1 Mo nao i bin hapen se, afta, mi, Nifae, mi putum wan en blong toktok long ol brata blong mi, luk oli talem long mi: “Yu bin talem long mifala plante strong samting, moa bitim wanem mifala i save tekem.”

2 Mo i bin hapen se mi talem long olgeta se mi save se mi talem ol strong samting agensem ol man nogud, folem trutok; mo olgeta we oli stret mo gud, mi talem se oli no gat rong, mo mi testifae se bae God i leftemap olgeta long las dei; taswe, ^aolgeta man we oli gat rong oli ting se ^btrutok i strong tumas, from i ^dkatem olgeta stret long medel blong olgeta.

3 Mo nao olgeta brata blong mi, sapos yufala i stret mo gud mo wantem blong harem trutok, mo stap mekem folem trutok ia, blong yufala i save ^awokbaot long stret laef long fored blong God, ale, bae yufala i no save komplen from trutok ia, mo talem: “Yu talem plante strong samting agensem mifala.”

4 Mo i bin hapen se mi, Nifae, mi askem strong long olgeta brata blong mi, blong oli obei ol komanmen blong Lod wetem strong tingting oltaem.

5 Mo i bin hapen se oli ^aputum tingting blong olgeta i stap daon long fored blong Lod; inaf blong mekem se mi gat glad mo ol bigfala hop from olgeta, se bae oli wokbaot long ol rod blong stret mo gud fasin.

6 Nao, mifala i bin talem mo mekem evri samting ia long taem we papa blong mi i bin stap long wan tenet long vale we hem i bin singaotem Lemyul.

7 Mo i bin hapen se mi, Nifae, mi tekem wan long ol ^agel blong Ismael blong stap olsem ^bwaef blong mi, mo tu, ol brata blong mi oli bin tekem ol narafala gel blong Ismael olsem waef blong olgeta; mo tu, ^dSoram i bin tekem fasbon gel blong Ismael olsem waef blong hem.

8 Mo olsem ia nao papa blong mi i mekem i hapen evri komanmen blong Lod we hem i bin givim long hem. Mo tu, mi, Nifae, mi kasem plante blesing tumas long Lod.

9 Mo i bin hapen se voes blong Lod i toktok long papa blong mi long naet, mo i givim oda long hem se long nekis dei, hem i mas wokbaot i go long waelples.

10 Mo i bin hapen se taem we papa blong mi i girap long moning, mo i go aot long doa blong tenet, long bigfala sapraes blong hem, hem i luk long graon wan ^abol we fasin blong wokem bol ia i defren tumas; mo oli mekem wetem naes bras. Mo insaed long bol i gat tufala samting olsem nidel; mo wan i poenem wei, we mifala i mas go long hem long waelples.

11 Mo i bin hapen se mifala i karem i kam tugeta eni samting we mifala i mas karem i go long waelples, wetem evri kaekae blong mifala we i stap yet we Lod i bin givim long mifala; mo mifala i karem sid blong evri kaen blong mifala i save karem i go long waelples.

12 Mo i bin hapen se mifala i karem ol tenet blong mifala mo mifala i aot i go long waelples, long narasaed blong Leman reva.

13 Mo i bin hapen se mifala i wokbaot blong spes blong fo dei, kolosap long rod we i go Saot-Saot Is, mo mifala i stanemap ol tenet blong mifala bakegen; mo mifala i singaotem nem blong ples ia Sesa.

14 Mo i bin hapen se mifala i karem ol bonara blong mifala mo ol ara blong mifala, mo mifala i go long waelples blong kilim kaekae blong ol famli blong mifala; mo afta we mifala i kilim ol kaekae blong ol famli blong mifala, mifala i gobak bakegen long ol famli blong mifala long waelples, long ples blong Sesa. Mo mifala i go bakegen long waelples, folem sem wei, mifala i stap wokbaot nomo long gudfala graon long waelples, we i stap long ol boda kolosap long ^aRed Si.

15 Mo i bin hapen se mifala i wokbaot blong spes blong plante dei, mifala i stap kilim kaekae long rod wetem ol bonara blong mifala mo ol ara blong mifala, mo ol ston blong mifala mo ol sling blong mifala.

16 Mo mifala i folem ol ^arod blong bol we i lidim mifala i go long ol ples we oli moa gudfala long waelples ia.

17 Mo afta we mifala i wokbaot blong spes blong plante dei, mifala i stanemap ol tenet blong mifala blong spes blong smol taem blong mekem se mifala i save spel smol mo kasem kaekae blong ol famli blong mifala.

18 Mo i bin hapen se taem we mi, Nifae, mi go blong kilim kaekae, luk, mi brekem bonara blong mi, we oli mekem wetem gudfala ^astil; mo afta we mi brekem bonara blong mi, luk, ol brata blong mi oli kros long mi, from mifala i lusum bonara blong mi, mo mifala i no kasem eni kaekae.

19 Mo i bin hapen se mifala i gobak we mifala i no gat kaekae blong ol famli blong mifala, mo from oli taed tumas from wokbaot blong olgeta, oli safa plante from oli nidim kaekae.

20 Mo i bin hapen se Leman mo Lemyul mo ol boe blong Ismael, oli stat blong komplen tumas, from ol harem nogud blong olgeta, mo ol hadtaem long waelples; mo tu, papa blong mi i stat blong komplen agensem Lod, God blong hem; yes, mo olgeta evriwan oli harem nogud tumas, mekem se oli komplen agensem Lod.

21 Mo i bin hapen se mi, Nifae, from mi kasem hadtaem wetem ol brata blong mi from mi brekem bonara blong mi, mo ol bonara blong olgeta i brok tu from ol spring blong olgeta i lus, i stat blong kam had tumas, yes, inaf, we i mekem se mifala i no save kasem eni kaekae.

22 Mo i bin hapen se mi, Nifae, mi toktok plante long ol brata blong mi, from oli mekem hat blong olgeta i kam strong bakegen, i go kasem we oli ^akomplen agensem Lod, God blong olgeta.

23 Mo i bin hapen se mi, Nifae, mi mekem wan bonara aot long wud, mo aot long wan stik we i stret, wan ara; taswe, mi mekem rere miwan wetem wan bonara mo wetem wan ara, wetem wan sling mo sam ston. Mo mi talem long ^apapa blong mi: “?Wanem ples bae mi go blong kasem kaekae?”

24 Mo i bin hapen se hem i ^aaskem Lod, from oli putum tingting blong olgeta i stap daon from ol toktok blong mi; from mi talemaot plante samting long olgeta wetem ful paoa blong sol blong mi.

25 Mo i bin hapen se voes blong Lod i kam long papa blong mi; mo i ^atok strong long papa blong mi, from hem i komplen agensem Lod, inaf, we i mekem se Lod i mekem hem i godaon long ol dip ples blong harem nogud.

26 Mo i bin hapen se voes blong Lod i talem long hem: “Luk long bol, mo luk ol raeting we oli stap.”

27 Mo i bin hapen se taem we papa blong mi i luk ol samting we oli raetem long bol, hem i fraet mo seksek tumas, mo tu, ol brata blong mi, mo ol boe blong Ismael, mo ol waef blong mifala.

28 Mo i bin hapen se mi, Nifae, mi luk tufala samting olsem nidel we oli stap insaed long bol, we oli wok folem ^afet mo strong tingting, mo fasin blong mekem folem we mifala i mekem long olgeta.

29 Mo tu, i gat long olgeta wan niufala raeting, we i klia gud blong ridim, we i givim ^asave long mifala long saed blong ol fasin blong Lod; mo raeting ia Lod i raetem mo jenisim wanwan taem, folem fet mo strong tingting we mifala i givim long hem. Mo olsem ia nao yumi luk we tru long ol ^bsmol wei Lod i save mekem plante bigfala samting i hapen.

30 Mo i bin hapen se mi, Nifae, mi go antap long bigfala hil, folem toktok we i stap long bol.

31 Mo i bin hapen se mi kilimded ol wael animol, inaf blong mekem se mi kasem kaekae blong ol famli blong mifala.

32 Mo i bin hapen se mi gobak long ol tenet blong mifala, mi stap karem ol animol we mi bin kilim i ded; mo nao, taem we oli luk we mi kasem kaekae, !nao glad blong olgeta i bigwan tumas! Mo i bin hapen se oli putum tingting blong olgeta bakegen i stap daon long fored blong Lod, mo oli talem tangkyu long hem.

33 Mo i bin hapen se mifala i bin tekem wokbaot blong mifala bakegen, mifala i stap wokbaot kolosap long sem rod olsem long stat; mo afta we mifala i bin wokbaot blong wan spes blong plante dei mifala i bin stanemap ol tenet blong mifala bakegen, blong mekem se mifala i save stap smol blong wan spes blong wan taem.

34 Mo i bin hapen se ^aIsmael i ded, mo mifala i berem hem long ples we oli singaotem Nehom.

35 Mo i bin hapen se ol gel blong Ismael oli krae sore tumas, from oli lusum papa blong olgeta, mo from ol ^ahadtaem blong olgeta long waelples; mo oli bin komplen agensem papa blong mi, from hem i bin karem olgeta aot long graon blong Jerusalem, oli talem se: “Papa blong mifala i ded; yes, mo mifala i wokbaot olbaot plante long waelples, mo mifala i safa long plante hadtaem, hanggri, tosta, mo taed; mo afta ol safa ia, mifala i mas ded long waelples, wetem hanggri.”

36 Mo olsem ia nao oli bin komplen agensem papa blong mi, mo tu, agensem mi; mo oli wantem blong gobak long Jerusalem.

37 Mo Leman i bin talem long Lemyul, mo tu, long ol boe blong Ismael: “Luk, bae yumi ^akilimded papa blong yumi, mo tu, brata blong yumi Nifae, we hem i mekem hemwan i kam ^bman blong rul blong yumi mo tija blong yumi, we yumi ol bigfala brata blong hem.

38 Nao, hem i talem se Lod i bin toktok wetem hem, mo tu, se ol ^aenjel oli bin givhan long hem. Be luk, yumi save se hem i stap giaman long yumi; mo hem i talem yumi ol samting ia, mo hem i mekem plante samting tru long fasin blong trik blong hem, blong hem i save trikim ae blong yumi, tingting, se maet, hem i save lidim yumi i gowe long sam defren kaen waelples; mo afta, hem i bin lidim yumi i gowe, hem i tingting blong mekem hemwan i kam wan king mo wan man blong rul ova long yumi, blong hem i save mekem wetem yumi folem tingting blong hem mo wanem hem i wantem.” Mo tru long fasin ia nao brata blong mi, Leman, i bin toktok long olgeta blong mekem hat blong olgeta i kros.

39 Mo i bin hapen se Lod i stap wetem mifala, yes, voes blong Lod tu i kam mo talemaot plante toktok long olgeta ia, mo i ^atok strong tumas long olgeta; mo afta we voes blong Lod i tok strong long olgeta, oli tanem kros blong olgeta i gowe, mo oli sakem sin blong olgeta, inaf blong mekem se Lod i blesem mifala bakegen wetem kaekae, blong mekem se mifala i no ded.