1 Shizhéʼé Mormon haneʼ, shí, Moroni shichʼįʼ áyiilaa; dóó tʼáá ániidígo Diyin God binaʼanish bee shikʼihodiiniiʼgo shichʼįʼ íʼiilaa. Áádóó kóníigo, shichʼįʼ íʼiilaa:

2 Shiyeʼ ayóí ííníshʼnínii, Moroni, tsʼídá yéego naa shił hózhǫ́ niDiyin Bóhólníihii Jesus Christ éí naa ákonízin, dóó binaʼanishjí nííkeed, dóó binaanish diyinii binanilnish doo biniyé.

3 Shí tsʼídá tʼáá áłahjįʼ shisodizin biyiʼ nenáshniih, háálá tʼáá áłahjįʼ beʼAwééʼ Diyinii, Jesus, bízhiʼ binahjįʼ Diyin God aTʼaa nilíinii bichʼįʼ sodiszin, háálá éí, biyáʼátʼéehii dóó bibee ajoobaʼ doo nineelʼáanii binahjįʼ, níiníłkąąjįʼ tsʼídá yéego yínídlą́ągo éí nikʼijidlíi doo.

4 Áádóó kʼad, shiyeʼ, díí tsʼídá yéego bąąh shíniʼígíí bee nichʼįʼ hadeesdzih; háálá éí díí saad ahídaahtʼáhígíí ayóó baa yínííł nisin.

5 Háálá, tʼááʼaaníí shił bééhózingo, nihaʼáłchíní yázhí tó bee yilzį́hígíí biniinaa saad ahídasoohtʼą́.

6 Áádóó kʼad, shiyeʼ, yéego nanilnish nííníshní, áko díí tʼáá íiyisíí doo yáʼátʼééhgóó asdzihígíí nihitahdóó nahjįʼ kódadoohłííł, áko, díí biniyé nichʼįʼ iʼiishłaa.

7 Tʼáá nihitah hólónígíí shił bééhoozingo Diyin Bóhólníihii díí binabídééłkid. Áádóó Diyin Bóhólníihii bizaad Iiʼ Sizį́ Diyinii bibee ádziil binahjįʼ yee shichʼįʼ haadzííʼ, kóníigo:

8 Christ, náNináʼnídláii, niDiyin Bóhólníihii dóó niDiyin God, éí bizaad yísíníłtsʼą́ą́ʼ. Áko shooh, nihokááʼgi níyáago bąąhági ádaatʼínígíí ádaańdaʼoohkąąh bidideeshniił yáʼátʼéehgo dahinánígíí éí ndagaʼ; hadaałtʼéhígíí éí doo azeeʼííłʼíní bá wókeed da, ndi tʼáá hazhóʼó doo bitah dahatsʼídígíí tʼéiyá; ákohgo, áłchíní yázhí éí hadaałtʼé, háálá bąąhági ádadoonííłgo éí doo yídeiyííghah da; ákohgo Adam asiihgo bá nihootʼánée éí shí shinahjįʼ bá nahjįʼ kólyaa, áko éí doo bídadéétʼiʼ da; dóó ąąh nahiníłgizhę́ę bibee hazʼáanii ałdóʼ shiiʼ ninítʼiʼ.

9 Áádóó díí kótʼéego éí Iiʼ Sizį́ Diyinii Diyin God bizaad shichʼįʼ íishją́ áyiilaa; ákohgo, shiyeʼ ayóíʼííníshʼníinii, díí shił bééhózin áłchíní yázhí tó bee yilzį́hígíí, éí Diyin God tʼáá íiyisíí bá nahaltʼiʼígíí átʼé.

10 Áko shooh kónidishní díí éí bee naʼnítin doo—ádaanáʼookąąh dóó tó bee alzį́į́h éí bíighahgo béédááhai dóó bąąhágiʼ átʼéii íidoolííł yídáághahígíí bichʼįʼ; aooʼ, amá dóó azhéʼé danilínígíí ádaanáʼoohkąąh dóó tó bee danihiʼdiilzį́į́h, dóó nihaʼáłchíní nahalingo hojoobaʼgo ídaʼdółnééh, bidiníigo bínabiníłtin, áko tʼáá átʼé baʼáłchíní yił yisdááhidookah.

11 Áádóó baʼáłchíní yázhí éí ádaanáʼookąąh doo bídadéétʼiʼ da, dóó ałdóʼ doo tó bee doolzį́įł da. Áko shooh, bee hazʼáanii bikʼehgo tó bee alzį́į́h éí ádaanáʼjookąąhgo bąąhági ádaatʼéii haa néidiidooʼááł.

12 Ákondi áłchíní yázhí éí Christ yinahjįʼ dahiiná, éí tʼáá ńléí hodeeyáádą́ą́ʼ ákótʼé; doo ákótʼéégóó éí, Diyin God akʼijįʼ nilíinii nilį́į doo; dóó Diyin God łahgo ánááʼníłígíí nilį́į doo, dóó diné doo tʼáá aheełtʼéego yaa ntsékeesí nilį́į doo; háálá haashį́į́ néelą́ą́ʼ áłchíní yázhí daneezná tʼáhdoo tó bee dabiʼdilzį́į́hgóó!

13 Ákohgo, áłchíní yázhí doo tó bee dabiʼdilzį́į́hgóó éí doo yisdánáhidookahgóó, áko éí áhoolʼáago chʼį́įdiitahgóó aheeskai doo ńtʼę́ę́ʼ.

14 Áko shooh shí ándishní, tʼáá háíshį́į́ áłchíní yázhí tó bee daasį́į́h nínígíí éí tsʼídá bikʼeʼashchʼííʼgo bikʼeʼíyééʼdéé dóó bąąhági átʼéii bótąʼgo ání, dóó doo yáʼáhootʼéehgi nahaleʼ da; háálá oodląʼ, hojoobaʼ hwiindzin, dóó diyingo ayóóʼóʼóní éí bee ádin; ákohgo ákwíizhnízingo ntsíjíkeesgo ájídingo, éí chʼį́įdiitahgóó jidoogááł.

15 Háálá díí éiyá tsʼída doo yáʼátʼéehgo ntsáhákeesii átʼé éí Diyin God awééʼ tʼááłáʼígo tó bee yilzį́į́h biniina yisdéidoołtééł, dóó tʼáadoo tó bee dabiʼdiilzį́ʼę́ę éí dadínóonééł.

16 Yíi tʼáá háiida díígiʼ átʼéego Diyin Bóhólníihii bibee oʼoolʼįįł łáh ándayoodlíłʼígíí, háálá doo ádaańdaʼookąąhgo éí dadínóonééł. Áko shooh, Diyin God díí yichʼįʼ shííłʼaadígíí biniinaa, doo násdzidgo yáshtiʼ; dóó diné lá haa dashidoolíił doo nisin da; háálá ayóó óʼóʼníinii hadaałtʼéii éí báhádzidę́ę nahjįʼ kódeileʼ.

17 Áádóó diyingo ayóóʼóʼóní éí shiiʼ hólǫ́, díí éí ayóó óʼóʼní doo nińtʼiʼii átʼé, ákohgo, áłchíní éí tʼáá ałtso shił tʼáá ahedaałtʼé; ákohgo, áłchíní yázhí ayóóʼóʼóóʼní haałtʼéhígíí bee ayóó ííníshʼní; dóó éí tʼáá ahedaałtʼé dóó éí yisdáʼiildéehii bee bikʼihojídlí.

18 Háálá shił bééhózin Diyin God éí doo akʼijįʼ nilíinii nilį́į da, dóó doo łahgo áánííł da; ákondi éí éiyá ahoolʼáádééʼ dóó ahoolʼáágóó doo łahgo ánááʼnííł da.

19 Áłchíní yázhí ádaanáʼookąąh doo bídadéétʼiʼ da; ákohgo, doo yáʼáshóonii átʼé Diyin God bibee ajoobaʼ haałtʼéhígíí bee bichʼįʼ baa hóchʼįʼgo, háálá éí bibeʼajoobaʼ biniinaa tʼáá ałtso dahiiná.

20 Áádóó tʼáá háíshį́į́ áłchíní yázhí tó bee bidiʼdoolzį́į́ł bee hazʼą́ nínígíí éí Christ bibee ajoobaʼ doo yoodlą́ą da, dóó bąąhági átʼéii yikʼé nináʼnídláhígíí dóó bee yisdánáʼiiʼnííł bibee ádziil éí doo bił nilį́įgo yaa ntsékees.

21 Yíi éí ákódajitʼéhígíí, éí doo há yáʼáhootʼéeh da háálá anoonééł, dóó chʼį́įdiitah, dóó ahoolʼáágo tiʼhooʼníihii hakʼi siláa dooleeł. Díí éí tʼáadoo naanishʼíní bee yáshtiʼ; Diyin God áshiłníigo. Díí deísínóołtsʼą́ąʼ doo bikʼeh dahonołʼį́, éí doodago éí nihikʼijįʼ ńdoodleeł Christ nihwiiʼaah-bikááʼdahʼasdáhídi nihisookaigo.

22 Háálá áko shooh tʼáá ałtso áłchíní yázhí éí Christ yinahjįʼ dahiiná, índa bee hazʼáanii bee ádaadinígíí ałdóʼ ákótʼé. Háálá nináʼályáhígíí bibeʼadziil bibee hazʼáanii bee ádaadinígíí bikʼéstiʼ; ákohgo, háiida doo bá nihootʼánígíí, doodago háiida doo bikʼijįʼ saad siʼánígíí, éí ádaanáʼookąąhgo doo bá bíighah da; dóó éí tó bee alzį́į́h doo bikáʼadoolwoł da—

23 Ákondi díí éí Diyin God bidááhdóó tʼóó bá nahaltʼiʼii átʼé, Christ bibee ajoobaʼ, dóó biʼ Iiʼ Sizį́ Diyinii bibee adziil, dóó doo ndaalnishii joodlą́ągo.

24 Áko shooh, shiyeʼ, díí éí doo ákótʼée da; háálá ádaanáʼookąąh éí ndabiʼdilkaahii bá dóó bee hazʼáanii kʼéʼéltǫʼígíí yiyaadóó doo yáʼátʼééhgóó bá haʼoodzííʼ.

25 Áádóó ádaańaʼookąąh éí tsʼídá áłtsé bee bééhózinígíí éí tó bee alzį́į́h; dóó tó bee alzį́į́h hweʼoodląʼ binahjįʼ Diyin God bibee hazʼáanii ałtso beʼalʼįįhgo índa; dóó bee hazʼáanii ałtso beʼalʼįįhgo índa bąąhági ádaatʼéii há yóóʼadahidootʼááł;

26 Áádóó bąąhági ádaatʼéii yooʼaditʼááh éí aa hojoobaʼ, dóó ajéí hojoobaʼ íinízin bitsʼą́ądóó nihwiileeh; dóó háálá aa hojoobaʼ dóó ajéí hojoobaʼ ákwiinidzin bitsʼą́ądóó Iiʼ Sizį́ Diyinii hoł haleeh, éí Aaʼáhályáanii hojoobaʼ hwiinidzinii dóó ayóó óʼóʼní haałtʼéhígíí hwiiʼ haidiłbį́į́h, éí ayóó óʼóʼníinii éí sodizin bee nízaadgo dinaʼ, niiníłką́ąjįʼ, Diyin yá naazínígíí tʼáá ałtso Diyin God yił kéédahatʼį́ silį́įʼjįʼ.

27 Áko shooh, shiyeʼ, nichʼįʼ ánáádeeshdlííł, doo hah Laman dineʼé bikʼijįʼ náádadiibáahgo. Áko shooh, doodago Nephi bidineʼé, bee ádaa hodzódlí, éí ábidiʼdooldįįł tʼáá hazhóʼó ádaańdaʼooskango tʼéiyá.

28 Éí bá sodílzin, shiyeʼ, áko ádaańaʼookąąh bichʼįʼ kódoolnííł. Ákondi shooh, shí éí bá násdzid háálá Iiʼ Sizį́ Diyinii doo bił dahólǫ́ǫ da silį́į́ʼ; dóó kojí nihił hazʼáníjí éí tsʼída tʼáá ałtso Diyin God bibee ádziil dóó bibee óhólnííh nahjįʼ kódeiłʼį́; dóó Iiʼ Sizį́ Diyinii ałdóʼ doo hólǫ́ǫ da daaní.

29 Áádóó tsʼída tʼóó ahayóí Diyin God binaʼnítin bił béédahózingo éí ałtso yóó, adeideezʼą, shiyeʼ, háálá éí tʼáadoo hodíínaʼí azhdoodįįł, Diyin God yá yádaałtiʼii náás ádahodoonííł daanínée, dóó Yisdáʼiiníiłii tʼáá bí bizaad yee haadzíʼę́ę éí ałdóʼ bidaʼdoolnííł.

30 Hágoóneeʼ, shiyeʼ, nichʼįʼ anááʼiishdlaago índa, éí doodago nááʼahiidiiltséełgo da índa. Amen.