1 Tan-awa, karon natabo ini nga ang katawhan ni Nefi nagkalipay sing tuman, tungod ginluwas sila liwat sang Ginuo halin sa mga kamot sang ila mga kaaway; gani naghatag sila sing pagpasalamat sa Ginuo nga ila Dios; huo, kag nagpuasa sila sing tuman kag nagpangamuyo sing tuman, kag nagsimba sila sa Dios sing may tuman kadako nga kalipay.

2 Kag natabo ini, sa ika-disenuebe nga tuig sang pagginahum sang mga hukom sa katawhan ni Nefi, nga si Alma nagkadto sa iya anak nga si Helaman kag nagsiling sa iya: Nagapati ka bala sa mga pulong nga akon ginhambal sa imo parte sadtong mga kasulatan nga ginatipigan?

3 Kag si Helaman nagsiling sa iya: Huo, nagapati ako.

4 Kag si Alma nagsiling liwat: Nagapati ka bala kay Jesucristo, nga magaabot?

5 Kag nagsiling sia: Huo, nagapati ako sa tanan nga pulong nga imo ginhambal.

6 Kag si Alma nagsiling sa iya liwat: Tumanon mo bala ang akon mga kasugoan?

7 Kag nagsiling sia: Huo, tumanon ko ang imo mga kasugoan sa bug-os ko nga tagipusuon.

8 Dayon si Alma nagsiling sa iya: Bulahan ikaw; kag pauswagon ka sang Ginuo sa sini nga duta.

9 Apang tan-awa, may pila ka butang nga ipropesiya ko sa imo; apang kon ano ang ipropesiya ko sa imo indi mo pag-ipahibalo; huo, kon ano ang ipropesiya ko sa imo indi pag-ipahibalo, bisan tubtob nga ang propesiya matuman, gani isulat ang mga pulong nga akon isiling.

10 Kag amo ini ang mga pulong: Tan-awa, nakita ko nga ini mismo nga katawhan, ang mga Nefinhon, suno sa espiritu sang rebelasyon nga yari sa akon, pagkatapos sang apat ka gatos ka tuig halin sa tion nga si Jesucristo magapakita sang iya kaugalingon sa ila, magausmod sa pagkawala’y pagtuo.

11 Huo, kag dayon maagyan nila ang mga giyera kag mga peste, huo, mga tiggulutom kag pagpaagay sang dugo, bisan tubtob nga ang katawhan ni Nefi maubos kalamatay—

12 Huo, kag ini tungod kay magausmod sila sa pagkawala’y pagtuo kag mahulog sa mga buluhaton sang kadudulman, kag imoralidad, kag tanan nga sari sang mga kalainan; huo, ginasiling ko sa imo, nga tungod magapakasala sila batok sa tuman ka dako nga kasanag kag ihibalo, huo, ginasiling ko sa imo, nga sumugod sa sina nga adlaw, bisan ang ika-apat nga henerasyon indi tanan mapatay antes ining dako nga kalainan magaabot.

13 Kag kon inang dako nga adlaw mag-abot, tan-awa, ang tion malapit na mag-abot nga inang mga sa subong, ukon ang kaliwatan sinang mga naisip subong sa katawhan ni Nefi, indi na maisip sa katawhan ni Nefi.

14 Apang kon sin-o man ang mabilin, kag indi malaglag sa sinang dako kag makahaladlok nga adlaw, pagaisipon upod sa mga Lamanhon, kag mangin pareho sa ila, ang tanan-tanan, luwas sa pila nga pagatawgon nga mga disipulo sang Ginuo; kag sila pagalagson sang mga Lamanhon bisan tubtob nga sila maubos kalamatay. Kag karon, tungod sang kalainan, ining propesiya matuman.

15 Kag karon natabo ini nga pagkatapos nga nasiling ni Alma ining mga butang kay Helaman, ginpakamaayo niya sia, kag amo man ang iya iban pa nga mga anak nga lalaki; kag ginpakamaayo man niya ang duta para sa kaayohan sang mga matarong.

16 Kag nagsiling sia: Ini ang siling sang Ginuong Dios—Pagasumpaon ang duta, huo, ini nga duta, padulong sa kalaglagan, para sa tagsa ka nasyon, kaliwat, lengguahe, kag katawhan nga nagahimo sing kalainan, kon sila lubos na nga luto; kag pareho sang akon nasiling, matabo ini; kay amo ini ang pagsumpa kag ang pagpakamaayo sang Dios sa duta, kay ang Ginuo indi makatulok sa sala nga may bisan pinakadiutay nga pagtugot.

17 Kag karon, sang nasiling ni Alma ining mga pulong ginpakamaayo niya ang simbahan, huo, ang tanan nga magapabilin nga malig-on sa pagtuo sumugod sa sina nga tion.

18 Kag sang nahimo ini ni Alma naghalin sia sa duta sang Zarahemla, nga daw makadto sa duta sang Melek. Kag natabo ini nga wala na gid sia mabatii pa; parte sa iya kamatayon ukon paglubong wala kami sing may nahibal-an.

19 Tan-awa, ini amon nahibal-an, nga isa sia ka matarong nga tawo; kag ang hambalanon naglapnag sa simbahan nga gindala sia paibabaw sang Espiritu, ukon ginlubong sang kamot sang Ginuo, bisan pareho kay Moises. Apang tan-awa, ang balaan nga mga kasulatan nagasiling nga gindala sang Ginuo si Moises sa iya kaugalingon; kag nagahunahuna kami nga ginbaton man niya si Alma sa espiritu, sa iya kaugalingon; gani, sa sini nga kabangdanan wala kami sing nahibal-an parte sa iya kamatayon kag paglubong.

20 Kag karon natabo ini, sa pagsugod sang ika-disenuebe nga tuig sang pagginahum sang mga hukom sa katawhan ni Nefi, nga si Helaman naglibot sa katawhan agud ipahayag ang pulong sa ila.

21 Kay tan-awa, tungod sang ila mga giyera batok sa mga Lamanhon kag sang madamo nga tinagdiutay nga mga pag-ilinaway kag mga kinagamo nga natabo sa katawhan, nangin kinahanglanon nga ang pulong sang Dios ipahayag sa ila, huo, kag isa ka pagsulundan ang pagahimuon sa bug-os nga simbahan.

22 Gani, si Helaman kag ang iya mga kauturan nagpadayon agud magpahamtang liwat sang simbahan sa bug-os nga kadutaan, huo, sa tagsa ka siyudad sa bug-os nga kadutaan nga ginapuy-an sang katawhan ni Nefi. Kag natabo ini nga nagpili sila sang mga pari kag mga manunudlo sa bug-os nga kadutaan, sa tanan nga simbahan.

23 Kag karon natabo ini nga pagkatapos nga sanday Helaman kag ang iya mga kauturan nakapili sang mga pari kag mga manunudlo sa mga simbahan nga may nagtuhaw nga pag-ilinaway sa tunga nila, kag indi na sila mamati sa mga pulong ni Helaman kag sang iya mga kauturan;

24 Kundi nga nagbugalon sila, nga naalsa sa ila mga tagipusuon, tungod sang ila tuman kadako nga mga manggad; gani nangin mga manggaranon sila sa ila kaugalingon nga mga mata, kag indi na mamati sa ila mga pulong, nga maglakat sing matarong sa atubang sang Dios.