1 Manje kwacala kwaba khona sicalekiso lesikhulu kulo lonkhe live ngenca yebubi bebantfu, ngendlela yekutsi, uma umuntfu abeka lithulusi lakhe noma inkemba yakhe eshelufini lakhe, noma endzaweni lapho abetawuligcina khona, buka, ngakusasa, bekangeke asalitfola, sasisikhulu kakhulu sicalekiso eveni.

2 Ngaloko-ke wonkhe muntfu wanamatsela kuloko lobekukwakhe, ngetandla takhe, futsi bekangaboleki noma abolekise; wonkhe umuntfu bekagcina umphini wenkemba yakhe esandleni sangesekudla, kute avikele lokungekwakhe nemphilo yakhe neyebafati kanye kanye neyebantfwana bakhe.

3 Manje, emvakweminyaka lemibili, emvakwekufa kwaSharedi, buka, kwavela umnakaboSharedi naye walwa naKhoriyantumra, lapho Khoriyantumra amehlula khona wamcosha wate wayomfaka ehlane lase-Akishi.

4 Futsi kwenteka kutsi umnakaboSharedi walwa naye ehlane lase-Akishi; imphi yaba matima kakhulu, netinkhulungwane letinyenti tafa ngenkemba.

5 Futsi kwenteka kutsi Khoriyantumra wavimba ehlane; umnakaboSharedi waphuma ehlane ebusuku, wabulala incenye yelibutfo laKhoriyantumra, ngesikhatsi badzakiwe.

6 Weta eveni laMoron, watibeka esihlalweni sebukhosi saKhoriyantumra.

7 Futsi kwenteka kutsi Khoriyantumra wahlala nelibutfo lakhe ehlane sikhatsi lesingangeminyaka lemibili, lapho atfola khona emandla lamakhulu ebutfweni lakhe.

8 Manje umnakaboSharedi, libito lakhe bekunguGileyadi, naye ngalokunjalo watfola emandla lamakhulu ebutfweni lakhe, ngenca yemacembu layimfihlo.

9 Futsi kwenteka kutsi umphristi wakhe lomkhulu wambulala ngesikhatsi ahleti esihlalweni sakhe sebukhosi.

10 Futsi kwenteka kutsi munye wemacembu layimfihlo wambulalela endleleni lesekusitsekeni, watitsatsela umbuso, libito lakhe bekunguLibi; Libi bekayindvodza lendze kakhulu, ngetulu kwawo onkhe emadvodza emkhatsini wabo bonkhe bantfu.

11 Futsi kwenteka kutsi ngemnyaka wekucala waLibi, Khoriyantumra weta eveni laMoron, walwa naLibi

12 Futsi kwenteka kutsi walwa naLibi, lapho Libi wamshaya emkhonweni kangangoba walimala; noko, libutfo laKhoriyantumra lamhlasela Libi, wabalekela eminceleni ngaselugwini lwelwandle.

13 Futsi kwenteka kutsi Khoriyantumra wamcosha, Libi walwa naye khona ngaselugwini lwelwandle.

14 Futsi kwenteka kutsi Libi walishaya libutfo laKhoriyantumra, kangangoba babalekela ehlane lase-Akishi.

15 Futsi kwenteka kutsi Libi wamcosha wate wefika ematsafeni ase-Agoshi. Khoriyantumra besekatsetse bonkhe bantfu wabaleka nabo ngesikhatsi abalekela Libi kuleyo ncenye yelive lapho bekabalekele khona,

16 Futsi ngesikhatsi asafike ematsafeni ase-Agoshi walwa naLibi, wamshaya wate wafa; noko, umnakaboLibi wabuya watawukulwa naKhoriyantumra esikhundleni sakhe, imphi yaba matima kakhulu, lapho Khoriyantumra waphindze wabalekela libutfo lemnakaboLibi.

17 Manje libito lemnakaboLibi bekunguShizi. Futsi kwenteka kutsi Shizi wacosha Khoriyantumra, wabhubhisa emadolobha lamanyenti, wabulala besifazane kanye nebantfwana, washisa nemadolobha.

18 Kwesatjwa kwaShizi kwagcwala live lonkhe; yebo, kukhala kwagcwala live lonkhe—Ngubani longema phambi kwelibutfo laShizi na? Bukani, uyalibhubhisa lelive phambi kwakhe!

19 Futsi kwenteka kutsi bantfu bacala kubutsana ndzawonye ngemabutfo, eveni lonkhe.

20 Futsi behlukana; incenye yabo yabalekela ebutfweni laShizi, kwatsi lenye incenye yabo yabalekela ebutfweni laKhoriyantumra.

21 Beseyibe yinkhulu yaphindze yadvonsa imphi, futsi bese sibesidze kakhulu nesehlakalo sekucitseka kwengati kanye nekubulawa kwebantfu labanyenti, kangangekutsi lonkhe live beselimbonywe tidvumbu talabafile.

22 Futsi imphi yaphangisa yaphindze yashesha kakhulu kangangekutsi kwababete namunye lowasala kutsi angcwabe labafile, kodvwa besuka ekucitseni ingati baya kulokunye kucitsa ingati, bashiya tidvumbu temadvodza, besifazane kanye nebantfwana tisabalele eveni, kutsi tibe kudla kwetimphetfu tenyama

23 Liphunga lato lagcwala live, ngisho kulo lonkhe live; ngaloko-ke bantfu bakhatsateka imini nebusuku, ngenca yeliphunga lato.

24 Noko, Shizi akayekelanga kumcosha Khoriyantumra, ngoba bekafungile kutiphindziselela kuKhoriyantumra ngengati yemnakabo, lobekabulewe, kanye nasevini leNkhosi leleta ku-Etheri kutsi Khoriyantumra angeke afe ngenkemba.

25 Ngako-ke siyabona kutsi iNkhosi yabajezisa ngentfukutselo yayo lephelele, futsi bubi kanye netinengiso tabo bese kuyilungisile indlela yekubhujiswa kwabo lokungapheli.

26 Futsi kwenteka kutsi Shizi wamcosha Khoriyantumra waya ngasemphumalanga, eminceleni ngaselugwini lwelwandle, lapho wefike walwa naShizi sikhatsi lesingangemalanga lamatsatfu.

27 Kwaba kubi kakhulu kubhujiswa emabutfweni aShizi kangangekutsi bantfu bacala kwesaba, bacala kuwabalekela emabutfo aKhoriyantumra; babalekela eveni laseKhorihori, babulala embikwabo labebahlala khona, bonkhe labo labebangafuni kuhlangana nabo.

28 Babese bemisa emathende abo esigodzini saseKhorihori; Khoriyantumra yena wamisa akhe emathende esigodzini saseShuri. Manje lesigodzi saseShuri besidvutane neligcuma iKhomnori; ngaloko-ke, Khoriyantumra wabutsela ndzawonye emabutfo akhe egcumeni iKhomnori, washayela emabutfo aShizi licilongo kuwabita kutsi aphume batawukulwa.

29 Futsi kwenteka kutsi beta, kodvwa baphindze bacoshwa babuyiselwa emuva; babuya kwesibili, baphindze bacoshwa babuyiselwa emuva kwesibili. Futsi kwenteka kutsi beta kwesitsatfu, lapho imphi yaba matima kakhulu.

30 Futsi kwenteka kutsi Shizi washaya Khoriyantumra kangangekutsi wamlimata kakhulu; Khoriyantumra alahlekelwe yingati yakhe, waculeka, watsatfwa shangatsi ufile

31 Manje kulahlekelwa ngemadvodza, besifazane kanye nebantfwana etinhlangotsini totimbili kwaba kukhulu kakhulu kangangekutsi Shizi wayaleta bantfu bakhe kutsi bangasawacoshi emabutfo aKhoriyantumra; ngaloko-ke, babuyela enkanjini yabo.