Balaan ng mga Kasulatan
Alma 25


Kapitulo 25

Naglapnag ang pagpanalakay sang mga Lamanhon—Ang mga kaliwatan sang mga pari ni Noe nagkalamatay suno sa ginpropesiya ni Abinadi—Madamo nga mga Lamanhon ang nahaylo kag nagbuylog sa katawhan sang Anti-Nefi-Lehi—Nagpati sila kay Cristo kag nagtuman sang layi ni Moises. Mga 90–77 B.C.

1 Kag tan-awa, karon natabo ini nga yadtong mga Lamanhon labi nga naakig tungod napatay nila ang ila mga kauturan; gani nanumpa sila nga magtimalus sa mga Nefinhon; kag wala na sila nagtinguha pa sa pagpamatay sang katawhan sang Anti-Nefi-Lehi sa sina nga tion.

2 Kundi nga gindala nila ang ila mga kasoldadohan kag nagtabok sa mga dulonan sang duta sang Zarahemla, kag ginsalakay ang katawhan nga yara sa duta sang Amonihas kag ginpamatay sila.

3 Kag pagkatapos sina, madamo sila sang mga nangin inaway batok sa mga Nefinhon nga sa diin napanabog sila kag napamatay.

4 Kag sa mga Lamanhon nga nagkalamatay amo ang halos tanan nga kaliwatan ni Amulon kag sang iya mga kauturan, nga mga pari ni Noe, kag nagkalamatay sila paagi sa mga kamot sang mga Nefinhon;

5 Kag ang nagkalabilin, nga nakapalagyo padulong sa este nga bahin sang kamingawan, kag nakaagaw sang gahum kag awtoridad batok sa mga Lamanhon, nagpahanabo nga madamo sang mga Lamanhon ang magkalamatay paagi sa kalayo tungod sang ila pagpati—

6 Kay madamo sa ila, pagkatapos nga nagbatas sing dako nga kapierdihan kag tuman nga pag-antos, nagsugod nga mapukaw sa pagdumdum sang mga pulong nga ginwali sa ila nanday Aaron kag sang iya mga kauturan sa ila duta; gani nagsugod sila nga indi na magpati sa mga tradisyon sang ila mga amay, kag magpati sa Ginuo, kag nga naghatag sia sing dako nga gahum sa mga Nefinhon; kag gani madamo sa ila ang nahaylo sa kamingawan.

7 Kag natabo ini nga ang mga tagdumala nga mga nagkalabilin sang mga anak ni Amulon nagpahanabo nga pamatyon sila, huo, ang tanan nga nagpati sa sining mga butang.

8 Karon ini nga pagkamartir amo ang rason nga madamo sang ila mga kauturan ang mapukaw sa kaakig; kag didto nagsugod nga may pagbinaisay sa kamingawan; kag ang mga Lamanhon nagsugod sa pagpangita sang kaliwatan ni Amulon kag sang iya mga kauturan kag nagsugod sa pagpamatay sa ila; kag nagpalagyo sila padulong sa este nga bahin sang kamingawan.

9 Kag tan-awa ginapangita sila sa sini nga adlaw sang mga Lamanhon. Gani natuman ang mga pulong ni Abinadi, nga iya ginsiling parte sa kaliwatan sang mga pari nga nagpapatay sa iya paagi sa kalayo.

10 Kay nagsiling sia sa ila: Kon ano ang inyo himuon sa akon mangin sulundan sang mga butang nga magaabot.

11 Kag karon si Abinadi amo ang una nga nag-antos sang kamatayon paagi sa kalayo tungod sang iya pagpati sa Dios; karon amo ini ang buot niya silingon, nga madamo ang magaantos sang kamatayon paagi sa kalayo, pareho sang iya naagyan.

12 Kag nagsiling sia sa mga pari ni Noe nga ang ila kaliwatan mangin rason nga madamo ang pamatyon, sa amo man nga paagi nga ginhimo sa iya, kag palaptahon sila sa gwa kag pamatyon, bisan pareho nga ang isa ka carnero nga wala sing manugpahalab ginatabog kag ginapatay sang mabangis nga mga sapat; kag karon tan-awa, ining mga pulong napamatud-an, kay ginpanabog sila sang mga Lamanhon, kag ginpangita sila, kag ginpangsakit sila.

13 Kag natabo ini nga sang nakita sang mga Lamanhon nga indi nila madaug ang mga Nefinhon nagbalik sila liwat sa ila kaugalingon nga duta; kag madamo sa ila ang nagkadto agud magpuyo sa duta sang Ismael kag sa duta sang Nefi, kag nagbuylog sila sa katawhan sang Dios, nga amo ang katawhan sang Anti-Nefi-Lehi.

14 Kag ginpanglubong man nila ang ila mga armas sa giyera, pareho sang ginhimo sang ila mga kauturan, kag nagsugod sila nga mangin isa ka matarong nga katawhan; kag naglakat sila sa mga dalanon sang Ginuo, kag nagbantay sa pagtuman sang iya mga kasugoan kag sang iya mga pagsulundan.

15 Huo, kag nagtuman sila sang layi ni Moises; kay ginakinahanglan nga magtuman pa sila sang layi ni Moises kay wala pa ini tanan natuman. Apang sa pihak sang layi ni Moises, nagpaabot sila sa pagkari ni Cristo, nga ginakabig nga ang layi ni Moises isa ka simbolo sang iya pagkari, kag nagapati nga kinahanglan gid sila magtuman sang panggwa nga mga hilikuton tubtob sa tion nga ipakita sia sa ila.

16 Karon wala sila naghunahuna nga ang kaluwasan nagaabot paagi sa layi ni Moises; kundi nga ang layi ni Moises nagbulig sa pagpabakod sang ila pagtuo kay Cristo; kag gani napadayon nila ang paglaum paagi sa pagtuo, tuhoy sa wala’y katapusan nga kaluwasan, nga nagasandig sa espiritu sang propesiya, nga naghambal sinang mga butang nga magaabot.

17 Kag karon tan-awa, sanday Amon, kag Aaron, kag Omner, kag Himni, kag ang ila mga kauturan nagkasadya sing tuman, tungod sang kadalag-an nga naagom nila sa mga Lamanhon, sang nakita nila nga ang Ginuo nagtugot sa ila suno sa ila mga pangamuyo, kag napamatud-an man niya ang iya pulong sa ila sa tagsa ka punto.