1 Ut anajwan, at walal, wan k’a’ruhaq li tinye chirix li k’ojob’ank wi’chik li yeeb’il resil; xb’aan naq k’e reetal, wankeb’ li xe’xpo’ xyaalalileb’ li loq’laj hu, ut xe’xsach xb’e chi najt xb’aan li na’leb’ a’in. Ut nink’e reetal naq xikenaq aach’ool chi k’oxlak ajwi’ chirix li na’leb’ a’in. K’e ut reetal, tinch’olob’ xyaalal chawu.

2 Ninye aawe, at walal, naq li k’uub’anb’il na’leb’ re k’ojob’ank wi’chik, aajel ru rik’in xtiikal ru lix na’leb’ li Dios; xb’aan naq aajel ru naq taak’ojob’amanq wi’chik chixjunil li k’a’aq re ru sa’ tz’aqal lix na’aj. K’e reetal, aajel ru ut tiik ru, jo’ chanru xwankilal ut xwaklijik chi yo’yo li Kristo, naq li raam li winq taak’ojob’aaq wi’chik rik’in xxaqalil, ut naq li junjunq xcha’al li tz’ejwalej taak’ojob’aaq wi’chik sa’ xna’aj.

3 Ut aajel ru rik’in xtiikal ru lix na’leb’ li Dios naq eb’ li winq te’raqe’q aatin chirixeb’ jo’ chanru lix k’anjeleb’; ut wi chaab’il chaq lix k’anjeleb’ sa’ li yu’am a’in, ut chaab’il chaq li rajomeb’ lix ch’ool, naq jo’kan ajwi’ eb’ a’an, sa’ roso’jik li kutan, te’k’ojob’aaq wi’chik rik’in li k’a’ru chaab’il.

4 Ut wi ink’a’ us lix k’anjeleb’, taak’ojob’aaq wi’chik reheb’ choq’ maa’usilal. Chi jo’kan, chixjunil li k’a’aq re ru taak’ojob’amanq wi’chik sa’ tz’aqal xna’aj, li junjunq sa’ tz’aqal xxaqalil—li k’a’ru nakam waklesinb’il chi ink’a’ chik nakam, li k’a’ru naq’a chi ink’a’ chik naq’a—waklesinb’il sa’ li junelik sahil ch’oolejil re taareechani li rawa’b’ejihom li Dios, malaj sa’ li rahil ch’oolejil maak’a’ roso’jik re taareechani li rawa’b’ejihom laj tza, li jun chi junpak’al, ut li jun chik chi junpak’al chik—

5 Li jun waklesinb’il sa’ li sahil ch’oolejil, jo’ chanru naq rajom li sahil ch’oolejil, malaj li chaab’il jo’ chanru naq rajom li chaab’il; ut li jun chik sa’ li maa’usilal jo’ chanru naq rajom li maa’usilal; xb’aan naq jo’ chanru naq kiraj xb’aanunkil li maa’usilal chiru chixjunil li kutan, jo’kan ajwi’ tixk’ul maa’usilal choq’ xq’ajkamunkil naq taachalq li q’ojyin.

6 Ut jo’kan naq wan chi junpak’al chik. Wi xjal xk’a’uxl chirix lix maak, ut xraj li tiikilal toj sa’ roso’jikeb’ lix kutan, jo’kan ajwi’ taaq’ajkamuuq choq’ re li tiikilal.

7 A’ineb’ li tojb’ileb’ rix xb’aan li Qaawa’; relik chi yaal, a’ineb’ li isinb’ileb’ chaq, li kolb’ileb’ chiru li q’ojyin a’an maak’a’ roso’jik re aak’ab’; ut chi jo’kan neke’xaqli malaj neke’t’ane’; xb’aan naq k’e reetal, a’aneb’ xraqoleb’ aatin xjuneseb’ rib’, ma te’xb’aanu li us malaj te’xb’aanu li ink’a’ us.

8 Anajwan, ink’a’ naru xjalb’al lix taqlanb’il aatin li Dios; jo’kan naq kawresinb’il li b’e re naq li ani naraj, taaruuq chi b’eek chiru ut taakole’q.

9 Ut anajwan k’e reetal, at walal, maakanab’ aawib’ jun sutaq chik chixq’etb’al li raatin laa Dios chirixeb’ li jar raqal chi tzol’leb’ a’an, li xakanab’ wi’ aawib’ chirix li maakob’k toj anajwan.

10 Maak’oxla, rik’in naq yeeb’il resil li k’ojob’ank wi’chik, naq sa’ li maak tatk’ojob’aaq chaq sa’ li sahil ch’oolejil. K’e reetal, ninye aawe, li maa’usilal maajun wa kiwan choq’ sahil ch’oolejil.

11 Ut anajwan, at walal, chixjunileb’ li winq li wankeb’ jo’ chanru li ruchich’och’, malaj ut tinye, sa’ jun tz’ejwalejil wanjik, wankeb’ sa’ xk’ahil li yot’e’k ut sa’ xb’ak’leb’ li maa’usilal; ut wankeb’ chi maak’a’eb’ xDios sa’ li ruchich’och’, ut xikenaqeb’ chi junpak’al chik rik’in chan ru naq wan li Dios; jo’kan naq lix wanjikeb’ junpak’al chik wan rik’in chan ru naq wan li sahil ch’oolejil.

12 K’e ut reetal anajwan, ma a’in xyaalalil li aatin k’ojob’ank wi’chik, xk’amb’al k’a’ruhaq ut xk’eeb’al b’ar wi’ maak’a’ xna’aj, malaj xk’eeb’al sa’ jun wanjik li junpak’al chik wan rik’in chan ru li ak re?

13 At walal, moko jo’ka’in ta wan; lix yaalalil b’an li aatin k’ojob’ank wi’chik, a’an xk’amb’al wi’chik li maa’usilal choq’ re li maa’usilal, malaj li tz’ejwalejil choq’ re li tz’ejwalejil, malaj ajtzahil choq’ re li ajtzahil—li chaab’il choq’ re li k’a’ru chaab’il, li tiikilal choq’ re li k’a’ru tiik, li tiikil na’leb’ choq’ re li k’a’ru tiik ru; li uxtaan choq’ re li k’a’ru aj uxtaan.

14 Jo’kan ut, at walal, chawil aawib’ re naq aj uxtaanaqat reheb’ laa was aawiitz’in; chatk’anjelaq chi tiik aana’leb’, chatraqoq aatin chi tiik, ut chab’aanu rajlal li chaab’il; ut wi nakab’aanu chixjunil li k’a’aq re ru a’in, rik’in a’an taak’ul aaq’ajkamunkil; relik chi yaal, taak’ojob’aaq wi’chik li uxtaan aawe; taak’ojob’aaq wi’chik li tiik ruhil na’leb’ aawe; taak’ojob’aaq wi’chik aawe jun raqb’a-aatin tiik; ut taaq’ajkamuuq wi’chik aawe li chaab’il.

15 Xb’aan naq li k’a’ru nakataqla taasutq’iiq wi’chik aawe, ut taak’ojob’aaq wi’chik; jo’kan ut, li aatin k’ojob’ank wi’chik q’axal wi’chik naxjit laj maak, ut maamin naxtiikob’resi ru.