we God i mekem Adam.

18 Nao, histri ia i bin mekem ol pipol blong Mosaea oli krae tumas, yes, oli fulap wetem sore; be tu, hemia i givim plante save long olgeta, we i mekem olgeta oli hapi long hem.

19 Mo histri ia bae oli raetem afta long hemia; from luk, i nid se evri pipol i mas save ol samting we oli bin raetem long histri ia.

20 Mo nao, olsem we mi bin talem long yufala, se afta we king Mosaea i mekem ol samting ia, hem i tekem buk ia we oli bin mekem wetem ^abras, mo evri samting we hem i bin holem, mo i givim olgeta long Alma, we i boe blong Alma; yes, evri histri, mo tu, ol samting blong ^btalem mining blong ol lanwis, mo i givim olgeta long hem, mo hem i givim oda long hem se hem i mas holem mo ^dputum gud olgeta, mo tu, hem i mas kipim wan histri blong ol pipol, i pasem i go daon long wan jeneresen i go long narawan, olsem we oli bin pasem i go daon stat long taem we Lihae i bin aot long Jerusalem.