1 Shiyeʼ ayóí ííníshʼníinii, nichʼįʼ ánááʼáshdlééh áko tʼahdii hinishnánígíí nił bééhózin dooleeł biniyé; ndi díí tsʼídá baa yínííł hasinígíí baa náʼiisóóh dooleeł.

2 Háálá áko shooh, Laman dineʼé tsʼídá yéego bił daʼahiigą́ą́ʼ, dóó nihikʼeh dadeesdlį́į́ʼ; dóó Archeantus, dóó ałdóʼ Luram, dóó Emron éí bééshhał yee daneezná; aooʼ, diné yáʼádaatʼéehii tʼóó ahayóí nihitsʼą́ą́ʼ ndaaztseed.

3 Áádóó áko shooh, shiyeʼ, díí éí binásdzid háálá díí dineʼé doo ádaańdaʼookąąh da, éí Laman dineʼé ałtso ndabidoołtsił nisin, dóó Chʼį́įdii éí tʼáá áłahjįʼ ałchʼįʼ bádahachįʼgo áyósin.

4 Áko shooh, shí éí tʼáá áłahájįʼ bił ndaashnish; dóó Diyin God bizaad tʼáá aaníí átʼéhígíí tsʼídá yéego bee bichʼįʼ yáshtiʼgo bitah dahodiiłnááʼ dóó shichʼįʼ bá ńdahachįįh; dóó tʼáá hazhóʼógo bichʼįʼ hanásdzihgo éí tʼóó bijéí yikʼijįʼ ndeiłtłʼis; ákohgo, Diyin Bóhólníihii biʼIiʼ Sizį́ Diyinii éí kʼad doo bił dahólǫ́ǫ da nisingo tʼóó binásdzid.

5 Háálá tsʼídá tʼóó báhádzidgo bá ńdahachįįh áko dadootsaałjįʼ ndi doo yéédaaldzid da nahalin; dóó ayóó óʼóʼní bitahgóó ásdįįd, dóó dił yíká ádáátʼį́ dóó áká ndeeʼáh tʼéiyá danízin.

6 Áádóó kʼad, shiyeʼ ayóí ííníshʼníinii, azhą́ bąąhági ádaatʼį́į ndi, tsʼídá yéego bidadiniilkaalgo ndaniitin doo; háálá niʼkwíidzaago éí, nihikʼijįʼ saad siʼą́ą doo; háálá nahasdzáán tʼah bikáaʼgi neidáago éí nihinaanish ádiilnííł, éí éí yáʼátʼéehii yikʼijįʼ naalnishígíí bikʼeh didiidleeł, dóó áko nihiiʼ sizíinii Diyin God bił hazʼą́ądi bił yah anídiitʼash.

7 Áádóó kʼad éí díí diné tiʼdahooníhígíí náhásoh dooleeł. Háálá ééhózinígíí Amoron yee shił hoolneʼę́ę, áko shooh, Laman dineʼé éí tsʼídá tʼóó ahayóí diné yił dahaazdéél, éí Sherrizah hódah dahazʼą́ą́dóó yił ndahaazdéél; diné, dóó asdzání, dóó áłchíní danilį́įgo.

8 Áádóó áłchíní dabizhéʼé yę́ę dóó asdzání badahastiin yę́ę éí ndeistseed; dóó badahastiin yę́ę bitsįʼ sáanii deiyiyísą́ą́ʼ, dóó áłchíní dabizhéʼé yę́ę bitsįʼ deiyiyísą́ą́ʼ; tó éí ádin, tʼáá hazhóʼó áłchʼį́į́dígo tʼéiyá, yaa ńdeikáah.

9 Áádóó azhą́ Laman dineʼé tsʼídá aláahdi joodláhígíí yaa naakai ndi, nihidineʼé Moriantumdi kéédahatʼínígíí éí díí yiláahgo ádáádzaa. Háálá áko shooh, Laman dineʼé bitsiʼ tʼóó ahayóí yił ndahaazdéél; dóó bikʼijįʼ tsʼídá ayóí ádayóʼnínée dóó tsʼídá tʼáá ałtsoní biláahdi ílíinii yę́ę neʼ yaa náádeidiidlá, éí éiyá atsʼíís dílzin dóó atsʼíís doo bąąh chin álnéhę́ę—

10 Áádóó kódeileʼgo, tsʼídá yéego yichʼįʼ ndahwiiłnáago ndeistseed, áádóó ndeiłtseedgo, deilghał naaldlooshii daʼałchinii daʼayánígi átʼéego, háálá bijéí tsé nitłʼizí nahalin daazlį́ʼígíí biniinaa; dóó díí éí tʼáadoo binásdzidí da daaníigo ákódaatʼį́.

11 O shiyeʼ ayóí ííníshʼníinii, haash yitʼáo díí diné, doo áhaantsídaakees daazlį́į́ʼ—

12 (Áádóó tʼáá díkwíhíyeeʼ nááhaiyę́ędą́ą́ʼ nizhónígo dóó diné bá dahózhóonii danilį́įgo kéédahatʼíi ńtʼę́ę́ʼ)

13 Ákondi O shiyeʼ, haash yitʼáo diné díigi ádaatʼéego, tʼóó ahayóí tsʼídá aláahdi joodláhígíí tʼéiyá yaa bił dahoneeni—

14 Haash yitʼéego éí Diyin God bílaʼ yee doo nihá nahidooʼááł da?

15 Áko shooh, shijéí éí yícha: Yíi díí diné bichʼįʼ. Kʼad bá nihoníʼaah, O Diyin God, bibąąhági ádaatʼéii, dóó doo yáʼáshóonii, dóó tsʼídá aláahdi joodláhígíí nidááhdóó nahjįʼ ńdíłʼįįh!

16 Áádóó nááná, shiyeʼ, asdzání bąąh ádahasdįįdii dóó dabichʼéʼé tʼóó ahayóí tʼahdii Sherrizahdi; dóó bidaʼiináanii Laman dineʼé tʼáadoo dah deidiijahą́ʼígíí éí, Zenephi bá ndaabaahii ałtso dah deidiijaaʼ, áko éí tʼáá bíhólníihgo chʼiyáán hadeinitáago ádayiilaa; áko tʼóó ahayóí sáanii tʼáá ákǫ́ǫ́ bił chʼaa dahazlį́į́ʼ dóó náádahidiilyá.

17 Áádóó ndaabaahii bił naashkaigíí éí chʼééh deeskai; dóó Laman dineʼé bindaabaahí éí shí dóó Sherrizah bitaʼgi dah yinééł; dóó tʼóó ahayóí éí Aaron bindaabaahii dah yinéłígíí bichʼįʼ adahineezhchą́ą́ʼ éí kʼasdą́ą́ʼ ałtso ndeistseed.

18 O shidineʼé yę́ę tʼóó baaʼihgo deeskai! Kʼé hwiinidzinée ádin dóó ajoobaʼą́ądóʼ ádin. Áko shooh, shí éí tʼáá diné nishłį́, dóó tʼáá dinégi átʼáo shidziil, dóó shá ndaabaahą́ą doo dashíístsʼą́ąʼ da daazlį́į́ʼ.

19 Áádóó tsʼídá tʼóó baaʼihgo deeskai; éí ndi tʼáá aheełtʼéego doo daatsʼíid da silį́į́ʼ, tsʼídá tʼáá ałtso ndeiłtseed, hadaastihígíí dóó áłchíní yázhí ndi, áádóó doo yáʼátʼéehii tʼéí yaa bił dahoneeni; dóó nihidaʼasdzánée dóó nihaadaʼáłchíníyę́ę tʼáá ałtsogóó tsʼídá yiláahgo tiʼdahoonííh; aooʼ, doo baa hojoolneʼígi átʼáo, dóó doodzoh ndi doo bíighah da.

20 Áádóó kʼad, shiyeʼ, díí tʼóó baaʼihgo nihił áhootʼéhígíí éí tʼáá ákódígo baa hodeeshnih. Áko shooh, díí diné bąąhági átʼéii yaa deeskaígíí éí nił bééhózin; nił bééhózingo atłʼáahdi siláí yee dabidziil yę́ę éí ádin, dóó beʼajoobaʼą́ą ałdóʼ ádin; dóó Laman dineʼé yiláahgo bąąhági átʼéii yaa deeskai.

21 Áko shooh, shiyeʼ, Diyin God bichʼįʼ bá hadeesdzihígíí éí doo shá bíighah da éí atíshidoolíił nisin.

22 Ákondi shooh, shiyeʼ, Diyin God éí bichʼįʼ yáʼátʼéehgo ná hadeesdzih, dóó Christ éí baʼííníshłíigo áko yisdáńdíídááł; dóó Diyin God tʼah hiníná ánósingo ná sodiszin, áko bidineʼé Diyin God yaa ńdookah, éí doodago ałtso dínóonéłígíí yidííłtsééł dishní; háálá shí éí shił bééhózin éí nahjįʼ kodabidiʼdoolnííł tʼáá hazhóʼó ádaańdaʼooskango dóó yichʼįʼ nináhááskaigo tʼéiyá.

23 Áádóó daneeznáago éí Jared dineʼé ásdįįdę́ę nahalin doo, háálá hodiyeeshééł dóó doo hańdiníʼą́ą da haʼnínígíí tʼéiyá, bijéí biyiʼ dadineesdlį́į́ʼ.

24 Áádóó daneeznáádą́ą́ʼ, nihí éí nihił bééhózingo tʼóó ahayóí nihidineʼé Nephi dineʼé éí Laman dineʼé yichʼįʼ adahineestʼį́į́ʼ, áádóó tʼóó ahayóí ałdóʼ áajigo anáádahidínóotʼį́į́ł; ákohgo, éí tʼáá díkwíhígo baa naʼízo dooleeł, yínídziʼídą́ą́ʼ dóó shí éí nááshiʼdiilyáago dóó doo naaniiłtsą́ą́góó, ndi átʼahígo náániideestsééł nisin; háálá haneʼ diyinii hadadiilyaaígíí naa deeshnił.

25 Shiyeʼ, Christ yínídlą́; dóó tʼáadoo leʼé nááházooígíí tʼáadoo ayóó baa yínííł níníziní, bikééʼ kódoohníiłgo tʼáá íiyisíí ndaaz nił silį́įgo niyółhééł lágo; ndi Christ beʼadziil nił hólǫ́ǫ doo, dóó tiʼhoozniiʼígíí dóó daaztsánígíí, dóó bitsʼíís yee nihizhéʼé yę́ę yichʼįʼ ííshjání áʼdiilyaa yę́ę, dóó beʼajoobaʼii dóó bee haʼólníinii, dóó beʼayóó átʼéii dóó hoolʼáágóó iiná bíká chohooʼíinii, hoolʼáágóó nihintsékees biiʼ hólǫ́ǫ doo.

26 Áádóó Diyin God bibee ajoobaʼ bee, yáʼąąshdi tsʼídá aláahdi bił hazʼą́ądi, dóó nihiDiyin Bóhólníihii Jesus Christ, bibee adziilii nishʼnáájígo dah sidáhígíí, tsʼídá tʼáá ałtsoní bee bóhólnííh silį́įʼjįʼ, dóó hoolʼáágóó nił hólǫ́ǫ doo. Amen.