1 Futsi emalangeni aKhomu kweta baphrofethi labanyenti, baphrofetha ngekubhujiswa kwalabo bantfu labanemandla ngaphandle kwekutsi baphendvuke, babuyele eNkhosini, bayekele kubulala kanye nebubi babo.

2 Futsi kwenteka kutsi baphrofethi balahlwa bantfu, babalekela kuKhomu kute bativikele, ngoba bantfu bebafuna kubabulala.

3 Baphrofetha kuKhomu tintfo letinyenti, wababusisa kuwo onkhe emalanga akhe labekasasele.

4 Futsi waphila wate waba mdzala kakhulu, watala Shiblomu, wase Shiblomu ubusa esikhundleni sakhe. UmnakaboShiblomu wamvukela, kwase kucala kuba khona imphi lenkhulu kakhulu eveni lonkhe.

5 Futsi kwenteka kutsi umnakaboShiblomu wenta kutsi bonkhe labaphrofethi labebaphrofethe ngekubhujiswa kwebantfu babulawe.

6 Kwaba khona lusizi lolukhulu eveni lonkhe, ngoba bebafakaze kutsi sicalekiso lesikhulu sitawuta kulelive, kanjalo nakubantfu, nekutsi kutawuba khona kubhujiswa lokukhulu emkhatsini wabo, lobekungakate kube khona nanini emhlabeni, futsi ematsambo abo abetawuba njengetindvundvuma temhlabatsi eveni ngaphandle kwekutsi baphendvuke ebubini babo.

7 Kodvwa abalilalelanga livi leNkhosi, ngenca yemacembu abo lamabi; ngaloko-ke kwacala kwaba khona timphi kanye netincabano eveni lonkhe, kanjalo netindlala letinyenti, netifo letingumashayabhuce, kangangekutsi kwaba khona kubhujiswa lokukhulu, lobekungakate kwatiwa eveni; konkhe loku kwenteka ngemalanga aShiblomu.

8 Bantfu bacala kuphendvuka ebubini babo; futsi njengobe benta njalo iNkhosi yaba nebubele kubo.

9 Futsi kwenteka kutsi Shiblomu wabulawa, Sethi watfunjwa, wahlala ekutfunjweni onkhe emalanga akhe.

10 Futsi kwenteka kutsi Ahahi, indvodzana yakhe, yawutsatsa umbuso, yabusa etikwebantfu emalanga ayo onkhe. Yenta lonkhe luhlobo lwebubi emalangeni ayo, lokwatsi ngako yadala kucitseka kwengati lenyenti; Futsi aba mbalwa emalanga ayo.

11 Futsi Ethemu, awesitukulwane sa-Ahahi, wawutsatsa umbuso; naye ngalokunjalo wenta loko lokwakukubi emalangeni akhe.

12 Futsi kwenteka kutsi emalangeni a-Ethemu, kweta baphrofethi labanyenti, baphindze baphrofetha kubantfu; yebo, baphrofetha kutsi iNkhosi yayitawubabhubhisa baphele nya emhlabeni ngaphandle kwekutsi baphendvuke ebubini babo.

13 Futsi kwenteka kutsi bantfu batenta lukhuni tinhlitiyo tabo, bangafuni kuwalalela emavi abo; baphrofethi balila baphindze bakhwesha emkhatsini wabo.

14 Futsi kwenteka kutsi Ethemu wehlulela ngebubi onkhe emalanga akhe, watala Moron. Futsi kwenteka kutsi Moron wabusa esikhundleni sakhe; Moron wenta loko bekukubi phambi kweNkhosi.

15 Futsi kwenteka kutsi kwacubuka kuvukelana emkhatsini webantfu, ngenca yalelo cembu leliyimfihlo lebelisungulwe kutsi kutfolakale emandla kanye nenzuzo; futsi kwavela indvodza lebeyinemandla ekwenteni bubi emkhatsini wabo, yalwa naMoron, lapho yaketula khona incenye yembuso; yayigcina leyo ncenye yembuso iminyaka leminyenti.

16 Futsi kwenteka kutsi Moron wayiketula, waphindze wawutsatsa umbuso.

17 Futsi kwenteka kutsi kwavela lenye indvodza lebeyinemandla, lebeyiyesitukulwane semnakaboJaredi.

18 Futsi kwenteka kutsi yamketula Moron yawutsatsa umbuso; ngako-ke, Moron wahlala ekutfunjweni onkhe emalanga akhe lebekasasele; watala Khoriyantori.

19 Futsi kwenteka kutsi Khoriyantori wahlala ekutfunjweni onkhe emalanga akhe.

20 Emalangeni aKhoriyantori kweta baphrofethi labanyenti, baphrofetha ngetintfo letinkhulu naletimangalisako, bashumayela kuphendvuka kubantfu, nekutsi ngaphandle kwekutsi baphendvuke iNkhosi Nkulunkulu yayitawukwehlisela kwehlulela ngalokumelene nabo bate babhujiswe nya.

21 Nekutsi iNkhosi Nkulunkulu yayitawutfumela noma iletse labanye bantfu kutsi balitsatse lelive, ngemandla ayo, ngaleyo ndlela leyaletsa ngayo bokhokho babo.

22 Futsi bawalahla onkhe emavi ebaphrofethi, ngenca yenhlangano yabo leyimfihlo kanye netinengiso tabo letimbi.

23 Futsi kwenteka kutsi Khoriyantori watala Etheri, wabese uyafa, ahleli ekutfunjweni onkhe emalanga akhe.