1 Kag natabo ini nga pagkatapos sang duha ka adlaw kag duha ka gab-i buot na kuntani nila nga dal-on ang iya lawas kag ihamyang sa isa ka pantyon nga ila ginhimo para sa katuyoan sang paglubong sang ila mga minatay.

2 Karon ang reyna nga nakabati sang kabantugan ni Amon, gani nagpadala sia sang mga mensahero kay Amon kag nagpangabay nga magkadto sia sa iya.

3 Kag natabo ini nga ginhimo ni Amon ang suno sa ginsugo sa iya, kag ginkadtoan ang reyna, kag namangkot agud mahibal-an kon ano ang luyag niya nga iya himuon.

4 Kag nagsiling sia sa iya: Ang mga alagad sang akon bana nagpahibalo sa akon nga isa ikaw ka propeta sing isa ka balaan nga Dios, kag may gahum ka sa paghimo sing madamo nga gamhanan nga mga buhat sa iya ngalan;

5 Gani, kon amo sina, luyag ko nga kadtoan mo kag tan-awon ang akon bana, kay nagahigda sia sa iya hiligdaan sa sulod sang duha ka adlaw kag duha ka gab-i; kag may pila nga nagasiling nga indi sia patay, apang may iban nga nagasiling nga patay na sia kag nagapanimaho na sia, kag dapat sia nga ibutang sa pantyon; apang para sa akon, wala sia nagapanimaho.

6 Karon, amo ini ang luyag ni Amon, kay nahibal-an niya nga si haring Lamoni yara sa idalom sang gahum sang Dios; kay nahibal-an niya nga ang madulom nga belo sang pagkawala’y pagtuo ginawahig halin sa iya kaisipan, kag ang kasanag nga nag-iwag sa iya kaisipan, nga amo ang kasanag sang himaya sang Dios, nga isa ka dalayawon nga kasanag sang iya kaayo—huo, ini nga kasanag nagdala sing tuman nga kalipay sa iya kalag, nga ang panganod sang kadudulman nadula, kag ang kasanag sang kabuhi nga wala’y katubtuban napasiga sa iya kalag, huo, nahibal-an niya nga nadaug sini ang iya pisikal nga lawas, kag gindala sia sa Dios—

7 Gani, ang ginpangayo sa iya sang reyna amo lamang ang iya luyag. Gani nagkadto sia agud makita ang hari suno sa ginpangayo sang reyna sa iya; kag nakita niya ang hari, kag nahibal-an niya nga indi sia patay.

8 Kag nagsiling sia sa reyna: Indi sia patay, kundi nagakatulog sia sa Dios, kag sa buwas magabangon sia liwat; gani indi sia pag-ilubong.

9 Kag si Amon nagsiling sa iya: Nagapati ka bala sini? Kag nagsiling sia sa iya: Wala ako sing saksi luwas sa imo pulong, kag sa pulong sang amon mga alagad; apang nagapati ako nga mangin amo ini suno sa imo ginsiling.

10 Kag si Amon nagsiling sa iya: Bulahan ka tungod sang imo tuman nga pagtuo; ginasiling ko sa imo, babayi, wala sing pareho sina kadako nga pagtuo sa tanan nga katawhan sang mga Nefinhon.

11 Kag natabo ini nga nagbantay sia sa hiligdaan sang iya bana halin sa sina nga tion bisan tubtob sa pagkadason nga adlaw nga gintalana ni Amon nga magabangon sia.

12 Kag natabo ini nga nagbangon sia suno sa mga pulong ni Amon; kag samtang nagabangon sia, gin-untay niya ang iya kamot sa babayi, kag nagsiling: Bulahan ang ngalan sang Dios, kag bulahan ka.

13 Kay pareho nga nagakabuhi ka, tan-awa, nakita ko ang akon Manunubos; kag magakari sia, kag ibun-ag sing isa ka babayi, kag pagatuboson niya ang tanan nga tawo nga nagapati sa iya ngalan. Karon, sang nasiling niya ining mga pulong, napuno ang iya tagipusuon, kag natumba sia liwat sa kalipay; kag ang reyna natumba man nga gindaug sang Espiritu.

14 Karon si Amon nga nakita nga ang Espiritu sang Ginuo ginbubo suno sa iya mga pangamuyo sa mga Lamanhon nga iya mga kauturan, nga amo ang nangin kabangdanan sing tuman nga pagpangalisud sang mga Nefinhon, ukon sang tanan nga katawhan sang Dios tungod sang ila mga kalainan kag sang ila mga tradisyon, nagluhod sia, kag nagsugod sa pagbubo sang iya kalag sa pangamuyo kag pagpasalamat sa Dios tungod sang iya ginhimo para sa iya mga kauturan; kag gindaug man sia sang kalipay; kag tungod sini sila tanan nga tatlo nagkalatumba sa duta.

15 Karon, sang nakita sang mga alagad sang hari nga nagkalatumba sila, nagsugod man sila sa pagpakitluoy sa Dios, kay ang kahadlok sa Ginuo nag-abot man sa ila, kay amo ini sila nga nagtindog sa atubang sang hari kag nagpamatuod sa iya parte sa dako nga gahum ni Amon.

16 Kag natabo ini nga nagpanawag sila sa ngalan sang Ginuo, sa ila kusog, bisan tubtob nga nagkalatumba sila sa duta, luwas sa isa sang mga Lamanhon nga babayi, nga ang ngalan amo si Abis, sia nga nahaylo sa Ginuo sa sulod sing madamo na nga tinuig, tungod sing isa ka talalupangdon nga panan-awon sang iya amay—

17 Gani, kay nahaylo sa Ginuo, kag wala gid ini pag-ipahibalo, sa amo nga rason, sang nakita niya nga ang tanan nga alagad ni Lamoni nagkalatumba sa duta, kag amo man ang iya ama, ang reyna, kag ang hari, kag si Amon nga nagahapa sa duta, nahibal-an niya nga gahum ini sang Dios; kag sa pagpati nga ini nga oportunidad, paagi sa pagpahibalo sa katawhan sang kon ano ang nagkalatabo sa ila, nga paagi sa pagtan-aw sining hitabo mangin rason ini agud magpati sila sa gahum sang Dios, gani nagdalagan sia sa tagsa ka balay, nga ginapahibalo ini sa katawhan.

18 Kag nagsugod sila sa pagtipon sang ila mga kaugalingon sa balay sang hari. Kag may nag-abot nga kadam-an, kag sa ila kakibot, nakita nila ang hari, kag ang reyna, kag ang ila mga alagad nga nagahapa sa duta, kag nagahigda sila didto nga daw mga patay sila; kag nakita man nila si Amon, kag tan-awa, isa sia ka Nefinhon.

19 Kag karon ang katawhan nagsugod sa pagkinumod sa ila mga kaugalingon; may pila nga nagasiling nga isa ka dako nga kalainan ang natabo sa ila, ukon sa hari kag sa iya panimalay, tungod gintugotan niya nga ang Nefinhon magpabilin sa duta.

20 Apang ginsaway sila sing iban nga nagasiling: Ang hari ang nagdala sining kalainan sa iya panimalay tungod ginpamatay niya ang iya mga alagad nga ang ila mga panong ginpalapta sa mga tubig sang Sebus.

21 Kag ginsaway man sila sang mga lalaki nga nagtilindog sa mga tubig sang Sebus kag nagpalapta sang mga panong nga iya sang hari, kay naakig sila kay Amon tungod sang kadamuon sang iya ginpamatay sa ila mga kauturan sa mga tubig sang Sebus samtang nagapangapin sang mga panong sang hari.

22 Karon, ang isa sa ila, nga ang utod nga lalaki ginpatay sang espada ni Amon, nga naakig sing tuman kay Amon, naggabot sang iya espada kag nagpalapit agud nga iya ini ipatupa kay Amon, agud patyon sia; kag samtang ginaalsa niya ang espada agud labuon sia, tan-awa, natumba sia nga patay.

23 Karon makita naton nga si Amon indi mahimo patyon kay ang Ginuo nagsiling kay Mosias nga iya amay: Amligan ko sia, kag mangin sa iya ang suno sa imo pagtuo—gani, gintugyan sia ni Mosias sa Ginuo.

24 Kag natabo ini nga sang nakita sang kadam-an nga natumba nga patay ang lalaki nga nag-alsa sang espada agud patyon si Amon, ang kahadlok nag-abot sa ila tanan, kag wala sila nangisog nga iuntay ang ila mga kamot agud tandugon sia ukon sa bisan sin-o sadtong nagkalatumba; kag nagsugod sila sa pagkatingala liwat sa ila mga kaugalingon kon ano ang kabangdanan sining dako nga gahum, ukon ano ang buot silingon sining tanan nga butang.

25 Kag natabo ini nga madamo sa ila ang nagsiling nga si Amon amo ang Dakong Espiritu, kag ang iban nagsiling nga ginpadala sia sang Dakong Espiritu;

26 Apang ginsaway sila tanan sang iban, nga nagasiling nga isa sia ka halimaw, nga ginpadala halin sa mga Nefinhon agud paantoson sila.

27 Kag may pila nga nagsiling nga si Amon ginpadala sang Dakong Espiritu agud sakiton sila tungod sang ila mga kalainan; kag ang Dakong Espiritu amo ang nangin dalayon nga nagabantay sa mga Nefinhon, nga amo na sadto pa ang nagluwas sa ila halin sa ila mga kamot; kag nagsiling sila nga amo ini nga Dakong Espiritu ang naglaglag sang madamo kaayo sang ila mga kauturan, ang mga Lamanhon.

28 Kag gani ang pagbinaisay nangin tuman kainit sa tunga nila. Kag samtang yara sila sa amo nga pagbinaisay, nag-abot ang babayi nga alagad nga nagpatipon sang kadam-an, kag sang nakita niya ang pagbinaisay nga yara sa tunga sang kadam-an nangin tuman sia kamasinulub-on, bisan tubtob nga nakahibi.

29 Kag natabo ini nga ginpalapitan niya kag ginkaptan ang reyna sa kamot, agud nga basi pa lang mapabangon niya sia halin sa duta; kag sa gilayon nga natandog niya ang iya kamot nagbangon sia kag nagtindog sa iya mga tiil, kag nagsinggit sa isa ka mabaskog nga tingug nga nagasiling: O bulahan nga Jesus, nga nagluwas sa akon halin sa makahaladlok nga impiyerno! O bulahan nga Dios, maluoy ka sa sining katawhan!

30 Kag sang nasiling niya ini, gintakop niya ang iya mga kamot, nga napuno sang kalipay, nga nagahambal sing madamo nga pulong nga indi mahangpan; kag sang nahimo niya ini, ginkaptan niya ang hari, si Lamoni, sa kamot, kag tan-awa nagbangon sia kag nagtindog sa iya mga tiil.

31 Kag sia, sa gilayon, nga nakita ang pagbinaisay sang iya katawhan, naggwa kag nagsugod sa pagsaway sa ila, kag sa pagtudlo sa ila sang mga pulong nga iya nabatian halin sa baba ni Amon; kag madamo nga nakabati sang iya mga pulong ang nagpati, kag nahaylo sa Ginuo.

32 Apang may madamo sa ila nga indi mamati sa iya mga pulong; gani naglakat sila sa ila mga dalanon.

33 Kag natabo ini nga sang nagbangon si Amon ginbuligan man niya sila, kag amo man ang ginhimo sang tanan nga alagad ni Lamoni; kag sila tanan nagpahayag sa katawhan sang amo man nga butang—nga ang ila mga tagipusuon nagbag-o; nga indi na sila luyag pa nga maghimo sang malain.

34 Kag tan-awa, madamo ang nagpahayag sa katawhan nga nakakita sila sang mga anghel kag nakapakighambal sa ila; kag gani ginsugiran nila sila sang mga butang parte sa Dios, kag parte sa iya pagkamatarong.

35 Kag natabo ini nga may madamo nga nagpati sa ila mga pulong; kag ang tanan nga nagpati ginbunyagan; kag nangin isa sila ka matarong nga katawhan, kag nagpahamtang sila sing isa ka simbahan sa ila.

36 Kag gani ang buluhaton sang Ginuo nagsugod sa mga Lamanhon; gani ang Ginuo nagsugod sa pagbubo sang iya Espiritu sa ila; kag makita naton nga ang iya butkon ginauntay sa tanan nga katawhan nga magahinulsol kag magapati sa iya ngalan.