Balaan ng mga Kasulatan
Alma 3


Kapitulo 3

Ginmarkahan sang mga Amlicianhon ang ila mga kaugalingon suno sa ginapropesiya nga pulong—Ang mga Lamanhon ginsumpa tungod sang ila pagrebelde—Ang mga tawo mismo ang nagadala sa ila kaugalingon sang mga sumpa—Ginpierde sang mga Nefinhon ang isa pa ka kasoldadohan nga Lamanhon. Mga 87–86 B.C.

1 Kag natabo ini nga ang mga Nefinhon nga wala nagkalamatay sa mga armas sang giyera, pagkatapos nga napanglubong inang mga nagkalamatay—karon ang kadamuon sang nagkalamatay wala naisip tungod sang ila tuman nga kadamuon—pagkatapos nila mapanglubong ang ila mga patay nagbalalik sila tanan sa ila mga duta, kag sa ila mga balay, kag sa ila mga asawa, kag sa ila mga anak.

2 Karon madamo nga babayi kag kabataan ang nagkalamatay paagi sa espada, kag madamo man sang ila mga panong kag sang ila mga baka; kag madamo man sang ila mga kaumhan sang uyas ang nahalitan, kay gintasak ang mga ini sang madamo nga tawo.

3 Kag karon kon ano kadamo ang mga Lamanhon kag mga Amlicianhon nga nagkalamatay sa pangpang sang suba sang Sidon ginpanghaboy sa mga tubig sang Sidon; kag tan-awa ang ila mga tul-an yara sa kaidadalman sang dagat, kag madamo ang mga ini.

4 Kag ang mga Amlicianhon makilal-an nga lain sa mga Nefinhon, kay ginmarkahan nila ang ila mga kaugalingon sing pula sa ila mga agtang suno sa pamaagi sang mga Lamanhon; apang wala nila pagkiskisi ang ila mga ulo pareho sa mga Lamanhon.

5 Karon ang mga ulo sang mga Lamanhon kiniskisan; kag nagauba sila, luwas sa panit sang sapat nga nawagkos palibot sa ila mga balikawang, kag amo man ang ila taming, nga nasul-ob sa ila, kag ila mga pana, kag ila mga baslay, kag ila mga bato, kag ila mga tirador, kag iban pa.

6 Kag maitom ang mga panit sang mga Lamanhon, suno sa marka nga ginbutang sa ila mga amay, nga isa ka sumpa sa ila tungod sang ila kalapasan kag sang ila pagrebelde batok sa ila mga kauturan, nga ginalakipan nanday Nefi, Jacob, kag Jose, kag Sam, nga mga matarong kag balaan nga mga tawo.

7 Kag ang ila mga kauturan nagtinguha sa paglaglag sa ila, gani ginsumpa sila; kag ang Ginuong Dios nagbutang sang marka sa ila, huo, kanday Laman kag Lemuel, kag amo man sa mga anak nga lalaki ni Ismael, kag sa mga babayi nga Ismaelnon.

8 Kag ginhimo ini agud ang ila kaliwatan makilal-an nga lain sa kaliwatan sang ila mga kauturan, agud nga paagi sa sini maamligan sang Ginuong Dios ang iya katawhan, nga indi sila magsimpon kag magpati sa di-husto nga mga tradisyon nga magaresulta sa ila kalaglagan.

9 Kag natabo ini nga kon sin-o man ang magsimpon sang iya kaliwatan sa sinang iya sang mga Lamanhon nagdala sang amo man nga sumpa sa iya kaliwatan.

10 Gani, kon sin-o man ang magatugot sa iya kaugalingon nga madala palayo sang mga Lamanhon gintawag sa idalom sina nga ngalan, kag may marka nga ginbutang sa iya.

11 Kag natabo ini nga kon sin-o man ang indi magpati sa tradisyon sang mga Lamanhon, apang nagapati sa sinang mga kasulatan nga gindala halin sa duta sang Jerusalem, kag amo man sa tradisyon sang ila mga amay, nga husto, nga nagapati sa mga kasugoan sang Dios kag nagatuman sang mga ini, gintawag nga mga Nefinhon, ukon ang katawhan ni Nefi, sumugod sa sina nga tion—

12 Kag amo ini sila ang mga nagtipig sang mga kasulatan nga amo ang matuod parte sa ila katawhan, kag parte man sa katawhan sang mga Lamanhon.

13 Karon magabalik kita liwat sa mga Amlicianhon kay sila man may marka nga ginbutang sa ila; huo, nagbutang sila sang marka sa ila mga kaugalingon, huo, bisan marka nga pula sa ila mga agtang.

14 Gani ang pulong sang Dios natuman, kay amo ini ang mga pulong nga iya ginhambal kay Nefi: Tan-awa, ang mga Lamanhon akon ginsumpa, kag magabutang ako sang marka sa ila agud sila kag ang ila kaliwatan mapain halin sa imo kag sa imo kaliwatan, halin sa sini nga tion padayon tubtob sa wala’y katapusan, luwas lang nga maghinulsol sila sang ila kalainan kag magliso sa akon agud nga maluoy ako sa ila.

15 Kag sa liwat: Magabutang ako sang marka sa iya nga magasimpon sang iya kaliwatan sa imo mga kauturan agud nga pagasumpaon man sila.

16 Kag sa liwat: Magabutang ako sang marka sa iya nga nagapakig-away batok sa imo kag sa imo kaliwatan.

17 Kag sa liwat, ginasiling ko nga sia nga magatalikod sa imo indi na pagtawgon nga imo kaliwatan; kag pagapakamaayohon ko ikaw, kag ang sin-o man nga pagatawgon nga imo kaliwatan, halin sa sini nga tion padayon tubtob sa wala’y katapusan; kag amo ini ang mga promisa sang Ginuo kay Nefi kag sa iya kaliwatan.

18 Karon ang mga Amlicianhon wala nakahibalo nga ginatuman nila ang mga pulong sang Dios sang magsugod sila sa pagmarka sang ila mga kaugalingon sa ila mga agtang; apang hayag sila nga nagrebelde batok sa Dios; gani ginakinahanglan nga ang sumpa magtupa sa ila.

19 Karon luyag ko nga makita ninyo nga sila ang nagdala sa ila mga kaugalingon sang sumpa; kag sa amo man ang tagsa ka tawo nga ginsumpa nagadala sa iya kaugalingon sang pagkondenar mismo sa iya.

20 Karon natabo ini nga indi pa madamo nga inadlaw ang nagligad pagkatapos sang inaway nga gin-away sa duta sang Zarahemla, sang mga Lamanhon kag mga Amlicianhon, nga may isa pa ka kasoldadohan sang mga Lamanhon nga nagsalakay sa katawhan ni Nefi sa amo man nga lugar sa diin ang una nga kasoldadohan nakig-away sa mga Amlicianhon.

21 Kag natabo ini nga may kasoldadohan nga ginpadala agud tabugon sila pagwa sa ila duta.

22 Karon si Alma nga mismo nagaantos tungod sang pilas wala nagsulong sa pagpakig-away sa sini nga tion batok sa mga Lamanhon;

23 Apang nagpadala sia sing madamo nga kasoldadohan batok sa ila; kag nagsulong sila kag ginpamatay ang madamo sa mga Lamanhon, kag ginpanabog ang nagkalabilin sa ila pagwa sa mga dulonan sang ila duta.

24 Kag dayon nagbalik sila liwat kag nagsugod sa pagpaluntad sang paghidaet sa duta nga wala na ginatublag sang ila mga kaaway sa malip-ot nga tion.

25 Karon natabo ining tanan nga butang, huo, ang tanan sining mga giyera kag mga pagbinaisay nasugdan kag natapos sa ika-lima nga tuig sang pagginahum sang mga hukom.

26 Kag sa isa ka tuig linibo kag napulo ka linibo sang mga kalag ang ginpadala sa wala’y katapusan nga kalibutan, agud maani nila ang ila mga padya suno sa ila mga binuhatan, kon bala ang mga ini maayo ukon ang mga ini malain, agud mag-ani sang wala’y katapusan nga kalipayan ukon wala’y katapusan nga kalisud, suno sa espiritu nga ila ginpili nga tumanon, kon bala ini maayo nga espiritu ukon malain.

27 Kay ang tagsa ka tawo nagabaton sang mga bayad halin sa iya nga ginpili niya nga tumanon, kag ini suno sa mga pulong sang espiritu sang propesiya; gani pabay-i nga matabo ini suno sa kamatuoran. Kag gani natapos ang ika-lima nga tuig sang pagginahum sang mga hukom.