Balaan ng mga Kasulatan
Alma 27


Kapitulo 27

Ang Ginuo nagsugo kay Amon nga pangunahan ang katawhan sang Anti-Nefi-Lehi sa kaluwasan batok sa peligro—Pagkakita kay Alma, ang kalipay ni Amon nag-urot sang iya kusog—Ginhatag sang mga Nefinhon sa mga Anti-Nefi-Lehi ang duta sang Jerson—Gintawag sila nga katawhan ni Amon. Mga 90–77 B.C.

1 Karon natabo ini nga sang ang mga Lamanhon nga nakig-away batok sa mga Nefinhon nakakita, pagkatapos sang ila madamo nga pagtinguha sa paglaglag sa ila, nga wala’y pulos ang maghandum sang ila kalaglagan, nagbalik sila liwat sa duta sang Nefi.

2 Kag natabo ini nga ang mga Amaleknon, tungod sang ila kapierdihan, tuman nga naakig. Kag sang nakita nila nga indi sila makatimalus sa mga Nefinhon, nagsugod sila sa pagsugyot sang katawhan sa kaakig batok sa ila mga kauturan, ang katawhan sang Anti-Nefi-Lehi; gani nagsugod sila liwat sa pagpamatay sa ila.

3 Karon ining katawhan liwat nga nagpangindi sa pagkapot sang ila mga armas, kag gintugotan nila ang ila mga kaugalingon nga magkalamatay suno sa mga kaluyag sang ila mga kaaway.

4 Karon sang nakita ni Amon kag sang iya mga kauturan ining buhat sang kalaglagan sa sinang ila mga labing pinalangga, kag sa sinang mga labi nga nagapalangga sa ila—kay ginkabig sila nga daw mga anghel sila nga ginpadala halin sa Dios agud luwason sila halin sa wala’y katubtuban nga kalaglagan—gani, sang nakita ni Amon kag sang iya mga kauturan ining dako nga buhat sang kalaglagan, natandog sila sang kaluoy, kag nagsiling sila sa hari:

5 Tiponon naton ining katawhan sang Ginuo, kag magdulhog kita sa duta sang Zarahemla sa aton mga kauturan nga mga Nefinhon, kag magpalagyo halin sa mga kamot sang aton mga kaaway agud indi kita mapatay.

6 Apang ang hari nagsiling sa ila: Tan-awa, pamatyon kami sang mga Nefinhon tungod sang madamo nga mga pagpamatay kag mga sala nga amon nahimo batok sa ila.

7 Kag si Amon nagsiling: Malakat ako kag mamangkot sa Ginuo, kag kon magsiling sia sa aton, magdulhog sa aton mga kauturan, magalakat bala kamo?

8 Kag ang hari nagsiling sa iya: Huo, kon ang Ginuo magsiling sa aton nga maglakat, magadulhog kami sa aton mga kauturan, kag mangin mga ulipon nila kami tubtob nga mabayaran namon sa ila ang madamo nga mga pagpamatay kag mga sala nga amon nahimo batok sa ila.

9 Apang si Amon nagsiling sa iya: Batok sa layi sang aton mga kauturan, nga ginpahamtang sang akon amay, nga may yara sing bisan sin-o nga mga ulipon sa ila; gani madulhog kita kag magsalig sa mga kaluoy sang aton mga kauturan.

10 Apang ang hari nagsiling sa iya: Magpamangkot sa Ginuo, kag kon magsiling sia sa aton lakat, malakat kami; kon indi magakalamatay kami sa duta.

11 Kag natabo ini nga si Amon naglakat kag namangkot sa Ginuo, kag ang Ginuo nagsiling sa iya:

12 Pagwaa ining katawhan halin sa sini nga duta, agud indi sila magkalamatay; kay si Satanas may dako nga kapyot sa mga tagipusuon sang mga Amaleknon, nga nagasugyot sa mga Lamanhon sa kaakig batok sa ila mga kauturan agud pamatyon sila; gani gwa kamo sa sini nga duta; kag bulahan ining katawhan sa sini nga henerasyon, kay amligan ko sila.

13 Kag karon natabo ini nga si Amon naglakat kag ginsugiran ang hari sang tanan nga pulong nga ginhambal sang Ginuo sa iya.

14 Kag gintipon nila ang tanan nila nga katawhan, huo, ang tanan nga katawhan sang Ginuo, kag ginpanipon ang tanan nila nga mga panong kag mga baka, kag naghalin sa duta, kag nag-abot sa kamingawan nga nagatunga sang duta sang Nefi sa duta sang Zarahemla, kag nag-abot sa malapit sa mga dulonan sang duta.

15 Kag natabo ini nga si Amon nagsiling sa ila: Tan-awa, ako kag ang akon mga kauturan magakadto sa duta sang Zarahemla, kag magapabilin kamo diri tubtob nga magbalik kami; kag pagatilawan namon ang mga tagipusuon sang aton mga kauturan kon pasudlon nila kamo sa ila duta.

16 Kag natabo ini nga samtang nagalakat si Amon pasulod sa duta, nasugat-an niya kag sang iya mga kauturan si Alma, sa lugar nga nasambit; kag tan-awa, isa ini ka malipayon nga pagkilitaay.

17 Karon tuman kadako ang kalipay ni Amon sa bagay nga napuno sia sini; huo, nadaug sia sang kalipay sa iya Dios, bisan tubtob sa pagkaubos sang iya kusog; kag natumba sia liwat sa duta.

18 Karon indi bala ini tuman nga kalipay? Tan-awa, ini ang kalipay nga wala sing makabaton luwas sa matuod-tuod nga mahinulsulon kag mapainubuson nga nagapangita sang kalipayan.

19 Karon ang kalipay ni Alma sa pagkakita sang iya mga kauturan matuod-tuod nga dako gid, kag amo man ang kalipay ni Aaron, kag ni Omner, kag ni Himni; apang tan-awa ang ila kalipay indi amo sina nga makalabaw sa ila kusog.

20 Kag karon natabo ini nga gindala ni Alma ang iya mga kauturan pabalik sa duta sang Zarahemla; bisan sa iya kaugalingon nga balay. Kag nagkadto sila kag ginsugiran ang puno nga hukom sang tanan nga butang nga nagkalatabo sa ila sa duta sang Nefi, sa ila mga kauturan, ang mga Lamanhon.

21 Kag natabo ini nga ang puno nga hukom nagpadala sing isa ka pabantala sa bug-os nga kadutaan, nga ginapangayo ang tingug sang katawhan parte sa pagbaton sang ila mga kauturan, nga mga katawhan sang Anti-Nefi-Lehi.

22 Kag natabo ini nga ang tingug sang katawhan nagpahayag nga nagasiling: Tan-awa, ihatag namon ang duta sang Jerson, nga yara sa este sa tupad sang dagat, nga nagatambi sa duta nga Bugana, nga yara sa sur sang duta nga Bugana; kag ining duta nga Jerson amo ang duta nga ihatag namon sa aton mga kauturan bilang isa ka palanublion.

23 Kag tan-awa, magapahamtang kami sang amon mga kasoldadohan sa tunga sang duta nga Jerson kag sa duta nga Nefi, agud maamligan naton ang aton mga kauturan sa duta nga Jerson; kag ini amon ginahimo para sa amon mga kauturan, tungod sang ila kahadlok sa pagkapot sang mga armas batok sa ila mga kauturan kay basi makahimo sila sang sala; kag ining ila dako nga kahadlok nabatyagan tungod sang ila tuman nga paghinulsol nga ginhimo, tungod sang ila madamo nga ginpamatay kag sang ila makahaladlok nga kalainan.

24 Kag karon tan-awa, ini amon himuon para sa amon mga kauturan, agud nga mapanubli nila ang duta nga Jerson; kag bantayan namon sila halin sa ila mga kaaway paagi sa amon mga kasoldadohan, sa kondisyon nga maghatag sila sa amon sing isa ka bahin sang ila manggad agud buligan kami nga masakdag namon ang amon mga kasoldadohan.

25 Karon, natabo ini nga sang nabatian ini ni Amon, nagbalik sia sa katawhan sang Anti-Nefi-Lehi, kag si Alma upod man sa iya, padulong sa kamingawan, kon sa diin nagpatindog sila sang ila mga tolda, kag ginpahibalo sa ila ining tanan nga butang. Kag ginsaysay man ni Alma sa ila ang iya pagkahaylo, upod kanday Amon kag Aaron, kag sang iya mga kauturan.

26 Kag natabo ini nga nagtuga ini sing dako nga kalipay sa ila. Kag nagdulhog sila sa duta sang Jerson, kag ginpanag-iyahan ang duta sang Jerson; kag gintawag sila sang mga Nefinhon nga katawhan ni Amon; gani ginkilala sila sa sina nga ngalan halin sadto.

27 Kag nasimpon sila sa katawhan ni Nefi, kag naisip man sa katawhan nga iya sang simbahan sang Dios. Kag ginkilala man sila tungod sang ila kaukod sa Dios, kag amo man sa mga tawo; kay lubos sila nga sinsero kag matarong sa tanan nga butang; kag malig-on sila sa pagtuo kay Cristo, bisan tubtob sa katapusan.

28 Kag ginkabig nila ang pagpaagay sang dugo sang ila mga kauturan sing may pinakadako nga kangil-ad; kag indi gid sila makombinse sa pagkapot sang mga armas batok sa ila mga kauturan; kag wala gid sila magkabig sang kamatayon sing may bisan ano nga kahadlok, tungod sang ila paglaum kag mga panglantaw kay Cristo kag sa pagkabanhaw; gani, ang kamatayon gindaug para sa ila sang kadalag-an ni Cristo batok sa sini.

29 Gani, magaantos sila sang kamatayon sa pinakagrabe kag masakit nga paagi nga mahimo buhaton sang ila mga kauturan, antes sila magkapot sang espada ukon sundang agud labuon sila.

30 Kag gani nangin isa sila ka maukod kag pinalangga nga katawhan, isa ka labing pinasulabi nga katawhan sang Ginuo.