1 Manje mine Moroni, sengiyachubeka nekucedzela umbhalo wami mayelana nekubhujiswa kwalabo bantfu lebengibhala ngabo.

2 Ngoba buka, bawalahla onkhe emavi a-Etheri; ngoba ngempela wabatjela ngato tonkhe tintfo, kusukela ekucaleni kwemuntfu; nekutsi emvakwekutsi emanti sekehlile eveni laba live lelikhetsekile ngetulu kwawo onkhe lamanye emave, live lelikhetsiwe leNkhosi; ngaloko-ke iNkhosi ifuna kutsi bonkhe bantfu bayisebentele bahlale kulo;

3 Nekutsi bekuyindzawo yeJerusalema leNsha, leyokwehlela phansi ivela ezulwini, kanye nendzawo lengcwele yeNkhosi.

4 Buka, Etheri wawabona emalanga aKhristu, wakhuluma mayelana neJerusalema leNsha kulelive.

5 Waphindze wakhuluma mayelana nendlu yaka-Israyeli, kanye neJerusalema lapho Lehi ayawuphuma khona—kutsi emvakwekutsi seyibhujisiwe iyawuphindze yakhiwe, lidolobha lelingcwele eNkhosini; ngaloko-ke, angeke ibe yiJerusalema lensha ngoba beyikhona esikhatsini sakadzeni; kodvwa iyawuphindze yakhiwe, ibe lidolobha lelingcwele leNkhosi; futsi iyawukwakhiwa endlini yaka-Israyeli—

6 Nekutsi iJerusalema leNsha kufanele yakhiwe kulelive, yakhelwe insali yentalelwane yaJosefa, lobekunemfanekiso ngalokuphatselene naletintfo.

7 Ngoba njengobe Josefa aletsa uyise eveni laseGibhithe, wafela khona; ngaloko-ke, iNkhosi yayikhipha insali yentalelwane yaJosefa eveni laseJerusalema, kute ibe nemusa kuyo intalelwane yaJosefa kute ingabhubhi, njengobe yaba nemusa kuyise waJosefa kutsi angabhubhi.

8 Ngaloko-ke, insali yendlu yaJosefa iyawukwakhiwa kulelive, futsi liyakuba live lelilifa layo; iyawukwakhela iNkhosi lidolobha lelingcwele, njengeJerusalema lendzala; futsi angeke bahlanganiswe nalabanye nanini, kute kufike siphetfo lapho umhlaba utawukwendlula.

9 Kuyawuba khona lizulu lelisha kanye nemhlaba lomusha, kuyawuba njengekwakadzeni ngaphandle kwekutsi kwakadzeni kwendlulile, tonkhe tintfo setinsha.

10 Emvakwaloko kuta iJerusalema leNsha, futsi babusisiwe labahlala kuyo, ngoba ngibo labo tembatfo tabo letimhlophe ngenca yengati yeliWundlu; futsi ngibo labo lababalwa nensali yentalelwane yaJosefa, labebabendlu yaka-Israyeli.

11 Emvakwaloko kuta iJerusalema yakadzeni; nalabahlala kuyo, babusisiwe, ngoba bahlantwe engatini yeliWundlu; futsi ngibo labo labebahlakatiwe baphindze bagcogcwa babuyiswa emagumbini lamane emhlaba, kanye nasemaveni lasenyakatfo, futsi babahlanganyeli ekugcwalisekeni kwesivumelwano Nkulunkulu lasenta neyise, Abrahama.

12 Futsi uma letintfo setenteka, tigcwalisa umbhalo longcwele lotsi, ngibo labo labebabekucala, labayawuba bekugcina; futsi ngibo labo labebabekugcina, labayawuba bekucala.

13 Futsi besengitawubhala lokunyenti, kodvwa ngalelwe, kodvwa betitinkhulu tiphindze timangalisa tiphrofetho ta-Etheri; kodvwa bamtsatsa njengentfo lengenalutfo, bamcosha; watifihla emgodzini welidvwala emini, kwatsi ebusuku waphuma wabuka letintfo lebetitawukwenteka kubantfu.

14 Ngesikhatsi ahleli emgodzini welidvwala wacedzela lobekusele kwalombhalo, abuka kubhujiswa lobekwehlele bantfu, ebusuku.

15 Futsi kwenteka kutsi ngawo lowo mnyaka lacoshwa ngawo emkhatsini webantfu kwacala kwaba khona imphi lenkhulu emkhatsini webantfu, ngoba baba banyenti labeta ngaphambili, lokwakubantfu labanemandla, bafuna kubulala Khoriyantumra ngemacebo abo ebubi layimfihlo, lesekukhulunywe ngawo.

16 Manje Khoriyantumra, asatifundzisile, ngabo bonkhe buciko bemphi kanye nangenkhohliso yemhlaba, ngaloko-ke walwa nabo labo labebafuna kumbulala.

17 Kodvwa akaphendvukanga, kanjalo nemadvodzana kanye nemadvodzakati akhe lamahle; kanjalo nemadvodzana nemadvodzakati lamahle aKhohori; kanjalo nemadvodzana kanye nemadvodzakati lamahle aKorihori; kwephetsa, akutange kube khona namunye wemadvodzana nemadvodzakati lamahle kuwo wonkhe umhlaba lowaphendvuka etonweni takhe.

18 Ngaloko-ke, kwenteka kutsi ngemnyaka wekucala Etheri ahlala emgodzini welidvwala, kwaba khona labanyenti bantfu lababulawa ngenkemba yalawo macembu layimfihlo, labelwa naKhoriyantumra kute atfole umbuso.

19 Futsi kwenteka kutsi emadvodzana aKhoriyantumra alwa kakhulu aphindze opha kakhulu.

20 Ngemnyaka wesibili livi leNkhosi lefika ku-Etheri, litsi akahambe ayawuphrofetha kuKhoriyantumra kutsi, uma angaphendvuka, kanye nabo bonkhe bendlu yakhe, iNkhosi yayitawumnika umbuso wakhe futsi ibasindzise bantfu—

21 Ngaphandle kwaloko bayawubhujiswa, kanye nabo bonkhe bendlu yakhe ngaphandle kwakhe. Futsi nguye kuphela lobekatawuphila kute abone kugcwaliseka kwaleto tiphrofetho letakhulunywa mayelana nalabanye bantfu labebatawutfola live libe lifa labo; nekutsi Khoriyantumra bekatawungcwatjwa ngibo; futsi wonkhe umuntfu uyawubhujiswa ngaphandle kwaKhoriyantumra.

22 Futsi kwenteka kutsi Khoriyantumra akaphendvukanga, nendlu yakhe, kanjalo nebantfu; netimphi atiphelanga; futsi bafuna nekumbulala Etheri, kodvwa wababalekela wayewubhaca emgodzini welidvwala.

23 Futsi kwenteka kutsi kwavela Sharedi, naye ngalokunjalo walwa naKhoriyantumra; wamehlula, kangangekutsi ngemnyaka wesitsatfu wamyisa ekutfunjweni.

24 Emadvodzana aKhoriyantumra, ngemnyaka wesine, amehlula Sharedi, aphindze awubuyisela umbuso kuyise.

25 Manje kwacala kwaba khona imphi eveni lonkhe, wonkhe muntfu nelicembu lakhe alwela loko bekakufuna.

26 Futsi bekukhona tigebengu, kwephetsa, tonkhe tinhlobo tebubi kulo lonkhe live.

27 Futsi kwenteka kutsi Khoriyantumra wamtfukutselela kakhulu Sharedi, wahamba nemabutfo akhe wayawukulwa naye; bahlangana ngentfukutselo lenkhulu, bahlangana esigodzini saseGilgali; lemphi yaba matima kakhulu.

28 Futsi kwenteka kutsi Sharedi walwa naye sikhatsi lesingangemalanga lamatsatfu. Futsi kwenteka kutsi Khoriyantumra wamehlula, wamcosha wate wefika ematsafeni aseHeshloni.

29 Futsi kwenteka kutsi Sharedi waphindze walwa naye kulawo matsafa; buka, wamehlula Khoriyantumra, wamphocelela kutsi abaleke abuyele emuva esigodzini saseGilgali

30 Khoriyantumra waphindze walwa naSharedi esigodzini saseGilgali, lapho ehlula khona Sharedi futsi wambulala.

31 Sharedi walimata Khoriyantumra etsangeni lakhe, kangangekutsi akatange abuyele kuyawukulwa sikhatsi lesingangeminyaka lemibili, ngaleso sikhatsi bonkhe bantfu eveni bebacitsa ingati, futsi bekute namunye lobekangabavimba.