1 Mo i bin hapen se afta we mifala i kam daon long waelples long papa blong mifala, luk, hem i fulap wetem glad, mo tu, mama blong mi, ^aSaraea, i glad tumas, from we hem i bin krae sore tru from mifala.

2 From hem i bin ting se mifala i bin ded long waelples; mo tu, hem i bin komplen agensem papa blong mi, hem i talem long hem se hem i wan man blong luk ol visen, i talem se: “Luk, yu bin lidim mifala aot long graon blong mifala we mifala i bin kasem long ol papa blong mifala, mo ol boe blong mi oli nomo stap, mo bae yumi evriwan i ded long waelples.”

3 Mo long kaen toktok ia nao mama blong mi i bin komplen agensem papa blong mi.

4 Mo i bin hapen se papa blong mi i bin toktok long hem, i talem se: “Mi save se mi mi wan ^aman blong luk ol visen; from sapos mi no bin luk ol samting blong God long wan ^bvisen bae mi no save gat save long gudfala fasin blong God, be bae mi stastap long Jerusalem mo mi ded wetem ol brata blong mi.

5 Be luk, mi bin kasem wan ^agraon blong promes, long ol samting ia mi mi glad tumas; yes, mo mi ^bsave se Lod bae i sevem ol boe blong mi aot long ol han blong Leban, mo karem olgeta i kam daon bakegen long yumi long waelples.”

6 Mo long kaen toktok ia papa blong mi, Lihae, i bin leftemap tingting blong mama blong mi, Saraea, long saed blong mifala, long taem we mifala i stap wokbaot long waelples i go antap long graon blong Jerusalem blong kasem histri blong Ol Jiu.

7 Mo taem we mifala i bin kambak long tenet blong papa blong mi, luk glad blong tufala i bin fulap, mo tingting blong mama blong mi, i bin harem gud.

8 Mo hem i bin toktok, i talem se: “Nao mi save tru we Lod i bin ^agivim oda long hasban blong mi blong ronwe i go long waelples; yes, mo tu, mi save tru we Lod i bin lukaot gud long ol boe blong mi, mo i bin sevem olgeta, oli aot long ol han blong Leban, mo i bin givim paoa long olgeta blong oli save ^bfinisim samting we Lod i bin talem long olgeta.” Mo long kaen toktok ia hem i bin toktok.

9 Mo i bin hapen se oli bin hapi tumas, mo oli bin mekem ^asakrifaes mo bonem ol ofring i go long Lod; mo oli bin talem ^btangkyu long God blong Isrel.

10 Mo afta we oli bin talem tangkyu long God blong Isrel, papa blong mi, Lihae, i bin tekem ol histri we oli bin raetem long ol ^abuk we oli bin mekem wetem bras, mo hem i bin stadi olgeta stat long stat blong olgeta.

11 Mo hem i bin luk se oli bin holem ol faef ^abuk blong Moses, we i bin talem wan histri blong taem we God i bin mekem wol ia, mo tu, blong Adam mo Iv, we oli bin fasfala papa mo mama blong yumi;

12 Mo tu, wan ^ahistri blong Ol Jiu stat long stat, i go kasem stat blong taem we Sedekaea, king blong Juda i bin rul long hem;

13 Mo tu, ol profesi blong ol tabu profet, stat long stat, go kasem stat blong taem we ^aSedekaea i stat blong kam king; mo tu, plante profesi we i bin kamaot long maot blong ^bJeremaea.

14 Mo i bin hapen se papa blong mi, Lihae, tu i bin faenem long ol ^abuk we oli bin mekem wetem bras wan famli laen blong ol papa blong hem; taswe, hem i bin save se hem i bin kamaot long laen blong ^bJosef; yes, hem i semfala Josef we i bin boe blong ^dJekob, we oli bin ^esalem hem i go long Ijip, mo we han blong Lod i bin ^fsevem hem, blong hem i save sevem papa blong hem, Jekob, mo evriwan insaed long haos blong hem blong oli no ded from ol hadtaem blong kasem kaekae.

15 Mo oli bin ^akamaot long fasin blong stap slef mo aot long graon blong Ijip, tru long semfala God ia we i bin sevem olgeta.

16 Mo olsem ia nao papa blong mi, Lihae, i bin faenem famli laen blong ol papa blong hem. Mo Leban tu, i bin kamaot long laen blong ^aJosef, taswe, hem mo ol papa blong hem oli bin kipim ol histri ia.

17 Nao taem we papa blong mi i bin luk ol samting ia, hem i bin fulap long Spirit, mo i bin stat blong profesae long saed blong laen blong hem—

18 Se ol buk ia we oli bin mekem wetem bras, bae oli go aot long evri kantri, famli, lanwis, mo pipol we oli blong laen blong hem.

19 Taswe, hem i bin talem se ol buk ia we oli bin mekem wetem bras bae oli ^aneva save lus; mo tu, bae oli no lusum saen blong olgeta tru long taem. Mo hem i bin profesae long plante samting long saed blong laen blong hem.

20 Mo i bin hapen se kasem taem ia nao, mi wetem papa blong mi i bin stap obei long ol komanmen we Lod i bin givim long mifala.

21 Mo mifala i bin kasem ol histri ia olsem Lod i bin givim oda long mifala, mo mifala i bin stadi gud histri ia, mo faenemaot se hemia ol samting we mifala i wantem tumas; yes, we i gat bigfala ^ayus long mifala, inaf blong mekem se mifala i save ^bsevem ol komanmen blong Lod long ol pikinini blong mifala.

22 Taswe, hem i bin waes tingting long Lod we mifala i mas karem ol histri ia wetem mifala, long taem we mifala i bin wokbaot tru long waelples i go long graon blong promes.