Balaan ng mga Kasulatan
Alma 28


Kapitulo 28

Ang mga Lamanhon napierde sa isa ka dako kaayo nga inaway—Napulo ka linibo ang nagkalamatay—Ang mga malain ginatugyan sa isa ka kahimtangan sang nagapadayon nga kasubo; ang mga matarong makaangkon sang di-matapos nga kalipayan. Mga 77–76 B.C.

1 Kag karon natabo ini nga pagkatapos nga ang katawhan ni Amon nakapuyo sa duta sang Jerson, kag isa ka simbahan ang napahamtang man sa duta sang Jerson, kag ang mga kasoldadohan sang mga Nefinhon napahamtang sa palibot sang duta sang Jerson, huo, sa tanan nga dulonan sa palibot sang duta sang Zarahemla; tan-awa ang mga kasoldadohan sang mga Lamanhon nagsunod sa ila mga kauturan padulong sa kamingawan.

2 Kag gani may isa ka dako kaayo nga inaway; huo, bisan isa nga wala pa gid nakita sa tanan nga katawhan sa kadutaan halin sa tion nga si Lehi nagbiya sa Jerusalem; huo, kag napulo ka linibo sang mga Lamanhon ang nagkalamatay kag naglinapta sa iban nga lugar.

3 Huo, may nangin dako nga pagpamatay sa katawhan ni Nefi; apang, ang mga Lamanhon napanabog kag naglinapta, kag ang katawhan ni Nefi nagbalik liwat sa ila duta.

4 Kag karon tion ini nga may dako nga pagkalisud kag panalambiton nga mabatian sa bug-os nga kadutaan, sa tanan nga katawhan ni Nefi—

5 Huo, ang paghilibion sang mga balo nga babayi nga nagakalisud tungod sa ila mga bana, kag amo man sang mga amay nga nagakalisud tungod sa ila mga anak nga lalaki, kag ang mga anak nga babayi tungod sa utod nga lalaki, huo, ang utod nga lalaki tungod sa amay; kag gani ang paghilibion mabatian sa ila tanan nga nagakalisud tungod sang ila mga paryente nga nagkalamatay.

6 Kag karon pat-od nga isa ini ka masubo nga adlaw; huo, isa ka tion sang kamingaw, kag isa ka tion sing tuman nga pagpuasa kag pangamuyo.

7 Kag gani natapos ang ika-kinse nga tuig sang pagginahum sang mga hukom sa katawhan ni Nefi;

8 Kag amo ini ang kasaysayan ni Amon kag sang iya mga kauturan, ang ila mga pagpanglakaton sa duta sang Nefi, ang ila mga pag-antos sa duta, ang ila mga kasubo, kag ang ila mga kabudlayan, kag ang ila di-matungkad nga kalipay, kag ang pagbaton kag kasigurohan sang mga kauturan sa duta sang Jerson. Kag karon kabay nga ang Ginuo, ang Manunubos sang tanan nga tawo, magpakamaayo sang ila mga kalag sa wala’y katapusan.

9 Kag amo ini ang kasaysayan sang mga giyera kag mga pagbinaisay sa tunga sang mga Nefinhon, kag sang mga giyera man sa tunga sang mga Nefinhon kag mga Lamanhon; kag natapos ang ika-kinse nga tuig sang pagginahum sang mga hukom.

10 Kag halin sa una nga tuig tubtob sa ika-kinse nagpahanabo sang kalaglagan sang madamo nga linibo ka kabuhi; huo, nagpahanabo ini sing makahaladlok nga talan-awon sang pagpaagay sang dugo.

11 Kag ang mga lawas sang madamo nga linibo napanglubong sa duta, samtang ang mga lawas sang madamo nga linibo nagakaladunot sa tinumpokan sa ibabaw sang duta; huo, kag madamo nga linibo ang nagakalisud tungod sang pagkadula sang ila mga paryente, tungod may kabangdanan sila sa pagkahadlok, suno sa mga promisa sang Ginuo, nga natugyan sila sa kahimtangan sang nagapadayon nga kasubo.

12 Samtang madamo nga linibo sang iban pa ang matuod-tuod nga nagakalisud tungod sang pagkadula sang ila mga paryente, apang nagakasadya sila kag nagakalipay sa paglaum, kag nakahibalo pa gani, suno sa mga promisa sang Ginuo, nga pagabangonon sila agud magpuyo sa tuo nayon nga kamot sang Dios, sa kahimtangan sang di-matapos nga kalipayan.

13 Kag sa sini makita naton kon daw ano kadako ang indi pagpalareho sang tawo tungod sang sala kag kalapasan, kag sang gahum sang yawa, nga nagaabot paagi sa tuso nga mga plano nga iya ginpadihot agud masiod ang mga tagipusuon sang mga tawo.

14 Kag sa sini makita naton ang dako nga tawag sang katutum sang mga tawo sa pagpangabudlay sa mga ulubasan sang Ginuo; kag sa sini makita naton ang dako nga kabangdanan sang kasubo, kag amo man sang pagkinasadya—kasubo tungod sang kamatayon kag kalaglagan sang mga tawo, kag kalipay tungod sang kasanag ni Cristo padulong sa kabuhi.