INcwadzi ya-Etheri
Umbhalo wemaJaredi, lotsetfwe kubongcwengcwe labangemashumi lamabili nakune labatfolwa bantfu baLimhi emalangeni eNkhosi Mosiya.
Sehluko 1
Moroni ufinyeta imibhalo ya-Etheri—Umlandvo wesitukulwane sa-Etheri ubekwa sobala—Lulwimi lwemaJaredi aluphambatiswa eMbhoshongweni waseBhabheli—INkhosi yetsembisa kubaholela eveni lelikhetsekile iphindze ibente sive lesikhulu.
1 Manje mine, Moroni, sengiyachubeka nekuniketa indzaba yalabo bantfu basendvulo lababhujiswa ngesandla seNkhosi eveni lelisenyakatfo.
2 Futsi indzaba yami ngiyitsatsa kubongcwengcwe labangemashumi lamabili nakune labatfolwa bantfu baLimhi, lababitwa ngekutsi yincwadzi ya-Etheri.
3 Njengobe ngicabanga kutsi incenye yekucala yalombhalo, lekhuluma ngekudalwa kwemhlaba, kanjalo nekwa-Adamu, nangendzaba kusukela ngaleso sikhatsi kute kufike embhoshongweni lomkhulu, futsi nanganoma ngutiphi tintfo letenteka emkhatsini webantfwana bebantfu kute kube ngulesi sikhatsi, tikumaJuda—
4 Ngako-ke angitibhali leto tintfo letenteka kusukela emalangeni a-Adamu kute kube ngulesikhatsi; kodvwa tikhona kulabongcwengcwe; loyo lotitfolako, uyawuba nemandla ekutsi atfole indzaba lephelele.
5 Kodvwa buka, anginiki indzaba lephelele, kodvwa ngibhala incenye yalendzaba, kusukela embhoshongweni bate babhujiswe.
6 Futsi ngiyibhala ngalendlela lendzaba. Loyo lowabhala lombhalo bekungu-Etheri, futsi bekawentalelwane yaKhoriyantori.
7 Khoriyantori bekayindvodzana yaMoron.
8 Moron bekayindvodzana ya-Ethemu.
9 Ethemu bekayindvodzana ya-Ahahi.
10 Ahahi bekayindvodzana yaSethi.
11 Sethi bekayindvodzana yaShibloni.
12 Shibloni bekayindvodzana yaKhomu.
13 Khomu bekayindvodzana yaKhoriyantumi.
14 Khoriyantumi bekayindvodzana ya-Amnigada.
15 Amnigada bekayindvodzana ya-Aroni.
16 Aroni bekawentalelwane yaHethi, lobekayindvodzana yaHeyathomu.
17 Heyathomu bekayindvodzana yaLibi.
18 Libi bekayindvodzana yaKishi.
19 Kishi bekayindvodzana yaKhoromu.
20 Khoromu bekayindvodzana yaLevi.
21 Levi bekayindvodzana yaKimu.
22 Kimu bekayindvodzana yaMoriyantoni.
23 Moriyantoni bekawentalelwane yaRiplakishi.
24 Riplakishi bekayindvodzana yaShezi.
25 Shezi bekayindvodzana yaHethi.
26 Hethi bekayindvodzana yaKhomu.
27 Khomu bekayindvodzana yaKhoriyantumi.
28 Khoriyantumi bekayindvodzana ya-Emeri.
29 Emeri bekayindvodzana ya-Omeri.
30 Omeri bekayindvodzana yaShule.
31 Shule bekayindvodzana yaKibi.
32 Kibi bekayindvodzana ya-Oriha, lobekayindvodzana yaJaredi;
33 Loyo Jaredi lowaphuma nemnakabo kanye nemindeni yabo, kanye nalabanye nemindeni yabo, embhoshongweni lomkhulu, ngesikhatsi iNkhosi iphambanisa lulwimi lwebantfu, futsi yafunga isentfukutselweni yayo kutsi bayawuhlakatwa emhlabeni wonkhe; futsi ngekwelivi leNkhosi labantfu bahlakatwa.
34 UmnakaboJaredi bekayindvodza lenkhulu nalenemandla, futsi bekayindvodza lebeyitsandvwa kakhulu yiNkhosi, Jaredi, umnakabo, watsi kuye: Khala eNkhosini, kute ingasiphambanisi kutsi singawacondzi emavi etfu.
35 Futsi kwenteka kutsi umnakaboJaredi wakhala eNkhosini, iNkhosi yamhawukela Jaredi; ngako-ke ayitange iluphambanise lulwimi lwaJaredi; naJaredi kanye nemnakabo abatange baphambaniswe.
36 Ngaleso sikhatsi Jaredi watsi kumnakabo: Khala futsi eNkhosini, kute isuse intfukutselo yayo kulabo lababangani betfu, kute ingaluphambanisi lulwimi lwabo.
37 Futsi kwenteka kutsi umnakaboJaredi wakhala eNkhosini, iNkhosi yabahawukela labangani babo kanjalo nemindeni yabo, kangangoba nabo abaphambaniswanga.
38 Futsi kwenteka kutsi Jaredi waphindze wakhuluma kumnakabo, watsi: Hamba uyawubuta eNkhosini kutsi ingabe itawusikhipha yini kulelive, uma itawusikhipha kulelive, khala kuyo kutsi siyawuya kuphi. Ngubani lowatiko kutsi kungenteka iNkhosi isitfwale isiyise eveni lelikhetsekile ngetulu kwawo onkhe emhlabeni na? Futsi uma kunjalo, asetsembeke eNkhosini, kute silitfole libe lifa letfu.
39 Futsi kwenteka kutsi umnakaboJaredi wakhala eNkhosini ngaloko lobekukhulunywe ngemlomo waJaredi.
40 Futsi kwenteka kutsi iNkhosi yamuva umnakaboJaredi, yaba nesihawu, yatsi kuye:
41 Hamba ubutsele ndzawonye imihlambi yakho, lendvuna nalensikati, yalo lonkhe luhlobo; kanjalo nenhlanyelo yemhlaba yalo lonkhe luhlobo; nemindeni yenu, Jaredi umnakenu kanye nemndeni wakhe; kanjalo nebangani bakho nemindeni yabo, kanye nebangani baJaredi nemindeni yabo.
42 Uma sewukwentile loku uyawubahola wehle uye esigodzini lesingasenyakatfo. Ngitawuhlangana nawe lapho, ngitawuhamba phambi kwakho kuya eveni lelikhetsekile ngetulu kwawo onkhe emave emhlaba.
43 Lapho ngitawukubusisa kanye nentalelwane yakho, futsi ngitikhulisele entalelwaneni yakho, nasentalelwaneni yemnakenu, kanye nalabo labayawuhamba nawe, sive lesikhulu. Akuyuba khona nasinye lesiyawuba sikhulu kunaleso sive lengiyawutikhulisela sona entalelwaneni yakho, emhlabeni wonkhe. Futsi ngitawukwenta kanjalo kuwe ngoba ukhalile kimi sonkhe lesikhatsi lesidze.