1 Mo i bin hapen se Limhae mo ol pipol blong hem oli gobak long bigtaon blong Nifae, mo oli stat blong stap bakegen long graon long pis.

2 Mo i bin hapen se afta plante dei oli bin stat bakegen blong tanem tingting blong Ol Man blong Leman blong oli kam kros agensem Ol Man blong Nifae, mo oli bin stat blong kam long ol boda blong graon raonabaot.

3 Nao oli bin fraet blong kilimded olgeta, from strong promes we king blong olgeta i mekem long Limhae; be oli bin slapem olgeta long ol ^ajik blong olgeta, mo yusum atoriti blong olgeta long olgeta; mo oli stat blong putum ol ^bhevi samting long ol bak blong olgeta, mo fosem olgeta olsem we oli pulum wan dongki we i no toktok—

4 Yes, oli bin mekem evri samting ia blong mekem se toktok blong Lod i save hapen.

5 Mo nao ol hadtaem blong Ol Man blong Nifae i bin bigwan, mo i no bin gat wan wei, we oli save mekem olgeta oli go fri aot long ol han blong olgeta, from Ol Man blong Leman oli raonem olgeta long evri saed.

6 Mo i bin hapen se ol pipol oli stat blong komplen long king from ol hadtaem blong olgeta; mo oli stat blong gat tingting blong go agensem olgeta long faet. Mo oli givim tumas hadtaem long king wetem ol komplen blong olgeta; from hemia, hem i letem olgeta blong oli mekem folem wanem oli wantem.

7 Mo oli bin kam tugeta wan ples bakegen, mo oli werem ol klos blong faet, mo oli go agensem Ol Man blong Leman blong pusum olgeta aot long graon blong olgeta.

8 Mo i bin hapen se Ol Man blong Leman oli winim olgeta, mo oli pusum olgeta oli gobak, mo oli kilimded plante long olgeta.

9 Mo nao i bin gat wan ^abigfala harem sore from ded mo kraekrae long medel blong ol pipol blong Limhae, wido we i stap harem sore from ded blong hasban blong hem, boe mo gel i stap harem sore from ded blong papa blong tufala, mo ol brata from ded blong ol brata blong olgeta.

10 Nao i bin gat plante wido tumas long graon, mo oli krae strong long wan dei i go long narafala dei, from wan bigfala fraet long Ol Man blong Leman i bin kam long olgeta.

11 Mo i bin hapen se ol krae blong olgeta we i gohed oltaem i mekem tingting blong smol haf blong ol pipol blong Limhae blong kam kros agensem Ol Man blong Leman; mo oli go bakegen long faet, be oli pusumbak olgeta bakegen, mo oli bin lusum plante man.

12 Yes, oli bin go bakegen blong nambatri taem, mo safa long sem fasin; mo olgeta we oli no ded oli bin gobak long bigtaon blong Nifae.

13 Mo oli bin putum tingting blong olgeta i stap daon go kasem das, oli bin letem olgeta long yok blong slef, oli letem olgeta blong oli kilim olgeta, mo blong ronem olgeta i go ia mo i kam ia, mo ol enemi blong olgeta oli putum ol hevi samting long olgeta folem wanem we oli bin wantem.

14 Mo oli bin ^aputum tingting blong olgeta i stap daon go kasem daon olgeta; mo oli bin prea strong long God; yes, go kasem fuldei oli prea long God blong hem i mekem olgeta i go fri aot long ol hadtaem blong olgeta.

15 Mo nao Lod i bin ^atekem taem blong harem prea blong olgeta from ol rabis fasin blong olgeta; be Lod i harem ol prea blong olgeta, mo i stat blong mekem hat blong Ol Man blong Leman i kam sofsof, mekem se oli stat blong tekemaot ol hevi samting long bak blong olgeta; be stil, Lod i no luk se i stret taem blong tekem olgeta oli kamaot long fasin blong stap slef.

16 Mo i bin hapen se oli stat blong kam antap gud smolsmol long graon, mo oli stat blong resemap plante sid, mo ol grup blong animol, mo ol buluk, blong mekem se oli no harem nogud long hanggri.

17 Nao i bin gat wan bigfala namba blong ol woman, bitim ol man; from hemia, king Limhae i givim oda se evri man i mas ^aserem samting blong sapotem ol ^bwido mo ol pikinini blong olgeta, blong mekem se oli no save ded long hanggri; mo oli mekem samting ia from bigfala namba blong olgeta we oli bin ded.

18 Nao ol pipol blong Limhae oli bin stap tugeta long wan grup olsem long evri taem we i save hapen, mo lukaotem ol sid blong olgeta mo ol grup blong animol blong olgeta;

19 Mo king hemwan i no bin trastem se bae hem i sef aotsaed long ol wol blong bigtaon, be nomo sapos hem i tekem ol gadman blong hem wetem hem, from hem i fraet se long sam wei bae hem i foldaon long ol han blong Ol Man blong Leman.

20 Mo hem i bin mekem se ol pipol blong hem bae oli lukaotem ol graon raonabaot, blong mekem se long sam wei oli save kasem ol pris ia we oli bin ronwe i go long waelples, we oli stilim ol ^agel blong Ol Man blong Leman, mo we oli mekem se wan bigfala trabol i bin kam long olgeta.

21 From oli bin wantem blong tekem olgeta blong oli save panisim olgeta; from oli kam long graon blong Nifae long naet, mo oli tekem ol sid blong olgeta mo plante long ol gudgudfala samting blong olgeta; from hemia, oli haed blong kasem olgeta.

22 Mo i bin hapen se i nomo gat trabol bitwin Ol Man blong Leman mo ol pipol blong Limhae, go kasem taem we ^aAmon mo ol brata blong hem oli bin kam long graon.

23 Mo from king i bin kam aotsaed long ol get blong bigtaon wetem ol gad blong hem, hem i faenem Amon mo ol brata blong hem; mo from hem i ting se oli ol pris blong Noa, nao, hem i mekem se oli tekem olgeta, mo fasem olgeta, mo sakem olgeta i go long ^akalabus. Mo sapos oli bin ol pris blong Noa bae hem i mekem se oli kilim olgeta i ded.

24 Be taem we hem i faenemaot se oli no ol pris, be se oli ol brata blong hem, mo oli bin kam long graon blong Sarahemla, hem i fulap wetem glad we i bigwan tumas.

25 Nao king Limhae i bin sendem, bifo Amon i kam, wan ^asmol namba blong ol man blong ^blukaotem graon blong Sarahemla; be oli no save faenem, mo oli bin lus long waelples.

26 Be, oli faenem wan graon we i bin gat man long hem bifo; yes, wan graon we ol drae ^abun i kavremap; yes, wan graon we i bin gat man mo we faet i bin prapa spolem gud; mo olgeta, from oli ting se hem i graon blong Sarahemla, oli gobak long graon blong Nifae, mo oli kam insaed ol boda blong graon sam dei nomo bifo Amon i kam.

27 Mo oli bin karem wan histri i kam wetem olgeta, we i wan histri blong ol pipol we ol bun blong olgeta oli bin faenem; mo oli raetem olgeta long buk blong ston blong aean.

28 Mo nao Limhae i bin bakegen fulap wetem glad taem we hem i lanem tru long ol toktok blong maot blong Amon se king Mosaea i gat wan presen long God, we tru long ^apresen ia hem i save talem mining blong ol raeting olsem ia; yes, mo Amon tu i glad.

29 Be stil Amon mo ol brata blong hem oli bin fulap wetem harem nogud from plante long ol brata blong olgeta oli kilim olgeta oli ded;

30 Mo tu, se king Noa mo ol pris blong hem oli mekem ol pipol blong hem oli mekem plante sin mo plante rabis fasin agensem God; mo oli krae sore tu from ^aded blong Abinadae; mo tu, from Alma i bin ^baot mo ol pipol we oli go wetem hem we hem i mekem wan jos ia blong God tru long fulpaoa mo paoa blong God, mo fet long ol toktok we Abinadae i bin talemaot.

31 Yes, oli bin krae sore from oli bin aot long olgeta, from oli no save se oli ronwe i go wea. Nao bae oli save hapi blong joen wetem olgeta, from olgeta tu i bin mekem wan kavenan wetem God blong wok blong hem mo holem ol komanmen blong hem.

32 Mo nao stat long taem we Amon i bin kam, king Limhae tu i mekem wan kavenan wetem God, mo tu, plante long ol pipol blong wok blong hem mo holem ol komanmen blong hem.

33 Mo i bin hapen se king Limhae mo plante long ol pipol blong hem i wantem blong kasem baptaes; be i no bin gat wan man long graon we i gat ^aatoriti long God. Mo Amon i no bin wantem blong mekem samting ia, from hem i ting se hem i wan wokman we i no klin inaf.

34 From hemia, oli no bin, long tetaem ia, kam tugeta blong mekem wan jos, be oli wet long Spirit blong Lod. Nao oli wantem blong kam olsem Alma mo ol brata blong hem, we oli bin ronwe i go long waelples.

35 Oli bin wantem blong kasem baptaes olsem wan witnes mo wan testemoni se oli glad blong wok blong God wetem evri hat blong olgeta; be oli bin seftem taem; mo histri blong baptaes blong olgeta bae oli ^atalem afta.

36 Mo nao evri tingting blong Amon mo ol pipol blong hem, mo king Limhae mo ol pipol blong hem, i bin blong mekem olgeta oli go fri, mo kamaot long ol han blong Ol Man blong Leman, mo long fasin blong stap slef.