1 Tan-awa, natabo ini nga ang hari sang mga Lamanhon nagpadala sing isa ka pabantala sa tanan niya nga katawhan, nga indi nila pagpadapatan sang ila mga kamot si Amon, ukon si Aaron, ukon si Omner, ukon si Himni, ukon bisan sin-o sa ila mga kauturan nga magwali sang pulong sang Dios, sa kon diin nga lugar nga ila kadtoan, sa bisan diin nga bahin sang ila duta.

2 Huo, nagpadala sia sing isa ka mando sa ila, nga indi nila sila pagpadapatan sang ila mga kamot agud gapuson sila, ukon agud ihunong sila sa bilanggoan; kag indi man nila sila pagduplaan, ukon pagsakiton, ukon pagtabugon pagwa sa ila mga sinagoga, ukon pagsilotan; kag indi man nila sila pagbatuhon, kundi nga mangin hilway sila nga makasulod sa ila mga balay, kag amo man sa ila mga templo, kag sa ila mga santuaryo.

3 Kag gani makawali sila sang pulong suno sa ila mga luyag, kay ang hari nahaylo sa Ginuo, kag ang tanan niya nga panimalay; gani nagpadala sia sang iya pabantala sa bug-os nga kadutaan sa iya katawhan, agud ang pulong sang Dios indi mapunggan, kundi nga magalapnag ini sa bug-os nga kadutaan, agud ang iya katawhan makumbinse parte sa malain nga mga tradisyon sang ila mga amay, kag makumbinse sila nga mag-ulolutod sila tanan, kag indi sila dapat magpamatay, kag magpangagaw, kag magpangawat, kag magpanglahi, kag maghimo sing bisan ano nga sari sang kalainan.

4 Kag karon natabo ini nga sang napadala sang hari ini nga pabantala, nga si Aaron kag ang iya mga kauturan naglakat sa tagsa ka siyudad, kag sa tagsa ka balay sang pagsimba, nga nagapahamtang sang mga simbahan, kag nagakonsagrar sang mga pari kag mga manunudlo sa bug-os nga kadutaan sa mga Lamanhon, agud magwali kag magtudlo sang pulong sang Dios sa ila; kag gani nagsugod sila nga mangin madinalag-on.

5 Kag linibo ang nadala sa ihibalo parte sa Ginuo, huo, linibo ang nadala sa pagpati sa mga tradisyon sang mga Nefinhon; kag gintudloan sila sang mga kasulatan kag mga propesiya nga ginpasa-pasa bisan tubtob sa sini nga panahon.

6 Kag pareho kasigurado nga buhi ang Ginuo, gani sigurado nga ang tanan nga nagpati, ukon ang tanan nga nadala sa ihibalo parte sa kamatuoran, paagi sa pagpangwali nanday Amon kag sang iya mga kauturan, suno sa espiritu sang rebelasyon kag sang propesiya, kag sang gahum sang Dios nga nagahikot sang mga milagro sa ila—huo, ginasiling ko sa inyo, pareho nga buhi ang Ginuo, ang tanan nga Lamanhon nga nagpati sa ila pagpangwali, kag nahaylo sa Ginuo, wala gid nagtalikod.

7 Kay nangin isa sila ka matarong nga katawhan; ginbuy-an nila ang mga armas sang ila pagrebelde, nga wala na sila magpakig-away batok sa Dios, kag wala man batok sa bisan sin-o sang ila mga kauturan.

8 Karon, amo ini sila ang nahaylo sa Ginuo:

9 Ang katawhan sang mga Lamanhon nga yara sa duta sang Ismael;

10 Kag amo man sang katawhan sang mga Lamanhon nga yara sa duta sang Midoni;

11 Kag amo man sang katawhan sang mga Lamanhon nga yara sa siyudad sang Nefi;

12 Kag amo man sang katawhan sang mga Lamanhon nga yara sa duta sang Silom, kag yara sa duta sang Semlon, kag sa siyudad sang Lemuel, kag sa siyudad sang Simnilom.

13 Kag amo ini ang mga ngalan sang mga siyudad sang mga Lamanhon nga nahaylo sa Ginuo; kag amo ini sila ang nagbuya sang mga armas sang ila pagrebelde, huo, ang tanan nila nga armas sa giyera; kag tanan sila mga Lamanhon.

14 Kag ang mga Amaleknon wala nahaylo, luwas sa isa lamang; wala man sing bisan isa sang mga Amulonhon; kundi nga ginpatig-a nila ang ila mga tagipusuon, kag amo man ang mga tagipusuon sang mga Lamanhon sa sina nga bahin sang duta nga kon sa diin sila nagapuyo, huo, kag ang tanan nila nga baryo kag ang tanan nila nga siyudad.

15 Gani, ginsambit namon ang tanan nga siyudad sang mga Lamanhon nga sa diin sila naghinulsol kag nakahibalo parte sa kamatuoran, kag nahaylo.

16 Kag karon natabo ini nga ang hari kag yadtong mga nahaylo maluyag nga makaangkon sila sang ngalan agud paagi sa sini makilal-an sila halin sa ila mga kauturan; gani ang hari nagpalaygay kay Aaron kag sa madamo nila nga pari, parte sa ngalan nga dapat nila dal-on sa ila mga kaugalingon, agud makilal-an sila.

17 Kag natabo ini nga gintawag nila ang ila mga ngalan nga mga Anti-Nefi-Lehi; kag gintawag sila sa sini nga ngalan kag wala na gintawag nga mga Lamanhon.

18 Kag nagsugod sila nga mangin isa ka tuman kapisan nga katawhan; huo, kag mainabyanon sila sa mga Nefinhon; gani, ginsugdan nila ang pagpakig-angot sa ila, kag ang sumpa sang Dios wala na nagsunod pa sa ila.