1 Kag karon natabo ini nga sang nabaton ni Moroni ini nga sulat nagpakaisog ang iya tagipusuon, kag napuno sang tuman kadako nga kalipay tungod sang pagkatampad ni Pahoran, nga indi man sia traidor sa kahilwayan kag kawsa sang iya pungsod.

2 Apang nagkasubo man sia sing tuman tungod sang kalainan sang mga nagtabog kay Pahoran halin sa hukom-lingkuranan, huo, sa malip-ot nga pulong tungod sang mga nagrebelde batok sa ila pungsod kag sa ila man Dios.

3 Kag natabo ini nga si Moroni nagdala sing diutay lang nga tinawo, suno sa luyag ni Pahoran, kag ginhatag kanday Lehi kag Teancum ang awtoridad sa nabilin sang iya kasoldadohan, kag nagsugod sang iya paglakat padulong sa duta sang Gideon.

4 Kag ginpataas niya ang bandera sang kahilwayan sa bisan diin nga lugar nga iya ginsudlan, kag nagkuha sang kon ano man nga puwersa nga iya masarangan sa tanan niya nga paglakat padulong sa duta sang Gideon.

5 Kag natabo ini nga linibo ang nagpanong sa iya bandera, kag nagkapot sang ila mga espada sa pagpangapin sang ila kahilwayan, agud nga indi sila magtupa sa pagkaulipon.

6 Kag gani, sang mapanipon ni Moroni ang pila man ka mga tinawo nga iya masarangan sa tanan niya nga paglakat, nagkadto sia sa duta sang Gideon; kag sa pag-isa sang iya mga puwersa upod sinang kay Pahoran nangin tuman sila kabakod, bisan mas mabakod pa sangsa mga tinawo ni Pacos, nga amo ang hari sang mga nagsilipak nga nagpanabog sang mga maki-kahilwayan pagwa sa duta sang Zarahemla kag nag-agaw sang duta.

7 Kag natabo ini nga sanday Moroni kag Pahoran nagdulhog upod ang ila mga kasoldadohan padulong sa duta sang Zarahemla, kag nagsulong batok sa siyudad, kag gin-atubang ang mga tinawo ni Pacos, sa bagay nga nagpakig-away sila.

8 Kag tan-awa, napatay si Pacos kag ang iya mga tinawo ginpangdakop nga mga bihag, kag si Pahoran ginpanumbalik sa iya hukom-lingkuranan.

9 Kag ang mga tinawo ni Pacos ginbista, suno sa layi, kag amo man ang mga maki-hari nga ginpangdakop kag ginhunong sa bilanggoan; kag ginsentensyahan sang kamatayon suno sa layi; huo, ang mga tinawo ni Pacos kag ang mga maki-hari, ang kon sin-o man nga indi magkapot sang ila mga armas sa pagpangapin sang ila pungsod, kundi nga magapakig-away batok sa sini, ginapatay.

10 Kag gani nangin kinahanglanon nga ini nga layi istrikto nga pagatumanon para sa kasigurohan sang ila pungsod; huo, ang bisan sin-o nga matukiban nga nagapanghiwala sang ila kahilwayan madasig nga ginasentensyahan sang kamatayon suno sa layi.

11 Kag gani natapos ang ika-treinta nga tuig sang pagginahum sang mga hukom sa katawhan ni Nefi; nga napapanumbalik nanday Moroni kag Pahoran ang paghidaet sa duta sang Zarahemla, sa ila kaugalingon nga katawhan, nga nagpatuman sang kamatayon sa tanan nga indi tampad sa kawsa sang kahilwayan.

12 Kag natabo ini, sa pagsugod sang ika-treinta’y uno nga tuig sang pagginahum sang mga hukom sa katawhan ni Nefi, ginpahanabo gilayon ni Moroni nga ang mga panigana ipadala, kag amo man nga padal-an si Helaman sang kasoldadohan sang anum ka libo ka tinawo, agud buligan sia sa pag-amlig sina nga bahin sang duta.

13 Kag ginpahanabo man niya nga ang kasoldadohan sang anum ka libo ka tinawo, upod ang igo nga kadamuon sang pagkaon, ang ipadala sa mga kasoldadohan nanday Lehi kag Teancum. Kag natabo ini nga ini ginhimo agud pabakuron ang duta batok sa mga Lamanhon.

14 Kag natabo ini nga sanday Moroni kag Pahoran, nga nagabilin sang dako nga grupo sang mga tinawo sa duta sang Zarahemla, nagsugod sang ila paglakat upod ang dako nga grupo sang mga tinawo padulong sa duta sang Nefias, nga determinado sa paglaglag sang mga Lamanhon sa sina nga siyudad.

15 Kag natabo ini nga samtang nagalakat sila padulong sa duta, ginpangdakop nila ang dako nga grupo sang mga tinawo sang mga Lamanhon, kag ginpamatay ang madamo sa ila, kag ginpanguha ang ila mga panigana kag ang ila mga armas sa giyera.

16 Kag natabo ini, pagkatapos nga nadakop nila sila, ginpasulod nila sila sa isa ka kasugtanan nga indi na sila magkapot pa sang ila mga armas sa giyera batok sa mga Nefinhon.

17 Kag sang nakasulod na sila sa sini nga kasugtanan ginpadala nila sila agud magpuyo upod sa katawhan ni Amon, kag yara sila sa kadamuon nga mga apat ka libo nga wala napatay.

18 Kag natabo ini nga sang napadala na nila sila nagpadayon sila sang ila paglakat padulong sa duta sang Nefias. Kag natabo ini nga sang nakaabot sila sa siyudad sang Nefias, nagpatindog sila sang ila mga tolda sa mga kapatagan sang Nefias nga malapit sa siyudad sang Nefias.

19 Karon si Moroni maluyag nga ang mga Lamanhon maggwa agud magpakig-away batok sa ila, sa mga kapatagan; apang ang mga Lamanhon, nga nakahibalo sang ila tuman nga kaisog, kag ginalantaw ang kadako sang ila kadamuon, gani wala sila nangisog sa paggwa batok sa ila; gani wala sila nagpakig-away sa sina nga adlaw.

20 Kag pag-abot sang kagab-ihon, si Moroni naglakat sa kadulom sang kagab-ihon, kag nagtaklas sa ibabaw sang pader agud magpanilag kon sa diin nga bahin sang siyudad ang mga Lamanhon nagkampo upod sa ila kasoldadohan.

21 Kag natabo ini nga yara sila sa este, sa tupad sang entrada; kag tanan sila nagakatulog. Kag karon nagbalik si Moroni sa iya kasoldadohan, kag nagsugo nga magdali-dali sila sa paghanda sang mabakod nga mga higot kag mga hagdan, nga ipapanaog halin sa ibabaw sang pader tubtob sa nasulod nga bahin sang pader.

22 Kag natabo ini nga si Moroni nagsugo nga ang iya mga tinawo magsulong kag magtaklas sa ibabaw sang pader, kag magpanaog sa sina nga bahin sang siyudad, huo, bisan sa weste, nga sa diin ang mga Lamanhon wala nagkampo upod ang ila mga kasoldadohan.

23 Kag natabo ini nga tanan sila nakapanaog sa siyudad sa kagab-ihon paagi sa ila mabakod nga mga higot kag sa ila mga hagdan; gani pagkaaga yara na sila tanan sa sulod sang mga pader sang siyudad.

24 Kag karon, sang nakabugtaw ang mga Lamanhon kag nakita nga ang mga kasoldadohan ni Moroni yara na sa sulod sang mga pader, hinadlokan sila sing tuman, sa bagay nga nagpinalagyo sila pagwa sa mayor nga alagyan.

25 Kag karon sang nakita ni Moroni nga nagapalagyo sila sa iya atubang, nagsugo sia nga ang iya mga tinawo magsalakay batok sa ila, kag ginpamatay ang madamo, kag ginpalibutan ang madamo nga iban pa, kag ginpangdakop sila nga mga bihag; kag ang nagkalabilin sa ila nagpalagyo padulong sa duta sang Moroni, nga yara sa mga dulonan malapit sa baybayon.

26 Gani nakuha nanday Moroni kag Pahoran ang siyudad sang Nefias nga wala sing may nadula bisan isa ka tawo; kag may madamo sa mga Lamanhon nga nagkalamatay.

27 Karon natabo ini nga madamo sa mga Lamanhon nga mga bihag ang maluyag nga magbuylog sa katawhan ni Amon kag mangin hilway nga katawhan.

28 Kag natabo ini nga sa tanan nga maluyag, sa ila gintugot ang suno sa ila mga luyag.

29 Gani, ang tanan nga bihag nga mga Lamanhon nagbuylog sa katawhan ni Amon, kag nagsugod sa pagpangabudlay sing tuman, nga nagauma sang duta, nga nagatanom kag nagasagod sang tanan nga sari sang mga uyas, kag mga panong kag mga baka sang tagsa ka sahi; kag gani ang mga Nefinhon nahaw-asan sang dako nga palas-anon; huo, sa bagay nga nahaw-asan sila sang tanan nga bihag nga mga Lamanhon.

30 Karon natabo ini nga si Moroni, pagkatapos nga nakuha niya ang siyudad sang Nefias, nga nakadakop sang madamo nga bihag, nga nagbuhin sing tuman sang mga kasoldadohan sang mga Lamanhon, kag nabawi ang madamo nga Nefinhon nga ginpangbihag, nga nagpabakod sing tuman sang kasoldadohan ni Moroni; gani naglakat si Moroni halin sa duta sang Nefias padulong sa duta sang Lehi.

31 Kag natabo ini nga sang nakita sang mga Lamanhon nga nagapadulong si Moroni batok sa ila, hinadlokan sila liwat kag nagpinalagyo sa atubang sang kasoldadohan ni Moroni.

32 Kag natabo ini nga ginpanglagas sila ni Moroni kag sang iya kasoldadohan sa tagsa ka siyudad, tubtob nga ginsugata sila nanday Lehi kag Teancum; kag ang mga Lamanhon nagpinalagyo kanday Lehi kag Teancum, bisan padulhog sa mga dulonan malapit sa baybayon, tubtob nga nakaabot sila sa duta sang Moroni.

33 Kag ang mga kasoldadohan sang mga Lamanhon nagtililipon tanan, sa bagay nga sila tanan nangin isa ka grupo sa duta sang Moroni. Karon si Ammoron, ang hari sang mga Lamanhon, yara man upod sa ila.

34 Kag natabo ini nga sanday Moroni kag Lehi kag Teancum nagkampo upod ang ila mga kasoldadohan sa palibot sa mga dulonan sang duta sang Moroni, sa bagay nga ang mga Lamanhon napalibutan sa mga dulonan malapit sa kamingawan sa sur, kag sa mga dulonan malapit sa kamingawan sa este.

35 Kag gani nagkampo sila para sa gab-i. Kay tan-awa, ang mga Nefinhon kag ang mga Lamanhon man ginakapoy tungod sang kalawig sang paglakat; gani wala sila nagdesisyon sa bisan ano nga plano sa kagab-ihon, luwas kay Teancum; kay tuman ang iya kaakig kay Ammoron, sa bagay nga ginakabig niya nga si Ammoron, kag si Amalikia nga iya utod, amo ang nangin kabangdanan sining dako kag nagalawig nga giyera sa tunga nila kag sang mga Lamanhon, nga nangin kabangdanan sang tuman kadamo nga giyera kag pagpaagay sang dugo, huo, kag sang dako nga tiggulutom.

36 Kag natabo ini nga si Teancum sa iya kaakig nagkadto pasulod sa kampo sang mga Lamanhon, kag gintunton ang iya kaugalingon sa mga pader sang siyudad. Kag nagkadto sia nga may dala nga higot, sa tagsa ka lugar, tubtob nga nakit-an niya ang hari; kag ginhaboyan niya sia sang sibat, nga nagtuhog sa iya malapit sa tagipusuon. Apang tan-awa, ginpamukaw sang hari ang iya mga alagad antes sia napatay, sa bagay nga ginlagas nila si Teancum, kag ginpatay sia.

37 Karon natabo ini nga sang nahibal-an nanday Lehi kag Moroni nga si Teancum patay na nagkasubo sila sing tuman; kay tan-awa, isa sia ka lalaki nga nakig-away sing maisog para sa iya pungsod, huo, isa ka matuod-tuod nga abyan sa kahilwayan; kag nagbatas sia sing tuman kadamo nga grabe nga mga pag-antos. Apang tan-awa, patay na sia, kag naglakat na sa alagyan sang bug-os nga duta.

38 Karon natabo ini nga si Moroni naglakat pagkaaga, kag nagsalakay sa mga Lamanhon, sa bagay nga ginpamatay nila sila sa isa ka dako nga pagpamatay; kag ginpanabog nila sila pagwa sa duta; kag nagpinalagyo sila, bisan nga wala na sila nagbalik sa sina nga tion batok sa mga Nefinhon.

39 Kag gani natapos ang ika-treinta’y uno nga tuig sang pagginahum sang mga hukom sa katawhan ni Nefi; kag gani naagyan nila ang mga giyera, kag mga pagpaagay sang dugo, kag tiggulutom, kag pag-antos, sa sulod sang madamo nga tinuig.

40 Kag may mga pagpamatay, kag mga pagbinaisay, kag mga pag-ilinaway, kag tanan nga sari sang kalainan sa tunga sang katawhan ni Nefi; apang para sa kaayohan sang mga matarong, huo, tungod sang mga pangamuyo sang mga matarong, ginluwas sila.

41 Apang tan-awa, tungod sang tuman nga kalawigon sang giyera sa tunga sang mga Nefinhon kag sang mga Lamanhon madamo ang nagtig-a, tungod sang tuman nga kalawigon sang giyera; kag madamo ang naghumok tungod sang ila mga pag-antos, sa bagay nga nagpaubos sila sang ila mga kaugalingon sa atubang sang Dios, bisan sa tuman nga pagkamapainubuson.

42 Kag natabo ini nga pagkatapos nga mapabakod ni Moroni ang mga bahin sang duta nga nakataya gid sa mga Lamanhon, tubtob nga igo na sila nga mabakod, nagbalik sia sa siyudad sang Zarahemla; kag amo man si Helaman nagbalik sa lugar nga iya palanublion; kag may paghidaet naman liwat nga nagluntad sa katawhan ni Nefi.

43 Kag gintugyan ni Moroni ang awtoridad sang iya mga kasoldadohan sa mga kamot sang iya anak, nga ginahingalanan kay Moronias; kag nagpahuway sia sa iya kaugalingon nga balay agud mahinguyang niya ang nabilin sang iya mga inadlaw sa kalinong.

44 Kag si Pahoran nagbalik sa iya hukom-lingkuranan; kag si Helaman nagbalik liwat sa pagwali sa katawhan sang pulong sang Dios; kay tungod sang sa pagkadamo nga giyera kag mga pagbinaisay nangin kinahanglanon nga isa ka pagsulundan ang himuon liwat sa simbahan.

45 Gani, si Helaman kag ang iya mga kauturan naglibot, kag nagpahayag sang pulong sang Dios upod ang dako nga gahum tubtob sa pagkumbinse sa madamo nga katawhan sang ila kalainan, nga nagpahanabo sang ila paghinulsol sang ila mga sala kag mabunyagan sa Ginuo nga ila Dios.

46 Kag natabo ini nga ginpahamtang nila liwat ang simbahan sang Dios sa bug-os nga kadutaan.

47 Huo, kag ang mga pagsulundan ginhimo parte sa layi. Kag ang ila mga hukom, kag ang ila puno nga mga hukom ginpili.

48 Kag ang katawhan ni Nefi nagsugod liwat sa pag-uswag sa duta, kag nagsugod sa pagdamo kag sa pagbakod liwat sing tuman sa duta. Kag nagsugod sila nga magmanggaranon sing tuman.

49 Apang sa pihak sang ila mga manggad, ukon sang ila kusog, ukon sang ila kauswagan, wala sila nag-alsa sa bugal sang ila mga mata; kag indi man sila mahinay sa pagdumdum sang Ginuo nga ila Dios; kundi nga ginpaubos nila ang ila mga kaugalingon sing tuman sa iya atubang.

50 Huo, gindumdum nila kon ano kadalagko nga mga butang ang ginhimo sang Ginuo para sa ila, nga ginluwas niya sila halin sa kamatayon, kag halin sa mga gapos, kag halin sa mga bilanggoan, kag halin sa tanan nga sari sang mga pag-antos, kag ginluwas niya sila halin sa mga kamot sang ila mga kaaway.

51 Kag nagpangamuyo sila sa Ginuo nga ila Dios sing dalayon, sa bagay nga ginpakamaayo sila sang Ginuo, suno sa iya pulong, gani nagbakod sila kag nag-uswag sa duta.

52 Kag natabo ini nga ining tanan nga butang nahimo. Kag si Helaman napatay sa ika-treinta’y singko nga tuig sang pagginahum sang mga hukom sa katawhan ni Nefi.