Balaan ng mga Kasulatan
Alma 18


Kapitulo 18

Si haring Lamoni naghunahuna nga si Amon amo ang Dako nga Espiritu—Gintudloan ni Amon ang hari parte sang Pagtuga, pagpakigbagay sang Dios sa mga tawo, kag pagtubos nga magaabot paagi kay Cristo—Si Lamoni nagpati kag natumba sa duta nga daw patay. Mga 90 B.C.

1 Kag natabo ini nga si haring Lamoni nagsugo nga ang iya mga alagad magtindog kag magpamatuod sang tanan nga butang nga ila nakita parte sa natabo.

2 Kag sang nagpamatuod sila tanan sa mga butang nga ila nakita, kag nabal-an niya ang pagkatampad ni Amon sa pag-amlig sang iya mga panong, kag ang iya man dako nga gahum sa pagpakig-away batok sadtong mga nagtinguha nga patyon sia, naurungan sia sing tuman, kag nagsiling: Pat-od gid, labaw pa ini sangsa isa ka tawo. Tan-awa, indi bala ini ang Dako nga Espiritu nga nagapadala sang amo kadako nga mga silot sa sining katawhan tungod sang ila mga pagpamatay?

3 Kag ginsabat nila ang hari, kag nagsiling: Kon sia man ang Dako nga Espiritu ukon isa ka tawo, wala kami nakahibalo; apang ini lamang ang amon nahibal-an, nga indi sia mapatay sang mga kaaway sang hari; kag indi man nila mapalapta ang mga panong sang hari kon kaupod namon sia, tungod sang iya abilidad kag dako nga kusog; gani, nahibal-an namon nga abyan sia sang hari. Kag karon, O hari, wala kami nagapati nga ang isa ka tawo may amo sina kadako nga gahum kay nahibal-an namon nga indi sia mapatay.

4 Kag karon, sang nabatian sang hari ining mga pulong, nagsiling sia sa ila: Nahibaloan ko na karon nga ini ang Dako nga Espiritu; kag nagpanaog sia sa sini nga tion agud amligan ang inyo mga kabuhi, agud nga indi ko kamo pag-ipapatay pareho sang akon ginhimo sa inyo mga kauturan. Karon ini ang Dako nga Espiritu nga ginasiling sang aton mga amay.

5 Karon amo ini ang ginapatihan ni Lamoni, nga nabaton niya halin sa iya amay, nga may Dako nga Espiritu. Bisan pa nga nagapati sila sa Dako nga Espiritu, naghunahuna sila nga husto ang bisan ano man nga ila himuon; apang, si Lamoni nagsugod nga mahadlok sing tuman, sang kahadlok nga basi nakasala sia sa pagpatay sang iya mga alagad;

6 Kay madamo sia sing ginpamatay sa ila tungod ginpalapta sang ila mga kauturan ang ila mga panong sa lugar sang tubig; kag gani, tungod napalapta nila ang ila mga panong ginpamatay sila.

7 Karon gawi sining mga Lamanhon nga maghulat malapit sa mga tubig sang Sebus agud laptahon ang mga panong sang katawhan, agud nga sa sini nga paagi mapanabog nila ang madamo nga panong nga naglinapta sa ila kaugalingon nga duta, kay ini gawi sang pagpangagaw sa ila.

8 Kag natabo ini nga si haring Lamoni nagpamangkot sa iya mga alagad nga nagasiling: Diin ining lalaki nga may amo sina kadako nga gahum?

9 Kag nagsiling sila sa iya: Tan-awa, nagapakaon sia sang imo mga kabayo. Karon ang hari nagsugo sa iya mga alagad, antes sang tion sang pagpainom sang ila mga panong, nga ihanda nila ang iya mga kabayo kag mga karwahe, kag idul-ong sia sa duta sang Nefi; kay may dako nga piyesta nga gintalana sa duta sang Nefi, sang amay ni Lamoni, nga amo ang hari sa bug-os nga kadutaan.

10 Karon sang nabatian ni haring Lamoni nga si Amon nagahanda sang iya mga kabayo kag sang iya mga karwahe labi sia nga nagdayaw, tungod sang pagkatampad ni Amon nga nagasiling: Pat-od gid nga wala sing bisan sin-o nga alagad sa tanan nga alagad ko nga nangin tuman katutum pareho sini nga tawo; kay bisan iya pa gani ginadumdum ang tanan ko nga sugo nga tumanon ang mga ini.

11 Karon nahibal-an ko gid nga amo ini ang Dako nga Espiritu, kag luyag ko nga magkadto sia sa akon, apang indi ako mangisog.

12 Kag natabo ini nga sang nahanda na ni Amon ang mga kabayo kag ang mga karwahe para sa hari kag sa iya mga alagad, nagkadto sia sa hari, kag nakita niya nga nagliwat ang nawong sang hari; gani nagahana na sia nga magbalik halin sa iya atubang.

13 Kag isa sang mga alagad sang hari ang nagsiling sa iya, Rabana, nga, kon sayuron, gamhanan ukon dako nga hari, nga nagakabig sang ila mga hari nga gamhanan; kag gani nagsiling sia sa iya: Rabana, luyag sang hari nga magpabilin ka.

14 Gani nag-atubang si Amon sa hari, kag nagsiling sa iya: Ano ang luyag mo nga himuon ko para sa imo, O hari? Kag ang hari wala nagsabat sa iya sa sulod sing isa ka oras, suno sa ila tion, kay wala sia makahibalo kon ano ang dapat niya nga ihambal sa iya.

15 Kag natabo ini nga si Amon nagsiling sa iya liwat: Ano ang kinahanglan mo sa akon? Apang ang hari wala nagsabat sa iya.

16 Kag natabo ini nga si Amon, nga napuno sang Espiritu sang Dios, gani nahibal-an niya ang mga panghunahuna sang hari. Kag nagsiling sia sa iya: Tungod bala nga nabatian mo nga ginpangapinan ko ang imo mga alagad kag ang imo mga panong, kag ginpatay ang pito sang ila mga kauturan paagi sa tirador kag paagi sa espada, kag ginpang-utod ang mga butkon sang iban, agud pangapinan ang imo mga panong kag ang imo mga alagad; tan-awa, amo bala ini ang kabangdanan sang imo pagkatingala?

17 Ginasiling ko sa imo, ngaa, nga tuman gid ang imo pagkatingala? Tan-awa, isa ako ka tawo, kag alagad mo ako; gani, ang bisan ano nga imo pangayuon nga husto, ina pagahimuon ko.

18 Karon sang nabatian sang hari ining mga pulong, naurungan sia liwat, kay nakita niya nga mahibal-an ni Amon ang iya mga panghunahuna; apang bisan pa amo sini, si haring Lamoni nagtikab sang iya baba, kag nagsiling sa iya: Sin-o ka? Ikaw bala inang Dako nga Espiritu nga nakahibalo sang tanan nga butang?

19 Si Amon nagsabat kag nagsiling sa iya: Indi.

20 Kag ang hari nagsiling: Paano mo nahibal-an ang mga panghunahuna sang akon tagipusuon? Mahimo ka nga maghambal sing wala’y kahadlok, kag sugiri ako parte sining mga butang; kag sugiri man ako kon sa ano nga gahum mo ginpamatay kag ginpang-utod ang mga butkon sang akon mga kauturan nga nagpalapta sang akon mga panong—

21 Kag karon, kon sugiran mo ako parte sining mga butang, bisan ano ang imo pangayuon ihatag ko sa imo; kag kon kinahanglanon, pabantayan ko ikaw sa akon mga kasoldadohan; apang nahibal-an ko nga mas gamhanan ka pa sangsa ila tanan; apang, bisan ano ang imo pangayuon sa akon ihatag ko sa imo.

22 Karon si Amon nga maalam, apang indi makahalalit, nagsiling kay Lamoni: Mamati ka bala sa akon mga pulong kon sugiran ko ikaw kon sa ano nga gahum ko ginahimo ining mga butang? Kag amo ini ang butang nga ginapangayo ko sa imo.

23 Kag ang hari nagsabat sa iya, kag nagsiling: Huo, magapati ako sa tanan mo nga pulong. Kag gani nakuha sia paagi sa taktika.

24 Kag si Amon nagsugod sa paghambal sa iya sing may kaisog, kag nagsiling sa iya: Nagapati ka bala nga may Dios?

25 Kag nagsabat sia, kag nagsiling sa iya: Wala ako makahibalo kon ano ang buot silingon sina.

26 Kag dayon si Amon nagsiling: Nagapati ka bala nga may Dako nga Espiritu?

27 Kag nagsiling sia, Huo.

28 Kag si Amon nagsiling: Amo ini ang Dios. Kag si Amon nagsiling sa iya liwat: Nagapati ka bala nga ining Dako nga Espiritu, nga amo ang Dios, nagtuga sang tanan nga butang nga yara sa langit kag sa duta?

29 Kag nagsiling sia: Huo, nagapati ako nga gintuga niya ang tanan nga butang nga yara sa duta; apang wala ako makahibalo sang mga langit.

30 Kag si Amon nagsiling sa iya: Ang kalangitan isa ka lugar nga sa diin nagapuyo ang Dios kag ang tanan niya nga balaan nga mga anghel.

31 Kag si haring Lamoni nagsiling: Sa ibabaw bala ini sang duta?

32 Kag si Amon nagsiling: Huo, kag ginatan-aw niya ang tanan nga anak sang katawhan; kag nahibal-an niya ang tanan nga panghunahuna kag mga tinutuyo sang tagipusuon; kay sa iya kamot sila tanan gintuga halin pa sa ginsuguran.

33 Kag si haring Lamoni nagsiling: Nagapati ako sa tanan nga butang nga imo ginhambal. Ginpadala ka bala halin sa Dios?

34 Si Amon nagsiling sa iya: Isa ako ka tawo; kag ang tawo sa ginsuguran gintuga suno sa dagway sang Dios, kag gintawag ako sang iya Balaan nga Espiritu nga itudlo ining mga butang sa iya katawhan, agud madala sila sa ihibalo sinang matarong kag matuod;

35 Kag isa ka bahin sinang Espiritu nagapuyo sa akon nga nagahatag sa akon sang ihibalo, kag amo man sang gahum suno sa akon pagtuo kag mga handum nga yara sa Dios.

36 Karon sang nahambal ni Amon ining mga pulong, nagsugod sia halin sa pagtuga sang kalibutan, kag sa pagtuga man kay Adan, kag ginsugiran sia sang tanan nga butang parte sa pagkahulog sang tawo, kag ginsaysay kag ginhumlad sa iya atubang ang mga kasulatan kag ang balaan nga mga kasulatan sang katawhan, nga ginhambal sang mga propeta, bisan tubtob sa tion nga ang ila amay nga si Lehi nagbiya sa Jerusalem.

37 Kag ginsaysay man niya sa ila (kay ini tuhoy sa hari kag sa iya mga alagad) ang tanan nga pagpanglakaton sang ila mga amay sa kamingawan, kag ang tanan nila nga pag-antos upod ang kagutom kag kauhaw, kag ang ila mga pagpangabudlay, kag iban pa.

38 Kag ginsaysay man niya sa ila ang parte sa mga pagrebelde nanday Laman kag Lemuel, kag sang mga anak nga lalaki ni Ismael, huo, ang tanan nila nga mga pagrebelde ginsaysay niya sa ila; kag ginpaathag niya sa ila ang tanan nga kasulatan kag balaan nga mga kasulatan halin sa tion nga si Lehi nagbiya sa Jerusalem tubtob sa sining panahon.

39 Apang indi lamang ini; kay ginpaathag niya sa ila ang plano sang pagtubos, nga ginhanda halin pa sa pagtuga sang kalibutan; kag ginpahibalo man niya sa ila ang parte sa pagkari ni Cristo, kag ang tanan nga buluhaton sang Ginuo ginpahibalo niya sa ila.

40 Kag natabo ini nga pagkatapos nga nasiling niya ining tanan nga butang, kag napaathag ang mga ini sa hari, nga ang hari nagpati sa tanan niya nga mga pulong.

41 Kag nagsugod sia sa pagpakitluoy sa Ginuo nga nagasiling: O Ginuo, maluoy ka; suno sa imo bugana nga kaluoy nga may yara ka sa katawhan ni Nefi, kaluoyi ako kag ang akon katawhan.

42 Kag karon, sang nasiling niya ini, natumba sia sa duta nga daw patay na sia.

43 Kag natabo ini nga ginhakwat sia sang iya mga alagad kag gindala sa iya asawa, kag ginpahigda sia sa isa ka hiligdaan; kag naghigda sia nga daw patay na sia sa sulod sang duha ka adlaw kag duha ka gab-i; kag ang iya asawa, kag ang iya mga anak nga lalaki, kag ang iya mga anak nga babayi nagpangalisud sa iya, suno sa paagi sang mga Lamanhon, nga nagapanalambiton sing tuman sa iya pagkadula.