1 Futsi kwenteka kutsi Shezi, lobekawesitukulwane saHethi—ngoba Hethi bekabulewe yindlala, kanye nabo bonkhe bendlu yakhe ngaphandle kwaShezi—ngaloko-ke, Shezi wacala waphindze wakha bantfu labebacishe babulawa konakala nendlala.

2 Futsi kwenteka kutsi Shezi wakukhumbula kubhujiswa kwabokhokho bakhe, wakha umbuso lolungile; ngoba wakukhumbula loko iNkhosi lebeyikwentile ekuletseni Jaredi kanye nemnakabo ngesheya kwelwandle, wahamba etindleleni teNkhosi; futsi watala emadvodzana kanye nemadvodzakati.

3 Futsi indvodzana yakhe lendzala, libito layo lebekunguShezi, yamvukela; noko, Shezi washaywa sandla sesigebengu, ngenca yemcebo wakhe lomnyenti, lokwaphindze kwaletsa kuthula kuyise.

4 Futsi kwenteka kutsi uyise wakha emadolobha lamanyenti eveni, nebantfu bacala kusabalala eveni lonkhe. Shezi waphila wate waba mdzala kakhulu; watala Riplakishi. Wafa, wase Riplakishi uyabusa esikhundleni sakhe.

5 Futsi kwenteka kutsi Riplakishi akakwentanga loko lobekulungile emehlweni eNkhosi, ngoba yena waba nebafati labanyenti kanye netingani, waphindze wabeka loko emahlombe ebantfu lobekumatima kutsi bakwetfwale; yebo, wabatselisa ngemtselo lomatima; ngalomtselo wakha takhiwo letinyenti letivulekile.

6 Watakhela sihlalo sebukhosi lesihle kakhulu; wakha lamanyenti emajele, futsi loyo lobekangafuni kukhokha umtselo bekamfaka ejele; loyo lobekangakhoni kukhokha umtselo naye bekafakwa ejele; wenta kutsi basebente njalo kute bondliwe; futsi loyo lobekakwala kusebenta bekenta kutsi abulawe.

7 Ngaloko-ke wawutfola wonkhe umsebenti wakhe lomuhle, yebo, ngisho neligolide lakhe lelicolisakeli wenta kutsi licengwe ejele; tonkhe tinhlobo temisebenti lemihle wenta kutsi tisetjentwe ejele. Futsi kwenteka kutsi wabahlupha bantfu ngebugwadla kanye nangetinengiso takhe.

8 Watsi sekabuse sikhatsi lesiyiminyaka lengemashumi lamane nakubili bantfu bamvukela; kwacala kwaba khona imphi kulelive, kangangekutsi Riplakishi wabulawa, nesitukulwane sakhe saphocelelwa kutsi sibaleke kulelive.

9 Futsi kwenteka emvakwesikhatsi seminyaka leminyenti, Moriyantoni, (awesitukulwane saRiplakishi) wabutsela ndzawonye libutfo lalabacoshwa, wahamba wayawukulwa nebantfu; wawazuza emandla kulamanyenti emadolobha; imphi yacala yaba yimbi kakhulu, yadvonsa sikhatsi lesiyiminyaka leminyenti; futsi wawazuza emandla eveni lonkhe, watibeka waba yinkhosi eveni lonkhe.

10 Emvakwekutsi sekatibeke waba yinkhosi wawucekisa umtfwalo ebantfwini, ngaloko wazuza kutsandvwa bantfu, futsi bamgcoba kutsi abe yinkhosi yabo.

11 Futsi wenta kulunga kubantfu, kodvwa hhayi kuye ngenca yebugwadla bakhe lobunyenti; ngaloko-ke wehlukaniswa neNkhosi.

12 Futsi kwenteka kutsi Moriyantoni wakha emadolobha lamanyenti, bantfu banotsa kakhulu ngaphansi kwembuso wakhe, ngenca yetakhiwo, ligolide nesiliva, kukhulisa lokuyinhlavu, imihlambi yetimvu, imihlambi yetinkhomo, nangenca yetintfo letitsite lebetibuyiselwe kubo.

13 Moriyantoni waphila wate waba mdzala kakhulu, ngaleso sikhatsi watala Kimu; Kimu wabusa esikhundleni seyise; wabusa iminyaka lesiphohlongo, uyise wafa. Futsi kwenteka kutsi Kimu akatange abuse ngekulunga, ngaloko-ke akatange atsandvwe yiNkhosi.

14 Umnakabo wamvukela, lokwatsi ngaloko wamfaka ekutfunjweni; wahlala ekutfunjweni onkhe emalanga akhe; watala emadvodzana kanye nemadvodzakati asekutfunjweni, futsi ebudzaleni bakhe watala Levi; wabese uyafa.

15 Futsi kwenteka kutsi Levi wasebenta asekutfunjweni emvakwekufa kweyise, sikhatsi lesingangeminyaka lengemashumi lamane nakubili. Walwa nenkhosi yelive, lokwatsi ngako watitfolela umbuso.

16 Emvakwekutsi sekatitfolele umbuso wenta loko lobekulungile emehlweni eNkhosi; bantfu baphumelela kulelive; waphila wate waba mdzala impela, watala emadvodzana kanye nemadvodzakati; futsi ngetulu kwaloko watala Khoromu, lamgcoba waba yinkhosi esikhundleni sakhe.

17 Futsi kwenteka kutsi Khoromu wenta loko lobekukuhle emehlweni eNkhosi onkhe emalanga akhe; watala emadvodzana nemadvodzakati lamanyenti; emvakwekutsi sekabone emalanga lamanyenti wafa, njengabo bonkhe bantfu; futsi Kishi wabusa esikhundleni sakhe.

18 Futsi kwenteka kutsi Kishi wafa naye ngalokunjalo, kwatsi Libi wabusa esikhundleni sakhe.

19 Futsi kwenteka kutsi Libi naye wenta loko lobekukuhle emehlweni eNkhosi. Ngemalanga aLibi tinyoka letinebutsi tabulawa. Ngaloko-ke bahamba baya eveni lelingaseningizimu, kuyotingela kudla kwebantfu baseveni, ngoba live belimbonywe tilwane tasehlatsini. Libi naye lucobo waba ngumtingeli lomkhulu.

20 Bakha lidolobha lelikhulu esihlengeni lesincane selive, edvute nendzawo lapho lwandle belwehlukanisa khona nelive.

21 Balilondvolota live lelingaseningizimu kutsi libe lihlane, kute batfole tinyamatane. Futsi live lonkhe lebelingasenyakatfo belimbonywe bantfu labebahlala khona.

22 Bebasebenta kakhulu, bebatsenga baphindze batsengise bese bayatsengiselana lomunye nalomunye, kute batfole inzuzo.

23 Bebasebenta ngalo lonkhe luhlobo lwensimbi lesalitje, benta ligolide, isiliva, insimbi, litfusi, kanye nalo lonkhe luhlobo lwetinsimbi; bebatimba emhlabatsini; ngaloko-ke, benta tindvundvuma letinkhulu temhlabatsi kute batfole insimbi lesalitje, yeligolide, isiliva, insimbi, kanye neyelitfusi. Futsi bebenta tonkhe tinhlobo temisebenti lemihle.

24 Baba nesilika, kanye nelineni leyephotselwe ngalokucolisakele; futsi bebenta tonkhe tinhlobo tendvwangu, kute batigcokise.

25 Futsi bebenta tonkhe tinhlobo tetintfo tekusebenta kute balime umhlabatsi, kute balime baphindze bahlanyele, kute bavune baphindze bahlakule, futsi kanjalo nekutsi babhule.

26 Bebenta tonkhe tinhlobo tetintfo tekusebenta labasebentisa ngato tilwane tabo.

27 Bebenta tonkhe tinhlobo tetikhali temphi. Futsi bebenta tonkhe tinhlobo temsebenti webuciko lobukhulu.

28 Bebangakate nanini bantfu babusiswe kangaka njengabo, baphumelele kakhulu ngesandla seNkhosi. Futsi bebaseveni lebelikhetsekile ngetulu kwawo onkhe emave, ngoba iNkhosi beyikukhulumile loko.

29 Futsi kwenteka kutsi Libi waphila iminyaka leminyenti, watala emadvodzana nemadvodzakati; ngetulu kwaloko watala Heyathomu.

30 Futsi kwenteka kutsi Heyathomu wabusa esikhundleni seyise. Ngesikhatsi Heyathomu sekabuse iminyaka lengemashumi lamabili nakune, buka, umbuso watsatfwa kuye. Wasebenta iminyaka leminyenti asekutfunjweni, yebo, ngisho nangawo onkhe emalanga akhe lebekasele.

31 Watala Hethi, Hethi waphila ekutfunjweni onkhe emalanga akhe. Hethi watala Aroni, na-Aroni wahlala ekutfunjweni onkhe emalanga akhe; yena watala Amnigada, Amnigada naye wahlala ekutfunjweni onkhe emalanga akhe; yena wabese utala Khoriyantumi, naKhoriyantumi wahlala ekutfunjweni onkhe emalanga akhe; futsi yena watala Khomu.

32 Futsi kwenteka kutsi Khomu wadvonsa incenye yembuso. Wabusa etikwencenye yembuso iminyaka lengemashumi lamane nakubili; wahamba wayawukulwa nenkhosi, Amgidi, balwa sikhatsi lesiyiminyaka leminyenti, lokwatsi ngaleso sikhatsi Khomu wamncoba Amgidi, wazuza emandla embusweni lobewusele.

33 Ngemalanga aKhomu kwacala kwaba khona tigebengu kulelive; tachubeka ngemacebo akadzeni, tifungisa tifungo ngendlela yebasendvulo, tiphindze tifuna kubhubhisa umbuso.

34 Manje Khomu walwa nabo kakhulu; noko, akatange abehlule.