1 Futsi kwenteka kutsi Oriha wakwenta ngekulunga kwehlulela eveni lonkhe ngemalanga akhe, emalanga akhe laba manyenti kakhulu.

2 Watala emadvodzana kanye nemadvodzakati; yebo, watala labangemashumi lamatsatfu nakunye, emkhatsini wabo lebekunemadvodzana langemashumi lamabili nakutsatfu.

3 Futsi kwenteka kutsi ngetulu kwaloko watala Kibi ebudzaleni bakhe. Futsi kwenteka kutsi Kibi wabusa esikhundleni sakhe; Kibi watala Khorihori.

4 Ngesikhatsi Khorihori sekaneminyaka lengemashumi lamatsatfu nakubili budzala wavukela uyise, wahamba wewela wayohlala eveni laNehori; watala emadvodzana kanye nemadvodzakati, baba bahle kakhulu; ngaloko-ke Khorihori waheha labanyenti bantfu bamlandzela.

5 Ngesikhatsi sekagcogcele ndzawonye libutfo wakhuphukela eveni laMoron lapho inkhosi beyihlala khona, wayitfumba, loko lokwenta kutsi kugcwaliseke lobekushiwo ngumnakaboJaredi kutsi bayawuletfwa ekutfunjweni.

6 Manje live laMoron, lapho bekuhlala khona inkhosi, belisedvutane nalelo live lelibitwa ngemaNefi ngekutsi yiNcitsakalo.

7 Futsi kwenteka kutsi Kibi wahlala ekutfunjweni, kanye nebantfu bakhe bangaphansi kwendvodzana yakhe Khorihori, wate waba mdzala kakhulu; noko Kibi watala Shule ebudzaleni bakhe, ngesikhatsi asesekutfunjweni.

8 Futsi kwenteka kutsi Shule wamtfukutselela umnakabo; Shule wakhula waba nemandla, waba nemandla ngekwemandla endvodza; ngetulu kwaloko bekakwati kwehlulela ngalokungiko.

9 Ngaloko-ke, waya egcumeni i-Efrayimu, wancibilikisa insimbi kulelo ligcuma, waphindze wenta tinkemba ngetinsimbi wentela labo labekabahehe kutsi bahambe naye; emvakwekutsi sekabahlomisile ngetinkemba wabuyela eveni laNehori, wayawukulwa nemnakabo Khorihori, ngaleyo ndlela wawutfola umbuso wawubuyisela kuyise Kibi.

10 Manje ngenca yalentfo Shule labekayentile, uyise wamnika umbuso; ngako-ke wacala kubusa esikhundleni seyise.

11 Futsi kwenteka kutsi wehlulela ngekulunga; wawusabalalisa umbuso wakhe eveni lonkhe, ngoba bantfu bese babanyenti kakhulu.

12 Futsi kwenteka kutsi Shule naye watala emadvodzana kanye nemadvodzakati lamanyenti.

13 Khorihori waphendvuka ebubini lobunyenti labekabentile; ngaloko-ke Shule wamnika emandla embusweni wakhe.

14 Futsi kwenteka kutsi Khorihori bekanemadvodzana kanye nemadvodzakati lamanyenti. Emkhatsini wemadvodzana aKhorihori bekukhona munye libito lakhe bekunguNowa.

15 Futsi kwenteka kutsi Nowa wavukela Shule, inkhosi, kanye neyise Khorihori, waheha umnakabo Khohori, kanjalo nabo bonkhe bomnakabo kanye nalabanyenti bantfu.

16 Walwa naShule, inkhosi, lokwenta watfola live lelaba lifa labo lekucala; futsi waba yinkhosi kuleyo ncenye yelive.

17 Futsi kwenteka kutsi waphindze walwa naShule, inkhosi, wamtsatsa Shule, inkhosi, wamtfwala wayawumtfumbela eMoron.

18 Futsi kwenteka ngesikhatsi sekatawumbulala, emadvodzana aShule anyenya angena endlini yaNowa ebusuku ambulala, aphula umnyango welijele akhipha uyise, ambeka esihlalweni sakhe sebukhosi embusweni wakhe.

19 Ngaloko-ke, indvodzana yaNowa yawakha umbuso wakhe esikhundleni sakhe; noko bona abatange basawatfola emandla nanini ngetulu kwaShule inkhosi, futsi bantfu labebangaphansi kwembuso waShule inkhosi baphumelela kakhulu baphindze bakhula kakhulu.

20 Futsi live lehlukana; kwaba khona imibuso lemibili, umbuso waShule, kanye nembuso waKhohori, indvodzana yaNowa.

21 Futsi Khohori, indvodzana yaNowa, wenta kutsi bantfu bakhe balwe naShule, lapho Shule abehlula khona waphindze wabulala Khohori.

22 Manje Khohori bekanendvodzana lebeyibitwa ngekutsi nguNimrodi; Nimrodi wawushiya umbuso waKhohori wawunika Shule, wemukeleka emehlweni aShule; ngaloko-ke Shule wamentela lokuhle, futsi wenta embusweni waShule njengekutsandza kwakhe.

23 Futsi ngetulu kwaloko embusweni waShule kwefika baphrofethi emkhatsini webantfu, labebatfunyiwe bavela eNkhosini, baphrofetha kutsi bubi kanye nekukhonta tithico kwebantfu bekuletsa sicalekiso kulelive, nekutsi bekufanele babhujiswe uma bangaphendvuki.

24 Futsi kwenteka kutsi bantfu babetfuka baphrofethi, baphindze bahlekisa ngabo. Futsi kwenteka kutsi inkhosi Shule yabehlulela bonkhe labo labebatfuka baphrofethi.

25 Wabeka umtsetfo kulo lonkhe live, lobewuniketa emandla kubaphrofethi kutsi bebangaya noma ngukuphi lapho bebafuna kuya khona; ngalesi sizatfu bantfu baphendvuka.

26 Ngenca yekutsi bantfu baphendvuka ebubini babo kanye nasekukhonteni tithico iNkhosi yabasindzisa, bacala baphindze baphumelela kulelive. Futsi kwenteka kutsi Shule watala emadvodzana kanye nemadvodzakati ebudzaleni bakhe.

27 Futsi besekute timphi emalangeni aShule; watikhumbula tintfo letinkhulu iNkhosi lebeyitentele boyise ekubaletseni ngesheya kwelwandle yabayisa eveni lesetsembiso; ngaloko-ke wehlulela ngekulunga onkhe emalanga akhe.