Wóltaʼii 6
Diné ádaańdaʼooskanígíí éí tó bee dabiʼdoolzį́į́ʼ dóó baa áháyą́ągo kʼé dabiʼdiʼdooʼniid—Sodizinjí atah danilínígíí ádaańdaʼookąąhgo éí baa ńdaʼdiitʼaah—Iiʼ Sizį́ Diyinii bibeʼadziilii bikʼehgo áłah ńdaʼadleeh. Jesus náádiidzáádóó A.D. 401–421 yihahgo.
1 Áádóó kʼad éí tó bee alzį́į́h baa yánáánáshtiʼ dooleeł. Áko shooh, elder, priest, dóó ndaʼnitiní danilíinii éí tó bee dabiʼdoolzį́į́ʼ; dóó doo éí tó bee dabidiʼdoolzį́į́ʼ da tʼáá hazhóʼó beʼiinaʼ hashtʼedeileʼ dóó deidósingo tʼéiyá.
2 Áádóó ałdóʼ doo éí tó bee dabidiʼdoolzį́į́ʼ da tʼáá hazhóʼó bijéí dóó biiʼsizʼíinii yínííł danilį́įgo tʼéiyá, dóó sodizin daʼatahígíí yínááł tʼáá aaníigo bibąąhági ádaatʼéii tʼáá átʼé yaa ńdaʼooskan.
3 Áádóó tsʼída ahoolʼáágóó Christ bikééʼ sézį́į́ doo, dóó bá naashnish doo daanínígíí tʼéiyá tó yee deisį́į́h.
4 Áádóó tó bee dabiʼdoolzį́į́ʼgo, dóó Iiʼ Sizį́ Diyinii bibee ádziil bindaashnish dóó doo bąąh chinígóó ábiilaago índa, Christ bisodizin yee dayikahígíí yitah hakááh; áádóó bízhiʼ éí ndaháasdzoh, háálá Diyin God bizaad yáʼátʼéehii bee bééhániih dóó yee dabidziil doo biniyé, áko yáʼátʼééh honítʼiʼjįʼ deíkáahgo ólzin doo, dóó sodizin tʼáá áłahjįʼ yee ádaa ádahalyą́ą doo, Christ bibee ajoobaʼígíí tʼéiyá yadaʼólíigo, dóó beʼoodląʼ bá áyiilaa dóó ałtso báʼííłʼíinii nilį́.
5 Áádóó sodizin daʼatahígíí éí tʼáá ahąąh áłah ńdaadleeh, chʼiyáán ádąąh deitʼį́įgo dóó sodadilzingo, dóó ndaʼahinitin áko biiʼ sizíinii hazhóʼó yáʼádahalyą́ą doo biniyé.
6 Áádóó daʼóodlánígíí éí tʼáá ahąąh áłah ńdaadleeh bááh dóó chʼil naʼatłʼoʼii bitooʼ chodayoołʼį́ Diyin Bóhólníihii Jesus bee bééhániih biniyé.
7 Áádóó bąąhági átʼéii bitah dooleełígíí ayóó yaa daastiʼ, dóó háiida bąąhági ádzaago hádeilʼįʼígíí, dóó táltʼéego daʼiiłtsáanii sodizin daʼatahígíí éí elder danilíinii yinááł yá ndahwiiʼaah ńtʼę́ę́ʼ, dóó doo ádaańdaʼookąąhgóó, dóó doo ádaa dahoolneʼgóó, éí bízhiʼ nahjįʼ kódeileʼ, dóó doo éí Christ dayóodlanígíí bił daowóltaʼ da ńtʼę́ę́ʼ.
8 Ákondi tʼáá ádaańdaʼookąąhgo dóó shaanidiʼdootʼááł danízingo yíkáʼádaatʼínígíí, tʼááʼaaníí ádaaníigo, éí baa ndaʼdiitʼaah.
9 Áádóó sodizin Iiʼ Sizį́ Diyinii bindaalnishígi átʼéego áłah nídaadleeh, dóó Iiʼ Sizį́ Diyinii bibeeʼádziil binahjįʼ, sodizin yee alą́ąjįʼ naazínígíí sodizin yee deiyééłyeed ńtʼę́ę́ʼ; háálá Iiʼ Sizį́ Diyinii bibee ádziil bił da hólǫ́nígíí bikʼehgo ndaʼniłtin, éí doodago yee yádaałtiʼ, éí doodago sodadilzin, éí doodago biká sohodidoozįįłígíí bił íishjání óólzin, éí doodago dahataał, kótʼáo ádaʼiilaa.