1 Áádóó kʼad shí, Moroni, éí shizhéʼé Mormon bizaad tʼáá díkwíhígo ninááhásóóh, éí éiyá oodląʼ, chohooʼíinii, dóó diyingo ayóóʼóʼóní yaa yááłtiʼę́ę; kótʼéego éí diné yichʼįʼ yááłtiʼ, éí sodizin biyiʼ dahodísingo ádeiyiilaa éí biyiʼ neineeztą́ą́ʼ.

2 Áádóó kʼad shí, Mormon, nihichʼįʼ yáshtiʼ, shikʼéí ayóí ánihííníshʼnínii; dóó Diyin God aZhéʼé nilíinii bibee ajoobaʼ bikʼehgo dóó Diyin Bóhólníihii Jesus Christ binahjįʼ, dóó diyingo íinízinígíí bikʼehgo, háálá binaʼanish yee shikʼihojisdliʼígíí bąą, kweʼé saad bee nihichʼįʼ hadeesdzihígíí éí kʼad yee shá hoołʼaʼ.

3 Ákohgo, shí nihichʼįʼ haasdzííh sodizin daʼnohtahígíí, kʼé bee Christ bikééʼ nisoozínígíí, dóó Diyin Bóhólníihii bił hazʼą́ądi baa ndoohdááł bíighah danohsinígíí, kodóó dóó náasjįʼ ńléí yáʼąąshdi bił yahandahisohkaijįʼ.

4 Áádóó áko shikʼéí danohłíinii, shí éí kótʼéego bee nihiníshʼį́ háálá kʼé bikʼehgo éí nihokááʼ dineʼé baʼáłchíní bitaałdeeh.

5 Háálá shí éí Diyin God bizaad kóníigo bénáshniih binaanish ádeiilʼínígíí binahjįʼ béédahonohsin doo; háálá binaanish yáʼádaatʼéehgo éí bídóʼ diné yáʼátʼéehii danilį́į doo.

6 Háálá áko shooh, Diyin God áníigo éí diné dóo yáʼáshóonii éí yáʼátʼéehii doo íidoolíił da; háálá tʼáá haʼátííshį́į́ aa yiléego, éí doodago Diyin God sodizin yee yichʼįʼ haadzíiʼgo, tʼáá hazhóʼó tʼááʼaaníí áátʼįįdgo tʼéiyá néididoolééł doodago éí doo bee bikʼihojisdliʼ da doo.

7 Háálá áko shooh, éí diyinkʼehgo oodááłjí doo há bił óltaʼ da.

8 Háálá áko shooh, diné doo yáʼáshóonii tʼáá haʼátííshį́į́ aa yiléego, éí doo íinízin da ndi ákótʼįįh; ákohgo Diyin God éí doo aa jiniláágóó yółtaʼ; ákohgo Diyin God bichʼįʼjigo éí doo yáʼájíshǫ́ǫ́góó haa ntsékees.

9 Áádóó tʼáá ákónáánátʼéego diné doo tʼááʼaaníí áníigo bijéí biyiʼdóó sodilzingo, éí diné doo yáʼáshǫ́ǫ́góó baa ntsíhodookos; aooʼ, dóó sodizin éí tʼáadoo nanídlíní da, háálá Diyin God éí ákótʼéhígíí doo yiyíistsʼą́ąʼ da.

10 Ákohgo, diné doo yáʼáshóonii éí haʼátʼííshį́į́ yáʼátʼéhígíí doo íidoolíił da, índa tʼáá haʼátʼííshį́į́ yáʼátʼéhígíí doo eidooléeł da.

11 Háálá áko shooh, tó díchʼíiʼgo háálį́įgo éí doo áádę́ę́ʼ tó łikango hadoonah da, índa tó łikango háálį́įgo ałdóʼ doo áádę́ę́ʼ tó díchʼíiʼgo hadoonah da; ákohgo, diné biʼiiníziinii yá naalnishgo éí doo Christ yikééʼ ndoogaał da; dóó Christ yikééʼ sizíigo éí doo biʼiiníziinii yá ndoolnish da.

12 Ákohgo, tʼáá ałtsoní yáʼadaátʼéehii éí Diyin God bitsʼą́ądóó; dóó doo yáʼáshóonii éí biʼiiníziinii bitsʼą́ą́dę́ę́ʼ; háálá biʼiiníziinii éí Diyin God yeʼanaaʼí nilį́ doo tʼáá áłahjįʼ hoł ahigą, dóó bąąhági ádoonííłgo wóshdę́ę́ʼ dóó kodi biʼdiʼní, dóó tʼáá áłahjįʼ doo yáʼáshóonii baa njigháa doo hóóʼní.

13 Ákondi shooh, Diyin God bitsʼą́ądę́ʼígíí éí tʼáá áłahjįʼ yáʼátʼééh bee ádoolníiłii hágo dóó wóshdę́ę́ʼ yiłní; ákohgo tʼáá ałtsoní yáʼátʼéehii tʼéiyá hágo dóó wóshdę́ę́ʼ hałnínígíí, dóó Diyin God ayóí ájóʼní, dóó bá naashnish doo jinízingo áhósinígíí, éí Diyin God bitsʼą́ą́dę́ę́ʼ yidiłígíí átʼé.

14 Ákohgo, díí deísínóołtsʼą́ą́ʼ, shikʼéí ayóó ánihííníshʼnínii, háálá doo yáʼáshóonii éí Diyin God bitsʼą́ą́dę́ę́ʼ doo dínóosįįł da, éí doodago yáʼátʼéehii dóó Diyin God bitsʼą́ądę́ʼígíí éí biʼiiníziinii beʼiiʼsizį́į bitsʼą́ą́dę́ę́ʼ doo dínóosįįł da.

15 Háálá áko shooh, shikʼéí danohłíinii, ntsáhákees éí nihaa yilyá, yáʼátʼéhígíí dóó doo yáʼátʼéhígíí bee ałʼąą átʼéhígíí nihił bééhózin doo biniyé, índa baa ntsíhodookosígíí átʼéego ałdóʼ tʼáá bééhózíní, díí tsʼída nizhónígo nihił bééhózin doo, éí díí adinídíín dóó chahałheeł ałʼąą átʼéhígíí átʼéego baa ákonohsin doo.

16 Háálá áko shooh, Christ biʼIiʼ Sizį́ Diyinii éí tsʼídá diné tʼáá ałtso beiyílyá, éí bąą yáʼátʼéehii dóó doo yáʼátʼéehii bee ałʼąą átʼéhígíí bił bééhózin doo biniyé; ákohgo díí baa ntsáhákeesígíí nihił ííshją́ą́ áshłééh; háálá tʼáá ałtsoní yáʼátʼééh ádoohłííł hałnínígíí, dóó Christ yiniidlą́ hałnínígíí, éí Christ bibee ádziil dóó bibee aʼiilyéii bee nihaa dahasyá; ákohgo tsʼída tʼáadoo naaki nílíní nihił bééhózin doo díí éí Diyin God bitsʼą́ą́dę́ę́ʼ.

17 Ákondi tʼáá haʼátʼííshį́į́ diné doo yáʼátʼéehii bíniʼ ádeileʼígíí, dóó biniinaa Christ doo dayóodląnígíí, dóó doo deinízinígíí, índa biniinaa Diyin God doo yá ndaalnishígíí; éí tsʼída tʼááʼaaníí nihił béédahózin doo, díí éí biʼiiníziinii bitsʼą́ą́dę́ę́ʼ; háálá kótʼéego éí biʼiiníziinii naalnish, háálá diné yáʼátʼéehii doo yichʼįʼ yiłʼáa da, dooda, doo tʼááłáʼí ndi, dóó bí bá ndaalʼaʼí ndi, doo áájí akééʼ deizįʼígíí ndi.

18 Áádóó áko, shikʼéí danohłíinii, díí adinídíín bee ééhózingo bikʼehgo ntsáhákeesígíí éí nihił béédahózin, éí adinídíín bee ééhózinii éí Christ bee adinídíín átʼé hazhóʼó baa ntsídaahkees; háálá doo ákótʼéego bee woohsį́į́h lágo, háálá baa ntsísookéézígíí dóó bee woohsį́ʼígíí éí bikʼehgo nihí ałdóʼ nihá nihodootʼááł.

19 Ákohgo, shikʼéí danohłíinii, díí baa nánihooshkąąh, Christ bee adinídíín tsʼída yéego ndaałkaah áko yáʼátʼéehii dóó doo yáʼáshóonii bee ałʼąą átʼéhígíí nihił bééhózin doo; dóó tsʼída tʼáá ałtsoní yáʼátʼéehii daołtsóodgo, dóó doo nahjįʼ kódaołééhgo, háálá éí tsʼída tʼááʼaaníí Christ beʼawééʼ nohłį́į dooleeł.

20 Áádóó kʼad, shikʼéí danohłíinii, haash yitʼéego éí tʼáá ałtso yáʼadaátʼéehii yizhdoołtsoł?

21 Áádóó kʼad éí oodląʼ, baa hodeeshnih dishnínée baa hoolzhiizh; dóó díí tʼáá ałtsoní yáʼátʼéehii bee yidooltsołígíí éí bee nihił hodeeshnih.

22 Háálá áko shooh, Diyin God hoolʼáádę́ę́ʼ dóó ahoolʼáágóó hólǫ́onii, éí tʼáá ałtsoní bił bééhózin, áko shooh, éí Diyin yá ndaalʼaʼí nihokááʼ dineʼé baʼáłchíní yíká adoojah biniyé yitah ayisʼaʼ, Christ yigháhígíí éí bił béédahózin doo; dóó Christ bitsʼą́ądóó éí tsʼída tʼáá ałtso yáʼátʼéehii hólónígíí bił béédahózin doo biniyé.

23 Áádóó Diyin God tʼáá bí bizééʼdę́ę́ʼ, Christ éí doogááł, níigo bá yáʼdaałtiʼii yee yichʼįʼ haadzííʼ.

24 Áádóó áko shooh, tʼóó ahayóí ałʼąą átʼéego yáʼadaátʼéehii nihokááʼ dineʼé baʼáłchíní yichʼįʼ íishjání áyiilaa; dóó tsʼída tʼáá ałtso yáʼátʼéehii éí Christ bitsʼą́ą́dę́ę́ʼ, éí doo yáʼátʼéehgo éí diné Diyin God yitsʼáhaaskai doo ńtʼę́ę́ʼ, dóó yáʼátʼéehii tsʼída doo baa doolyéeł da ńtʼę́ę́ʼ.

25 Ákohgo, Diyin yá ndaalʼaʼí diyinkʼehgo bikáʼanídaajahgo binahjįʼ, dóó tsʼídá tʼáá átʼé Diyin God bizééʼdę́ę́ʼ saad yee hahadziihígíí binahjįʼ, diné Christ dayoodlą́ daazlį́į́ʼ; dóó ákótʼáo beʼoodląʼ bee, tsʼídá yáʼádaatʼéehii dayiiltsood; dóó díí tʼáá ákótʼéego Christ níyá.

26 Áádóó éí níyáádóó bikʼijįʼ diné bízhiʼ dayoodlą́ągo yee yisdánáhaskai ałdóʼ; dóó beʼoodląʼ bee, Diyin God biyeʼ daazlį́į́ʼ. Áádóó tsʼídá tʼáá aaníí Christ hináago díí nihizhéʼé danilínée yichʼįʼ haadzííʼ, kóníigo: Tsʼídá tʼáá ałtsoní, yáʼátʼéehii, nihiTaaʼ nilíinii shízhiʼ binahjįʼ, deinohdlą́ągo, shaa doolyééł danohsingo, áko shooh, éí bee nihikʼihozhdoodliił.

27 Ákohgo, shikʼéí ayóí ánihííníshʼnínii, Christ yáʼąąshgóde náásdlį́ʼígíí, dóó Diyin God binishʼnáájígo dah neezdá, nihokááʼ dineʼé baʼáłchíní nihiTaaʼ nilíinii yitsʼąądóó hojoobaʼ yoosbánígíí biniinaa, álíleekʼehjí naanishígíí daatsʼí ninítʼiʼ?

28 Háálá éí éiyá bee hazʼáanii ninítʼiʼjįʼ ałtso yiʼiilaa, dóó tʼáá ałtso daboodlánígíí éí shí yiłní; dóó daboodlánígíí éí tʼáá ałtso yáʼátʼéhígíí dayótąʼ dooleeł; ákohgo nihokááʼ dineʼé baʼáłchíní yánáʼookąąh, dóó ahoolʼáágóó yáʼąąshdi kééhatʼį́.

29 Áádóó díí kódzaagoósh biniinaa álílee naʼanishii ninítʼiʼ, shikʼéí ayóí ánihííníshʼnínii? Áko shooh shí éí, Ndagaʼ nihidishní; dóó índa Diyin yá ndaalʼaʼí éí tʼahdii nihokááʼ dineʼé baʼáłchíní yíká ańdaajah.

30 Háálá áko shooh, bí éí bikʼeh dahółʼį́, éí bizaadígíí bikʼehgo áká ańdaajah, tʼáá ałtsojįʼ bił dahodiyingo ntsídaakeesígíí dóó beʼóodląʼ dabídziilígíí éí yichʼįʼ íishjání ádaʼdiilyaa.

31 Áádóó binaanish bá ádaalyaaí éí diné ádaańdaʼoohkąąh deiłníigo bikʼidahodiiniiʼ, dóó nihiTaaʼ nilíinii bee ahadaʼdeetʼaahii yindaalnish dóó ałtso yee daʼaleʼ, éí nihokááʼ dineʼé baʼáłchíní yá áyiilaa, háálá nihokááʼ dineʼé baʼáłchíní yitahgóó yá hashtʼedahalééh, Christ bizaad Diyin Bóhólníihii átsʼáyiiznilígíí yee ndeinitin, áko tʼáá aaníigo yaa dahalneʼ dooleeł.

32 Áádóó kódáátʼį́įgo, Bóhólníihii Diyin God diné chʼéédzíʼígíí Christ dayoodlą́ą doogo yá hashtʼedahalééh áko Iiʼ Sizį́ Diyinii bibee ádziil bee bijéí biyiʼ dahólǫ́ǫ doo; kótʼéego nihiTaaʼ nilíinii nihokááʼ dineʼé baʼáłchíní yił ahadaʼdeestʼánée ałtso yidaʼaleʼ.

33 Áádóó Christ ání: Dashiinohdlą́ągo éí tʼáá ałtsoní nihá yáʼátʼééh nisinígíí ádadoohłííł.

34 Áádóó ałdóʼ kódííniid: Tʼáá anółtso nihookáaʼgi kéédahohtʼíinii ádaańdaʼoohkąąh, dóó shaa hohkááh, dóó shízhiʼ binahjįʼ tó bee danihiʼdiilzį́į́h, dóó dashiinohdlą́, áko yisdánádahidoohkááh.

35 Áádóó kʼad, shikʼéí ayóí ánihííníshʼníinii, díí kótʼéego saad bee nihichʼįʼ haasdzíʼę́ę tʼááʼaaníigo, dóó Diyin God tsʼída akéeʼdi yoołkáłígíí biyiʼ bibee ádziil binahjįʼ dóó ayóó átʼéii binahjįʼ, díí tʼáá aanínígíí nihił ííshją́ą́ íidoolííł, dóó díí tʼááʼaaníigo daʼ álíleego ndaʼanishígíí nidahaaztʼiʼ?

36 Éí doodagoísh Diyin yá ndaalʼaʼí nihokááʼ dineʼé baʼáłchíní doo yichʼįʼ ííshjání áńdaʼdiilʼįįh da silį́į́ʼ? Éí doodagoósh Iiʼ Sizį́ Diyinii bibeeʼádziiliísh yitsʼą́ą́ʼ tʼą́ą́ʼ yótąʼ ńtʼę́ę́ʼ? Éí doodagoósh éí ákódoonííł, tʼáá oolkił bá hazʼąąjįʼ, éí doodago nahasdzáán tʼah dah siʼąągo, éí doodago bikáaʼgi diné tʼááłáʼí yisdádooltéeł ndi?

37 Áko shooh ánihidishníigo éí, Ndagaʼ; háálá oodląʼ tʼéí binahjįʼ álílee bee naʼanish; dóó oodląʼ binahjįʼ Diyin yá ndaalʼaʼí diné yaa ńdaakah dóó yíká anájah; ákohgo, díí ndahaaztʼiʼ silį́įʼgo nihokááʼ dineʼé baʼáłchíní doo bá yáʼátʼééh da doo, háálá éí éí doo daʼóodlánígíí biniinaa, dóó tʼáá ałtso tʼáadoo biniyéhé da dooleeł.

38 Háálá Christ bizaad bikʼehgo, éí diné doo łaʼ yisdáńdoodáał da, tʼáá hazhóʼó bízhiʼ dayoodlą́ągo tʼéiyá; ákohgo, díí niʼ ádáádzaago daatsʼí, oodląʼ ałdóʼ ninítʼiʼ doo; tsʼída doo yáʼáshǫ́ǫgo diné bił hazʼąą doo, háálá nináʼályá doo bá ahóótiʼgóó ályaa nahalin doo ńtʼę́ę́ʼ.

39 Ákondi shooh, shikʼéí ayóí ánihííníshʼnínii, shí éí doo ákódadoohníił da nisin, háálá joobaʼ danohsinígíí biniinaa Christ deinohdlą́ nisin; háálá doo deinohdlą́ą́góó éí bisodizin yee dah deíkáhígíí anohtahgo doo bíínóhghah da dooleeł.

40 Áádóó nááná, shikʼéí ayóí ánihííníshʼnínii, biká ił chohooʼínígíí bee nihichʼįʼ hadeesdzih. Haash yitʼéego éí oodląʼ hwee hodooleeł, tʼáá hazhóʼó biká hoł chohooʼį́ hwiiʼ hólǫ́ǫgo tʼéiyá?

41 Áádóó haʼátʼíísh éí biká nihił chohooʼį́į doo? Áko shooh ánihidishníigo éí Christ nihibąąhági átʼéii yikʼé nináʼnídláhígíí dóó nááhiinaʼígíí bibeʼadziil binahjįʼ, nihídóʼ ahoolʼáágóó iiná biyiʼjįʼ náádahiinohnáá dooleeł éí biká nihił chohooʼį́į doo, díí éí deinohdlánígíí biniinaa éí yee ádeihaadziʼę́ę bikʼehgo.

42 Ákohgo, diné beʼoodląʼ hólǫ́ǫgo éí ałdóʼ bił chohooʼį́į doo, háálá oodląʼ tʼáá géedgo éí biká chohooʼínígíí ádin doo.

43 Áádóó nááná, áko shooh ánáánihidishníigo doo éí oodląʼ dóó hoł chohooʼį́į da doo, tʼáá hazhóʼó haa hojoobaʼgo, dóó hajéí joobaʼ íinízingo tʼéiyá.

44 Díí ákótʼéego, hweʼoodląʼ dóó hoł chohooʼínígíí éí tʼáadoo biniyéhé da, háálá Diyin God bidááhdóó éí doo bił nilíní da, tʼáá hazhoʼó haa hojoobaʼgo, dóó hajéí joobaʼ íinízingo tʼéiyá bił jílį́į dooleeł; dóó Iiʼ Sizį́ Diyinii bibee ádziil bee Jesus éí Christ átʼį́ níigo, éí éiyá diyingo ayóóʼóʼóní bee hólǫ́ǫ doo, háálá diyingo ayóóʼóʼóní doo bee hólǫ́ǫ́góó éí tʼáadoo nilíní da; ákohgo diyingo ayóóʼóʼóní bee hólǫ́ǫ doo.

45 Áádóó diyingo ayóóʼóʼóníinii éí nízaadgóó haʼólní, dóó éí joobaʼ, dóó doo oołchʼį́įd da, dóó doo ádaa haʼniih da, dóó doo éí áchą́ ádeilnáa da, dóó doo ndi bá háchįʼ da, dóó doo yáʼáshǫ́ǫgo ntsídaakees da, dóó bąąhágiʼ átʼéii doo yaa bił honeeni da, ndi éí tʼááʼaaníinii yaa bił hózhǫ́, dóó tʼáá ałtsoní yichʼįʼ bidziil, dóó tʼáá ałtsojįʼ oodlą́, dóó tʼáá ałtsojįʼ bił chohooʼį́, dóó tʼáá ałtsoní yichʼįʼ haʼólní.

46 Ákohgo, shikʼéí ayóí ánihííníshʼnínii, diyingo ayóóʼóʼóníinii nihee ádingo éí tʼáadoo nohłíní da, háálá diyingo ayóóʼóʼóníinii éí tʼáadoo yiʼoh neelʼání da. Ákohgo, diyingo ayóóʼóʼóníinii yéego yínítąʼ, háálá éí éiyá tsʼída aláahdi átʼé, háálá tʼáá ałtsoní éí yiʼoh daneelʼą́ą dooleeł—

47 Ákondi diyingo ayóóʼóʼóníinii éí Christ beʼayóó óʼóʼní doo bąąh chiní átʼé, áádóó éí ahoolʼáágóó dinaʼii átʼé; dóó tʼáá háida akéeʼdi yoołkáałdi bee hólónígíí, éí tʼááʼaaníí bá yáʼátʼééh dooleeł.

48 Ákohgo, shikʼéí ayóí ánihííníshʼníinii, tsʼídá tʼáá átʼé adziil nihijéí biyiʼ hólónígíí bee nihiTaaʼ nilíinii bichʼįʼ sodadoołzin, háálá díí ayóó óʼóʼní nihiyiʼ hadidoobį́į́ł, tʼáá aaníí biYeʼ Jesus Christ yikééʼ naazínígíí yee yikʼidajisdliʼę́ę; háálá nidóʼ Diyin God baʼáłchíní nílį́į doo; háálá níyáago bígiʼ ádaniitʼée doo, háálá ázhnoolninígiʼ átʼéego deidiiltsééł; háálá díí chohooʼínígíí nihí dooleeł, nihídóʼ doo nihąąh chingóó ánihidiʼdoolnííł bí doo bąąh chinígiʼ átʼáo. Amen.