1 Kag tan-awa, karon natabo ini nga ang amon madason nga tuyo amo ang pagkuha sang siyudad sang Manti; apang tan-awa, wala sing paagi nga mapagwa namon sila sa siyudad paagi sa amon diutay nga mga guban. Kay tan-awa, nadumduman nila inang amon ginhimo sang una; gani indi na namon sila maganyat palayo sa ila mga pamakod.

2 Kag tuman sila kadamo sangsa amon kasoldadohan sa bagay nga wala kami nangisog nga atubangon kag salakayon sila sa ila mga pamakod.

3 Huo, nangin kinahanglanon nga gamiton namon ang amon mga tinawo sa pagdumala sinang mga bahin sang duta nga nabawi namon ang pagpanag-iya; gani nangin kinahanglanon nga maghulat kami, agud makabaton kami sing dugang nga puwersa halin sa duta sang Zarahemla kag bag-o man nga mga panigana.

4 Kag natabo ini nga nagpadala ako sing isa ka emisaryo sa gobernador sang amon duta agud mapahibalo sa iya ang parte sa kahimtangan sang amon katawhan. Kag natabo ini nga naghulat kami nga magbaton sang mga panigana kag kusog halin sa duta sang Zarahemla.

5 Apang tan-awa, diutay lang ang nangin kapuslanan sini sa amon; kay ang mga Lamanhon nagabaton man sang dalagko nga kusog adlaw-adlaw, kag madamo man nga panigana; kag gani amo ini ang amon kahimtangan sa sini nga tion.

6 Kag ang mga Lamanhon nagasalakay sing hinali batok sa amon sa nagkalain-lain nga tion, nga nagagamit sang taktika agud laglagon kami; apang indi kami makasalakay sa ila tungod sang ila mga kuta kag sang ila mga pamakod.

7 Kag natabo ini nga naghulat kami sa sining mabudlay nga mga sirkumstansya sa sulod sang madamo nga binulan, bisan tubtob nga halos magkalamatay na kami tungod sang kakulang sang pagkaon.

8 Apang natabo ini nga nakabaton kami sing pagkaon, nga ginguwardiyahan padulong sa amon sing kasoldadohan sang duha ka libo ka tinawo nga nagbulig sa amon; kag amo lamang ini ang bulig nga amon nabaton, agud pangapinan ang amon kaugalingon kag ang amon pungsod halin sa pagkahulog sa mga kamot sang amon mga kaaway, huo, agud magpakig-away batok sa kaaway nga indi maisip.

9 Kag karon ang kabangdanan sining amon mga kabudlayan, ukon ang kabangdanan kon ngaa wala sila nagpadala sing dugang nga puwersa sa amon, wala kami makahibalo; gani nagkasubo kami kag napuno man sang kahadlok, nga basi kon ano nga paagi ang mga paghukom sang Dios magtupa sa amon duta, nga magresulta sa amon pagkatumba kag lubos nga kalaglagan.

10 Gani ginbubo namon ang amon mga kalag sa pagpangamuyo sa Dios, nga pabakuron niya kami kag luwason kami halin sa mga kamot sang amon mga kaaway, huo, kag hatagan man kami sing kusog agud padayon nga mangin amon ang amon mga siyudad, kag ang amon mga kadutaan, kag ang amon mga ginapanag-iyahan, para sa suporta sang amon katawhan.

11 Huo, kag natabo ini nga ang Ginuo nga amon Dios nagbisita sa amon upod ang mga pagpasalig nga luwason niya kami; huo, sa bagay nga naghambal sia sing paghidaet sa amon mga kalag, kag naghatag sa amon sing dako nga pagtuo, kag nagpahanabo sa amon nga maglaum kami para sa amon kaluwasan sa iya.

12 Kag nagpakaisog kami upod ang amon diutay nga puwersa nga amon nabaton, kag determinado gid nga daugon ang amon mga kaaway, kag padayon nga huptan ang amon mga kadutaan, kag ang amon mga ginapanag-iyahan, kag ang amon mga asawa, kag ang amon mga anak, kag ang kawsa sang amon kahilwayan.

13 Kag gani nagsulong kami sa amon bug-os nga kusog batok sa mga Lamanhon nga yara sa siyudad sang Manti; kag nagpatindog kami sang amon mga tolda sa kilid sang kamingawan nga malapit sa siyudad.

14 Kag natabo ini nga pagkaaga, nga sang nakita sang mga Lamanhon nga yara kami sa mga dulonan sa tupad sang kamingawan nga malapit sa siyudad, nga nagpadala sila sang ila mga espiya sa palibot namon agud nga mahibal-an nila ang kadamuon kag ang kusog sang amon kasoldadohan.

15 Kag natabo ini nga sang nakita nila nga indi kami mabakod, suno sa amon kadamuon, kag nagakahadlok nga mautod namon ang ila suporta luwas lang kon magpakig-away sila batok sa amon kag pamatyon kami, kag nagahunahuna man nga madali lang nila kami nga malaglag paagi sa ila madamo nga kasoldadohan, gani nagsugod sila sa paghimo sang mga pagpanghanda agud magsalakay batok sa amon.

16 Kag sang nakita namon nga nagahimo sila sang mga pagpanghanda agud magsalakay batok sa amon, tan-awa, nagsugo ako nga si Gid, upod ang pila lang ka tinawo, magpanago sa kamingawan, kag amo man nga si Teomner kag pila lang ka tinawo magpanago man sa kamingawan.

17 Karon si Gid kag ang iya mga tinawo yara sa tuo kag ang iban yara sa wala; kag sang nakapanago na sila, tan-awa, nagpabilin ako, upod sa nabilin sang akon kasoldadohan, sa sinang amo man nga lugar nga sa diin kami una nga nagpatindog sang amon mga tolda tubtob sa tion nga magsalakay ang mga Lamanhon agud magpakig-away.

18 Kag natabo ini nga ang mga Lamanhon nagsalakay upod ang ila tuman kadamo nga kasoldadohan batok sa amon. Kag sang nagapalapit na sila kag nagahana na sa pagsalakay sa amon paagi sa espada, nagsugo ako nga ang akon mga tinawo, yadtong mga kaupod nakon, mag-isol padulong sa kamingawan.

19 Kag natabo ini nga ginsunod kami sang mga Lamanhon sing tuman kadasig, kay luyag gid nila nga malab-ot kami agud pamatyon nila kami; gani ginsunod nila kami sa kamingawan; kag naglabay kami sa tunga nanday Gid kag Teomner, sa bagay nga wala sila matukibi sang mga Lamanhon.

20 Kag natabo ini nga sang nakalabay na ang mga Lamanhon, ukon sang nakalabay ang kasoldadohan, nagguluwa sanday Gid kag Teomner halin sa ila sekreto nga mga lugar, kag ginbalabagan ang mga espiya sang mga Lamanhon agud indi sila makabalik sa siyudad.

21 Kag natabo ini nga sang nabalabagan na nila sila, nagdalagan sila padulong sa siyudad kag ginsalakay ang mga bantay nga nabilin sa pagbantay sa siyudad, sa bagay nga ginpamatay nila sila kag gin-agaw ang siyudad.

22 Karon nahimo ini tungod gintugotan sang mga Lamanhon ang ila bug-os nga kasoldadohan, luwas sa pila ka mga bantay lamang, nga madala palayo sa kamingawan.

23 Kag natabo ini nga paagi sa amo nga pahito naangkon nanday Gid kag Teomner ang ila mga kuta. Kag natabo ini nga nagpadayon kami sa amon padulongan pagkatapos nga nakapanglakaton sing malawig sa kamingawan padulong sa duta sang Zarahemla.

24 Kag sang nakita sang mga Lamanhon nga nagalakat sila padulong sa duta sang Zarahemla, nahadlok sila sing tuman, kay basi may plano nga ginhimo nga dal-on sila sa kalaglagan; gani nagsugod sila sa pag-isol liwat sa kamingawan, huo, bisan pabalik sa amo man nga alagyan nga ila ginhalinan.

25 Kag tan-awa, gab-i sadto kag nagpatindog sila sang ila mga tolda, kay ang puno nga mga kapitan sang mga Lamanhon naghunahuna nga ang mga Nefinhon kinapoy tungod sang ila paglakat; kag nagahunahuna nga napanabog nila ang bug-os nga kasoldadohan gani wala sila naghunahuna parte sa siyudad sang Manti.

26 Karon natabo ini nga pagkagab-i, ginsugo ko ang akon mga tinawo nga indi magtulog kundi nga maglakat sila sa lain nga alagyan padulong sa duta sang Manti.

27 Kag tungod sining amon paglakat sa kagab-ihon, tan-awa, pagkaaga didto na kami sa unahan sang mga Lamanhon, sa bagay nga naunahan namon sila sa pag-abot sa siyudad sang Manti.

28 Kag gani natabo ini nga paagi sa sini nga taktika naagaw namon ang siyudad sang Manti nga wala sing pagpaagay sang dugo.

29 Kag natabo ini nga sang nag-abot ang mga kasoldadohan sang mga Lamanhon malapit sa siyudad, kag nakita nga nakahanda kami sa pag-atubang sa ila, natingala sila sing tuman kag nagbatyag sing dako nga kahadlok, sa bagay nga nagpinalagyo sila padulong sa kamingawan.

30 Huo, kag natabo ini nga ang mga kasoldadohan sang mga Lamanhon nagpinalagyo sa tanan nga bahin sini nga duta. Apang tan-awa, nagdala sila sang madamo nga babayi kag kabataan pagwa sa duta.

31 Kag yadtong mga siyudad nga nakuha sadto sang mga Lamanhon, ang tanan sang mga ini yara na sa amon pagpanag-iya subong; kag ang amon mga amay kag ang amon mga babayi kag ang amon mga anak nagabalalik sa ila mga puluy-an, ang tanan luwas sadtong mga ginpangdakop nga mga bihag kag ginpangdala sang mga Lamanhon.

32 Apang tan-awa, diutay ang amon mga kasoldadohan agud magdumala sang madamo kaayo nga siyudad kag dalagko kaayo nga mga pagkabutang.

33 Apang tan-awa, nagasalig kami sa amon Dios nga naghatag sa amon sing kadalag-an sa sinang mga kadutaan, sa bagay nga naangkon namon inang mga siyudad kag inang mga kadutaan, nga amon mismo.

34 Karon wala kami nakahibalo sang kabangdanan nga ang gobyerno wala nagahatag sa amon sing dugang nga puwersa; kag wala man yadtong mga tinawo nga nagbuylog sa amon nakahibalo kon ngaa wala kami nakabaton sing mas dako nga puwersa.

35 Tan-awa, wala kami nakahibalo pero basi wala kamo magmadinalag-on, kag ginpangdala ninyo ang mga puwersa sa sina nga bahin sang duta; kon amo, indi namon luyag nga magkumod.

36 Kag kon indi man amo sini, tan-awa, nagakahadlok kami nga may pila ka pagbinahinbahin sa gobyerno, sa bagay nga wala sila nagapadala sing dugang nga mga tinawo agud buligan kami; kay nahibal-an namon nga mas madamo sila sangsa sinang ila ginpadala.

37 Apang, tan-awa, indi ini importante—nagasalig kami nga ang Dios magaluwas sa amon, sa pihak sang kahuyang sang amon mga kasoldadohan, huo, kag magaluwas sa amon halin sa mga kamot sang amon mga kaaway.

38 Tan-awa, ini ang ika-beynte nuebe nga tuig, sa hingapusan nga bahin, kag ginapanag-iyahan na namon ang amon mga kadutaan; kag ang mga Lamanhon nagpinalagyo padulong sa duta sang Nefi.

39 Kag ang mga anak nga lalaki sang katawhan ni Amon, nga akon lubos nga ginadayaw, kaupod nakon sa siyudad sang Manti; kag ginasakdag sila sang Ginuo, huo, kag ginaamligan sila halin sa pagkalaglag sa espada, sa bagay nga bisan isa sa ila wala gid sing napatay.

40 Apang tan-awa, nakaagom sila sang madamo nga pilas; apang nagtindog sila sing malig-on sa sinang kahilwayan nga sa diin ginhimo sila sang Dios nga hilway; kag mahinalungon sila sa pagdumdum sang Ginuo nga ila Dios adlaw-adlaw; huo, nagatinguha sila sa pagtuman sang iya mga pagsulundan, kag sang iya mga paghukom, kag sang iya mga kasugoan sing dalayon; kag ang ila pagtuo mabakod sa mga propesiya parte sinang magaabot.

41 Kag karon, pinalangga kong utod nga Moroni, kabay nga ang Ginuo nga aton Dios, nga nagtubos sa aton kag naghimo sa aton nga hilway, magaamlig sa imo sing dalayon sa iya presensya; huo, kag kabay nga pasulabihon niya ining katawhan, bisan nga makaangkon kamo sing kadalag-an sa pagpanag-iya sang tanan nga ginpang-agaw sang mga Lamanhon sa aton, nga para sa aton suporta. Kag karon, tan-awa, ginatapos ko ang akon sulat. Ako si Helaman, ang anak ni Alma.