1 Áádóó kʼad shí, Moroni, éí shizhéʼé Mormon bizaad tʼáá díkwíhígo ninááhásóóh, éí éiyá oodląʼ, chohooʼíinii, dóó diyingo ayóóʼóʼóʼní yaa yááłtiʼę́ę; kótʼéego éí diné yichʼįʼ yááłtiʼ, éí sodizin biyiʼ dahodísingo ádeiyiilaa éí biyiʼ neineeztą́ą́ʼ.

2 Áádóó kʼad shí, Mormon, nihichʼįʼ yáshtiʼ, shikʼéí ayóó ánihííníshʼníinii; dóó Diyin God aZhéʼé nilíinii bibee ajoobaʼ bikʼehgo dóó Diyin Bóhólníihii Jesus Christ binahjįʼ, dóó diyingo íinízinígíí bikʼehgo, háálá binaʼanish yee shikʼi hojisdliʼígíí bąą, kweʼé saad bee nihichʼįʼ hadeesdzihígíí éí kʼad yee shá hoołʼaʼ.

3 Ákohgo, shí nihichʼįʼ haasdziih sodizin daʼnohtahígíí, kʼé bee Christ bikééʼ nisoozínígíí, dóó Diyin Bóhólníihii bił hazʼą́ądi baa ńdoohdááł bíighah danohsinígíí, kodóó dóó náasjįʼ ńléí yáʼąąshdi bił yah andahisookaijįʼ.

4 Áádóó áko shikʼéí danohłíinii, shí éí kótʼéego bee nihinéshʼį́ háálá kʼé bikʼehgo éí nihokááʼ dineʼé baʼáłchíní bitaałdeeh.

5 Háálá shí éí Diyin God bizaad kóníigo bénáshniih binaanish ádeiilʼínígíí binahjįʼ béédahonohsin doo; háálá binaanish yáʼádaatʼéehgo éí bídóʼ diné yáʼátʼéehii danilį́į doo.

6 Háálá áko shooh, Diyin God áníigo éí diné doo yáʼáshóonii éí yáʼátʼéehii doo íidoolíił da; háálá tʼáá haʼátʼííshį́į́ aa yiléego, éí doodago Diyin God sodizin yee yichʼįʼ haadzíiʼgo, tʼáá hazhóʼó tʼáá aaníí áátʼįįdgo tʼéiyá néididoolééł éí doodago éí doo bee bikʼihojisdliʼ da doo.

7 Háálá áko shooh, éí diyinkʼehgo oodááłjí doo há bił óltaʼ da.

8 Háálá áko shooh, diné doo yáʼáshóonii tʼáá haʼátʼííshį́į́ aa yiléego, éí doo íinízin da ndi ákótʼįįh; ákohgo Diyin God éí doo aa jiniláágóó yółtaʼ; ákohgo Diyin God bichʼįʼjigo éí doo yáʼájíshǫ́ǫ́góó haa nitsékees.

9 Áádóó tʼáá ákónáánátʼéego diné doo tʼáá aaníí áníigo bijéí biyiʼdóó sodilzingo, éí diné doo yáʼáshǫ́ǫ́góó baa ntsíhodookos; aooʼ, dóó sodizin éí tʼáadoo nanídlíní da, háálá Diyin God éí ákótʼéhígíí doo yiyíistsʼą́ąʼ da.

10 Ákohgo, diné doo yáʼáshóonii éí haʼátʼííshį́į́ yáʼátʼéhígíí doo íidoolíił da, índa tʼáá haʼátʼííshį́į́ yáʼátʼéhígíí doo eidooléeł da.

11 Háálá áko shooh, tó díchʼíiʼgo háálį́įgo éí doo áádę́ę́ʼ tó łikango hadoonah da, índa tó łikango háálį́įgo ałdóʼ doo áádę́ę́ʼ tó díchʼíiʼgo hadoonah da; ákohgo, diné biʼiiníziinii yá naalnishgo éí doo Christ yikééʼ ndoogááł da; dóó Christ yikééʼ sizíigo éí doo biʼiiníziinii yá ndoolnish da.

12 Ákohgo, tʼáá ałtsoní yáʼádaatʼéehii éí Diyin God bitsʼą́ą́dóó; dóó doo yáʼáshóonii éí biʼiiníziinii bitsʼą́ą́dę́ę́ʼ; háálá biʼiiníziinii éí Diyin God yeʼanaaʼí nilį́, dóó tʼáá áłahjįʼ hoł ahigą́, dóó bąąhági ádooníiłgo wóshdę́ę́ʼ dóó kodi bidiní, dóó tʼáá áłahjįʼ doo yáʼáshóonii baa nijigháa doo hóóʼní.

13 Ákondi shooh, Diyin God bitsʼą́ądę́ʼígíí éí tʼáá áłahjįʼ yáʼátʼééh bee ádoolníiłii hágo dóó wóshdę́ę́ʼ yiłní; ákohgo tʼáá ałtsoní yáʼátʼéehii tʼéiyá hágo dóó wóshdę́ę́ʼ hałnínígíí, dóó Diyin God ayóó ájóʼní, dóó bá naashnish doo jinízingo áhósinígíí, éí Diyin God bitsʼą́ą́dę́ę́ʼ yidiłígíí átʼé.

14 Ákohgo, díí deísínóołtsʼą́ą́ʼ, shikʼéí ayóó ánihííníshʼnínii, háálá doo yáʼáshóonii éí Diyin God bitsʼą́ą́dę́ę́ʼ doo dínóosįįł da, éí doodago yáʼátʼéehii dóó Diyin God bitsʼą́ądę́ʼígíí éí biʼiiníziinii biʼiiʼ sizį́ bitsʼą́ą́dę́ę́ʼ doo dínóosįįł da.

15 Háálá áko shooh, shikʼéí danohłíinii, ntsáhákees éí nihaa yilyá, yáʼátʼéhígíí dóó doo yáʼátʼéhígíí bee ałʼąą átʼéhígíí nihił bééhózin doo biniyé, índa baa ntsíhodookosígíí átʼéego ałdóʼ tʼáá bééhózíní, díí tsʼídá nizhónígo nihił bééhózin doo, éí díí adinídíín dóó chahałheeł ałʼąą átʼéhígíí átʼéego baa ákonohsin doo.

16 Háálá áko shooh, Christ biʼIiʼ Sizį́ Diyinii éí tsʼídá diné tʼáá ałtso beiyílyá, éí bąą yáʼátʼéehii dóó doo yáʼátʼéehii bee ałʼąą átʼéhígíí bił bééhózin doo biniyé; ákohgo díí baa ntsáhákeesígíí nihił ííshją́ą́ áshłééh; háálá tʼáá ałtsoní yáʼátʼééh ádoohłííł hałnínígíí, dóó Christ yinídlą́ hałnínígíí, éí Christ bibee adziil dóó bibee aʼiilyéii bee nihaa dahasyá; ákohgo tsʼídá tʼáadoo naaki nílíní nihił bééhózin doo díí éí Diyin God bitsʼą́ą́dę́ę́ʼ.

17 Ákondi tʼáá haʼátʼííshį́į́ diné doo yáʼátʼéehii bíniʼ ádeileʼígíí, dóó biniinaa Christ doo dayoodlánígíí, dóó doo deinízinígíí, índa biniinaa Diyin God doo yá nidaalnishígíí; éí tsʼídá tʼáá aaníí nihił béédahózin doo, díí éí biʼiiníziinii bitsʼą́ą́dę́ę́ʼ; háálá kótʼéego éí biʼiiníziinii naalnish, háálá diné yáʼátʼéehii doo yichʼįʼ yiłʼáa da, dooda, doo tʼááłáʼí ndi, dóó bí bá nidaalʼaʼí ndi, doo áájí akééʼ deizįʼígíí ndi.

18 Áádóó áko, shikʼéí danohłíinii, díí adinídíín bee ééhózingo bikʼehgo ntsáhákeesígíí éí nihił béédahózin, éí adinídíín bee ééhózinii éí Christ bee adinídíín átʼé hazhóʼó baa ntsídaahkees; háálá doo ákótʼéego bee woohsį́į́h lágo, háálá baa ntsísookéézígíí dóó bee woohsį́ʼígíí éí bikʼehgo nihí ałdóʼ nihá nihodootʼááł.

19 Ákohgo, shikʼéí danohłíinii, díí baa nánihooshkąąh, Christ bee adinídíín tsʼídá yéego nidaałkaah áko yáʼátʼéehii dóó doo yáʼáshóonii bee ałʼąą átʼéhígíí nihił bééhózin doo; dóó tsʼídá tʼáá ałtsoní yáʼátʼéehii daołtsóodgo, dóó doo nahjįʼ kódaołééhgo, háálá éí tsʼídá tʼáá aaníí Christ beʼawééʼ nohłį́į dooleeł.

20 Áádóó kʼad, shikʼéí danohłíinii, haash yitʼéego éí tʼáá ałtso yáʼádaatʼéehii yizhdoołtsoł?

21 Áádóó kʼad éí oodląʼ, baa hodeeshnih dishnínée baa hoolzhiizh; dóó díí tʼáá ałtsoní yáʼátʼéehii bee yidooltsołígíí éí bee nihił hodeeshnih.

22 Háálá áko shooh, Diyin God hoolʼáádę́ę́ʼ dóó ahoolʼáágóó hólǫ́onii, éí tʼáá ałtsoní bił bééhózin, áko shooh, éí Diyin yá nidaalʼaʼí nihokááʼ dineʼé baʼáłchíní yíká adoojah biniyé yitah ayiisʼaʼ, Christ yigháhígíí éí bił béédahózin doo; dóó Christ bitsʼą́ą́dóó éí tsʼídá tʼáá ałtso yáʼátʼéehii hólónígíí bił béédahózin doo biniyé.

23 Áádóó Diyin God tʼáá bí bizééʼdę́ę́ʼ, Christ éí doogááł, níigo bá yáʼdaałtiʼii yee yichʼįʼ haadzííʼ.

24 Áádóó áko shooh, tʼóó ahayóí ałʼąą átʼéego yáʼádaatʼéehii nihokááʼ dineʼé baʼáłchíní yichʼįʼ ííshjání áyiilaa; dóó tsʼídá tʼáá ałtso yáʼátʼéehii éí Christ bitsʼą́ą́dę́ę́ʼ, éí doo yáʼátʼéehgo éí diné Diyin God yitsʼáhaaskai doo ńtʼę́ę́ʼ, dóó yáʼátʼéehii tsʼídá doo baa doolyéeł da ńtʼę́ę́ʼ.

25 Ákohgo, Diyin yá nidaalʼaʼí diyinkʼehgo bikáʼanídaajahgo binahjįʼ, dóó tsʼídá tʼáá átʼé Diyin God bizééʼdę́ę́ʼ saad yee hahadziihígíí binahjįʼ, diné Christ dayoodlą́ daazlį́į́ʼ; dóó ákótʼáo beʼoodląʼ bee, tsʼídá yáʼádaatʼéehii dayiiltsood; dóó díí tʼáá ákótʼéego Christ níyá.

26 Áádóó éí níyáádóó bikʼijįʼ diné bízhiʼ dayoodlą́ągo yee yisdánáhaskai ałdóʼ; dóó beʼoodląʼ bee, Diyin God biyeʼ daazlį́į́ʼ. Áádóó tsʼídá tʼáá aaníí Christ hináago díí nihizhéʼé danilínée yichʼįʼ haadzííʼ, kóníigo: Tsʼídá tʼáá ałtsoní, yáʼátʼéehii, nihiTaaʼ nilíinii shízhiʼ binahjįʼ, deinohdlą́ągo, shaa doolyééł danohsingo, áko shooh, éí bee nihikʼihozhdoodliił.

27 Ákohgo, shikʼéí ayóó ánihííníshʼníinii, Christ yáʼąąsh góde náásdlį́ʼígíí, dóó Diyin God binishʼnáájígo dah neezdá, nihokááʼ dineʼé baʼáłchíní nihiTaaʼ nilíinii yitsʼą́ą́dóó hojoobaʼ yoosbánígíí biniinaa, álíleekʼehjí naanishígíí daatsʼí ninítʼiʼ?

28 Háálá éí éiyá bee hazʼáanii ninítʼiʼjįʼ ałtso yeʼiilaa, dóó tʼáá ałtso daboodlánígíí éí shí yiłní; dóó daboodlánígíí éí tʼáá ałtso yáʼátʼéhígíí dayótąʼ dooleeł; ákohgo nihokááʼ dineʼé baʼáłchíní yánáʼookąąh, dóó ahoolʼáágóó yáʼąąshdi kééhatʼį́.

29 Áádóó díí kódzaagoósh biniinaa álílee naʼanishii ninítʼiʼ, shikʼéí ayóó ánihííníshʼníinii? Áko shooh shí éí, Ndagaʼ nihidishní; dóó índa Diyin yá nidaalʼaʼí éí tʼahdii nihokááʼ dineʼé baʼáłchíní yíká ańdaajah.

30 Háálá áko shooh, bí éí bikʼeh dahółʼį́, éí bizaadígíí bikʼehgo áká ańdaajah, tʼáá ałtsojįʼ bił dahodiyingo ntsídaakeesígíí dóó beʼoodląʼ dabidziilígíí éí yichʼįʼ ííshjání ádaʼdiilyaa.

31 Áádóó binaanish bá ádaalyaaí éí diné ádaa ńdaʼoohkąąh deiłníigo bikʼidahodiiniiʼ, dóó nihiTaaʼ nilíinii bee ahadaʼdeetʼaahii yindaalnish dóó ałtso yee daʼaleʼ, éí nihokááʼ dineʼé baʼáłchíní yá áyiilaa, háálá nihokááʼ dineʼé baʼáłchíní yitahgóó yá hashtʼedahalééh, Christ bizaad Diyin Bóhólníihii átsʼáyiiznilígíí yee nideinitin, áko tʼáá aaníigo yaa dahalneʼ dooleeł.

32 Áádóó kódáátʼį́įgo, Bóhólníihii Diyin God diné chʼéédzíʼígíí Christ dayoodlą́ą doogo yá hashtʼedahalééh áko Iiʼ Sizį́ Diyinii bibee adziil bee bijéí biyiʼ dahólǫ́ǫ doo; kótʼéego nihiTaaʼ nilíinii nihokááʼ dineʼé baʼáłchíní yił ahadaʼdeestʼánée ałtso yidaʼaleʼ.

33 Áádóó Christ ání: Dashiinohdlą́ągo éí tʼáá ałtsoní nihá yáʼátʼééh nisinígíí ádadoohłííł.

34 Áádóó ałdóʼ kódííniid: Tʼáá ánółtso nihokáaʼgi kéédahohtʼíinii ádaa ńdaʼoohkąąh, dóó shaa hohkááh, dóó shízhiʼ binahjįʼ tó bee danihiʼdiilzį́į́h, dóó dashiinohdlą́, áko yisdánádahidoohkááh.

35 Áádóó kʼad, shikʼéí ayóó ánihííníshʼníinii, díí kótʼéego saad bee nihichʼįʼ haasdzíʼę́ę tʼáá aaníigo, dóó Diyin God tsʼídá akéeʼdi yoołkáłígíí biyiʼ bibee adziil binahjįʼ dóó ayóó átʼéii binahjįʼ, díí tʼáá aanínígíí nihił ííshją́ą́ íidoolííł, dóó díí tʼáá aaníigo daʼ álíleego ndaʼanishígíí nidahaaztʼiʼ?

36 Éí doodagoísh Diyin yá nidaalʼaʼí nihokááʼ dineʼé baʼáłchíní doo yichʼįʼ ííshjání áńdaʼdiilʼįįh da silį́į́ʼ? Éí doodagoósh Iiʼ Sizį́ Diyinii bibeeʼadziiliísh yitsʼą́ą́ʼ tʼą́ą́ʼ yótąʼ ńtʼę́ę́ʼ? Éí doodagoósh éí ákódoonííł, tʼáá oolkił bá hazʼą́ąjįʼ, éí doodago nahasdzáán tʼah dah siʼąągo, éí doodago bikáaʼgi diné tʼááłáʼí yisdádooltéeł ndi?

37 Áko shooh ánihidishníigo éí, Ndagaʼ; háálá oodląʼ tʼéí binahjįʼ álílee bee naʼanish; dóó oodląʼ binahjįʼ Diyin yá nidaalʼaʼí diné yaa ńdaakah dóó yíká anájah; ákohgo, díí ndahaaztʼiʼ silį́įʼgo nihokááʼ dineʼé baʼáłchíní doo bá yáʼátʼééh da doo, háálá éí éí doo daʼóodlánígíí biniinaa, dóó tʼáá ałtso tʼáadoo biniyéhé da dooleeł.

38 Háálá Christ bizaad bikʼehgo, éí diné doo łaʼ yisdáńdoodáał da, tʼáá hazhóʼó bízhiʼ dayoodlą́ągo tʼéiyá; ákohgo, díí niʼ ádaadzaago daatsʼí, oodląʼ ałdóʼ ninítʼiʼ doo; tsʼídá doo yáʼáshǫ́ǫ́góó diné bił hazʼą́ą doo, háálá nináʼályá doo bá ahóótiʼgóó ályaa nahalin doo ńtʼę́ę́ʼ.

39 Ákondi shooh, shikʼéí ayóó ánihííníshʼníinii, shí éí doo ákódadoohníił da nisin, háálá joobaʼ danohsinígíí biniinaa Christ deinohdlą́ nisin; háálá doo deinohdlą́ą́góó éí bisodizin yee dah deíkáhígíí anohtahgo doo bíínóhghah da dooleeł.

40 Áádóó nááná, shikʼéí ayóó ánihííníshʼníinii, bíká ił chohooʼínígíí bee nihichʼįʼ hadeesdzih. Haash yitʼéego éí oodląʼ hwee hodooleeł, tʼáá hazhóʼó bíká hoł chohooʼį́ hwiiʼ hólǫ́ǫgo tʼéiyá?

41 Áádóó haʼátʼíísh éí bíká nihił chohooʼį́į doo? Áko shooh ánihidishníigo éí Christ nihibąąhági átʼéii yikʼé nináʼnídláhígíí dóó nááhiinaʼígíí bibeʼadziil binahjįʼ, nihídóʼ ahoolʼáágóó iiná biyiʼjįʼ náádahinohnáá dooleeł éí bíká nihił chohooʼį́į doo, díí éí deinohdlánígíí biniinaa éí yee ádeihaadziʼę́ę bikʼehgo.

42 Ákohgo, diné beʼoodląʼ hólǫ́ǫgo éí ałdóʼ bił chohooʼį́į doo, háálá oodląʼ tʼáá géedgo éí bíká chohooʼínígíí ádin doo.

43 Áádóó nááná, áko shooh ánáánihidishníigo doo éí oodląʼ dóó hoł chohooʼį́į da doo, tʼáá hazhóʼó haa hojoobaʼgo, dóó hajéí joobaʼ íinízingo tʼéiyá.

44 Díí ákótʼéego, hweʼoodląʼ dóó hoł chohooʼínígíí éí tʼáadoo biniyéhé da, háálá Diyin God bidááhdóó éí doo bił nilíní da, tʼáá hazhóʼó haa hojoobaʼgo, dóó hajéí joobaʼ íinízingo tʼéiyá bił jílį́į dooleeł; dóó Iiʼ Sizį́ Diyinii bibee adziil bee Jesus éí Christ átʼį́ níigo, éí éiyá diyingo ayóóʼóʼóʼní bee hólǫ́ǫ doo, háálá diyingo ayóóʼóʼóʼní doo bee hólǫ́ǫ́góó éí tʼáadoo nilíní da; ákohgo diyingo ayóóʼóʼóʼní bee hólǫ́ǫ doo.

45 Áádóó diyingo ayóóʼóʼóʼní éí nízaagóó haʼólní, dóó éí joobaʼ, dóó doo oołchʼį́įd da, dóó doo ádaa haʼniih da, dóó doo éí áchą́ ádeilnáa da, dóó doo ndi bá háchįʼ da, dóó doo yáʼáshǫ́ǫ́góó ntsídaakees da, dóó bąąhági átʼéii doo yaa bił honeeni da, ndi éí tʼáá aaníinii yaa bił hózhǫ́, dóó tʼáá ałtsoní yichʼįʼ bidziil, dóó tʼáá ałtsojįʼ oodląʼ, dóó tʼáá ałtsojįʼ bił chohooʼį́, dóó tʼáá ałtsoní yichʼįʼ haʼólní.

46 Ákohgo, shikʼéí ayóó ánihííníshʼníinii, diyingo ayóóʼóʼóʼníinii nihee ádingo éí tʼáadoo nohłíní da, háálá diyingo ayóóʼóʼóʼníinii éí tʼáadoo yiʼoh neelʼání da. Ákohgo, diyingo ayóóʼóʼóʼníinii yéego yínítąʼ, háálá éí éiyá tsʼídá aláahdi átʼé, háálá tʼáá ałtsoní éí yiʼoh daneelʼą́ą dooleeł—

47 Ákondi diyingo ayóóʼóʼóʼníinii éí Christ beʼayóóʼóʼóʼní doo bąąh chiní átʼé, áádóó éí ahoolʼáágóó iinaʼii átʼé; dóó tʼáá háiida akéeʼdi yoołkáałdi bee hólónígíí, éí tʼáá aaníí bá yáʼátʼééh dooleeł.

48 Ákohgo, shikʼéí ayóó ánihííníshʼníinii, tsʼídá tʼáá átʼé adziil nihijéí biyiʼ hólónígíí bee nihiTaaʼ nilíinii bichʼįʼ sodadoołzin, háálá díí ayóó óʼóʼní nihiyiʼ hadidoobį́į́ł, tʼáá aaníí biYeʼ Jesus Christ yikééʼ naazínígíí yee yikʼidajisdliʼę́ę; háálá nidóʼ Diyin God baʼáłchíní nílį́į doo; háálá níyáago bígi ádaniitʼée doo, háálá ázhnoolninígi átʼéego deidiiltsééł; háálá díí chohooʼínígíí nihí dooleeł, nihídóʼ doo nihąąh chingóó ánihidiʼdoolnííł bí doo bąąh chinígi átʼáo. Amen.