1 Քանզի ահա, եղավ այնպես, որ Տերը, այո, ուղղակի երազում խոսեց հորս հետ և ասաց նրան. Օրհնվա՛ծ ես դու, Լե՛քի, այն բաների համար, որ դու արել ես. և քանզի դու հավատարիմ եղար ու հայտնեցիր այս ժողովրդին այն բաները, որոնք ես պատվիրեցի քեզ, ահա, նրանք ջանում են զրկել քեզ կյանքից:

2 Եվ եղավ այնպես, որ Տերը պատվիրեց հորս, ուղղակի երազում, որ նա պետք է վերցներ իր ընտանիքը և հեռանար անապատ:

3 Եվ եղավ այնպես, որ նա հնազանդ էր Տիրոջ խոսքին, այդ պատճառով արեց, ինչպես որ Տերը պատվիրեց նրան:

4 Եվ եղավ այնպես, որ նա հեռացավ անապատ: Եվ նա թողեց իր տունը և իր ժառանգության հողը և իր ոսկին և իր արծաթը և իր թանկարժեք իրերը, և իր հետ ոչինչ չվերցրեց, բացի իր ընտանիքից և պարենից և վրաններից, ու հեռացավ անապատ:

5 Եվ նա իջավ Կարմիր ծովի ափի մոտի եզերքով. և նա ճամփորդում էր անապատում՝ այն եզերքով, որն ավելի մոտ էր Կարմիր ծովին. և նա ճամփորդում էր անապատում իր ընտանիքի հետ, որը բաղկացած էր իմ մայր Սարիայից ու ավագ եղբայրներիցս, որոնք էին՝ Լամանը, Լեմուելը և Սամը:

6 Եվ եղավ այնպես, որ, երբ նա երեք օր ճամփորդել էր անապատում, նա խփեց իր վրանը մի հովտում, ջրի գետի ափին:

7 Եվ եղավ այնպես, որ նա կառուցեց մի զոհասեղան քարերից, և ընծա մատուցեց Տիրոջը, և գոհություն հայտնեց Տիրոջը՝ մեր Աստծուն:

8 Եվ եղավ այնպես, որ նա կոչեց գետի անունը Լաման, և այն թափվում էր Կարմիր ծովը. իսկ հովիտը գետաբերանի եզրին մոտ էր:

9 Եվ, երբ հայրս տեսավ, որ գետի ջրերը թափվում էին Կարմիր ծովի ակունքը, նա դիմեց Լամանին՝ ասելով. Երանի՜ թե դու կարողանայիր նմանվել այս գետին՝ անընդհատ վազող դեպի բոլոր արդարության ակունքը:

10 Եվ նա նաև ասաց Լեմուելին. Երանի՜ թե դու կարողանայիր նմանվել այս հովտին՝ կայուն ու հաստատուն, անխախտ՝ Տիրոջ պատվիրանները պահելիս:

11 Եվ այս նա ասաց Լամանի և Լեմուելի խստապարանոցության պատճառով. քանզի ահա, նրանք տրտնջում էին շատ բաների վերաբերյալ իրենց հոր դեմ, քանի որ նա տեսիլատես մարդ էր և դուրս էր բերել նրանց Երուսաղեմի հողից՝ թողնելով իրենց ժառանգության հողը և իրենց ոսկին և իրենց արծաթը և իրենց թանկարժեք բաները, որ մեռնի անապատում: Եվ սա, ասում էին նրանք, նա արել էր իր սրտի խենթ երևակայությունների պատճառով:

12 Եվ այսպես Լամանը և Լեմուելը, լինելով ավագները, տրտնջում էին իրենց հոր դեմ: Եվ նրանք տրտնջում էին, որովհետև չգիտեին գործերն այն Աստծո, որը ստեղծել էր իրենց:

13 Նրանք ոչ էլ հավատում էին, որ Երուսաղեմը, այդ մեծ քաղաքը, կարող է կործանվել՝ համաձայն մարգարեների խոսքերի: Եվ նրանք նման էին այն հրեաներին, որոնք Երուսաղեմում էին, որոնք ջանում էին զրկել հորս կյանքից:

14 Եվ եղավ այնպես, որ հայրս, լցված լինելով Հոգով, խոսեց նրանց հետ Լեմուելի հովտում, զորությամբ, այնպես որ նրանց մարմինները դողացին նրա առջև: Եվ նա այնպես կարկամեցրեց նրանց, որ նրանք չհամարձակվեցին խոսել նրա դեմ. ուստի, արեցին, ինչպես նա պատվիրեց:

15 Եվ իմ հայրը բնակվում էր վրանում:

16 Եվ եղավ այնպես, որ ես՝ Նեփիս, լինելով չափազանց երիտասարդ, այնուամենայնիվ, լինելով հաղթանդամ կազմվածքով, և նաև ունենալով մեծ իղձեր՝ իմանալու Աստծո խորհուրդները, ուստի, ես կանչեցի առ Տերը. և ահա, նա այցելեց ինձ և այնպես փափկացրեց իմ սիրտը, որ ես հավատացի բոլոր այն խոսքերին, որոնք ասվել էին հորս կողմից. այդ պատճառով ես չապստամբեցի նրա դեմ՝ իմ եղբայրների նման:

17 Եվ ես խոսեցի Սամի հետ, իմաց տալով նրան այն բաները, որոնք Տերը հայտնել էր ինձ իր Սուրբ Հոգու միջոցով: Եվ եղավ այնպես, որ նա հավատաց իմ խոսքերին:

18 Բայց, ահա, Լամանը և Լեմուելը չկամեցան ականջ դնել իմ խոսքերին. և վշտացած լինելով նրանց սրտերի կարծրության պատճառով, ես կանչեցի առ Տերը նրանց համար:

19 Եվ եղավ այնպես, որ Տերը խոսեց ինձ հետ՝ ասելով. Օրհնված ես դու, Նեփի, քո հավատքի համար, քանի որ դու փնտրեցիր ինձ ջանասիրաբար՝ սրտի խոնարհությամբ:

20 Եվ որքան որ դուք կպահեք իմ պատվիրանները, դուք կբարգավաճեք և կառաջնորդվեք խոստումի երկիր. այո, այսինքն՝ մի երկիր, որը ես պատրաստել եմ ձեզ համար. այո, մի երկիր, որն ընտիր է բոլոր մյուս երկրներից առավել:

21 Եվ որքան որ քո եղբայրները կապստամբեն քո դեմ, նրանք կկտրվեն Տիրոջ ներկայությունից:

22 Եվ որքան որ դու կպահես իմ պատվիրանները, դու կդարձվես ղեկավար և ուսուցիչ քո եղբայրների վրա:

23 Քանզի ահա, այն օրը, երբ նրանք կապստամբեն իմ դեմ, ես կանիծեմ նրանց, նույնիսկ դառն անեծքով, և նրանք իշխանություն չեն ունենա քո սերնդի վրա, քանի դեռ նրանք էլ չեն ապստամբել իմ դեմ:

24 Եվ եթե լինի այնպես, որ նրանք ապստամբեն իմ դեմ, նրանք խարազան կլինեն քո սերնդի համար՝ զարթնեցնելու նրանց մեջ հիշելու սովորույթը: