1 Mo i bin hapen se enjel i toktok long mi, i talem se: “!Luk!” Mo mi bin lukluk mo mi luk plante kantri mo plante kingdom.

2 Mo enjel i talem long mi: “?Wanem nao yu luk?” Mo mi talem: “Mi luk plante kantri mo kingdom.”

3 Mo hem i talem long mi: “Hemia i ol kantri mo ol kingdom blong Ol Jentael.”

4 Mo i bin hapen se mi luk long medel blong ol kantri blong Ol ^aJentael se wan ^bbigfala jos i stanap.

5 Mo enjel i talem long mi: “Luk jos ia we i stanap, hem i moa rabis bitim ol narafala jos, we i stap ^akilimded ol sent blong God, yes, mo i mekem olgeta i safa, mo i fasem daon olgeta, mo i putum wan yok long olgeta we i wan aean ^byok, mo i karem olgeta i kam daon blong oli stap slef.”

6 Mo i bin hapen se mi luk ^abigfala mo rabis jos ia; mo mi luk ^bdevel we i hem nao i bin stanemap hem.

7 Mo tu, mi luk ^agol, mo silva, mo ol klos we oli mekem long silik, mo ol narafala klos we oli red mo oli stap saen, mo ol klos we oli somap gud, mo evri kaen gudgudfala klos; mo mi luk plante woman blong rod.

8 Mo enjel i toktok long mi, i talem se: “Luk gol, mo silva, mo ol klos we oli mekem long silik, mo ol narafala klos we oli red mo oli stap saen, mo ol klos ia we oli somap gud, mo ol gudgudfala klos, mo ol woman blong rod, oli ol ^atingting blong bigfala mo rabis jos ia.

9 Mo tu, from ol pres blong wol, oli ^akilimded ol sent blong God mo karem olgeta i go daon blong oli kam slef.”

10 Mo i bin hapen se mi bin lukluk mo luk plante solwota; mo oli seperetem Ol Jentael long laen blong ol brata blong mi.

11 Mo i bin hapen se enjel i talem long mi: “Luk bigfala nogud kros blong God i stap long laen blong ol brata blong yu.”

12 Mo mi bin lukluk mo luk wan man long medel blong Ol Jentael, we plante solwota ia i bin seperetem hem long laen blong ol brata blong mi; mo mi luk ^aSpirit blong God, we i kamdaon mo i wok long man ia; mo hem i go aot long plante solwota ia, i go kasem laen blong ol brata blong mi, we i stap long promes graon.

13 Mo i bin hapen se mi luk Spirit blong God, we i bin wok long sam narafala Jentael; mo oli go fored, oli aot long kalabus, oli go long plante solwota ia.

14 Mo i bin hapen se mi luk plante ^agrup blong pipol blong Ol Jentael long ^bgraon blong promes; mo mi luk bigfala nogud kros blong God, we i stap wetem laen blong ol brata blong mi; mo oli ^dseraot long fored blong Ol Jentael mo oli kilim olgeta.

15 Mo mi luk Spirit blong Lod, we i stap long Ol Jentael, mo oli kam antap gud mo oli kasem ^agraon blong olgeta we oli kasem long ol papa blong olgeta; mo mi luk we oli waet, mo oli gud tumas mo ^bnaes, olsem ol pipol blong mi bifo oli ^dkilim olgeta i ded.

16 Mo i bin hapen se mi, Nifae, mi luk we Ol Jentael we oli go fored, oli aot long kalabus, oli bin putum tingting blong olgeta i stap daon long fored blong Lod; mo paoa blong Lod i bin stap wetem ^aolgeta.

17 Mo mi luk we ol mama Jentael blong olgeta i kam tugeta long ol solwota, mo long graon tu, blong faet agensem olgeta.

18 Mo mi luk we paoa blong God i stap wetem olgeta, mo tu, we bigfala nogud kros blong God i stap long olgeta we i kam tugeta agensem olgeta blong faet.

19 Mo mi, Nifae, mi bin luk we Ol Jentael we oli go fored, oli aot long kalabus, oli bin ^akam fri tru long paoa blong God aot long ol han blong evri narafala kantri.

20 Mo i bin hapen se mi, Nifae, mi luk we oli kam antap gud long graon; mo mi luk wan ^abuk, mo oli karem i go long medel blong olgeta.

21 Mo enjel i talem long mi: “?Yu save mining blong buk ia?”

22 Mo mi talem long hem: “Mi no save.”

23 Mo hem i talem: “Luk, buk ia i kam aot long maot blong wan Jiu.” Mo mi, Nifae, mi luk buk ia; mo hem i talem long mi: “^aBuk ia we yu stap luk, i wan ^bhistri blong Ol ^dJiu, we i holem ol kavenan blong Lod, we hem i bin mekem wetem laen blong Isrel; mo hem i holem tu plante long ol profesi blong ol tabu profet; mo hem i wan histri olsem ol raeting we oli stap long ol ^ebuk we oli mekem wetem bras, be hemia nomo i no gat plante tumas; be, oli holem ol kavenan blong Lod, we hem i bin mekem wetem laen blong Isrel; taswe, oli gat bigfala yus long Ol Jentael.”

24 Mo enjel blong Lod i talem long mi: “Yu bin luk we buk ia i kam aot long maot blong wan Jiu; mo taem we i kam aot long maot blong wan Jiu, i holem gospel blong Lod we i fulwan, we olgeta twelef aposol i talemaot; mo oli talemaot ol samting folem trutok we i stap long Smol Sipsip blong God.

25 Taswe, ol samting ia i go aot long Ol ^aJiu long klin fasin i go kasem Ol ^bJentael, folem trutok we i stap wetem God.

26 Mo afta oli go aot tru long ol han blong olgeta twelef aposol blong Smol Sipsip, long Ol Jiu ^ai go kasem Ol Jentael, yu stap luk taem we ^bbigfala mo rabis ^djos ia i stat, we i moa rabis bitim ol narafala jos; from luk, oli bin ^etekemaot, long gospel blong Smol Sipsip, plante pat we oli ^fklia mo gudgudfala; mo tu, oli bin tekemaot plante kavenan blong Lod.

27 Mo evri samting ia oli mekem blong oli save jenisim ol stret fasin blong Lod, blong oli save mekem ol ae oli kam blaen, mo mekem hat blong ol pikinini blong ol man i kam strong.

28 Taswe, yu stap luk we afta buk ia i go aot tru ol han blong bigfala mo rabis jos, i gat plante klia mo gudgudfala samting we oli bin tekemaot long buk ia, we i buk blong Smol Sipsip blong God.

29 Mo afta we ol samting ia we oli klia mo gudgudfala oli lus, buk ia i go long evri kantri blong Ol Jentael; mo afta we i go long evri kantri blong Ol Jentael, yes, i go krosem plante solwota we yu bin luk wetem Ol Jentael we oli bin go fored, oli aot long kalabus, yu luk—from plante samting ia we oli klia mo gudgudfala we oli bin tekemaot long buk ia, we oli bin isi blong ol pikinini blong ol man blong andastanem, folem klia fasin we i stap long Smol Sipsip blong God—from ol samting ia we oli tekemaot long gospel blong Smol Sipsip, wan bigfala namba blong ol pipol i foldaon, yes, inaf blong mekem se Setan i gat bigfala paoa ova long olgeta.

30 Be, yu luk se Ol Jentael we i bin go fored, oli aot long kalabus, mo oli bin kam antap tru long paoa blong God ova long evri narafala kantri, long fes blong graon we i gud tumas i bitim ol narafala graon, we i graon we Lod God i bin mekem kavenan wetem papa blong yu, se laen blong hem i mas gat ^agraon ia blong olgeta we oli kasem long papa; taswe, yu luk we Lod God bae i no letem se Ol Jentael bae i prapa spolem gud evriwan olgeta blong laen blong yu we oli bin ^bmiks, we oli stap long medel blong ol brata blong yu.

31 Mo tu, bae hem i no letem se Ol Jentael bae oli ^aprapa spolem gud laen blong ol brata blong yu.

32 Mo tu, Lod God bae i no letem se Ol Jentael bae oli stap oltaem long nogud ples blong stap blaen, we yu luk oli stap long hem, from ol klia mo ol gudgudfala pat blong gospel blong Smol Sipsip we ^arabis jos ia i bin holembak, we yu bin luk taem we hem i stat.”

33 Taswe, Smol Sipsip blong God i talem: “Bae mi gat sore long Ol Jentael, taem we bae mi panisim smol haf nomo blong laen blong Isrel wetem panis we i strong tumas.”

34 Mo i bin hapen se enjel blong Lod i toktok long mi, i talem se: “Luk, Smol Sipsip blong God i talem, afta we mi bin visitim ^asmol haf we i stap yet blong laen blong Isrel—mo smol haf ia we i stap yet we mi tokbaot, oli ol laen blong papa blong yu—taswe, afta we mi panisim olgeta wetem jajmen, mo mi kilim olgeta tru long han blong Ol Jentael, mo afta, Ol Jentael oli ^bfoldaon tumas, from we ol samting ia we oli klia mo gudgudfala blong ^dgospel blong Smol Sipsip we rabis jos ia i bin holembak olgeta, we i mama blong ol woman blong rod, Smol Sipsip i talem—bae mi gat sore long Ol Jentael long dei ia, inaf blong mekem se bae mi ^ekarem i kam long olgeta, wetem paoa blong miwan, plante long gospel blong mi we bae i klia mo gudgudfala,” Smol Sipsip i talem.

35 From, luk, Smol Sipsip i talem: “Bae mi soemaot miwan long ol laen blong yu, blong oli raetem plante samting we bae mi mas tijim long olgeta, we bae oli klia mo gudgudfala; mo afta ol laen blong yu bae oli ded, mo oli kam slak from oli lusum bilif, mo tu, ol laen blong ol brata blong yu; luk, ol ^asamting ia bae mi haedem, blong i kamaot i go long Ol Jentael, tru long presen mo paoa blong Smol Sipsip.”

36 “Mo long ol samting ia bae oli raetem ^agospel blong mi,” Smol Sipsip i talem, “mo ^bstrong ston blong mi mo fasin blong mi blong sevem man.”

37 Mo bae mi ^ablesem olgeta we oli lukaotem blong karem i kam ^bSaeon blong mi long dei ia, from bae oli gat ^dpresen mo paoa blong Tabu Spirit; mo sapos oli ^estap strong kasem en, bae God i leftemap olgeta long las dei, mo bae mi sevem olgeta long ^fkingdom we i no gat en blong Smol Sipsip; mo eni man we i ^gtalemaot pis, yes, nius we i karem bigfala glad i kam, bae oli kam naes tumas antap long ol bigfala hil.

38 Mo i bin hapen se mi bin luk smol haf we oli stap yet blong laen blong ol brata blong mi, mo tu, ^abuk blong Smol Sipsip blong God, we i bin kam aot long maot blong Ol Jiu, we i bin kam aot long Ol Jentael ^bi go long samfala we oli stap yet blong ol pikinini blong ol brata blong mi.

39 Mo afta we i bin kasem olgeta, mi bin luk sam narafala ^abuk we i bin kam tru long paoa blong Smol Sipsip long Ol Jentael i go long olgeta, blong ^bwinim tingting blong Ol Jentael mo smol haf we i stap yet blong laen blong ol brata blong mi, mo tu, Ol Jiu we i bin seraot olbaot long ful fes blong wol, se ol histri blong ol profet mo blong ol twelef aposol blong Smol Sipsip oli ^dtru.

40 Mo enjel i bin toktok long mi, i talem se: “Ol ^alasfala histri ia, we yu bin luk long medel blong Ol Jentael, bae oli ^bwitnes long saed blong trutok blong ^dfaswan, we i blong ol twelef aposol blong Smol Sipsip, mo bae i soem ol samting we i klia mo gudgudfala we oli bin tekemaot long faswan; mo bae i soem long evri famli, lanwis, mo pipol se Smol Sipsip blong God i Pikinini blong Papa we i no Save Finis, mo ^eSevya blong wol; mo we evri man i mas kam long hem, sapos no, hem i no save sevem olgeta.

41 Mo oli mas kam folem ol toktok we bae oli stanap tru long maot blong Smol Sipsip; mo ol toktok blong Smol Sipsip bae oli soemaot long ol histri blong laen blong yu, mo tu, long ol histri blong olgeta twelef aposol blong Smol Sipsip; taswe, tufala tugeta i mas stanap long ^awan; from i gat ^bwan God mo wan ^dMan blong Lukaot long Sipsip ova long ful wol.

42 Mo taem ia bae i kam we hem i mas soemaot hemwan long evri kantri, long Ol ^aJiu tugeta wetem Ol Jentael tu; mo afta we hem i bin soemaot hemwan long Ol Jiu mo tu long Ol Jentael, nao bae hem i soemaot hemwan long Ol Jentael mo tu long Ol Jiu, mo ^blaswan bae i faswan, mo ^dfaswan bae i laswan.”