1 Manje mine, Moroni, ngiyachubeka nembhalo wami. Ngako-ke, buka, kwenteka kutsi ngenca yemacembu layimfihlo a-Akishi kanye nebangani bakhe, buka, ngempela bawuketula umbuso wa-Omeri.

2 Noko, iNkhosi yaba nemusa ku-Omeri, kanjalo nakumadvodzana kanye nakumadvodzakati akhe labengatange afune kumbhubhisa.

3 INkhosi yamcwayisa Omeri ephusheni kutsi esuke eveni; ngaloko-ke Omeri wesuka eveni kanye nemndeni wakhe, wahamba emalanga lamanyenti, wefika wendlula ngasegcumeni laShimi, wefika ngasendzaweni lapho emaNefi bekabhujiselwe khona, kusuka lapho waya ngasemphumalanga, wate wefika endzaweni lebeyibitwa ngekutsi yi-Ablomu, ngaselugwini lwelwandle, lapho wemisa lithende lakhe, kanjalo nemadvodzana kanye nemadvodzakati akhe, nabo bonkhe bendlu yakhe, ngaphandle kwaJaredi nemndeni wakhe.

4 Futsi kwenteka kutsi Jaredi wagcotjwa waba yinkhosi etikwebantfu, ngesandla senkhohlakalo; waniketa Akishi indvodzakati yakhe kutsi ibe ngumkakhe.

5 Futsi kwenteka kutsi Akishi wayifuna imphilo yababetala wakhe; wacela labo labekafunge nabo ngesifungo sebasendvulo, futsi bayitfola inhloko yababetala wakhe, ngesikhatsi ahleti esihlalweni sakhe sebukhosi, alalela bantfu bakhe.

6 Ngoba besekukukhulu kwandza kwaleti tinhlangano letiyimfihlo naletikhohlakele kangangekutsi bese konakalise tinhlitiyo tebantfu bonkhe; ngako-ke Jaredi wabulawa asesihlalweni sakhe sebukhosi, kwatsi Akishi wabusa esikhundleni sakhe.

7 Futsi kwenteka kutsi Akishi wacala kuba nemona nendvodzana yakhe, ngako-ke wayivalela ejele, wayondla ngekudla lokuncane noma wangayiniki kudla nhlobo yate yafa.

8 Manje umnakabo loyo lowafa, (libito lakhe bekunguNimra) wamtfukutselela uyise ngenca yaloko lebekakwentile kumnakabo.

9 Futsi kwenteka kutsi Nimra wabutsela ndzawonye lidlanzana lebantfu, wabaleka waphuma kulelive, wahamba wayohlala na-Omeri.

10 Futsi kwenteka kutsi Akishi watala lamanye emadvodzana, atizuza tinhlitiyo tebantfu, nanoma bebafungile kuye kwenta tonkhe tinhlobo tebubi ngaleyo ndlela lebekafisa ngayo.

11 Manje bantfu ba-Akishi bebafuna inzuzo, njengobe na-Akishi bekafuna emandla; ngaloko-ke, emadvodzana a-Akishi abaniketa imali, ngaleyo ndlela badvonsa incenye lenyenti yebantfu kutsi babalandzele.

12 Kwacala kwabakhona imphi emkhatsini wemadvodzana a-Akishi kanye na-Akishi, leyadvonsa sikhatsi lesiyiminyaka leminyenti, yebo, leyaholela ekubhujisweni cishe kwabo bonkhe bantfu bembuso, yebo, ngisho bonkhe, ngaphandle nje kwebantfu labangemashumi lamatsatfu, kanye nalabo labebabaleke nendlu ya-Omeri.

13 Ngaloko-ke, Omeri waphindze wabuyiselwa eveni lelilifa lakhe.

14 Futsi kwenteka kutsi Omeri wacala kuba mdzala; noko, eminyakeni yakhe yebudzala watala Emeri; waphindze wamgcoba Emeri kutsi abe yinkhosi kute abuse esikhundleni sakhe.

15 Futsi emvakwekutsi sekagcobe Emeri kutsi abe yinkhosi wabona kuthula eveni sikhatsi lesingangeminyaka lemibili, wabese uyafa, sekabone emalanga lamanyenti kakhulu, lebekagcwele lusizi. Futsi kwenteka kutsi Emeri wabusa esikhundleni sakhe, wahamba etinyatselweni teyise.

16 INkhosi yacala kutsi isisuse sicalekiso eveni, indlu ya-Emeri yaphumelela kakhulu ngaphansi kwembuso wa-Emeri; futsi sikhatsi lesingangeminyaka lengemashumi lasitfupha nakubili bese bacine kakhulu, kangangekutsi baceba kakhulu—

17 Banetinhlobo tonkhe tetitselo, kanye nalokuyinhlavu, isilika, ilineni lecolisakele, ligolide, isiliva, kanye netintfo letiligugu;

18 Ngetulu kwaloko nato tonkhe tinhlobo tetinkhomo, tinkhabi, tinkhomati, timvu, tingulube, timbuti, kanjalo nato tonkhe letinye tinhlobo tetilwane lebetilusito kuba kudla kwebantfu.

19 Futsi ngetulu kwaloko baba nemahhashi, timbongolo, bekukhona tindlovu nemakhurelomu kanye nemakhumomu; tonkhe lebetilusito kumuntfu, ikakhulukati tindlovu nemakhurelomu kanye nemakhumomu.

20 Ngaleyo ndlela iNkhosi yatitfululela tibusiso tayo kulelive, lebelikhetsekile ngetulu kwawo onkhe lamanye emave; yayaleta kutsi labo labayawulitfola lelive bayawulitfolela iNkhosi, ngaphandle kwaloko bayawubhujiswa uma sebavutsiwe ebubini; ngoba kulabanjalo, itsi iNkhosi: Ngitawutfululela kuphelela kwentfukutselo yami.

21 Futsi Emeri wehlulela ngekulunga ngawo onkhe emalanga akhe, watala emadvodzana nemadvodzakati lamanyenti; watala Khoriyantumi, futsi wamgcoba Khoriyantumi kutsi abuse esikhundleni sakhe.

22 Emvakwekutsi sekagcobe Khoriyantumi kutsi abuse esikhundleni sakhe waphila iminyaka lemine, wabona kuthula eveni; yebo, wate wabona ngisho neNdvodzana yeKulunga, watfokota waphindze wadvumisa emalangeni akhe; wafa ngekuthula.

23 Futsi kwenteka kutsi Khoriyantumi wahamba etinyatselweni teyise, wakha emadolobha lamanyenti lamakhulu, wabanika loko lobekukuhle bantfu bakhe emalangeni akhe onkhe. Futsi kwenteka kutsi akatange abe nebantfwana wate waba mdzala kakhulu.

24 Futsi kwenteka kutsi umkakhe wafa, aneminyaka lelikhulu nakubili budzala. Futsi kwenteka kutsi Khoriyantumi watsatsa umfati, ebudzaleni bakhe, incekukati lencane, watala emadvodzana kanye nemadvodzakati; ngaloko-ke waphila wate waba neminyaka lelikhulu nemashumi lamane nakubili budzala.

25 Futsi kwenteka kutsi watala Khomu, Khomu wabusa esikhundleni sakhe; wabusa iminyaka lengemashumi lamane nemfica, watala Hethi; naye waphindze watala lamanye emadvodzana kanye nemadvodzakati.

26 Bantfu bese baphindze basabalala eveni lonkhe, kwaphindze kwacala kwaba nebubi lobukhulu eveni, Hethi waphindze wacala wemukela emacebo layimfihlo asendvulo, kute abulale uyise.

27 Futsi kwenteka kutsi wamketula uyise esihlalweni sebukhosi, ngoba wambulala ngenkemba yakhe lucobo; wabusa esikhundleni sakhe.

28 Kwaphindze kwefika baphrofethi kulelive, bashumayela kuphendvuka kubo—kutsi kufanele balungise indlela yeNkhosi ngaphandle kwaloko kuyawuta sicalekiso eveni; yebo, nekutsi kuyawuba khona indlala lenkhulu, ngayo bayawubhujiswa uma bangaphendvuki.

29 Kodvwa bantfu abawakholwanga emavi ebaphrofethi, kodvwa babacosha babakhiphela ngaphandle; labanye babo babafaka emigodzini babashiya khona kute bafe. Futsi kwenteka kutsi batenta tonkhe leti tintfo njengekwemiyaleto yenkhosi, Hethi.

30 Futsi kwenteka kutsi kwacala kwaba khona indlala lenkhulu kulelive, labahlala khona bacala kutsi babhubhe ngekushesha lokukhulu ngenca yendlala, ngoba bekute litulu kulelive.

31 Kwaphindze kwavela tinyoka letinebutsi ebusweni balelive, tafaka butsi kulabanyenti bantfu. Futsi kwenteka kutsi imihlambi yabo yacala yatibalekela tinyoka letinebutsi, yaya ngaseveni lelingaseningizimu, lebelibitwa ngemaNefi ngekutsi yiZarahemla.

32 Futsi kwenteka kutsi kwaba khona labanyenti babo labafa endleleni; noko bekukhona labanye lababalekela eveni lelingaseningizimu.

33 Futsi kwenteka kutsi iNkhosi yenta tinyoka kutsi tingabe tisabacosha, kodvwa tivimbe indlela kute bantfu bangakhoni kwendlula, kute loyo lowetama kwendlula abulawe tinyoka letinebutsi.

34 Futsi kwenteka kutsi bantfu balandzela indlela yetilwane, badla tidvumbu talabo labebawe ngasendleleni, bate batidla tonkhe. Manje ngesikhatsi bantfu sebabona kutsi bese batawufa bacala kuphendvuka ebubini babo baphindze bakhala eNkhosini.

35 Futsi kwenteka kutsi ngesikhatsi sebatitfobile ngalokwanele phambi kweNkhosi yayitfumela imvula eveni; bantfu bacala kuhlambuluka, kwacala kwaba khona titselo emaveni langasenyakatfo, kanye nakuwo onkhe emave latungeletile. INkhosi yawakhombisa emandla ayo kubo ekubasindziseni endlaleni.