1 Kʼad shí, Moroni, yáʼátʼééh nisinígíí nááhídéesoh; dóó shikʼéí bichʼįʼ éʼéshłééh, Laman dineʼé; dóó díí éí bił béédahózin doo nisin dį́įʼdi neeznádiin dóó baʼaan naadiin éí biláahgo nááhai ńléí Christ doogááł haʼníigo haʼoodzíʼę́ędą́ą́ʼ dóó wóshdę́ę́ʼ.

2 Áádóó díí haneʼígíí éí bidáʼdinishjeeh, áłtsʼíísígo saad bee haasdzihígíí bee nihichʼįʼ hanáánáásdzííʼ.

3 Áko shooh, díí baa nánihooshkąąh díí deínóhłtaʼgo, Diyin God díí nihichʼįʼ kóyiilaago deínóhłtaʼdą́ą́ʼ, éí díí béédaohłniih dooleeł, ńléí Adam ábiʼdiilyaayę́ędą́ą́ʼdóó wóshdę́ę́ʼ díí haneʼ ńdadooʼą́ąjįʼ éí Diyin Bóhólníihii tsʼídá nihokááʼ dineʼé baʼáłchíní ayóó áyóʼní, dóó tsʼídá yéego nihijéí biyiʼ baa ntsídaahkees doo.

4 Dóó díí shóisoołtʼeʼgo, nihichʼįʼ haasdziihigo éí Diyin God, Hoolʼáágóó nihiTaaʼ nilíinii, Christ bízhiʼ binahjįʼ, jó díí tʼáá aaníí átʼéhígíí baa naʼídídóołkił; dóó nihijéí bee tʼáá aaníí ádóhníigo, índa Christ yinohdlą́ągo, Iiʼ Sizį́ Diyinii binahjįʼ tʼáá aaníinii nihił ííshją́ą́ íidoolííł.

5 Áádóó Iiʼ Sizį́ Diyinii bibee adziil binahjįʼ tʼáá ałtsoní tʼáá aaníinii nihił bééhodoozįįł.

6 Áádóó tʼáá ałtsoní yáʼátʼéehii éí tʼáá ákótʼé dóó tʼáá aaníí; ákohgo, tʼáá ałtsoní yáʼátʼéhígíí éí doo Christ nahjįʼ kwííłʼį́į da, ndi tʼóó tʼáá aaníí hólǫ́ǫgo ííshjání áyósin.

7 Áádóó Iiʼ Sizį́ Diyinii binahjįʼ, éí hólónígíí nihił bééhodoozįįł; ákohgo baa nánihooshkąąh Diyin God bibee adziilii tʼáadoo bikʼijįʼ nohłíní; háálá adziilii, éí nihokááʼ dineʼé baʼáłchíní bedaʼoodląʼígíí yinahjįʼ naalnish, díí jį́ dóó yiską́ą́dóó, dóó tʼáá ákótʼéego ahoolʼá.

8 Áádóó nááná, díí baa nánihooshkąąh, shikʼéí nohłíinii, tʼáadoo Diyin God bibee aʼiilyéii nahjįʼ kódaʼohłʼíní; háálá éí tʼóó ahayóí, dóó éí tʼáá Diyin God bitsʼą́ą́dę́ę́ʼ hólǫ́. Dóó díkwííshį́į́ ałʼąą átʼéego éí haa dahalyé; ndi tʼáá éí Diyin God éí tʼááłáʼígíí tʼáá ajiłtso yee łaʼ hoolííł; dóó díí éí Diyin God biʼIiʼ Sizį́ Diyinii haa dahalyéhígíí hoł ííshją́ą́ ádeileʼ, háká adoolwoł biniyé.

9 Háálá áko shooh, łaʼ éí Diyin God biʼIiʼ Sizį́ Diyinii, bitsʼą́ą́dóó saad bee hódzáanii yee naʼnitin dooleeł;

10 Áádóó náánáłaʼ, éí saad bee bééhózinii neinitin dooleeł tʼáá éí Iiʼ Sizį́ Diyinii bitsʼą́ą́dóó;

11 Áádóó náánáłaʼ, éí oodląʼ tʼáá íiyisíí ląʼígo bee hólǫ́; dóó náánáłaʼ, éí haałtʼé ánáʼoolnííł aa dahalyéii tʼáá éí Iiʼ Sizį́ Diyinii bitsʼą́ą́dóó;

12 Áádóó nááná, łaʼígíí éí bichʼįʼ, ayóó álílee ayóó ádaatʼéhígíí ííłʼį́į dooleeł;

13 Áádóó nááná, łaʼígíí éí bichʼįʼ, tʼáá ałtsoní Diyin bikʼeh áhodooníłígíí yaa halneʼii nilį́į dooleeł;

14 Áádóó nááná, łaʼígíí éí bichʼįʼ, Diyin yá ndaalʼaʼí dóó iiʼsizį́ áká ańdaajahii yooʼį́į dooleeł;

15 Áádóó nááná, łaʼígíí éí bichʼįʼ, saad ałʼąą ádaatʼéego yee yáłtiʼ dooleeł biniyé;

16 Áádóó nááná, łaʼígíí éí bichʼįʼ, saad ałʼąą ádaatʼéii dóó ałʼąą dahólóonii yá ataʼ dahalneʼ dooleeł;

17 Áádóó díí aa halyéii éí tʼáá ałtso Christ biʼIiʼ Sizį́ Diyinii binahjįʼ bee hakʼidahojídlí; dóó íinízinígíí bikʼehgo, éí diné tʼáá ałtso baa dahalyé.

18 Áádóó baa nánihooshkąąh, shikʼéí ayóí ánihííníshʼníinii, béédaohłniih tsʼídá tʼáá ałtso yáʼádaatʼéehii Christ tʼéiyá bitsʼą́ą́dę́ę́ʼ.

19 Áádóó baa nánihooshkąąh, shikʼéí ayóí ánihííníshʼníinii, díí béédaohłniih dooleeł Christ éí adą́ą́dą́ą́ʼ, dóó dííshjį́, dóó hoolʼáágóó, doo łahgo ánááʼníił da, dóó díí tʼáá ałtso bibee akʼihojídlí baa nahosisneʼígíí, éí dadiyin, dóó doo ndahidootʼih da, éí díí nahasdzáán siʼą́ bijį́įjįʼ ndi, doo nááhididoolyéeł da, tʼáá hazhóʼó nihokááʼ dineʼé baʼáłchíní doo daʼoosdląądgóó tʼéiyá.

20 Ákohgo, oodląʼ éí hólǫ́ǫ doo; dóó oodląʼ hólǫ́ǫgo hojoobaʼ hwiindzin hólǫ́ǫ doo; dóó hojoobaʼ hwiindzin hólǫ́ǫgo éí diyingo ayóóʼóʼóníinii ałdóʼ hólǫ́ǫ doo.

21 Áádóó tʼáá hazhóʼó diyingo ayóóʼóʼóníinii nihee hólǫ́ǫgo tʼéiyá Diyin God bił hazʼą́ądi yisdáńdoohdááł; dóó ałdóʼ oodląʼ nihee ádingo éí doo yisdáńdoohdáał da, nááná hojoobaʼ hwiindzin doo nihee hólǫ́ǫ́góó ałdóʼ ndagaʼ.

22 Áádóó hojoobaʼ hwiindzin doo hwee hólǫ́ǫ́góó éí tʼáá íiyisíí haa nahóókaad doo; dóó aa nahóókaad éí bąąhági átʼéii bitsʼą́ą́dę́ę́ʼ nihwiileeh.

23 Áádóó Christ éí tʼáá aaníí kóníigo nihizhéʼé yichʼįʼ haadzííʼ: Niheʼoodląʼ hólǫ́ǫgo éí tʼáá ałtsoní yáʼátʼéehii nihá nisinígíí ádoohłííł.

24 Áádóó kʼad éí tʼáá ałtso nihokááʼ dineʼé bichʼįʼ haasdziih—háadida Diyin God bibee adziil dóó bibee aʼiilyéii nihitahgóó ásdįįdgo, éí éí doo daʼiinohdlą́ dasoolį́ʼígíí biniinaa dooleeł.

25 Áádóó yíi ákóhóótʼį́įdgo, háálá tsʼídá diné tʼááłáʼí ndi, doo yáʼátʼéehgo naaghá silį́įʼgo; éí tsʼídá nihokááʼ dineʼé baʼáłchíní doo bá yáʼátʼéeh da dooleeł. Háálá tsʼídá tʼááłáʼí ndi yáʼátʼéehgo naagháago, éí Diyin God bibee adziil dóó bibee aʼiilyéii yikʼehgo naalnish dooleeł.

26 Áádóó yíi háíshį́į́ díí nahjįʼ kodajiilaaígíí dazneeznáago doo há yáʼátʼéeh da dooleeł, háálá bibąąhági ádajitį́įgo dazhneezná, dóó Diyin God bił hazʼą́ądi yisdánáhizhdookahgo éí doo bíighah da; dóó díí éí Christ ánínígíí bikʼehgo yáshtiʼ; dóó doo éí shiyoochʼíid da.

27 Áádóó nánihooshkąąhgo ánihidishní, díí béédaohłniih; háálá tsxį́įłgo bichʼįʼ hoolzhish díí doo shiyoochʼídígíí nihił béédahodoozįįłjįʼ, háálá Diyin God bibee ánihwiitʼaah dasitą́ądi dashiidoołtsééł; dóó Bóhólníihii Diyin God ánihididooniił: Nihichʼįʼ haasdzíiʼ neʼ yaʼ, díí diné nááyíizo neʼ, daneeznánée bitahdę́ę́ʼ diitsʼaʼ nahalingo, aooʼ, índa łeeyiʼdę́ę́ʼ yáłtiʼ nahalingo yaʼ?

28 Díí bee yáshtiʼ náasdi ádahodoonííł haʼnínée biʼdoolnííł biniyé. Áádóó áko shooh, Diyin God hoolʼáágóó hólóonii éí bizééʼdę́ę́ʼ yee hadoodzih; dóó bizaad éí oochííłdę́ę́ʼ dóó oochíiłgóó yéego diitsʼaʼ dooleeł.

29 Áádóó Diyin God nááházooígíí tʼáá aaníinii átʼéego, nihił ííshją́ą́ íidoolííł.

30 Áádóó nááná baa nánihooshkąąh Christ baa hohkááh, dóó aʼiilyé yáʼádaatʼéehii tʼáá ałtso daołtsóód, dóó doo yáʼáshóonii aʼiilyéhígíí bídadohłchid lágo, dóó bąąhági ádaatʼéhígíí ałdóʼ dooda.

31 Áádóó chʼéénídzííd, dóó łeeshtahdóó ńdiiʼnééh, O Jerusalem; aooʼ, dóó niʼééʼ nizhónígíí biih nínááh, O Zion bichʼéʼé nilíinii; dóó hoolʼáágóó níbaal bá anídaalkałígíí daniłdzilgo ádanileʼ dóó hótsaago áhólééh hoolʼáágóó, áko doo nihił náádahalą́ą da dooleeł, áko Hoolʼáágóó nihiTaaʼ nilíinii nił ahaʼdeetʼánée, O Israel bighandóó danohłíinii, éí biʼdoolnííł.

32 Aooʼ, wóshdę́ę́ʼ Christ baa hohkááh, dóó binahjįʼ hadanołtʼéego adanihiʼdilneʼ, dóó bąąhági átʼéii átsʼádahidohtʼaah; dóó tʼáá aaníí bąąhági átʼéii atsʼádahisidohtʼą́ągo, dóó niheʼadziilii, dóó nihintsékees, dóó tʼáá átʼé bee, nihiDiyin God ayóí íínóhʼníigo, áko éí bibee ajoobaʼ nihikʼéstiʼ doo, áko bibee ajoobaʼ binahjįʼ Christ biiʼ hadanołtʼéego ánihidiʼdoolnííł; dóó Diyin God bibee ajoobaʼ bee Christ biiʼ hadanołtʼéego ánihiʼdiilyaago, éí tsʼídá Diyin God bibee adziilii doo yidoohdląąłígíí doo nihá bíighah da.

33 Áádóó nááná, nihí Diyin God bibee ajoobaʼ bee Christ biiʼ hadanołtʼé ánihiʼdiilyaago, dóó beʼadziilii doo nahjįʼ kódaahłéehgo, áko índa Diyin God bibee ajoobaʼ bee Christ biiʼ hadanołtʼéego ánihidiʼdoolnííł, Christ bidił deeznaʼą́ą biníkááʼ góneʼ, díí éí nihiTaaʼ nilíinii ahaʼdeetʼánée biiʼ nihibąąhági ádaatʼéii baa nihaa ńdadidootʼááł, áko doo nihąąh chingóó, dinohyin dooleeł.

34 Áádóó kʼad tʼáá ánółtso, hágoóneeʼ, nihidishní. Hodíinaʼgo Diyin God bikéyah hózhǫ́ǫdi yah ánídeeshdááł, shiiʼ sizíinii dóó shitsʼíís ahíináátʼáazhjįʼ, dóó yá biyiʼ ayóó áníshtʼéego nihaa deeshááł, ayóó átʼéii Jehovah bibee ánihwiitʼaah dasitáanii hózhǫ́ǫdi bidááhdóó náánihiideestsééł, éí dahinánígíí dóó daneesnánígíí tʼáá áła Hoolʼáágóó Ánihwiiʼaahii nilį́. Amen.