1 ^aBabylon ho ^batsɛmbusɛm a Amoz ba Isaiah hunii.

2 Hom nsi ^afrankaa wɔ bepɔw tsentsen no do, hom mma ndze do mma hɔn, hom ^bnnyam nsa, ama wɔaakɛhɛn ekunyin mbotsen no mu.

3 Mahyɛ mo ^ankorɔfo a wɔatsew hɔnho no, nyew, mafrɛ me mbarimba akatakyi ama m’ebufuw, nnyi hɔ mma hɔn a wodzi mo tumdzi mu ehurusi no.

4 Nyimpa dodow hɔn dede wɔ mbepɔw no do dɛ gyama ɔman kɛse bi dze, ^aaman ahendzi a ^bwɔaboa ano ne gyigyeegye dede a! dɔm Ewuradze rotwe no dɔm aboa ano akɔkõ.

5 Wofi ekyirekyir asaase do, na ɔsor n’etsiwa mu no ho reba, nyew, Ewuradze na n’ebufuhyew akodze no a, dɛ ɔrebɛsɛɛ asaase no nyina.

6 Hom ntwa ewuo; na Ewuradze da no abɛn; ɔbɛba dɛ ɔsɛɛ a ofi Otumfo hɔ.

7 Dɛm ntsi nsa nyina bɛyɛ mberɛw na nyimpa akoma biara anan;

8 Na hɔn bo botu; nketsenketse nye awerɛhow bekitsa hɔn; ɔyaw bɛba hɔn do; obiara ne nyɛnko ho bɛyɛ no ahobow; hɔn enyim bɛyɛ gyaframee enyim.

9 Hwɛ Ewuradze ne da reba, etsirmɔdzen, nye ebufuw nye ebufuhyew, dɛ ^aɔrebɛyɛ asaase no afo, na ɔasɛɛ ndzebɔnyɛfo efi mu.

10 Na ɔsor nworaba nye hɔn nworaba ekuwekuw nnkɛma hɔn kan, ^aewia bɛhyɛ sum wɔ ne mfirii mu na bosoom so nnkɛma ne kan ahyerɛn.

11 Na ^amobɔtwe wiadzefo aso wɔ hɔn bɔn ntsi na emumuyɛfo wɔ hɔn emumuyɛ ntsi; na mama ntsɛntsɛnnyi ne ^bntsɛn abɔ adze, na mama ɔhoɔhunyi n’ahokyerɛ abrɛ adze.

12 Mebɛma ^anyimpa no ho asom bo asen sika mapã; ɔdasanyi bɛsen Ophir sika mpɔkowa mpo.

13 Dɛm ntsi, mebɛma ɔsorsor apopo na ^awoeyi asaase efi ne sibea wɔ dɔm Ewuradze n’ebufuw no mu, na n’ebufuhyew da no mu.

14 Na ɔbɛba, dɛ ^aɔwansan a woritsiw no, na nguan a obi mmboa hɔn ano; na wɔbɛdandan hɔnho akokɔ hɔn nkorɔfo nkyɛn, na woeguanguan akokɔ hɔn asaase do.

15 Obiara a ɔyɛ ahantan no wobohwira no mu; na obiara a ɔdze noho abɔ emumuyɛfo ho no, ɔbɔtɔ afowa ano.

16 Na hɔn mbɔtowaba so mpo wɔdze hɔn bɔhwehwe famu atsetsew hɔn wɔ hɔn enyim; wɔbɔdodɔ hɔn efiefi asɛɛsɛɛ ndzɛmba na hɔn yernom dze wɔbogu hɔnho fi.

17 Hwɛ, mebɛhyɛ Mediafo tsirmu metsia hɔn, hɔn a wonnkobu dwetɛ bi, na sika dze, wɔnnkɛfa mu enyika.

18 Hɔn ngyen bɛtsetsew mberantsɛ mu esinesin, na worinnya yafun mu aba tsimbɔbɔr; hɔn enyi bɛsã mbofraba.

19 Na Babylon, ahendzi horow mu enyimnyamfo, Chaldeafo hɔn ahopɔw ^an’ahoɔfɛw no, ɔbɛyɛ dɛ ber a Nyame butuuw ^bSodom na Gomorrah no.

20 ^aWɔrenntsena mu ara da, eso wɔrenntsena ofi ebusuasantsen kesi ebusuasantsen; eso Arabnyi nnkesi ne ntamadan wɔ hɔ, eso nguanhwɛfo nnkɛma hɔn nguanban ebutuw hɔ.

21 Mbom sar do ^ambowa abɔyafo na wɔbɛdeda hɔ, na mpatu ebusufo bɛhyehyɛ hɔn adan amaama na nsohor bɛtsena hɔ, na ^bsatyrfo asaw wɔ hɔ.

22 Na mbowa abɔyafo a wɔwɔ nsupruw do no bosu wɔ hɔn amamfõ ^aefiefi, na ^babowa bɔyafo wɔ hɔn enyigye ahemfi; na ne mber abɛn, na ne da nnkɛkyɛr ba. Na mebɛsɛɛ no ntsɛntsɛm; nyew, osiandɛ mubohu me man mbɔbɔr, na mbom emumuyɛfo bɛhera.