1 Bwa e koro bukina i mwin are I tangiria ni kan atai bwaai ake e a tia n noori tamau, ao I kakoaua bwa e kona te Uea ni kaoti nakoiu, ao ngke I a tekateka man ^aiangoi baikai inanou ao e a ^buotai nako Tamnein te Uea, eng, nako taubukin te ^cmaunga ae moan te rietata, ae I tuai man nooria mai mwaaina, ao are I bon tuai man nakonako naba i aona.

2 Ao e taku te Tamnei nakoiu: Nooria, teraa ae ko tangiria?

3 Ao I taku: I kan noori bwaai ake e a tia n ^anoori tamau.

4 Ao e taku te Tamnei nakoiu: Ko kakoaua ae e a tia tamam n noora te ^akai are e a tia n taekinna?

5 Ao I kaeka: Eng, ko bon ataia ae I ^akakoauai ana taeka ni kabane tamau.

6 Ao ngke I a tia n taekin taeka aikai, e takarua te Tamnei ma te bwanaa ae baibati, ni kangai: Otanna nakon te Uea, te Atua ae moan te rietata; bwa bon ngaia te Atua iaon te ^aaonaba ni kabane, eng, iaon bwaai ni kabane. Ao ko na kakabwaiaki ngkoe, ae Nibwaai, ngkai ko ^bkakoaua Natin te Atua ae moan te rietata; mangaia ae, ko na noori bwaai ake ko kan noori.

7 Ao nooria ko na anganaki aei bwa te ^akanikina, bwa ngkana ko a tia n noora te kai are e karika te uaa are e katoonga tamam, ao ko na noora naba te mwaane ae e na ruo mai karawa, ao ko na kakoaua; ao ngkana ko a tia ni nooria ao ko na ^btataekinna ae bon ngaia Natin te Atua.

8 Ao e koro bukina bwa e taku te Tamnei nakoiu: Taraia! Ao I taraia ao I a noora te kai; ao bon titebo ma te ^akai are e a tia n nooria tamau; ao moan te korakora tamaroana, eng, riaon tamaroan bwaai ni kabane; ao ^bmainainana e a bon riaon mainainan te tinoo are e kamwaeaki n te ang.

9 Ao e koro bukina bwa ngke I a tia n noora te kai, ao I taku nakon te Tamnei: I nooria bwa ko a tia ni kaota nakoiu te kai ae ^akakawaki riki nakon bwaai ni kabane.

10 Ao e taku nakoiu: Tera ae ko tangiria?

11 Ao I kaeka ni kangai: I kan ataa ^ananona—bwa I kaakarabakau nakoina n titebo ma aron au kaakarabakau nakon te aomata temanna; bwa I nooria bwa titebo ^bteiteina ma te aomata, ma I bon ataia bwa bon Tamnein te Uea ngaia; ao e kaakarabakau nakoiu n aiaron ana kaakarabakau te aomata nakon te aomata.

12 Ao e koro bukina bwa e taku nakoiu: Taraia! Ao I taraia n aiaron ae I bakan taraia, ma I aki nooria; bwa e a bua mai irarikiu.

13 Ao e koro bukina bwa I taratara nako ao I noora te kaawa ae korakora ae Ierutarem, ao kaawa riki tabeua. Ao I noora naba te kaawa ae Natareta; ao i nanon te kaawa ae ^aNatareta ao I noora iai te ^bkibono, ae e rang raka tamaroana ao mainainana.

14 Ao e koro bukina bwa I a noora naba ^akarawa ae e uki; ao e a ruo rikaaki te anera n tei imatau; ao e taku nakoiu: Nibwaai, tera ae ko nooria?

15 Ao I kaeka nakoina: Te kibono, ae raka riki tikiraoina ma tamaroana nakoia kibono ni kabane.

16 Ao e taku nakoiu: Ko ataia ae e na ruo te Atua ni kamangoria nako aon te aba?

17 Ao I kaeka nakoina: I ataia ae e tangiriia natina; ma I aki atai nanon bwaai ni kabane.

18 Ao e taku nakoiu: Taraia, te ^akibono are ko a tia n nooria bon ^btinan Natin te Atua, n te maiu n rabwata.

19 Ao e koro bukina bwa I a nooria ae e uotaki nako i nanon te Tamnei; ao ngke e a tia ni uotaki nako i nanon te ^aTamnei n te tai ae maan, ao e a taetae te anera nakoiu, ni kangai: Nooria!

20 Ao I taraia ao I a manga noora riki te kibono arei, ae taua te ^ateei i nanon baina.

21 Ao e taku te anera nakoiu: Noora ana ^aTiibu te Teei te Atua, eng, are bon ^bNatin te ^cTama are Akea Tokina! Ko a oota n nanon te ^dkai are e a tia n nooria tamam?

22 Ao I kaeka nakoina, ni kangai: Eng, bon ana ^atangira te Atua, are tibwatibwaia nako nanoia natin te aomata n taabo nako; mangaia ae, bon ngaia te bwai ae moamoa tangirana nakon tangiran bwaai ni kabane.

23 Ao e taetae nakoiu, ni kangai: Eng, ao bon te bwai ae moan baan te ^akakukurei nakon te tamnei.

24 Ao ngke e a tia n taekin bwaai aikai, ao e taku nakoiu: Taraia! Ao I taraia, ao I a noora Natin te Atua ni ^awaaki i buakoia natia aomata; ao I a nooriia aika mwaiti aika a bwaka i waena man taromauria.

25 Ao e koro bukina bwa I a noora naba te ^akai ae te biti, are e a tia n nooria tamau, ae bon ana taeka te Atua, are e tiki nakon te koburake n ^bran ae maiu, ke n nakon te ^ckai ni kamaiu; aika ranna bon kanikinaean ana tangira te Atua; ao I a nooria naba ae te kai ni kamaiu bon kanikinaean naba ana tangira te Atua.

26 Ao e taku te anera nakoiu: Taraia ao noora ^aruon te Atua ni kamangoria!

27 Ao I taraia ao I ^anoora te Tia Kaboa te aonaba, are e a tia n taekinna tamau; ao I a noora naba te ^bburabeti are e na katauraoa te kawai i mwaaina. Ao e a waaki Ana Tiibu te Teei te Atua ni ^cbwabetitoaki irouna; ao i mwin bwabetitoakina, ao I a noora karawa bwa e uki, ao e a ruo te Tamnei ae Raoiroi mai karawa ao e a tiku i aona n ai aron te ^dtaobe.

28 Ao I a nooria naba n nako ni karaoa ana mwakuri n ibuobuoki i buakoia aomata, n te ^amwaaka ao te mimitong ae korakora; ao a uanao aomata ake a botaki bwa a na ongora irouna; ao I a nooria naba bwa a kakioa nako mai buakoia.

29 Ao I a nooria naba bwa ^atengaun ma uoman aika a iria. Ao e koro bukina bwa a uotaki nako i nanon te Tamnei mai matau, ao I a aki nooriia.

30 Ao e koro bukina bwa e taetae riki te anera nakoiu, ni kangai: Nooria! Ao I tararake, ao I manga noora naba karawa ae uki, ao I a nooriia ^aanera aika a ruo nako aoia natia aomata; ao a karaoi mwakuri n ibuobuoki nakoia.

31 Ao e taetae riki nakoiu, ni kangai: Nooria! Ao I taraia, ao I a noora ana Tiibu te Teei te Atua ni waaki i buakoia natia aomata. Ao I a nooriia aomata aika a uanao aika a aoraki, aika a taonaki n aoraki aika a kakaokoro, ma ^ariaboro, ma ^btamnei aika a bareka; ao e taetae te anera ao e kaoti bwaai aikai ni kabane nakoiu. Ao a ^ckamaiuaki ni mwaakan ana Tiibu te Teei te Atua; ao a kaotinakoaki taian riaboro ma tamnei aika bareka.

32 Ao e koro bukina bwa e taetae riki te anera nakoiu, ni kangai: Nooria! Ao I taraia ao I a noora ana Tiibu te Teei te Atua, ae e kairaki nako irouia aomata; eng, e a ^amotikaki taekan Natin te Atua ae akea tokina iroun te aonaba; ao I nooria ma ni kakoaua karaoana.

33 Ao Ngai ae Nibwaai, I a nooria ngke e a tabekaki nako aon te ^akaibangaki ao n ^btiringaki ibukin buren te aonaba.

34 Ao ngke e a tia n tiringaki ao I a nooriia aomata aika uanao i aon te aonaba, aika botaki bwa a na kaaitaraia ana abotoro te Tiibu te Teei; bwa anne te ara are a anganaki naake tengaun ma uoman iroun ana anera te Uea.

35 Ao a botaki aomata aika uanao iaon te aonaba; ao I a nooria bwa a mena i nanon te ^aauti ae bubura man mwawawa ae titebo ma te auti are e nooria tamau. Ao e a manga taetae riki nakoiu ana anera te Uea, ni kangai: Tara te aonaba ma wanawanana nako; eng, nooria bwa e a botaki te bata are Iteraera ni kabane bwa na kaaitaraia ana abotoro te Tiibu te Teei.

36 Ao e koro bukina bwa I a nooria ma ni kakoaua, bwa te auti are e bubura man mwawawa bon ^akainikatongan te aonaba; ao e a bwaka, ao te bwaka aio bon moan te korakora. Ao e taetae riki ana anera te Uea nakoiu, ni kangai: Aio bon uruakan ni kabane taian aba, reeti, neewe, ao aomata, ake a na kaaitaraia ana abotoro ake tengaun ma uoman te Tiibu te Teei.