1 Ao e koro bukina bwa ti a manga waakina mwanangara i nanon te rereua; ao ti a mwananga nako mainiku man te tai arei. Ao ti mwananga ao ti rinanon te korakai ae korakora i nanon te rereua; ao a bungia ataei kaainabara i nanon te rereua.

2 Ao e korakora ana kakabwaia te Uea iaora, bwa e ngae ngke ti maiu man irikoia maan aika ^aaki kamwaaki i nanon te rereua, ara aine a mwaiti ranin mammaia ibukiia natia, ao a korakora, eng, n ai aroia mwaane; ao a moanna ni kona mwaamwanangaia n akea te ngurengure.

3 Ao ti a nooria n aio bwa e riai ni kakoroaki bukin ana tua te Atua. Ao ngkana a ^akaawakin ana tua te Atua natiia aomata ao e na kateimatoai marurungiia, ma ni kakorakoraia, ao n anganiia kawai ake a na kona iai ni kakoroi bukin bwaai ake e a tia n tuatua bwa ana karaoi; mangaia are, e a ^bkatauraoi kawai ibukira n ara tai n tiku n tataninga i nanon te rereua.

4 Ao ti tiku n tataninga i nanon te maan ae ririki aika mwaiti, eng, i nanon waniua te ririki n te rereua.

5 Ao ti a roko n te aba ae ti aranna bwa te Aba ni Mari, ibukin mwaitin uaanikaina ma karewen te manibeeru iai; ao a bane ni katauraoaki bwaai aikai ni kabane iroun te Uea bwa ti aonga n aki mate. Ao ti a noora te marawa, ae ti aranna bwa Iriantam, ae nanona bon raan aika mwaiti.

6 Ao e koro bukina bwa ti a katei ara umwanriann imataniwin te aba; ao e ngae ngke ti a tia n rinanon te korakai ma ^akaangaanga aika mwaiti, eng, aika moan te mwaiti ao ti aki kona ni koroi taekaia ni kabane, e a korakora riki kimwareireira n rokora i mataniwin te aba: ao ti arana te tabo arei bwa te Aba ni Mari, ibukin uaanikaina aika mwaiti.

7 Ao e koro bukina bwa i mwin tiku ngai ae Nibwaai n te tabo ae te Aba ni Mari i nanon te maan ae boong aika mwaiti, e roko bwanaan te Uea nakou ao e taku: Teirake, ao nakon te maunga. Ao e koro bukina bwa I teirake ao I nakon te maunga, ao n tang nakon te Uea.

8 Ao e koro bukina bwa e taetae te Uea nakoiu, ni kangai: Ko na kabaa te kaibuke, n ^aaron ae N na kaotia nakoim, bwa I aonga ni uotia am botanaomata riaon marawa aikai.

9 Ao I taku: Te Uea, N na nakea bwa I aonga ni karekea te tano are iai te biti iai bwa N na kabuekia, bwa I aonga ni karaoi bwai ni mwakuri ibukin kabaan te kaibuke are ko a tia ni kaotia nakoiu?

10 Ao e koro bukina bwa e tuangai te Uea te tabo are N na nako iai bwa I aonga ni kunea te tano are iai te biti iai, bwa I aonga ni karaoi bwai ni mwakuri.

11 Ao e koro bukina bwa Ngai ae Nibwaai, I a karaoa te iriba ibukin ukan te ai, man kunin maan; ao ngke I a tia ni karaoa te iriba, are N na kona n uka te ai iai, ao I a oroi atibu aika uoua bwa N na karika te ai mai iai.

12 Bwa te uea e aki kariaia bwa ti na kainnanoaki ni kauraan te ai ae mwaiti, n tain mwamwanangara i nanon te rereua; bwa e taku: N na karewei kanami, bwa kam aonga n aki ^akuukan;

13 Ao N na riki naba bwa am taura i nanon te rereua; ao N na ^akatauraoa te kawai imwaaimi, ngkana kam kaawakin au tua; mangaia ae, ngkana kam kaawakin au tua ao kam na kairaki nakon te ^baba ni berita; ao kam na ^cataia bwa kam kairaki irou.

14 Eng, ao e taku naba te Uea: Ngkana kam roko n te aba ni berita, kam na ^aataia ae Ngai, ae te Uea, bon te ^bAtua; ao Ngai ae te Uea, ae kamaiungkami man te kamaunaki; eng, bwa bon Ngai ae I kaotinakoingkami man te aba are Ierutarem.

15 Mangaia ae, Ngai ae Nibwaai, I kakorakorai ni kaawakin ana tua te Uea, ao I kairoroia tariu bwa a na kakaonimaki ma ni botumwaka.

16 Ao e koro bukina bwa I a karaoi bwai ni mwakuri man te tano are iai te biti iai are I karannakoa man te bwa.

17 Ao ngke a nooria tariu bwa n nang moana ^akabaan te kaibuke, ao a ngurengure nakoiu ni kangai: Bon te baba tarira, bwa n ana iango e kona ni kabaa te kaibuke; eng, ao n ana iango e kona n riaon marawa aika korakora aikai.

18 Ao a bon ngurengure tariu ni kaitaraai, ao nanoia a rawa ni mwakuri, bwa a aki kakoaua ae I kona ni kabaa te kaibuke; ke ni kakoaua naba ae I anganaki kaetieti mai iroun te Uea.

19 Ao e koro bukina bwa Ngai ae Nibwaai, I a taonaki n te nanokawaki ae korakora ibukin matoan nanoia; ao ngke a noora nanokawakiu ao a kukurei i nanoia, n te aro are a ^akimwareirei irou man taku: Ti ataia bwa ko aki kona ni kabaa te kaibuke, bwa ti ataia bwa e aki tau am atatai; mangaia ae, ko aki kona ni kabobonga te mwakuri ae korakora aio.

20 Ao titebo ngkoe ma tamara, are e reke nako n ana ^aiango ni burababa i nanona; eng, e a tia ni kairira nako man te aba are Ierutarem, ao ti a tia n rerebu i nanon te rereua i nanon ririki aika mwaiti aikai; ao a tia ni kakorakaiaki kaainabara, n aia tai ni bikoukou; ao a tia ni bungia natia i nanon te rereua ao n rinanon kaangaanga n aekaia nako, ma ti te mate; ao e taraa n tamaroa riki ngke arona bwa a mate i Ierutarem i mwaain ae a kitanna nakon ae a kainnanoaki n taian kangaanga aikai.

21 Taraia, a mwaiti ririki ae ti a tia ni kainnano iai i nanon te rereua, aikai ririki aika ti kona n tia ni kimwareirei iai ni kaubwaira ao n abara are ti riki mai iai; eng, ao ti na bon tia n nang kukurei riki.

22 Ao ti ataia bwa aomata ake a tiku i Ierutarem bon ^aaomata aika raoiroi; bwa a kaawakin ana tua ma ana babaire te Uea, ao ana tua ni kabane, n aron ana tua Mote; mangaia ae, ti ataia bwa aomata aika raoiroi; ao e a tia tamara ni motiki taekaia, ao ni kairira nako bwa ti aonga n ongo n ana taeka; eng, ao titebo tarira ma ngaia. Ao aikai aron tein aia taeka tariu n ngurengure ma ni kaitaraira.

23 Ao e koro bukina bwa Ngai ae Nibwaai, I taetae nakoia, ni kangai: Kam kakoaua bwa a na kairaki nako ara bakatibu, aika tibun Iteraera, n nako mai nanon baia I-Aikubita ngke arona bwa a aki ongo nakon ana taeka te Uea?

24 Eng, n am iango a na tia ni kainaomataaki man te tautoronaki, ngke arona bwa e aki tuatua te Uea nakon Mote bwa e na ^akairia nako man te tautoronaki?

25 Ngkai kam a ataia bwa a tia tibun Iteraera n ^atautoronaki; ao kam ataia bwa a anganaki ^bmwakuri aika riao korakoraia, aika moan te kangaanga karaoaia; mangaia ae kam ataia bwa e tamaroa kaotinakoaia man te tautoronaki.

26 Ngkai kam a ataia bwa e tuangaki ^aMote iroun te Uea bwa e na karaoa te mwakuri ae korakora aio; ao kam ataia bwa e bwenauaki Taari are Uraura nako ikai ao nako ikekei n ana ^btaeka, ao a mwananga iaon te tano ae mwauu.

27 Bwa kam ataia ae a kabwabwaaki I-Aikubita aika kaain ana taanga ni buaka Bwarao i nanon Taari are Uraura.

28 Ao kam ataia naba ae a kamwarakeaki n te ^amaana ngke a mena i nanon te rereua.

29 Eng, ao kam ataia naba bwa e ^akatabwena te bwa Mote n ana taeka ni kaineti ma mwaakan te Atua are mena irouna, ao e a bwaro mai iai te ran, bwa a na katoka iai takaia tibun Iteraera.

30 Ao e ngae ngke a kairaki iroun te Uea ae Atuaia, ma aia Tia Kaboia, are e rimoaia ni kairia n te ngaina ao n anganiia te oota n te bong, ao ni karaoi naba bwaai ni kabane ake a ^ariai bwa a na reke irouin te aomata, a kamatoai nanoia ma ni kamataki aia iango, ao n teirake ni ^bkaitaraa Mote ao ni kaitaraa te Atua ni koaua ae maiu.

31 Ao e koro bukina bwa n aron ana taeka ao e ^atiringia; ao n aron ana taeka ao e ^bkairia; ao n aron ana taeka e karaoi bwaai ni kabane ibukiia; ao bon akea te bwai ae karaoaki ae e aki riki man ana taeka.

32 Ao ngke a roko n iteran te karaanga are Ioretan ao e a kakorakoraia ni ^akakionakoia kaain te aba arei, eng, ni kamaenakoia ao n tiringia.

33 Ao ngkai, n ami kaantaninga a raoiroi natin te aba aio, ake a maeka n te aba ni berita, ake a kakionakoaki irouia ara bakatibu? N ami kaantaninga a raoiroi? Taraia, I tuangkami, A aki.

34 N ami kaantaninga a na korakora riki tangirakiia ara bakatibu nakoia ngke arona bwa raoiroi? I tuangkami, A aki.

35 Taraia, titebo ^aaomata ni kabane iroun te Uea; ane e ^braoiroi e na ^cnanonaki riki roun te Atua. Ma taraia, a tia aomata aikai ni kabane n aki butimwaea ana taeka ni kabane te Atua, ao a onrake n te bure; ao e tabwanin unin te Atua i aoia; ao e kamaraiaa te aba te Uea nakoia, ao e kakabwaiaa nakoia ara bakatibu; eng, e a manga kamaraia nakoia bwa a na kamaunaki iai, ao e kakabwaiaa nakoia ara bakatibu bwa ana tautaeka iaona.

36 Taraia, e a tia te Uea ni ^akarika te ^baonaba bwa e na ^cmaekanaki; ao e a tia ni karikiia natina bwa a na karikiia bwa a na abanna.

37 Ao e ^akarikirakea te botanaomata ae raoiroi, ao e kamaunanakoia botanaomata aika buakaka.

38 Ao e kairia nako aika a raoiroi nakon ^aaaba aika kakawaki, ao e ^bkamaunanakoia aika a buakaka, ao e kamaraia te aba nakoia i bon ibukiia.

39 E tautaeka i karawa ike rietata, bon ana kaintoka n uea, ao te aonaba aio bon ^annen waena.

40 Ao e tangiriia ake a karikia bwa Atuaia. Taraia, e tangiriia ara bakatibu, ao e ^aberita mangaia, eng, nakoia naba Aberaam, ^bItaaka, ao ^cIakobwa; ao e uring taian berita aika tabu ake e a tia ni karaoi; mangaia ae e kairia nako mai aban ^dAikubita.

41 Ao e kaetii aroia i nanon te rereua n ana kai; bwa a ^akamatoai nanoia, n ai aromi; ao e kaetia te Uea man aia buakaka. E kanakoia taian ^bnaeta aika kibakiba man ura i buakoia; ao i mwin tenakiia ao e a katauraoa te kawai are a na ^ckamarurungaki iai; ao te mwakuri are a riai ni karaoia bon ti te tararake; ma ngkai e ^dbeebete te kawai, ke e aki kaangaanga, ao a mwaiti ake a mate.

42 Ao a kamatoai nanoia n taai tabetai, ao a ^ataetaebuaka ^bMote, ao ni kaitaraa naba te Atua; ma e ngae n anne ao kam ataia bwa a kairaki ni mwaakana ae akea kabootauana nakon te aba ni berita.

43 Ao ngkai, i mwin bwaai ni kabane aikai, e a roko te tai are a bane ni buakaka iai, eng, a kaan tawa; ao I aki ataia ma n te bong aei a boni kaan tiringaki; bwa I bon ataia ni koaua bwa e na roko te bong are, a na kamaunaaki iai, ma bon ti tabeman ake a na kairaki nako nakon te tautoronaki.

44 Mangaia ae e ^atuatua te Uea nakon tamau bwa e na mwananga nakon te rereua; ao a kataia Iutaia naba n anaa maiuna; eng, ao ^bkam a tia naba ni kataia n anaa maiuna; mangaia ae bon taan tiriaomata ngkami inanomi ao bon titebo ngkami ma ngaiia.

45 Kam ^awaekoa ni karaoa te buakaka ma ni waeremwe n uringa te Uea ae Atuami. Kam a tia n noora te ^banera, ao e taetae nakoimi; eng, kam a tia n ongo bwanaana n taai tabetai; ao e a tia n taetae nakoimi n te bwanaa ae maaraara ma ni beebete, ma kam ^caki namakinna, ao kam aki namakin ana taeka; mangaia ae e taetae nakoimi n aiaron rebwetauan te baa, are e karika rurun te aonaba n aiaron ae e nang bwenauaki.

46 Ao kam ataia naba ae e kona ni kabuaa te aonaba ni ^amwaakan ana taeka ae moan te mwaaka; eng, ao kam ataia naba bwa man ana taeka a kona n aoraoi taabo ake a tabukibuki, ao n uruaki taabo aika aoraoi. O, bukin tera ngkai a rang ni matoatoa nanomi?

47 Taraia, e a rawawata tamneiu ibukimi, ao e a kakorakaiaki nanou; I maaku bwa mwiina kam na teweaki nako n aki toki. Taraia, I ^aonrake n Tamnein te Atua, n te aro are ^bakea korakoran rabwatau.

48 Ao ngkai e koro bukina bwa ngke I a tia n taekin taeka aikai ao a un irou, ao a kan karenakoai nako kabin taari; ao ngke a mwananga bwa a na katokai baia i aou ao I taetae nakoia, ni kangai: N aran te Atua ae Moan te Mwaaka, I tuangkami bwa kam na aki ^ariingai, bwa I onrake ni ^bmwaakan te Atua, n te aro are e kona ni bue iai irikou; ao e na ^crai te aomata are e katoka baina iaou n aiaron te uteute ae mwau; ao e na riki n akea ni mwaakan te Atua, bwa ae e na oroia te Atua.

49 Ao e koro bukina bwa Ngai ae Nibwaai, I tuangiia bwa a na aki manga ngurengure ni kaitaraa tamaia; ke n rawa ni mwakuri ibukiu, bwa e a tia te Atua n tuatua nakoiu bwa N na kabaa te kaibuke.

50 Ao I taku nakoia: ^aNgkana e a tia te Atua n tuatua nakoiu bwa N na karaoi bwaai ni kabane ao N na kona ni karaoi. Ngkana e tuatua nakoiu bwa N na kangai nakon te marawa aei, riki bwa te aba, ao e na riki bwa te aba; ao ngkana I taekinna, e na koro bukina.

51 Ao ngkai, ngkana te Uea iai mwaakana ae korakora ao e a tia ni karaoi kakai aika mwaiti i buakoia natia aomata, e aera ngkai e na aki kona ni ^akairai bwa N na kabaa te kaibuke?

52 Ao e koro bukina bwa a mwaiti bwaai ake Ngai ae Nibwaai, I a taekin nakoia tariu, n te aro are a aki reke aia taeka ao a aki kona n teirake ni kaitaraai; ao a aki naba katokai baia iaou, ke n ringai n tabon baia i nanon te maan ae boong aika mwaiti. Ao a aki karaoi bwaai aikai bwa a rawa n rai imatau, bwa e korakora ^aTamnein te Atua; ao e a tia ni kairi nanoia.

53 Ao e koro bukina bwa e taku te Uea nakoiu: Arora baim nakoia tarim, ao a na aki rai i matam, ma N na karuruia, e taku te Uea, ao N na karaoa aei, bwa a aonga n ataia ae Ngai bon te Uea ae Atuaia.

54 Ao e koro bukina bwa I arora baiu nakoia tariu, ao aki rai imatau; ma e karuruia te Uea, n aiaron te taeka are e a tia n taekinna.

55 Ao ngkai a taku: Ti ataia ma te koaua bwa e mena te Uea iroum, bwa ti ataia bwa bon mwaakan te Uea are e a tia ni karuruira. Ao a bwaka imatau, ao a nang bon ^aneboai, ma I aki kariaia bwa a na karaoia, ni kangai: Bon tarimi ngai, eng, ae tarimi ae te karimwi; mangaia ae neboa te Uea ae te Atua, ao karinea tamam ao tinam, bwa aongo ni ^bkamwaitaki ami bong ni maiu i aon te aba are e na anganingkami te Uea ae Atuami.