1 Futsi kwenteka kutsi ngesikhatsi Khoriyantumra asaluleme emancebeni akhe, wacala wawakhumbula emavi Etheri labekawakhulume kuye.

2 Wabona kutsi besekuvele kubulewe ngenkemba cishe tigidzi letimbili tebantfu bakhe, wacala waba nelusizi enhlitiyweni yakhe; yebo besekubulewe tigidzi letimbili temadvodza lanemandla, kanjalo nebafati babo kanye nebantfwana babo.

3 Wacala kuphendvuka ebubini lebekabentile; wacala wawakhumbula lawo mavi labekakhulunywe ngemlomo wabo bonkhe baphrofethi, futsi wabona kutsi besekagcwaliseka kute kube manje, onkhe ngisho nalokuncane kanganani, futsi umphefumulo wakhe wakhala wala kudvudvuteka.

4 Futsi kwenteka kutsi wabhalela Shizi incwadzi, amcela kutsi asindzise bantfu, nekutsi bekatawunikela umbuso kuye ngenca yetimphilo tebantfu.

5 Futsi kwenteka kutsi ngesikhatsi Shizi asayitfolile lencwadzi yakhe wabhalela Khoriyantumra incwadzi, watsi uma atawutinikela yena, kute ambulale ngenkemba yakhe lucobo, bekatawutisindzisa timphilo tebantfu.

6 Futsi kwenteka kutsi bantfu abaphendvukanga ebubini babo, bantfu baKhoriyantumra baphehlelwa ekutfukutseleleni bantfu baShizi, kani nebantfu baShizi baphehlelwa ekutfukutseleleni bantfu baKhoriyantumra; ngaloko-ke, bantfu baShizi balwa nebantfu baKhoriyantumra.

7 Futsi ngesikhatsi Khoriyantumra asabona kutsi besekatawufa waphindze wababalekela bantfu baShizi.

8 Futsi kwenteka kutsi waya emantini aseRipliyankhumi, lokutsi, nakuhunyushwa, kusho lamakhulu, noma lokwendlula konkhe; ngaloko-ke, ngesikhatsi befika kulamanti bemisa emathende abo; naShizi ngalokunjalo wemisa akhe emathende dvute nabo; ngako-ke ngakusasa balwa futsi.

9 Futsi kwenteka kutsi balwa imphi lematima kakhulu, kuyo Khoriyantumra waphindze walimala, waculeka ngenca yekulahlekelwa yingati.

10 Futsi kwenteka kutsi emabutfo aKhoriyantumra awacindzetela emabutfo aShizi kangangekutsi awehlula, abenta kutsi bababalekele; babalekela ngaseningizimu, bamisa emathende abo endzaweni lebeyibitwa ngekutsi yi-Ogathi.

11 Futsi kwenteka kutsi libutfo laKhoriyantumra lemisa emathende alo ngasegcumeni iRama; futsi kwakungilo kanye lelo gcuma lapho babe Mormon afihla khona imibhalo eNkhosini, leyayingcwele.

12 Futsi kwenteka kutsi babutsela ndzawonye bonkhe bantfu kulo lonkhe live, labebangakabulawa, ngaphandle kwa-Etheri.

13 Futsi kwenteka kutsi Etheri watibona tonkhe tento tebantfu, wabona kutsi labo bantfu labebavumelana naKhoriyantumra bebabutsene ndzawonye ebutfweni laKhoriyantumra, nebantfu labebavumelana naShizi bebabutsene ndzawonye ebutfweni laShizi.

14 Ngaloko-ke, sikhatsi lesingangeminyaka lemine bebabutsela ndzawonye bantfu, kute batfole bonkhe labebaseveni, nekutsi batfole onkhe emandla lokwakungenteka kutsi bawatfole.

15 Futsi kwenteka kutsi ngesikhatsi bonkhe sebabutsene ndzawonye, wonkhe muntfu kulelo butfo bekatsandza kuba kulo, nebafati babo kanye nebantfwana babo—emadvodza, besifazane kanye nebantfwana bahlonyiswe ngetikhali temphi, banetihlangu, netivikelo tesifuba, kanye netivikelo tenhloko, bagcokiswe ngendlela yemphi—bahamba nguloyo abhekene nalomunye kute balwe; futsi balwa lilanga lonkhe, kodvwa abancobanga.

16 Futsi kwenteka kutsi ngesikhatsi sekusebusuku besebakhatsele, baphumula etinkanjini tabo; futsi emvakwekutsi sebaphumulile etinkanjini tabo bacala kuhhewula kanye nekulila ngenca yekulahlekelwa bantfu babo labebabulewe, futsi kwaba kukhulu kukhala kwabo, kuhhewula kwabo kanye nekulila kwabo, kangangekutsi bawudzabula kakhulu umoya.

17 Futsi kwenteka kutsi ngakusasa baphindze bayawukulwa, laba likhulu laphindze laba libi lelo langa; noko, abancobanga, futsi uma busuku buphindze bufika badzabula umoya ngekukhala kwabo, nekuhhewula kwabo, kanye nangesililo sabo, ngenca yekulahlekelwa bantfu babo labebabulewe.

18 Futsi kwenteka kutsi Khoriyantumra waphindze wabhalela Shizi incwadzi, amcela kutsi angasaphindzi atawukulwa, kodvwa kutsi atsatse umbuso, asindzise timphilo tebantfu.

19 Kodvwa buka, Moya weNkhosi besewuyekelile kuhlala kubo, Sathane besekanemandla onkhe etinhlitiyweni tebantfu; ngoba besebatinikele ekwenteni lukhuni tinhlitiyo tabo, kanye nasekuphumphutsekeni kwetingcondvo tabo kute babhujiswe; ngaloko-ke baphindze bahamba bayawukulwa.

20 Futsi kwenteka kutsi balwa lilanga lonkhe, futsi ngesikhatsi kufika busuku balala etikwetinkemba tabo.

21 Ngakusasa balwa kwate kwefika busuku.

22 Ngesikhatsi kufika busuku besebadzakiwe yintfukutselo, njengemuntfu lodzakwe liwayini; baphindze balala etikwetinkemba tabo.

23 Ngakusasa baphindze balwa; futsi ngesikhatsi kufika busuku bonkhe bese bafe ngenkemba ngaphandle kwalabangemashumi lasihlanu nakubili bebantfu baKhoriyantumra, kanye nalabangemashumi lasitfupha nemfica bebantfu baShizi.

24 Futsi kwenteka kutsi balala etikwetinkemba tabo ngalobu busuku, ngakusasa baphindze balwa, balwa ngemandla abo onkhe ngetinkemba tabo kanye nangetihlangu tabo, lonkhe lelo langa.

25 Ngesikhatsi kufika busuku besekusele emashumi lamatsatfu nakubili ebantfu baShizi, kanye nemashumi lamabili nesikhombisa ebantfu baKhoriyantumra.

26 Futsi kwenteka kutsi badla base bayalala, batilungiselela kufa ngakusasa. Futsi bebangemadvodza lamakhulu nalanemandla ngekwemandla ebantfu.

27 Futsi kwenteka kutsi balwa sikhatsi lesingangemahora lamatsatfu, baculeka ngenca yekulahlekelwa yingati.

28 Futsi kwenteka kutsi ngesikhatsi bantfu baKhoriyantumra sebatfole emandla lenele ekutsi bangahamba, bese batawubaleka kute basindzise timphilo tabo; kodvwa, Shizi waphakama, kanye nebantfu bakhe, wafunga ngentfukutselo yakhe kutsi utawumbulala Khoriyantumra noma yena abhubhe ngenkemba,

29 Ngaloko-ke, wacosha, ngakusasa wabakhandza; baphindze balwa ngenkemba. Futsi kwenteka kutsi ngesikhatsi bonkhe sebafile ngenkemba, ngaphandle kwaKhoriyantumra naShizi, buka Shizi besekaculekile ngenca yekulahlekelwa yingati.

30 Futsi kwenteka kutsi ngesikhatsi Khoriyantumra sekeyame enkembeni yakhe, kute aphumule kancane, wayishaya wayisusa inhloko yaShizi.

31 Futsi kwenteka kutsi emvakwekutsi sekayishaye wayisusa inhloko yaShizi, Shizi wasukuma wabambelela ngetandla takhe waphindze wawa; emvakwaloko walwela kutfola umphefumulo, wafa.

32 Futsi kwenteka kutsi Khoriyantumra wawela phansi, kwaba shangatsi sewute imphilo.

33 Futsi iNkhosi yakhuluma ku-Etheri, yatsi kuye: Hamba. Wahamba, wabona kutsi emavi onkhe eNkhosi besekagcwaliseka; wase ucedzela umbhalo wakhe; (incenye yalokulikhulu angitange ngiyibhale) wawufihla ngendlela yekutsi bantfu baLimhi bawutfola.

34 Manje emavi ekugcina labhalwa ngu-Etheri ngulawa: Noma ngabe iNkhosi ifuna kutsi ngitsatfwe, noma kutsi ngibeketelele intsandvo yeNkhosi enyameni, akunandzaba, nangabe nje ngisindzisiwe embusweni waNkulunkulu, Amen.