1 Futsi kwenteka kutsi emalanga a-Etheri bekasemalangeni aKhoriyantumra; Khoriyantumra bekayinkhosi kulo lonkhe live.

2 Futsi Etheri bekangumphrofethi weNkhosi; ngaloko-ke Etheri wefika ngemalanga aKhoriyantumra, wacala kuphrofetha kubantfu, ngoba bekangakwati kutibamba ngenca yaMoya weNkhosi lobewukuye.

3 Ngoba washumayela kusukela ekuseni, kwate kwaba sekushoneni kwelilanga, akhutsata bantfu kutsi bakholwe kuNkulunkulu kutsi baphendvuke funa babhujiswe, atsi kubo ngelukholo tonkhe tintfo tiyagcwaliseka—

4 Ngaloko-ke, loyo lokholwa kuNkulunkulu ngempela angaba nelitsemba lendzawo lencono, yebo, indzawo esandleni sangesekudla saNkulunkulu, lelo tsemba lelivela ngelukholo, lelenta bantfu kutsi basime, lokuyawubenta babambelele baphindze bacine, bente imisebenti lemihle njalo, baholelwa ekudvumiseni Nkulunkulu.

5 Futsi kwenteka kutsi Etheri waphrofetha tintfo letinkhulu naletimangalisako kubantfu, lebebangatikholwa, ngenca yekutsi bebangakatiboni.

6 Manje, mine, Moroni, ngitawukhuluma ngalokutsite mayelana naletintfo; ngitawukhombisa umhlaba kutsi lukholo tintfo letetsenjwako kodvwa letingabonakali; ngaloko-ke, ungaphikisi ngoba ungaboni, ngoba awutfoli bufakazi kute kube semvakwekulingwa ngelukholo lwakho.

7 Ngoba bekungenca yelukholo kutsi Khristu watibonakalisa kubokhokho betfu, emvakwekutsi sekavukile ekufeni; akatibonakalisanga kubo kwate kwaba semvakwekutsi babe nelukholo kuye; ngaloko-ke, kufanele kutsi labanye babe nelukholo kuye, ngoba akatibonakalisi emhlabeni.

8 Kodvwa ngenca yelukholo lwebantfu sewutibonakalisile emhlabeni, wadvumisa libito laBabe, futsi walungisa indlela kute ngayo labanye babe ngulabahlanganyela esiphiweni sasezulwini, kute betsembele kuleto tintfo labangakatiboni.

9 Ngaloko-ke, nani ningaba nelitsemba, futsi nibe ngulabahlanganyela kulesipho, uma nje ningaba nelukholo.

10 Buka bekungenca yelukholo kutsi labo basendvulo babitwa ngekweluhlelo lolungcwele lwaNkulunkulu.

11 Ngaloko-ke, umtsetfo waMosi waniketwa ngelukholo. Kodvwa ngesipho sendvodzana yakhe Nkulunkulu ulungise indlela lenhle kakhulu; futsi kungenca yelukholo kutsi ugcwalisekile.

12 Ngoba uma lungekho lukholo emkhatsini webantfwana bebantfu Nkulunkulu angeke akwati kwenta timangaliso emkhatsini wabo; ngaloko-ke, akatibonakalisanga kwate kwaba semvakwelukholo lwabo.

13 Buka, bekulukholo lwa-Alma kanye na-Amuleki lolwenta kutsi lijele liwele phansi.

14 Buka, bekulukholo lwaNefi kanye naLehi lolwenta lushintjo kumaLamani, kutsi abhajatiswe ngemlilo kanye nangaMoya loNgcwele.

15 Buka, bekulukholo lwa-Amoni kanye nabomnakabo lolwenta simangaliso lesikhulu emkhatsini wemaLamani.

16 Yebo, futsi nabo bonkhe labo labenta timangaliso batenta ngelukholo, ngisho nalabo labebangaphambili kwaKhristu kanjalo nalabo labebangemuva kwakhe.

17 Bekungelukholo kutsi bafundzi labatsatfu batfole setsembiso sekutsi bona bebangeke bakuve kufa; futsi abatange basitfole lesetsembiso kwate kwaba semvakwelukholo lwabo.

18 Akutange nangasiphi sikhatsi kube khona namunye lowenta timangaliso kute kube semvakwelukholo lwabo; ngaloko-ke bacale bakholwa kuyo iNdvodzana yaNkulunkulu.

19 Bekukhona labanyenti labebanelukholo lobelucine kakhulu, ngisho nangaphambi kwekutsi Khristu afike, labebangeke bavinjelwe kutsi babone ngekhatsi kwendvwangu, kodvwa ngempela babona ngemehlo abo tintfo lebebatibone ngemehlo elukholo, futsi bajabula.

20 Buka, sesibonile kulombhalo kutsi lomunye walaba bekungumnakaboJaredi; ngoba belulukhulu kakhulu lukholo lwakhe kuNkulunkulu, ngendlela yekutsi ngesikhatsi Nkulunkulu elula umunwe wakhe akakhonanga kuwufihla ekutseni ubonwe ngumnakaboJaredi, ngenca yelivi lakhe lebekalikhulume kuye, livi lebekalitfole ngelukholo.

21 Emvakwekutsi umnakaboJaredi sekabone umunwe weNkhosi, ngenca yaleso setsembiso umnakaboJaredi lebekasitfole ngelukholo, iNkhosi ayikhonanga kutsi igodle noma ngabe yini kutsi ayibone; ngaloko-ke yamkhombisa tonkhe tintfo, ngoba bekangeke agcinwe angephandle kwendvwangu.

22 Futsi kungenca yelukholo kutsi bokhokho bami batfole setsembiso sekutsi letintfo kumele tite kubomnakabo ngebeTive; ngako-ke iNkhosi ingiyaletile, yebo, ngisho Jesu Khristu.

23 Futsi ngatsi kuye: Nkhosi, beTive batawuhlekisa ngaleti tintfo, ngenca yebutsakatsaka betfu ekubhaleni; ngoba iNkhosi isente saba nemandla evini ngenca yelukholo, kodvwa awusentanga kutsi sibe nemandla ekubhaleni; ngoba wenta bonkhe labantfu kutsi bakhulume lokunyenti, ngenca yaMoya loNgcwele lobanikete wona.

24 Futsi usente kutsi sibhale lokuncane kuphela, ngenca yebumatima bekubhala ngetandla tetfu. Buka awusentanga saba nemandla ekubhaleni njengemnakaboJaredi, ngoba umente kutsi letintfo latibhala tibe nemandla njengawe, ekutseni tiphoca umuntfu kutsi atifundze.

25 Uphindze wenta emavi etfu aba nemandla aphindze aba makhulu, ngendlela yekutsi asikwati kuwabhala; ngako-ke, ngesikhatsi sibhala siyabubona butsakatsaka betfu, siyakhubeka ngenca yekubekeka kwemagama etfu; futsi ngiyesaba funa beTive bahlekise ngemavi etfu.

26 Ngesikhatsi sengikushito loku, iNkhosi yakhuluma kimi yatsi: Tiwula tiyahlekisa, kodvwa tiyawukhala; futsi umusa wami ubenele labamnene, kutsi bangasitakali ngebutsakatsaka benu;

27 Uma bantfu beta kimi ngitawubakhombisa butsakatsaka babo. Nginika bantfu butsakatsaka kute batfobeke; futsi umusa wami ubenele bonkhe bantfu labatitfobako phambi kwami; ngoba uma batitfoba phambi kwami, futsi banelukholo kimi, uma kunjalo ngitawukwenta tintfo letibutsakatsaka tibe nemandla kubo.

28 Buka, ngitawubakhombisa beTive butsakatsaka babo, futsi ngitawubakhombisa kutsi lukholo, litsemba kanye nelutsandvo kubaletsa kimi—lengingumtfombo wako konkhe kulunga.

29 Mine, Moroni, sengiwevile lamavi, ngadvudvuteka, ngatsi: O Nkhosi, kulunga kwakho kutawukwentiwa, ngoba ngiyati kutsi wena usebenta kubantfwana bebantfu ngekwelukholo lwabo;

30 Ngoba umnakaboJaredi watsi entsabeni iZerini, Suka—yesuka. Kube bekete lukholo beyingeke isuke; ngaloko-ke wena usebenta emvakwekutsi bantfu sebabe nelukholo.

31 Ngoba watibonakalisa ngaleyo ndlela kubafundzi bakho; ngoba emvakwekutsi sebabe nelukholo, futsi bakhuluma ngelibito lakho, watibonakalisa kubo ngemandla lamakhulu.

32 Ngetulu kwaloko ngiyakhumbula kutsi watsi ulungisele umuntfu indlu, yebo, ngisho emkhatsini wetindlu letinyenti taBabe wakho, lapho umuntfu angaba nelitsemba lelikhulu kakhulu; ngaloko-ke umuntfu kufanele etsembe, noma angeke alitfole lifa kuleyo ndzawo loyilungisile.

33 Kantsi futsi, ngiyakhumbula ushito kutsi ulitsandzile live, wate wabeka phansi imphilo yakho ngenca yelive, kute uyitsatse uphindze ulungiselele bantfwana bebantfu indzawo.

34 Manje ngiyati kutsi lolutsandvo lonalo ngebantfwana bebantfu lutsandvo loluphelele, ngaloko-ke, ngaphandle kwekutsi bantfu babe nelutsandvo angeke bayitfole leyo ndzawo loyilungisile etindlini taBabe wakho.

35 Ngaloko-ke, ngiyati ngenca yalentfo loyishito, kutsi uma beTive bete lutsandvo, ngenca yebutsakatsaka betfu, kutsi utawubalinga, uphindze utsatse emathalenta abo, yebo, ngisho naloko lesebakutfolile, bese unika labo labayawuba nalokunyenti.

36 Futsi kwenteka kutsi ngathandaza eNkhosini kutsi ibe nemusa kubeTive, kute babe nelutsandvo.

37 Futsi kwenteka kutsi iNkhosi yatsi kimi: Uma bete lutsandvo akusho lutfo loko kuwe, wena wetsembekile; ngaloko-ke, tembatfo takho tiyawuhlantwa. Ngenca yekutsi ububonile butsakatsaka bakho uyawuciniswa, kangangoba utawuhlala phansi endzaweni lengiyilungisile etindlini letinyenti taBabe.

38 Manje mine, Moroni, sengiyavalelisa kubeTive, yebo, futsi kanjalo nakubomnaketfu lengibatsandzako, site sihlangane embikwesihlalo sekwehlulela saKhristu, lapho bonkhe bantfu bayawukwati kutsi tembatfo tami atikangcoli ngengati yenu.

39 Futsi ngaleso sikhatsi niyawukwati kutsi ngimbonile Jesu, nekutsi ukhulumile nami buso nebuso, nekutsi wangitjela ngekutfobeka, njengemuntfu akhuluma nalomunye ngelulwimi lwami, mayelana naletintfo.

40 Futsi ngibhale lokumbalwa kuphela, ngenca yebutsakatsaka bami ekubhaleni.

41 Manje, ngifuna kunincusa kutsi nimfune loJesu baphrofethi kanye nebaphostoli lababhale ngaye, kute umusa waNkulunkulu Babe, kanjalo neNkhosi Jesu Khristu, kanye naMoya loNgcwele, lofakaza ngabo, ube kini futsi uhlale kini ingunaphakadze. Amen.