1 Karon sang magbinulagay sanday Amon kag ang iya mga kauturan sa mga dulonan sang duta sang mga Lamanhon, tan-awa si Aaron nagsugod sang iya pagpanglakaton padulong sa duta nga ginatawag sang mga Lamanhon nga Jerusalem, nga ginatawag ini sunod sa duta nga natawhan sang ila mga amay; kag didto ini sa malayo nga nagasugpon sa mga dulonan sang Mormon.

2 Karon ang mga Lamanhon kag ang mga Amaleknon kag ang katawhan ni Amulon nagtukod sing isa ka dako nga siyudad nga ginatawag nga Jerusalem.

3 Karon ang mga Lamanhon sa ila mismo mga kaugalingon tuman na katig-a, apang ang mga Amaleknon kag ang mga Amulonhon labi pa gid nga matig-a; gani ginpatig-a nila ang mga Lamanhon sang ila mga tagipusuon, nga magdugang sila sa kalainan kag sa ila mga kangil-aran.

4 Kag natabo ini nga si Aaron nag-abot sa siyudad sang Jerusalem, kag nagsugod sa pagwali sa mga Amaleknon. Kag nagsugod sia sa pagwali sa ila sa ila mga sinagoga, kay nagpatindog sila sang mga sinagoga suno sa paagi sang mga Nehor; kay madamo sa mga Amaleknon kag sa mga Amulonhon ang nagasunod sa paagi sang mga Nehor.

5 Gani, sang nagsulod si Aaron sa isa sang ila mga sinagoga agud magwali sa katawhan, kag sang nagahambal sia sa ila, tan-awa may nagtindog nga isa ka Amaleknon kag nagsugod sa pagpakigbais sa iya nga nagasiling: Ano ining imo ginapamatuod? Nakakita ka bala sang anghel? Ngaa wala nagapakita ang mga anghel sa amon? Tan-awa indi bala ining katawhan pareho kaayo sa imo katawhan?

6 Nagsiling ka man, luwas lang nga maghinulsol kami madula kami. Paano mo nahibal-an ang mga panghunahuna kag tinutuyo sang amon mga tagipusuon? Paano mo nahibal-an nga may kabangdanan kami sa paghinulsol? Paano mo nahibal-an nga indi kami matarong nga katawhan? Tan-awa, nagpatindog kami sang mga santuaryo, kag nagatipon kami sang amon mga kaugalingon agud magsimba sa Dios. Nagapati kami nga ang Dios magaluwas sang tanan nga tawo.

7 Karon si Aaron nagsiling sa iya: Nagapati ka bala nga ang Anak sang Dios magakari agud tuboson ang katawhan halin sa ila mga sala?

8 Kag ang lalaki nagsiling sa iya: Wala kami nagapati nga nahibal-an mo ang pareho sina nga butang. Wala kami nagapati sa sining binuang nga mga tradisyon. Wala kami nagapati nga nahibal-an mo ang mga butang nga magaabot, kag wala man kami nagapati nga ang imo mga amay kag amo man nga ang amon mga amay nakahibalo parte sa mga butang nga ila ginpanghambal, parte sinang magaabot.

9 Karon si Aaron nagsugod sa pagbukas sang balaan nga mga kasulatan sa ila parte sa pagkari ni Cristo, kag parte man sa pagkabanhaw sang mga minatay, kag nga mangin wala sing pagtubos para sa katawhan luwas lang nga ini paagi sa kamatayon kag mga pag-antos ni Cristo, kag sa pagbayad-sala paagi sa iya dugo.

10 Kag natabo ini, sang nagsugod sia sa pagpaathag sining mga butang sa ila naakig sila sa iya, kag nagsugod sa pagyaguta sa iya; kag indi sila mamati sa mga pulong nga iya ginpanghambal.

11 Gani, sang nakita niya nga indi sila mamati sa iya mga pulong, naggwa sia sa ila sinagoga, kag nagkadto sa isa ka baryo nga ginatawag nga Ani-Anti, kag didto nasalapoan niya si Muloki nga nagawali sang pulong sa ila; kag amo man si Ama kag ang iya mga kauturan. Kag nakigbais sila sa madamo parte sa pulong.

12 Kag natabo ini nga nakita nila nga ang katawhan magapatig-a sang ila mga tagipusuon, gani naghalin sila kag nagkadto sa duta sang Midoni. Kag nagwali sila sang pulong sa madamo, kag diutay ang nagpati sa mga pulong nga ila ginpanudlo.

13 Apang, si Aaron kag pila sang iya mga kauturan ginpangdakop kag ginhunong sa bilanggoan, kag ang nabilin sa ila nagpinalagyo halin sa duta sang Midoni padulong sa mga rehiyon sa palibot.

14 Kag yadtong mga ginpanghunong sa bilanggoan nag-antos sang madamo nga butang, kag ginhilway sila sang kamot nanday Lamoni kag Amon, kag ginpakaon sila kag ginpabayoan.

15 Kag naglakat sila liwat agud ipahayag ang pulong, kag gani ginhilway sila sa una nga tion halin sa bilanggoan; kag gani nag-antos sila.

16 Kag naglakat sila bisan diin man sila gintuytuyan sang Espiritu sang Ginuo, nga nagawali sang pulong sang Dios sa tagsa ka sinagoga sang mga Amaleknon, ukon sa tagsa ka pagtililipon sang mga Lamanhon kon diin sila mahimo nga batonon.

17 Kag natabo ini nga ang Ginuo nagsugod sa pagpakamaayo sa ila, sa bagay nga nadala nila ang madamo sa ihibalo parte sa kamatuoran; huo, napapati nila ang madamo parte sa ila mga sala, kag sa mga tradisyon sang ila mga amay nga indi husto.

18 Kag natabo ini nga sanday Amon kag Lamoni nagbalik halin sa duta sang Midoni padulong sa duta sang Ismael, nga amo ang duta nga ila palanublion.

19 Kag si haring Lamoni indi magtugot nga si Amon mag-alagad sa iya, ukon mangin iya alagad.

20 Kundi nagsugo sia nga magpatindog sang mga sinagoga sa duta sang Ismael; kag nagsugo sia nga ang iya katawhan, ukon ang katawhan nga yara sa idalom sang iya pagginahum, magtililipon sang ila mga kaugalingon.

21 Kag nagkasadya sia tungod sa ila, kag gintudloan niya sila sang madamo nga butang. Kag nagpahayag man sia sa ila nga isa sila ka katawhan nga yara sa idalom niya, kag isa sila ka hilway nga katawhan, nga hilway sila halin sa mga pagpamigos sang hari, sang iya amay; kay ang iya amay nagtugot sa iya nga maggahum sia sa katawhan nga yara sa duta sang Ismael, kag sa bug-os nga kadutaan sa palibot.

22 Kag nagpahayag man sia sa ila nga may kahilwayan sila sa pagsimba sa Ginuo nga ila Dios suno sa ila mga kagustohan, sa bisan diin man sila nga lugar, kon yara ini sa duta nga yara sa idalom sang pagginahum ni haring Lamoni.

23 Kag si Amon nagwali sa katawhan ni haring Lamoni; kag natabo ini nga gintudloan niya sila sang tanan nga butang parte sa mga butang nga angot sa pagkamatarong. Kag ginlaygayan niya sila adlaw-adlaw, sa bug-os nga katutum; kag namati sila sa iya mga pulong, kag nangin matutum gid sila sa pagtuman sang mga kasugoan sang Dios.