1 Na afei emi, Nephi, murunntum nnkyerɛw ndzɛmba nyina a wɔdze kyerɛkyerɛɛ mo nkorɔfo no; nna mennyɛ ɔbemfo wɔ akyerɛw mu tse dɛ wɔ kasa mu; osiandɛ sɛ nyimpa nam Sunsum Krɔnkrɔn no tum do kasa a; Sunsum Krɔnkrɔn no tum no dze asɛm no kɔ adasamba hɔn akoma mu.

2 Mbom hwɛ, dodowara wɔ hɔ a wopirim hɔn akoma dze tsia Sunsum Krɔnkrɔn no ma onnya tsenabew wɔ hɔn mu; dɛm ntsi wɔtow ndzɛmba pii a wɔakyerɛw no gu na wobu no adze huhuw.

3 Mbom emi, Nephi, makyerɛw dza makyerɛw, na mubu no dɛ ɔsom bo kɛse, dze ma nkanka mo nkorɔfo. Na mobɔ mpaa adzekyee nyina ma hɔn, na me nyinsuwa fɔw mo sundze anago, osian hɔn ntsi; na musu frɛ me Nyame wɔ gyedzi mu, na minyim dɛ obetsie mosufrɛ.

4 Na minyim dɛ Ewuradze Nyankopɔn bɛtsew me mpaabɔ ho ama aayɛ mfaso ama mo nkorɔfo. Na nsɛm a makyerɛw no mberɛwyɛ mu yi wɔbɛhyɛ no dzen ama hɔn; na wɔaboa hɔn ma wɔayɛ dza oye; wɔaboa hɔn ma woehu hɔn egyanom; osiandɛ ɔkã Jesus ho nsɛm, na wɔaboa hɔn ma wɔagye no edzi, ama woeetsim ekodu ewiei, mekyerɛ onnyiewiei nkwa no.

5 Na ɔkasa dzendzen tsia bɔn, dɛ mbrɛ nokwar ne pefeeyɛ tse; dasanyi biara no bo rummfuw wɔ nsɛm a makyerɛw yi ho gyedɛ onyia no wɔ abɔnsam sunsum.

6 Mehyɛ moho enyimnyam wɔ pefeeyɛ mu; mehyɛ moho enyimnyam wɔ nokwardzi mu; mehyɛ moho enyimnyam wɔ Jesus mu, osiandɛ ɔapon me kra efi hɛl.

7 Mowɔ ayamuyie ma mo nkorɔfo, na mowɔ gyedzi kɛse wɔ Christ mu dɛ mibehyia akra pii a nkekãa biara nnyi hɔn ho wɔ n’atsɛmbu egua no enyim.

8 Mowɔ ayamuyie ma Jewfo—Mese Jewfo, osiandɛ medze kyerɛ beebi a mifi bae no.

9 Mowɔ ayamuyie ma Amanamamfo so. Mbom hwɛ, monnkotum enya enyidado ama iyinom mu biara gyedɛ wɔnye Christ abɔmu, na wɔahɛn abow tseabaa no mu, na wɔanantsew kwan nkekãnkekã no a wɔdze kɔ nkwa mu no mu, na wɔkɔ do nantsew kwan no mu kesi ewiei a nsɔhwɛber no bɔsõ.

10 Na afei, mo nuanom adɔfo, nye Jewfo so, nye hɔn a wɔwɔ asaase n’ano n’ano nyina, hom ntsie nsɛm yi na hom ngye Christ ndzi; na sɛ hom renngye nsɛm yi nndzi a hom ngye Christ ndzi. Na sɛ hom gye Christ dzi a hom bɛgye nsɛm yi edzi, osiandɛ ɔyɛ Christ ne nsɛm na ɔdze ama me; na ɔkyerɛkyerɛ adasa nyina dɛ ɔsɛ dɛ wɔyɛ dza oye.

11 Na sɛ ɔnnyɛ Christ ne nsɛm a, hom ara hom mbua—Na Christ dze tum nye enyimnyam kɛse beyi akyerɛ hom dɛ ɔyɛ ne nsɛm wɔ da a odzi ewiei no mu; na emi na ɔwo begyina enyim na enyim wɔ asɛndzipon no enyim; na me mberɛwyɛ nyina ekyir no, hom bohu dɛ ɔno na ɔhyɛɛ me dɛ menkyerɛw dɛm ndzɛmba yi.

12 Na menam Christ ne dzin mu bɔ Egya no mpaa ama hɛn mu dodowara, sɛ nnyɛ hɛn nyina mpo a, wɔaagye hɛn nkwa wɔ n’ahenman mu wɔ da kɛse a odzi ewiei no mu.

13 Na afei, mo nuanom adɔfo, nye hɔn a wɔyɛ Israel fifo nyina, nye hɔn a wɔtse asaase n’ano n’ano nyina, mekasa kyerɛ hom dɛ obi a ne ndze fi huntuma mu retsea mu: Hom nantseyie kesi dɛ dɛm da kɛse no bɛba.

14 Na hom a hom rinnya Nyame ne papayɛ no, na hom mmbu Jewfo no nsɛm bi, nye me nsɛm so, nye nsɛm a obefi Nyame Eguambaa n’anomu aba no, hwɛ, mema hom nantseyie daapem, na dɛm nsɛm yi bobu hom fɔ wɔ da a odzi ewiei no mu.

15 Na dza mosɔw ano wɔ asaase yi do no, wɔdze bɛba ebetsia hom wɔ asɛndzipon no enyim; na dɛm na Ewuradze ahyɛ me, na otwar dɛ midzi do. Amen.